[صعب^المنال]

الحقيقه احد اقربائي نقلي هالخبر قبل قليل وهو صدمه صراحه مستشفى اهلي يعامل المراجعين بالشكل السيء هذا وش تركو للمستشفيات الحكوميه السالفه الرجال زوجته راجعته قبل اسبوعين تقريبا وكتبت له طبيبه عندهم اجازه الرجال راجعهم يبي تقرير وبعد كذا طلبو منه طلب تقرير من جهه عمل زوجته جابه لهم وطلع على اسا س انهم يتصلون عليه اذا انتهى التقرير وطنشوه اسبوع وراجعهم اليوم على اسا ياخذ تقرير الاجازه ولما جا ياخذه وجد انهم مخطئين بالتقرير وطلب التعديل الطباعي بالتقرير وبعد مداولات واجتماعات بين الموظف محمد المرشود والموظفه فلانه لم يفعلو اي شي يذكر حيال تقرير فطلب
المراجع اسم الموظف للذهاب الى مدير المستشفى وحل الموضوع وديا رفض الموظف المكذور اعطاء اسمه ( غريبه اول مره اشوف موظف يرفض اعطاء اسمه لمريض مع العلم انه من حقوق المريض هالشي ) وقام بتمزيق التقرير الطبي بالله هذا تصرف من موظف في مستشفى اهلي اجل العالم تجي تدفع فلوس وتعامل بهالشكل المزري (يالبا مستشفى الحبيب يدلعونك من اول ماتدخل من الباب) لكن مصخره القصيم الوطني لاتعليق ؟؟؟؟ هذا والمصيبه العظمى ياجماعه والله غير كلام قريبي بعد انا رحت وشفت بعيوني تحس انك داخل صاله عرض ازياء الموظفات حجاب كيف الحال تغتيرات وبناطيل ضيقه وميك اب فول ابشن ( حشا رايحات عرس ) اتمنى ان يرتقى هالمستشفى بمنطقه القصيم الي يحمل اسمها ويحافظ على حقوق المرضى والمراجعين والا الحبيب ترا فاتح بواباته والله الحبيب ناس مثقفه

وتقبلوا تحياتي

[قانون السيطرة]

أخـي صعب .. أراها دعوة مناسبة جميلة لذلك المستشفى لكي نشاهد تلك الحسناوات والميك آب على قولتك .!

كيما ينجح أي مشروع في الحياة .. عليك بوضع لافتة وردية وإن كانت قضبانها الخافية متصدية .
وفتاة استقبال فائقة البياض والرقة .. وإن كانت تضاريسها الخافية ... قبيحة !!


شوووووووكرن

[صعب^المنال]

اخي قانون يعطيك العافيه اسعدني ردك (عليك بوضع لافتة وردية وإن كانت قضبانها الخافية متصدية )



تقبل تحياتي والفكره نبي شي يرتقى لراحه المرضى مو كرنفال ميك اب

[ولد الذيب]

إيه مراح ينجح ابد القصيم الوطني داام هذا شغله وانا مابعد شفته بس نقول إنا لله وإليه راجعون

[الابجل]

انا لله وانا اليه راجعون

[Evening_bird]

مادري احس ان كلامك فيه زيادة وعمل دعاية لمستشفى الحبيب

تحياتي لك

[صعب^المنال]

اخ ايفننق ماسوي دعايه للحبيب ولا شي يالغالي بس من حرتي من تصرفاتهم وانت روح وشوف بنفسك واحكم يالغالي والله لايوديدنا لا للحبيب ولا غيره ويشفينا ويشفى مرضى المسلمين ويعيش مركز حينا الصحي اصرف منهم كلهم وقل بعد اسوي دعايه لمركز حينا الصحي تراه بلاش ومن الوزاره


تقبل تحياتي

[ابو خالد الشمالي]

