[عزوزتي]

اقتباس المشاركة الأساسية كتبها قم قاعد عزوزتي فديك قلبك أنا اقر هالقصه وتبي تستانس لآنه تثبت إن الشعب السعودي بنعمه كبيرة ولله الحمد هههههههه مذكرات سعودي سابق !!! المقدمة : كل ما دقيت في أرضٍ وتد ... من رداة الحظ وافتني حصاة في صباح أحد الأيام الخوالي من 35 سنة تقريباً انطلقت صرخاتي معلنةً ولادة مواطن سعودي غيره ينقص و هو يزودي في ذلك الصباح أبصرت عيناي النور ... و إلا أقول لكم خل أكون صادق معكم شوي ما أبصرت عيوني النور لأن المستشفى كان مظلم بسبب إنقطاع الكهرباء الوالد كان يحب التفائل و علشان كذا اختار لي اسم ( سعد ) ... و كانت الوالدة تدلعني سعد السعود و الوالد يدلعني سعد الذابح أتذكر كان جارنا عنده ولد اسمه يحيى و كان فرحانن به لأنه جاه بعد سنين عجاف ... المسكين كل ما جاه ولد مات لين جاه هالولد وسماه يحيى ، الجار كان دايم يدلع ولده و يغني له ( أسميته يحيى ليحيا ... فلما أشتد ساعده رماني ) <<< واضح إن الجار كان مثقف و الوالد كان عادة يرد عليه و يدلعني و يقول ( أسميته سعداً ليسعد ... تجري الرياح بما لا تشتهي السفن ) مع الأيام بديت أكتشف إن الإسم ما يغير شيء في الواقع ، عندنا واحد في الحارة اسمه ( جمال ) و هو لولا سنونه ما عرفنا وجهه من مقفاه و البنغالي اللي يركب دشوش في حارتنا اسمه ( فهيم ) و هو ما فيه أغبى منه لدرجة إنه راح يركب دش المجد عند مطوع و عرض على المطوع كروت قنوات مشفرة على الهوت بيرد هذا غير إن ( يحيى ) و لد الجيران مات و هو عمره خمس سنوات في حادث سيكل أليم و أنا ياللي اسمي ( سعد ) حتى سيكل ما حصل لي بيني و بينكم واضحة الشغلة ... و إلا كان كل ( سعودي ) صار سعيد طبعاً لكل قاعدة شواذ و الدليل إن السودان ما فيها بيضان أرجع لوضعي أنا يا سعد ... وين سعد معه ؟ و أنا طفولتي مليانة بأنواع الفلوق في الراس و مراهقتي مليانة بالكفوف و شبابي مثل شباب أي شاب سعودي طموح تصوروا إني كنت أتوقع إن جيد يعني ( زين ) و جيد جداً يعني ( زين مرة ) لين تفاجئت يوم خلصت الثنوي بتقدير جيد جداً إن جيد جداً عند الجامعات تعني ( ضف وجهك ) و عند غيرهم تعني ( ما عندك سالفة ) و هالشهادة بهالتقدير مالك إلا تلفها تلفها ثمن تحطها في ... درج الددسن الشهادة بتقدير ( ما عندك سالفة ) ممكن تدخلك بعض الأماكن بشرط يكون ( عندك واسطة ) يوم أكتشفت الواقع المر و إن شهادة الثنوي اللي كرفت علشانها سنين ما تدخلني و لا ملاهي البراجون قررت أنضم لجند الوطن سمعت عن دورة تدريب للدفاع المدني و إنهم بيقبلون 200 شخص الحمد لله أخيراً لقيت مكان ما راح يحتاج لواسطة و لا تقدير فوق ال ( زين مرة ) جهزت أموري و أوراقي كلها في ملف أخضر علاقي و رحت بدري مرة علشان أكون أول المسجلين في هالدورة طول الطريق و أنا أتخيل نفسي بملابس الدفاع المدني و أطفي حرايق أو أنقذ سيارات من السيول أو متكي مع زملائي في المركز و نفطر فول و تميس وصلت الساعة 6 و نصف و كنت متأكد إني بكون أول واحد عند الباب علشان اسلم ملفي أول واحد لكني تفاجئت بالمنظر الميتين وظيفة قدم عليها 7500 واحد و ما طلعت من المقبولين مدري المقبولين أزين مني و إلا أطول مني و إلا اكشخ مني و إلا عندهم واسطة !!! وش السواة يالربع ؟ و ش الدبرة ؟ لا جامعة تقبلني و لا دورات تضفني !!! أشاروا علي الربع إني أدرس دورة كمبيوتر و أدور لي وظيفة عز الله إنهم جابوها ... حنا هاللحين في عصر الكمبيوتر ... عصر السرعة ... عصر الهمبرقر درست دورة كمبيوتر و طلعت بتقدير ممتاز ما عاد لكم عذر يا أصحاب الوظايف .. سعد جايلكم بتقدير أزين من ( زين مرة ) كنت عارف و مستعد نفسياً إن الوظيفة ما راح تجي علطول ... يمكن تتأخر شهر شهرين ... لكني طلعت غلطان أخذت سنتين و أنا أدور وظيفة ... من مكتب لمكتب و من شركة لشركة لكن أخيراً جا الفرج توظفت توظفت توظفت توظفت في شركة بوظيفة ( فني شبكات ) ، الراتب ما كان زين لكن أهم شيء يصير عندي دخل ثابت ينقذني من الديون و أكتسب خبرة و ممارسة و أستفيد جلست لي شهرين في الشغل بدون ما أشتغل شيء أول واحد يجي للدوام الصبح هو أنا و آخر واحد يطلع هو أنا ... بس ما أسوي شيء مدري ليش متوظف أجل !!! رحت لمدير القسم و كان اسمه راجو ... قلت له ( سير أنا ما فيه شغل ؟ ) ابتسم ورد علي ( أنتا سأودي ما يحتاج شغل ) و ضحك شوي ثم كمل ( أنتا نسباا ... معلوم نسباا ) .. طبعاً فهمت من كلامه إني سعودي و إنهم موظفيني علشان نسبة السعودة و بس !!! بس أنا ما سكت له ... رحت لمدير الشركة و كلمته عن اللي صار ... ما قصر الرجال رفع السماعة و كلم راجو و قال له شغلو سعد شغلوه من أول ما رجعت للقسم و أنا مغير كرف صارو يطلبون مني كل شيء ... صرت أسوي كل الأعمال الشاقة و غير الشاقة ... جب طابعة .. و د هالجهاز ... مدد هالكيبلات ... ودع هالأغراض للمستودع ... استانست إني بديت أشتغل ... بس لحظة تذكرت ... أنا متوظف فني شبكات مهوب عامل تحميل و تفريغ !!! كلمت راجو إن هالشغل ما يصلح و إني أبي شغل أستفيد منه ... رد علي بضحكة و قال لي ( أنتا كلام يبقا شغل !!) و مد لي مفتاح سيارته ... قلت له ليش مفتاح ؟ قال لي ( شوف كفر سيارة مبنشر ... روح صلح كفر ) تهاوشت مع راجو و فصلوني بدون حقوق لأني ما قدرت أمسك نفسي و مديت يدي عليه زين إني ما دخلت السجن لأني ما أبي أصلح بنشر سيكل ... قصدي سيارة المدير جلست مع الشباب في استراحة و اللي يشوفني يقول شايلن الدنيا على راسي من الهم ... ما انقهرت بسبب الفصل كثر ما انقهرت من راجو يوم يمد لي مفتاح سيارته و هو يضحك كل واحد من الشباب صار يقترح علي شغلة ... اللي يقول ادخل في التجارة لو بمحل خضار ما يدرون إن لو عندي راس مال يكفي محل خضار ما جلست معهم أصلاً و اللي يقول لي دور واسطة و توظف الحكومة من زيني و زين معارفي هاللحين اللي اكشخ واحد فيهم موظف في 902 و اللي يقول لي بع الكرسيدا و اشتر ددسن و كد في الجح كأنهم ما يعرفون إن البلدية ما تخلي بياعين الجح في حالهم طال الحديث و النقاش حول مسئلة الشغل و طريقة توفير دخل يعيش الواحد ... لدرجة ما بقي الا نفكر نسرق بنك و نحل الموضوع فيه واحد من الشباب كان يقلب في جريدة الظاهر لها سنين مرمية تحت التلفزيون و ما درينا إلا و هو يصرخ يقول ( لقيتها يا سعد لقيتها ) طلع خوينا شايف له إعلان عن سيارات ليموزين بالتقسيط الممل أو ما يسمى الايجار المنتهي بالتفليس هاك الليلة بعد ما رجعت للبيت ما نمت مغير أفكر في فكرة شراء ليموزين تقسيط و أكد عليه .. قلبت الفكرة يمين يسار شمال جنوب ... مالقيت غيرها حل لوضعي ، قررت إني أتوكل على الله و اشتغل على سيارة ليموزين و اللي شجعني أكثر على هالخطوة إني سامع من كم سنة إن فيه قرار يمنع الأجنبي من سياقة الليموزين ( القرار صادر من مجلس الوزراء يوم الأثنين 21-شعبان-1423 ه يعني من سبع سنين عجاف بغيت أحط الرابط بس خفت يقلب الموضوع