[الجندي المجهول]

مقارنهه بين أطفال الناس الهاي و ورعانا المحترمين
أطفال الناس الهاي
1- في الصباح حيث يبداء يوم أطفال الهاي عندما يستيقظ على صوت
الكناري اللي بغرفته بعدها يتوجه للحمام يتروش ويفرش أسنانه ويطلع
من الحمام تستقبله المربية بالمنشفة وتصبح عليه يروح يغير ملابسه
و يا خذ شنطته وينزل لغرفة الطعام ويصبح على الماما والبابا و أحلى
بوسه ياخذها منهم ويفطر ذاك الفطور طبعا عبارة عن كرون فلكس
أبو ديك بالسكر وبيضه وحده بس عن التخمة وكاس عصير جريب فروت
( المعذرة ما أعرف أسمه لأني مش منهم ) وشويت زبدة مع العسل
على خبزه توست ما عمري شفتها.
بعدين يقوم يغسل فمه ويودع الماما والبابا ويتوجه لسيارة يلقى قدامه السواق مبتسم ويفتح له الباب ويودية لمدرسته الخاصة< أم الدراهم >
وورعانا المحترمين
ورعانايقوم الصبح بعد ما يطلع عين أهله ولازم أفراد العائلة تمر عليه
علشان تصحيه وكل واحد وطريقته:
الأب:قم جعلك الهزل
الأم:قم جعلك الجدري .
الأخ : والله إذا ما تقوم لفقع وجهك
أخته : تسوي نفسها بتدلعه ( الله يخليك قوم وأعطيك شنطة أخوك تروح فيها
للمدرسة وتراه مرتب كتبه من أمس ) . ما درت أن أخوه بالصف الأول وهو بالصف الخامس بعد ما يقوم يمر الحمام على السريع ويغسل وجه شطف ( بس الخشه ) هذا إذا راح وبعدين ياخذ اقرب كتب عنده ويربطها ويجيك مدحدر يدور الفطور ويتفاجاء انهم ما حطوه؟؟
بعد الصراخ ( يقالة مهتم بوقت المدرسة ) يحطون الفطور وهو كالعادة : فول +شكشوكه +تميس + حليب أبو علم يبدأ الورع بالأكل وشوي إلا وهو حاذف أخوه بعلبة الهندسة؟؟؟علشان أخوه الصغيرسحب صحن الفول من عنده مسكين ما يطوله وشوي إلا وهو مسدد بقس يمشي 2000 لأخوه الثاني لأنه سرق فسحته؟؟أبوه يتكلم معه (يا ورع أركد وافطر وعين خير أنت وش بلاك مهبول ) و راكم مدرسه يرد الورع عليه: أنت ما تشوف سعيدان سرق فسحتي؟؟
< سعيدان اكبر سروق بالبيت >>
أبوه على طول يصدق ويصـــــــك سعيدان كف مبروم .سعيدان مايدري وش الي صار ويقول هذي شنطتي أنت بالصف الأول ياخبل؟.
المهم بعد ما يخلص الفلم اليومي يروح الولد للسيارة يلقى أخوه فاتح الكبوة ويصب ماء من الهوز بالرديتر المشقوق تقفل أخلاق الورع وينقز للشارع ويأشر لأقرب سياره ويروح للمدرسة طبعاً (مدرسة حكومية) مش حب للمدرسة لكن مواعد الشباب هوشة بالفسحة .
أطفال الناس الهاااااي
2- بعد المدرسة يرجعون أطفال الهاي ويلقى المربية في استقبالهم
تاخذ الشنطة وتوديها لغرفته بصحبته يغير ملابسه ويغسل وجهه ورجليه ويستريح له ساعة في انتظار أفراد العائلة عشان يتغدى وبعد الغداء
الرايق طبعاً ما اعرف وشو بس اللي اعرفه انهم يأكلونه بشوكه وسكين
يروح لغرفة الجلوس ويشرب شاهي أخضر صيني ويحلي بقطعة كيك (مستورد)وبعدين يروح لغرفته ينام له ساعة قبل العصر.
و رعاااانا المحترمين
أما الورع منهم يجي من المدرسة وثوبه قالب لونه بني< تقول جدار مقبرة >>
ولا دخل البيت حذف الشنطة بالصالة و فصخ ثوبه ووينك ياشارع أخوياه يحترونه وهاتك يالعب كوره بهلقايله وحافي وطبعاً الشارع مولع من الحرارة وهم عادي ولا كأنه فيه شيء وأهله ما يدرون ؟؟ هو جاء من المدرسة ولا (لا)
في هذه الأثناء يرسل أبوه كتيبه من أخوانه للبحث عنه ولا لقوه وجابوه
للبيت قام يصيح طقوني وسحبوني قدام الناس .(والله ما أحد لمسه النصاب)
المهم يحطون الغداء (معروف يا كبسة لحم ولا مشخول دجاج يارز أبيض مع سمك من النوع الرخيص ) غيره ما فيه يتغدى الورع الكريم ويصــــــــــــــــــك بعدها لتر للبن بعدها يجلس ساعةفاتح أثمه تقل (سعلو) تحاول تسكر أثمه أنسى يحتري من يوديه يغسله إيدينه ؟
أطفال الناس الهاااااي
3- أطفال الهاي لا جاء العصر جابو دروسهم وشافوا وش عليهم من واجبات وحلوها وحضروا دروس بكره بمساعدة الماما والبابا.والمدرس الخصوصي
بعدها يروح لغرفة الألعاب ويجلس على البلي ستيشن (2) وخذ لعب لمدة ساعتين تقريبا يعني الوقت ما بين المغرب والعشاء.
بعدها تطلبه أمه مع بقية إخوانه عشان يجتمعون ويشربون العصير ويسولفون سواليف مررررررررررره حلوه.