معليش اخوي الله عرفناه بالعقل ماشفناه وبعدين حدث العاقل بما يفقه انت تقول ان الموظف قام بتمزيق التقرير طيب حلو ماختلفنا ..!! بس قريبك اكيد مسوي شي خلا الموظف يقوم بهذا الشي ( والنار ماتدخن بدون نار ) ..
وبنسبه للاخون اللي رادين على موضوعك هدام الله المفروض يتأكدون من الخبر مو يردون ولا يتقصون للحقيقة ( مع الخيل ياشقرا ) .. انا السراحه ما أزكي قريبك ولا الموظف مع العلم اني والله ماعرفة بس حنا ملينا من العالم الدايخه اللي تجي تهايط بالمنتديات بأسباب غير واضحة وتافهة ويشروحون وضعهم قدام الناس وكأنهم الضحية واغلاب العالم اللي اتكلم عليهم يمشون بمقولة ( ضربني وبكى وسبقني وشتكى ) وبعدين انت جاي تقول مشكلت قريبك والا تسوي دعايه للحبيب والا جاي تشهر بالموظفات المستشفى .. الله يهديك بس وياليت تتصل على قريبك وتقول له ليش الموظف مزق التقرير على شان تحطنا بالصورة يابو فضيحة ..

[ابوعبدالعزيز الودع]

مادري احس ان كلامك فيه زيادة وعمل دعاية لمستشفى الحبيب

هولاء نحن بعض اهالي بريده اذا حصل مشكله لو صغيره الغينا كل الايجابيات وركزنا على السلبيات فقط والدليل ان الكثيرين يسبوا المستشفيات الحكوميه ولاهليه

[**الحياة كلمه**]

اقتباس المشاركة الأساسية كتبها صعب^المنال اقتباس الحقيقه احد اقربائي نقلي هالخبر قبل قليل اقربائك!!<< ايقاله موب انت؟؟ متى امداك تنزل الخبر والا انت من الي اياهم<<؟؟ اقتباس وهو صدمه صراحه مستشفى اهلي يعامل المراجعين بالشكل السيء هذا وش تركو للمستشفيات الحكوميه وين الصدمه؟<<رفرف والا واجهيه اقول فك الله عيينك؟ اقتباس السالفه <<الشرهان على غفله اقتباس الرجال زوجته راجعته قبل اسبوعين تقريبا وكتبت له طبيبه عندهم اجازه الرجال راجعهم يبي تقرير وبعد كذا طلبو منه طلب تقرير من جهه عمل زوجته جابه لهم وطلع على اسا س انهم يتصلون عليه اذا انتهى التقرير وطنشوه اسبوع وراجعهم اليوم على اسا ياخذ تقرير الاجازه ولما جا ياخذه وجد انهم مخطئين بالتقرير وطلب التعديل الطباعي بالتقرير اقول ياخ اساس! الحاجة لك من المفروض انك انت الي تراجعهم اقتباس وبعد مداولات واجتماعات بين الموظف محمد المرشود والموظفه فلانه لم يفعلو اي شي يذكر حيال تقرير اما مداولات فكثرلي منه شكلك متابع جيد لقناة الجزيره اقتباس فطلب المراجع اسم الموظف للذهاب الى مدير المستشفى وحل الموضوع وديا رفض الموظف المكذور اعطاء اسمه ( غريبه اول مره اشوف موظف يرفض اعطاء اسمه لمريض مع العلم انه من حقوق المريض هالشي ) وقام بتمزيق التقرير الطبي :050 شلون تجي ذي وش التناقض ذا؟ رفض يعطيك اسمه ومزق الورقه بعد ؟؟ اقول خلك ابضاي وقول وش انت مسوي يالله اعترف اكيد امبزوط والرجال ماعنده لف ودوران اقتباس : بالله هذا تصرف من موظف في مستشفى اهلي اجل العالم تجي تدفع فلوس وتعامل بهالشكل المزري الناس تحترم نفسه قبل تدفع موب تشري احترام الناس بفلوسة!! وبعدين ماحصل هالشي الي تقوله الا وانت الي متسبب لنفسك واكبر دليل انك جاي هنا ومشهر بالعالم وحاطها بقريبك الي هو انت خخخخخخخخخخ اقتباس (يالبا مستشفى الحبيب يدلعونك من اول ماتدخل من الباب) لكن مصخره القصيم الوطني لاتعليق ؟؟؟؟ انت ماقلت لنا وش مسوي بس انا متاكد لو تسوي الي سويته عند الحبيب بيصيرمستشفى البغيض!! اقتباس هذا والمصيبه العظمى ياجماعه والله غير كلام قريبي بعد انا رحت وشفت بعيوني هاه؟ تقل بدا يعترف انه هو !! اقتباس تحس انك داخل صاله عرض ازياء الموظفات حجاب كيف الحال تغتيرات وبناطيل ضيقه وميك اب فول ابشن ( حشا رايحات عرس ) انت رايح تراجع والا تقزقز ببنات خلق الله اقتباس اتمنى ان يرتقى هالمستشفى بمنطقه القصيم الي يحمل اسمها ويحافظ على حقوق المرضى والمراجعين يرتقي <<بالراس والا دبل كيك ؟<هع هع اقتباس والا الحبيب ترا فاتح بواباته والله الحبيب ناس مثقفه اي والله وانا اشهد بس مع اشكال الي (يقربلك) مااعتقد !! اقتباس وتقبلوا تحياتي تحياتك والا تحيات قريبك!!

