[المرجهن]

الأطفال .. أكثر كلمة تحمل معنى البراءة في العالم
لكن هذاك من أول .. بس هالحين مع جيل ماكدونالدز
هاذي الكلمة تعني المعاناة
المراهقة أخبرها من13 إلى 19
لكن هالحين المراهقة من 4 إلى 25
يعني ها البزر يبي يقعد على طبيعه من يوم يبدا يتكلم
إلمين تزوجونه .. والله حالة



المهم .. نبدا في التصنيف إلي توصلت له
و إلي عنده شي لا يبخل علينا
لأن هذا بحث ليس بالسهل .. يبي يترتب عليه دراسات كثيرة ..!!
.
.
.

============================

(1) - البزر البريء ( المخفة ) :
هذا في البيت معك على كيفك
لكن تعال شفه بالمدرسة ولا مع أخوته
مسكين كل يوم يدبجه واحد و يتوطاه إلي يسوى و إلي ما يسوى
و كثيراً ما يعاني هذا الصنف من التشوهات المزمنة
لأنه ما يدافع عن نفسه
و ننصح بإنك تدخله دورة كاراتيه ولا مصارعة ولا إلي متوفر..المهم يفك روحه.


(2) - البزر العنيد :
هذا النوع راسه ياااااااااااااااابس
و لو قلت له " آآآح حار " يروح يلمسه عناداً لك
لكن صدق أو لا تصدق هذا أسهل صنف ممكن إنك تتعامل معه
كل ما بغيت منه شي قل العكس
لا تصلي
لا تشيطن
لا تنقلع
و هو يبي يستجيب لك بالعكس و يبي يسوي إلي براسك
لكن هو يشكل مشكلة لو كان له أخوه بنفس العمر أو قريب منه
لأن يبي يحصل تضارب بفيوزاتهم و بعدين يتحول طفلك إلي بزر متبلد المشاعر و يصير ما يستجيب لك ولا لغيرك ولا لنفسه
و هاذي حالة مهم تتفاداها...


(3) - البزر المادي $$$ :
هذا واحد ما تقدر تعامل معه إلا و إنت عندك شي
يا حلاو يا علك يا رضاعة
و مشكلته ممكن توصل فيه لدرجة إنه ما يروح للحمام ( الله يكرمكم )
إلا و إنت معطيه 5 تريل.. والله النشبه
و هذا بيعاني لمن يدخل المدرسة .. لأنه يتوقع دراهم و حلاو من مدرسينه
و تكبر المشكلة لمين يكبر .. لأنه إذا كبر يبي يطلب أشياء أغلى
و هذا النوع يبي يدج بك
و الأردى من هذا كله لو كان ( مايع )
لو شافك تناظره يقول (( علم أمي عليك ))
ولا لو سرقت السيارة يقول (( و قسم أخلي أبوي يكفخك((
و تصير باستمرار تعطيه و تعطيه
فـ حاول دااااايماً تفقده الوعي عن طريق الضرب المبرح ( امحق من أسلوب )
علشان ينسى إلي صار بعد ما يرجع له وعيه


(4) - البزر المستقوي :
هذا وخرررررررر عنه
بس جاهز كفوف و بكسات و ترفيس
يسوي لك أنواااااع المشاكل مع مدرسته
و آخرتها اذا كبر ماهوب داخل الجامعة
يروح يدور له شغل( عاد وش أنت يالشغل ) من شروطه مايصير به غبرات
ولا يدخل من عنده الهواء حتى
ما يحوس القصيصه.. أمحق من شروط!!
و مشكللللللللة لو كان عنده خوات
لأنه يكلفك اذاسوي بهم تشوهات تتطلب عمليات تجميل
فـ لو جاك هالولد
ارسله للعسكرية من يوم تشوف الحالة بدت عنده


(5) - البزر الدلوووووع :
يووووووه ذا مأسااااااة
تلقى كل الناس يسمونه " دلوع ماما "
لدرجة ان أمه تخيط ملابسها في ملابسه من كثر مايلصق به
لو جت تبي تروح لعرس راح معها .. لو عندها مشوار نشب به
هذا يبدا يسبب مشكلة لمين يصير عمره فوق الـ 15
لأنه يطلع شكله غلط و هو قاعدن بحضن أمه
و مشكلته .. أسلوبه بالصياح
تلقاه 24 ساعة صياااااااح و إزعاااااااااج و قللللللق
على أسباب تافهة
و هذا ينصح في حالته إنك تخيط فمه لأنه يبي يسوي لك أزمة


-6 البزر ( البثر ) :
هذا علشانه اخترعوا المثل ( البزران ما ينعطون وجه )
يجيك يقولك
=وراه النملة ما تطير ؟
-- لأن ما عنده أجنحة !!
= طيب وراه ؟
-- لأنه مهب من الحشرات اللي يطيرن
= طيب وراه ؟
-- لأنها حشرة تمشي بالأرض
= طيب وراه ؟
-- لاحوووووووووول خلاص انطم
= طيب وراه ؟
--
هذا الحل الوحيد إنك تشري خيزرانة ولا عجرا عشان تدبجه و تصفقه كلما مصخها ..
خله يعرف الحق
أو لو كنت إنسان ما تتعامل بالشيل والحط .. فاشتر له كتب
و كلما سألك شي قل له : رح اقر عن الموضوع
و مع الوقت يصير ما يسال .. لأنه متعيجز يقرا


