[رابعة]

انتم للحين تتنااقشون بهالموووضوع..!!!

وبعدين الي يتكلم عن العمر ماقلتلنا البنت وش يصلحلها من اعمار الرجااال..

لان حسابتك يمكن من صالح الرجل لكن ماهي من صالح المراة..

[بريده أم المدن]

عساءان تكرهو شي وهوخير لكم

[عاشق بريده]

اقتباس المشاركة الأساسية كتبها السفير الأمريكي بعد موافقه الخطبه والحمد لله تم المكله تفجئت بعمر البنت 25 سنة او 26 تقريبا هل الوضع عند امي عادي ولاتفكر في ابنها ام شي طبيعي والله يصبرني والله اني في حيره لا يعلمها الا الله سبحانه تعال ؟

اذا كنت صادق فأعتقد ان هذا السن مناسب لان الفتاة تكون ناضجة و تقدر الحياة الزوجية و من ناحية الجمال فهناك نساء في الاربعين و يفقن جمال ذات الخمسة عشر عاما

[مايرا]

الله يعين على الرجال مادري وش يبون بالظبط

بالعكس احسن لك ناخذ وحده فاهمه وعارفه الحياه

مهب مثلي الله يخلف متزوجه صغيره وسنين على مافهمت رجلي

[•°انكسار الأماني°•]

88

يعني ماتدرين وش يبون ؟؟ أقولك ياشيختي وبكل بساطة .
الأغلب من شبابنا يتمنون الزواج من فتيات ماتحت العشرين والسبب ( يلعبون عليهن )
ولكن للاسف الباب أغلق ولاعاد فيه بنت تفكر في مستقبلها بجد تتزوج في هذا العمر .
وإن كنت أقول البنات تغيرن واللحين مايفرق بالتفكير يعني طبيعي يتزوج بالطعشات وتربي أهله من وراه .
لكن هذي أمنيتهم ولن يحققها الزمان لهم وإذا يبون بنات مرخصات أعمارهن فالرخيص تعافه النفس قريباً .


وقبل أن أغادر أقول للأخ على بركة الله //

العنوسة لاأرى فيها عيب بل العيب في الزواج من هؤلاء الشباب المنهارين من كل حدب وصوب .
ولاأظنك تجهل أبناء جنسك وأنت منهم حيث لم يعودوا مناسبين لعقليات فتياتنا الحاضرات .
ولعل الجميع يرفعون ايديهم ويطلبون من الله الفرج وفتح الزواج من الخارج لنتخلص من الأزواج أمثالكم .

,,

[(الفارس الذهبي)]

عليك بالستخارة أعانك الله

[السفير الأمريكي]

انكسار الاماني . اسم على مسمى اتوقع من كلامك ان القطار طاف عليك من كلامك المجرح
والحقد ليسى من صفات المسلم ايتهو الغيورة اجل تبين من تركيا زوج مثل نور او زوج لميس اللي مدري
وش اسمه واتوقع لو فتحو الباب احنا الشباب اول من يتزوج وعذورني على رد هذة الغبيه

[*عزيزة نفس*]

اقتباس المشاركة الأساسية كتبها السفير الأمريكي انا عمري 29 سنه تمام .

وهي عمره ((25))حلووووو اخوي مافيهاشي
بالعكس احسن لك
وبعدين العمر مومهم اذا كنت مرتاح لها ومعجبتك
توكل على الله واستخر
والله يوفقك

[•°انكسار الأماني°•]

,,

صدقت يالسفير أنا عمري 30 وستة أشهر وتسعة أيام وثلاث ساعات .
ومع ذلك ماراح أتزوج إلى الأبد ماكو أحد يستاهل .
خل القطار يفوت هذا قطاركم ونبقى بغنى عنه .
وخذها نصيحة تزوج من برا والله يسعدك .
شخصياً أتمنى تتوجهون للخارج من باب شر وإنزاح عنا .