لتراجيديا من جد ) بديت في الاجراءات و كل اللي في بالي انه خلال يومين ثلاثة تصير السيارة معي ... طلعت الشغلة طويلة عريضة ... لازم بحث و تحري عني علشان يتأكدون إني ما عندي سوابق و لازم عمري يكون فوق 35 سنة و لازم أجيب شهادة من عمدة الحي و من إمام المسجد بعد كملت المتطلبات كلها و كملت السن القانوني و و خلال تسعة شهور كل شيء صار جاهز ... أخيراً صارت السيارة قدام بيتي ... بغيت أطير من الفرح و أول ما ركبت السيارة قمت أضرّب بواري و أغني ( يا سعد جاك السعد ) أول مشوار لي كان توصيل خالتي للمستشفى و طبعاً بدون مقابل خالتي حرمةٍ كبيرة و ما تحب تركب إلا في المرتبة اللي ورا ، تخبرون أيام أول عيب الحرمة تركب قدام المهم وصلتها و رحت لي مشيوير وصلت واحد بخمسة ريال و عبيت فيها بنزيم رجعت لخالتي و ركبت معي و مغير أسولف معها في الطريق و هي تسولف عن الدكاترة و الممرضات و خياس المستشفى و شين نفس اللي في الاستقبال ما دريت الا وراي جمس يأشر لي و يحدني و يوقفني طلع جمس الهيئة وش السالفة ؟ ما سويت شي !!! نزل الشيخ ببشته و معه عسكري كنه مسواك قال لي وقف السيارة و أركب معنا سئلت وش القصة ؟ قال لي مركّب حرمة معك ؟ و مغير تضحك و تسولف معها ؟ تحسبنا نايمين ... حنا جانا بلاغ عن وضعكم من فاعل خير أقسمت له انها خالتي ... قال : لا ياشيخ خالتك ورا ماركبت معك قدام ؟ قلت يابن الحلال هذي عجوز و ما تحب تركب إلا ورا وش أسوي بها قال وش يثبت لنا إنها خالتك ؟ عز الله إني تورطت من جد وش يثبت لهم !!! شكلي رحت فيها قلت ما فيه إلا تسئلونها عن عيارتي و إن عرفتها أكيد إنها خالتي و همست في إذن الشيخ بعيارتي و أنا صغير راح و سئل خالتي ... وش عيارة هالسواق يا خالة ؟ قالت له هوووو هذا مهوب سواق هذ و لد أختي سوير و عيارته ( سعدان ) معيرينه بها من كثر ما يطامر مثل القرد و هو صغير الحمد لله طلعت براءة مثل الشعرة من العجين من بعد حادثة الهيئة صرت كل ما جت حرمة و إلا بنت تبي تركب معي أقولها أركبي قدام بس ما أحد رضى يركب معي و طبعاً تم ترجيم سيارتي بمختلف أنواع القواطي عقاباً لهحركة المشكلة مهيب في الركوب قدام و إلا ورا المشكلة ... إن المنافسة ما كانت عادلة المشوار اللي أطلب مقابله 15 كان خان يطلب 10 و إذا كان الزبون من ربعه يكفيه 5 ... الفرق مهوب بسبب طمعي و لا بسبب كرم خان السبب هو ... خان ما عنده مشكلة ينام و ياكل و يشرب في سيارته .. لكن أنا عندي مصاريف و بيت و مسئوليات يوم شفت الوضع كذا ... قلت خل أشتغل من المطار ... عادة المطار ما فيه حريم لحالهن و هذي تفكنا من الهيئة و عادة مشاوير المطار حلوة لأنها من 50 ريال و فوق صرت أشتغل من المطار بس ماش ما ضبطت الشغلة مع أخوكم سعد أول شي الزباين صاروا يلقطونهم اللي يكدون خصوصي من عند بوابة الوصول مباشرة و بعبارتهم الشهيرة ( سيارة يا الأخو ) أو ( تبا تكس ) و ثاني شي ما أمداني أبدأ أشتغل إلا و هم صاكيني بمخالفة و تعهد لأني أحمل ركاب من المطار و أنا ما عندي ستيكر المطار و الستيكر مدري كم يكلف بس الوكاد إنه فوق استطاعتي رجعت لكد الشوارع و صرت أنزل بسعري مثل أخونا الهندي و إلا الباكستاني ... حيل الله أقوى العوض و لا القطيعة لكن جت مشكلة جديدة لاحظت كثير من الزباين ما يأشر لي و لا يوقفني لأني سعودي .. خاصة الحريم يخافون مني ... أعوذ بالله لو إن فيني عنقز و إذا وقفت و شافتني سعودي تصد عني و تركب مع الليموزين