ورعاااانا المحترمين
يجي وقت العصر وهو نايم طبعاً من مفعول اللبن يقوم قبل المغرب وياخذ دروسه وواجباته وأقلامه ناسيها في درج طاوله المدرسة ويروح عند أخته ويتحايل عليها بكل ما أوتي من قوه علشان تحل له الواجبات و إذا قالت (لا) ياويلها يا سواد ليلها بعد هذه المذكرة العجيبة أنواع الدجه مع ورعان الحارة ومن هم على شاكلته ما يخلون هندي إلا وسرقوا سيكله ولا دكان إلا ولعبوا بحسبته ولا رجع البيت على الساعة (11 ) تقريباً تلقى رآسه (مفلق) كله دم من جميع الاتجاهات والشرطة تدوره وجارهم مسوي إعلان عليه مطلوب حي أو ميت!! وخذلك عاد مساكين أهله.
أطفال الناس الهاااااي
4- أطفال الهاي بعد ما يتعشى ويمسي على أهله يروح لغرفته ويجلس
على الإنتر نت ساعة يبحث في الرماجع ساعة والمسنجر للمثلة ساعة إلى موعد نومه الساعه (10 ) تقريبا
بعدها يغير ملابسه وتجي المربية وتحكي له قصهمن قصص ألف ليلة وليله وإلا ملكة الثلج والأقزام السبعة ألين ينام و تغطيه وتطفي النور.
ورعاااانا المحترمين
لا رجع البيت الساعة (11( ما يدخل مع الباب لا ينط من فوق السور على شان أبوه ما يمسكه .وعلى طول (يزبن) بغرفته ويطرف الباب ويطفي النور ويطل من الدريشة على باب الشارع الرئيسي يشوف وش صار على
مسلسل المشاكل (الي مثل أفلام هلي وود) واللي جابها معه للبيت وكيف يحلها أبوه مع الناس ومع جارهم ومع الشرطة وفي أثناء ذلك يستغل الفرصة ويتسحبل للمطبخ ويسرق علبة جبن ( ابو ولد) أو جبنه البقرة الضاحكة
وخبزه ويرجع لوكره غرفته ويقفل باب الصندقة أقصد الغرفة ويتعشى وهو متغطي بالشرشف و المخده كلها (سعابيل) من الجبن والخبز الي سرقه اللين يدوخ على الساعة (3) الفجر وينام نومة مغمي عليه بدون طبعاً تغسيل وأزيدكم من الشعر بيت ما ينام إلا وهو متلطم ؟ على باله مراقب.
اتمنى أن يعجبكم هذا الوصف الفريد للمقارنة
واللـــه الموفق



منقول من أحد المنتديات وقد تم إدخال بعض التعديلات

[الكـنـكـورد]

ههههههههههههههههههههههههههههههه

تسلملي ياجندي يامجهوووووووووووووول

وصف جميل...............................

[الشجاع]

هههههههههه
هههههههههههه

مشكور
والجمل حيوان بري يصبر على الجوع والعطش أياما.

[الفارس الأصيل]

اخخخخخخخخ اخاخ اخخاخاخخاخاخاخاخاخاخاخخاخاخاخخا


مشكور اخوي

تحياتي

وسلامتك