من الصعب نصدق ان موظف يسئ للمنشئه الي يعمل فيها ويرتكب الي تقول عنه
بدون سبب واضح وانا لااتحيز للموظف واقسمبالله بأني لا اعرفه بس الحق يقال وكلامك مبهم ومتناقض ومردود عليك لكذا سبب:
اولا-شلون تقوله ابي اسمك ويرفض وانت ذاكر الاسم
ثانيا-تبينا نصدق انه مزق الورقه كذا من الباب للطاقه وانت عييناتك طايره
ثالثا-تسوي دعايه لحبيب <<شكلهم يعلمونك اساميهم اول ماتقبل عليهم
رابعا-جاينا جميع ماندري هل تشكي الموظف او تمدح الحبيب اوتنقد لبس الموظفات؟؟؟؟
نبي جواب نهائي؟



مخرج
ماكل مايقال يصدق

[ضايق الصدر]

عاد فضيحه !؟

قلنا فن التشويق بس مب بهالطريقه

عموما انا مازرت ولا واحد منهن وان شاء الله مازورهن ,

وماتشوفون شر ,,

[حبة فستق]

* الحياة كلمة *

يا حبي لك بعد
هذا الكلام !!

[أحن امرأه بالعالم]

صعب الواحد يحكم على المشكله من سماع طرف واحد؟؟؟؟؟؟

[أبوميس]

سمعت أن رجلا أتى إلى عمر بن الخطاب رضي الله عنه شاكيا يشتكي من رجلا قد أفقده عينه أي (فقع عينه) فكان رضي الله عنه حكيما متريثا في مثل هذه الأمور فما كان منه رضي الله عنه إلا أن أمر رضي الله عنه بإحضار ذلك الرجل قائلا : أحضروا ذاك الرجل فربما فقد عيناه الاثنتان يعني ظنا منه أنه ربما يكون ذاك الرجل مظلوما فليس المظلوم من يشتكي أولا - ولابد من تقصي الحقيقة والتريث والسماع من كلا الطرفين فسئمنا من الإشاعات والروايات التي لاتستند إلى دليل والمعروفة بـــــــ مصطلح: - حدثني من أثق به -فقد مللنا من سماعها فهي قد تخدم أصحاب الأهواء والدجالين وتحقق أهداف من به شر لتحقيق مصالحهم الشخصية وتعرفون حادثة الإفك التي أتهمت بها عائشة رضي الله عنها زوجة رسول الله صلى الله عليه وسلم من رؤوس المنافقين وأنزل الله براءتها في كتابه -وقد إختبر الله فيه قلوب المؤمنين وآخر الإشاعات هي: مكائن الخياطة فصدق من صدق وتضرر من تضرر فمن كان الضحية ؟؟؟ وقيسوا على ذلك إشاعات وروايات كثيرة بأشكالها ومواضيعها المختلفة -فلا تصدقوا ولاتكذبوا ذلك ولا تروونها لمن جالسكم أصلحني الله وإياكم والسلام .