اللي وراي و يسوقه أجنبي الحالة تعبانه يا جماعة ... صرت ما أقدر أسدد أقساط الموتر و البنزيم أضطر أرهن بطاقتي و إلا رخصتي علشان أعبي ، تعبت نفسياً و جسدياً ... أنا ياولد البلد مستعد أشتغل هالشغلة و تتعقد الأمور في وجهي و الغريب مدّهر على كيف كيفه ، أنا يطلبون مني بحث و تحري و حسن سيرة و سلوك و الأجنبي يجيك من ديرته ما تدري وشو مسوي قبل لا يجي و يركب هالليموزين ما أحد يسئله عن شيء ... يمكنه توه طالع من السجن من ديرته .. عادي .... يمكنه يشتغل في الممنوع ... عادي ... يمكنه يجر على ... بكيفه و الأدهى و أمر ... إنا يخافون مني و هو لا و أنا أغسل وجهي هاك الصبح قعدت أطالع وجهي في المراية ... و قعد أسولف مع روحي اللحين وش يفرق عني خان ... أزين مني ؟ أوسم مني ؟ أكبر جبهه ؟ أنظف خشم ؟ أكبر خشة ؟ لحظة لحظة ... اكتشفت إن ملامحي ما تفرق عن خان وربعه كلنا جحلط في هاللحظة خطرت في بالي فكرة جهنمية بتنتشلني من الفقر اللي أنا فيه الفكرة ببساطة إني أصير خان رحت للبطحاء و شريت ملابس من محلات أبو هنود و رجعت للبيت بسرعة و لبست الملابس ... خلاص هذي هي ملابس الدوام ... من اليوم ماراح أركب الليموزين إلا بهاللبس و هالهيئة نحجت الخطة ... ما عاد صار أحد يخاف مني و صارن البنات إذا ركبن معي يسولفن على كيفهن بدون أي إحراج ... لدرجة إنهن أحياناً يذبن علي و على ريحتي و أنا مسوي نفسي ما أفهم شيء بديت أوقف مع سواقين الليموزين الباكستانيين و تعلمت من كلامهم تغيرت لهجتي من كثر تقمص الشخصية و بدت الأمور تضبط معي شوي ... يعني تقدرون تقولون بوادر إنتعاش إقتصادي تتبعه طفرة إقتصادية <<< مشكلة اللي يتابع أخبار الاسهم يا جماعة حركة التنكر رهيبة و حلت أزمات ... ما أقصد أزمتي أنا بس ، أقصد أزمتي و أزمة ربعي بعد بعد ما تبكسنت ( صرت باكستاني ) واحد من خوياي قرر يتبنغل ( يصير بنغالي ) و يشتغل في تركيب الدشوش و برمجة الرسيفرات و خويي الثاني قرر يتهند ( يصير هندي ) و يدف عربيات عند كارفور و آخر واحد من ربعي قرر يتهند بعد و يشتغل في شغلة ( غسّل سيارة صديق ) ... شغلةٍ حلوة و راس مالها سطل و اسفنجة و في يوم من الأيام و أنا ماشي في حالي و مشغل شريط أغاني باكستاني و قفتني دورية قالوا لي إقامتك يا صديق قلت لهم أنا مافي صديق أنا سعودي كرووو الضحكة و قعدوا يذبون علي يحسبوني باكستاني من المعششين في السعودية أصروا على الإقامة و أنا أصريت إني سعودي قالو خلاص يا صديق عطنا بطاقة الأحوال اوووه تذكرت إن بطاقتني عند المحطة و الرخصة بعد عند محطة ثانية قالوا أركب أركب يا صديق بنوديك القسم إن كانك أجنبي فأنت ماشي بدون إقامة و بيجي كفيلك و يستلمك و إن كانك سعودي فتهمتك أكبر ... متنكر بزي أجنبي و بتنرك بالسجن لين تبين نواياك ما يستفاد 1 : سعودي نفر مافي كويس 2- سعودي لازم يغير جنسيه حتى يصير فيه فلوس كتير وسلامتكم للأسف هالقصه تحكي واقع كثير من السعوديين أنا أشهد إنك صدقت يوم قلت إن الدول الثانيه يغبطوننا

ههههههه والله ما قرات سوى بعض ماكتبت وعلى السريع


لكن يبدو إنك متأثر بمسلسل ( التخلف ) والرجعيه 00 طاش 0


تهجم وافتراء على الهيئه وعلى رجال الأمن !! أجل ماتركوك


الهيئه إلا حين عرفو إنك ( سعيدان ) هههههه أقول إلعب غيره


ورجال الهيئه أبطال ورجال حققو إنجازات واحبطو العديد من الجرائم


وأرعبو الكثير من الفاسقين والمفسدين الله يوفقهم ويكفيهم الأشرار 0