قال إيش قال قطار بالله الزواج هنا يسمى قطار قل عربجية يمكن مقبولة .

,,

[*عزيزة نفس*]

*

اذكروووووووووووووووووو الله
اللهم اننا صائمين
الدنيا موب واقفه على الزواج
الله يوفق الجميع لمايحبه ويرضاه

*

[الجلف]

ياجماعة انا جاي مصيّيف

بس كل مادخل موضوع القاكم متهاوشين مادري وش القصه ؟؟

انا فهمت من اخر الصفحات لاني ماقريت اوله بصراحه عجز

المهم فهمت ان عمرك 29 وهي 25 اذا هذا صحيح فاقولك

لو انا ماعرفك ولا تعرفن وتوي مسجل المهم اقولك يابعدي

ترى عمره ميه بالميه مناسب لك وخذ من انسان خبير بالزواج

ترى الزواج بوه اشياء اهم من العمر صدقن ولامنك تزوجت تبي تعرف كلامي

المهم خذ مثال النبي عليه الصلاة والسلام تزوج ام المؤمنين خديجه وهي اكبر منه

بسنيين وطبعا الرسول عليه الصلاة والسلام هو القدوة ...


اما انتي يانكسار الاماني ترى الزواج من الاجانب مفتوووووووووح من قال انه ممنوع

بس بسالك وش يبي بك الاجنبي يتزوجك فمثلا دكتور مصري تزوج الفنانه عتاب لانه سعوديه

وبالاخير بعد عده سنوات صارت محاكم وقضايا ومادري وش صار عليهم انقطعت اخبارة

[جولي لانجري]

مبروك
لا يهمك العمر اهم شي الاخلاق
توكل على الله فهو حسبك
موفق

[نجدية حرة]

نحن الشعب السعودي وبالاخص النجدي القصيمي (البريداوي) هو الشعب الوحيد من بين شعوب العالم اجمع اللذي لا يفخر ولا يعتز بنفسه ابدا ومهما فعل شعبة من بطولات لا يعترف بها بل يفخر ويعتز ويطبل ويغني على تفاهات الشعوب الاخرى ويحولها بمزاجه الى بطولات وانجازات!!

كذلك ينطبق الامر تماما في العلاقة بين الرجل والمرأة في مجتمعنا,, هذه العلاقة اللتي لم ولن تتغير للاسف بل انها تزداد سوءا على سوئها!!

احس باليأس حقيقة خصوصا بعد تأكيدكم لهذا الاستنتاج من خلال الردود والنقاشات السخيفة والمستفزة بين الطرفين وكأننا في حلبة مصارعة حرة بين الرجل والمرأة في اي موضوع يناقش او يمرر مثل هذه المواضيع وكل طرف يضمر للآخر شرآ!
فقبل انضمامي للمنتدى كنت متفائلة واحاول اقناع نفسي واللي حوليني بعكس ذلك لكن دون جدوى تعبتوني معاكم بصراحة مسويه فيها مسقط رأسي ومامسقط رأسي!!

ومااظن ان العلاقة بتتحسن في مجتمعنا حتى قيام الساعة!!
من المسؤول عن الفشل الذريع والحقد في العلاقة بين الطرفين رغم اننا من اكثر الشعوب تمسكآ بديننا وتطبيقآ له في رأيكم؟!

اساسا انا وش اللي ورطني بمنتدى بريداوي كنت وش حلاتي مع منتديات حجازية وشرقاوية واماراتيه تحسهم براءة وذوق واحترام واخلاق وادب والله فقدت هذيك الاخلاقيات بصراحة!!

[قناعتي سعادتي]

البركه مقدما ........
والله ياخوي بالنسبه لعمرها مررره مناسب لك ولاهي كبيره بالسن حراام عليك صغيرره وهذا العمر المناسب للزواج وتحمل المسؤليه وعاد انصحك بالاستخاره وتوكل على الله الله يوفقكم ...