(7) - البزر الداج :
هذا لا عمرك تشيل عينك عنه
هذا نووووع حالته مستعصية مالها حل !!
لو سرحت عنه دقيقة .. تلقاه فتح الباب و طلع
ما عنده وقت
هذا لا تشري له سيارة حتى يصير عمره 35 يمكن يكون عقل ذاك الوقت
و تراه يفلح في الرياضيات و الهندسة
و ممكن يشتغل في تصليح الطرق
لأنه يبي يمتر الشوارع تمتير من كثر ما يدوج فيها
و هذا يشكل أكبر نسبة من البزران في أيامنا هاذي


-8 البزر الطموح "بالعكس" :
هذا البزر الطييعي لمن تساله : وش تبي تصير يا شاطر لا كبرت
يقولك : أبي أصير دكتور
كيف تعرف لو كان طموح " بالعكس "
يرد عليك بأجوبة مثل : مانب صاير شي أبصير حرامي أسرق بنوك .. ولا أبصير مجرم أقتل الناس
هذا ما تقدر تسوي له شي أبداً أبداً
بس لو بغيت تخدم المجتمع رح بلّغ عنه الشرطة
عشان يصيرون وراه وراه


(9) - البزر الملوسن :
يوووو ذا دايماً ارسله مع خواتك لا طلعوا من البيت و خايف عليهم
هذا ممكن يسكت رجّال لو بغى
ملسووووون و وقح بشكل
و معظم المرات هذا النوع ينتج في البيت إلي مليان بنات
لأنه راح يقتبس هالصفة منهم
طبعاً من وقت لوقت حارشه .. عشان تشوف وش تعلم كلمات جديدة
و لو لقيت وحدة وصخة و مالها داعي عطه بكس واضمن لك ما يستخدمه مره ثانيه
بس نذكرك إنه لو جا عمه ولا جده قال تعال سلّم
لا تستغرب لو قالهم أشياء مثل : (أشتغل عندك انا) ولا (إنت إلي تعال ) ولا حتى ( كل تبن )الله يستر
يعني وقح وقح وقح .. بس يصلح سياسي



(10)- البزر أبو رادرارات :
هذا أقرد نوع
هذا لا عمرك تكلم أو تسوي تصرف قدامه
هذا لو قعد مع أحد
فـضّح في كل أسرار البيت
ممكن تتطور حالته إلي التجسس
و صدقن أردا شي إنها توصل معه للتجسس على مكالمات
البيت المستلمه والصادره ( اقاله يفت بجوال نوكيا)
لأن هذا يبي يوّلد مشاااااكل مالها نهاية
فأحسن شي إنك يا تقص لسانه
يا إما تحبسه في الملحق ألين يعقل
و يقال ( ولا أعلم له صحة ولا ضعفا) إنه يتعدى هاذي المرحلة بعد
سن البلوغ .. فإن شاء الله له حل
لكن إياااااااااك تطنش الوضع
لأنه يتطور للقافة .. حتى يصير يسأل عن كل شي
كل شي : من ؟ وين ؟ متى ؟ مع من ؟ من قال ؟
و لمين يصير عندك ضيف
يجي يطب عليكم فجأة و يقول وش تسوون
أبي أقعد معكم



(11) - البزر العلك :
هذا سمي العلك كناية عن التلزق
هذا يستجيب لمؤثرات عديدة
منها : الغترة و الشماغ - العباة - المفتاح - النعال (الله يكرمكم والسامعين!!!)
لأنه مجرد ما يحس إن أحد في البيت يطلع على طول يلبس نعاله و يركب السيارة
حتى لو ضيوف و جوا بيطلعون من بيتكم .. لا تستغرب لو راح معهم
هذا لازم بهالحاله تشري باتكس و سلاسل حديد
لأنك تحتاج تلزقه بكرسي ولا شي
حتى داااااايماً قبل ما تطلع من البيت شف رجلك يمكن يصير ناشب عليه
و هذا داااااايماً يكون فيه علامة مميزة مثل دعسة رجل تحوس وجهه





عاد أنت أن صار عنك بالبيت بزران .....
كل واحد يقول هم من اي نوع ....
والله يعين

[زياد بن محمد]

موضوع جميل والأجمل لو به بعض البهارات يعني مواقف مثلا

وشكرا لك

[الإعصار]

كلام وموضوع رائع جدا بارك الله فيك

[المرجهن]

الأخ زياد
هلا وغلا
تعرف ان المقصود هو الدراسة
وما يستحسن اننا نجمع كل شيئ..( ايقاله فاهم)
وخاف بعدين يستفاد منها
فلذلك صارت كذا

الأخ الإعصار
وانت أروع
ولا أروع
الله يرضى عليك

[المنخرش]

موضوع رهيب
مرة

شكراً

[حروف]

ممتاز شكرًا لك

[هذا أنـا ... !]

وش يقرب له في بيتنا مجنون

[عجوز الجن]

موضوع رائع الله يعطيك العافيه ..

مشكوور..