[ابو شذى]

.
.
.

ياجماعة ليش أخلاقنا تغير إذا ركبنا سياراتنا ؟؟
ليش هذا يشتم وهذا يتوعد ... وبعضهم يقول لبق كان فيك خير ...! يعني ماعنده مشكلة يتعارك مع الناس بس عنده مشكلة كبيرة ومايقدر عليها .. صعبه عليه يرفع ايده ويعتذر .. اوحتى يبتسم ... لكن الله يرحم الحال بس ..
ودي أعرف وش أسباب هالظاهرة وفقدان السيطرة على النفس ؟؟ ليش تتغير طباعنا وتفسد أخلاقنا عند أدنى مشكلة ولأتفه سبب ممكن نقتلب وحوووووش ؟؟
بالمقابل لو سير عليك أحد الشباب بالإستراحة أو بالبيت تلقاك قمة في الأخلاق والتعامل .. وتتفنن بإنتقاء الكلمات والعبارات الطيبة .. ( تفضل .. تفضل .. لا لا تفضل أنت .. ! لا لا باليمين .. !! مايصير ..!! اسفرت وانورت .. ياحيا الله ابو فلان ... توه ماتبارك الإستراحة .. )
شفتوا الأخلاق وش زينه ..
بس يركب ابو الشباب السيارة ويلاقى واحد ماسك اليمين عند الإشارة وهي حمراء تشوف الأخلاق على حقيقته !! وللأسف هذا أنا وانت وأغلب الشباب كذا .. الله يهدينا بس .. طيب وش حليلك قبل شوي بالإستراحة وكلامك ينقط عسل .. وين الأخلاق والتواضع ولين الجانب ..؟
يعني افرض لقيت واحد ماسك اليمين عند الإشارة ليش تفقد أعصابك وتلعن وتشيل وتحط .. ؟
ياخي صح انه غلطان وتصرف بشكل غير نظامي بس ماهو مبرر انك تعلّق البوري وتزعج عباد الله .. ياخي احتسب الأجر وتذكر انك مأجور على صبرك وحسن تعاملك مع الناس .. ترى كلها 20 او 30 ثانية ماراح تقدم ولا تأخر .. هذاك تدور أحياناً بالساعات .. وبعض الأحيان تروح للمدينة عشان تاكل من مطعم البيك وتجي من قوة الفراغ .. او اعتبر نفسك واقف عند إشارة ثانية .. أو افرض ياخي إن هالرجال هو رفيقك اللي زارك بالإستراحة ! وش موقفك .. ؟؟ اكيد بيقول ( أفااااا اثر الرجال مسوي فيها ... !! )
ولو فتحلك ترى ماله داعي ترمقه بنظرة حادة وتهز براسك يمين وشمال .. الرجال غلط وصلح غلطته .. يعني ماعمرك سويته أنت ؟؟
ليش مانحاول نتخلص من هالعادة السيئة ونتعلم الصبر والحلم والرفق بعباد الله ... ؟
أحياناً نلقى هوشه بوسط الشارع وضرب يوجع القلب بسبب هالإنفلات الأخلاقي .. اللي نازل بعجرى واللي معه سكين !! والسبب ياشباب ؟؟
تلاقي واحد ماسك اليسار ومهدّي والثاني مسرع وهذا مافتحله ..!
بينما لو اعتذر احدهم ومط كشرته ببتسامه حلوه كان استحى على وجهه الثاني وراح وكفا الله المؤمنين القتال ..
واحد من الشباب يقولي كنت مره بلف يمين والإشارة حمرا .. بس لقيت واحد مسكر علي .. قمت وعلقت البوري طااااااااااااط ومادريت إلا الرجال رجع بالسيارة وصدمني ..!! والله هذا اللي حصل .. وطبعاُ انتهى الموضوع بهوشه قوية وطعنة سكين للأسف ..
بصراحة أقولها وبكل ثقة .. اكتشفت إن الأخلاق ما تظهر على حقيقتها إلا أثناء القيادة .. يعني الزحمة والمهايط اللي بالاستراحة وبالمناسبات ماهوب دليل .. كلنا كذا .. لكن المحك الحقيقي داخل السيارة وبس ..
حاولت الاقي تفسير منطقي لها لمشكلة وشين النفس عند البعض الله يهديهم .. لقيت ان فيه بعض العوامل (يمكن) تكون سبب في هذا التحول والإنهيار المفاجيء للأخلاق .. منها مثلاً ..
كون الشخص داخل السيارة فهذا بحد ذاته سبب رئيسي للتوتر بسبب توقع حدوث مكروه في أي وقت لا قدر الله , وهذا يزول بالإيمان بالقضاء والقدر وأنه لن يصيبنا إلا ماكتب الله لنا .. و السبب الثاني هو أن البعض لا يهتم بمشاعر الآخرين لأنه يعتقد أن لا أحد يستحق الإحترام سوى من يعرفهم فقط .. ومن يزورني بالإستراحة وبس .. !


يقول الله عزوجل (وَلا تَسْتَوِي الْحَسَنَةُ وَلا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ * وَمَا يُلَقَّاهَا إِلَّا الَّذِينَ صَبَرُوا وَمَا يُلَقَّاهَا إِلَّا ذُو حَظٍّ عَظِيمٍ) وقال سبحانه (وسَارِعُوا إِلَى مَغْفِرَةٍ مِنْ رَبِّكُمْ وَجَنَّةٍ عَرْضُهَا السَّمَاوَاتُ وَالْأَرْضُ أُعِدَّتْ لِلْمُتَّقِينَ * الَّذِينَ يُنْفِقُونَ فِي السَّرَّاءِوَالضَّرَّاءِوَالْكَاظِمِينَ الْغَيْظَ وَالْعَافِينَ عَنِ النَّاسِ وَاللَّهُ يُحِبُّ الْمُحْسِنِين ) وقال عزوجل (وَإِنْ عَاقَبْتُمْ فَعَاقِبُوا بِمِثْلِ مَا عُوقِبْتُمْ بِهِ وَلَئِنْ صَبَرْتُمْ لَهُوَ خَيْرٌ لِلصَّابِرِينَ )

وعن ابن عمر - رَضي الله عنهما -: أن رجلا جاء إلى النبي صلى الله عليه وسلم فقال: يا رسول الله أي الناس أحب إلى الله ؟ وأي الأعمال أحب إلى الله ؟ فقال رسول الله صلى الله عليه وسلم: أحب الناس إلى الله تعالى أنفعهم للناس، وأحب الأعمال إلى الله تعالى سرور يدخله على مسلم ،
أو يكشف عنه كُربةً ، أو تقضي عنه دينًا، أو تطرد عنه جوعًا ،ولأن أمشي مع أخٍ في حاجةٍ أحبُّ إليَّ من أن أعتكف في هذا المسجد - يعني مسجد المدينة - شهرًا ، ومن كفَّ غضبه ستر الله عورته ، ومن كظم غيظه - ولو شاء أن يمضيه أمضاه - ملأ الله قلبه رجاءً يوم القيامة ، ومن مشى مع أخيه في حاجةٍ حتى يتهيأَ لهُ ؛ أثبت الله قدمه يوم تزول الأقدام".

وعن ابن عمر - رضي الله عنهما - قال: قال رسول الله صلى الله عليه وسلم: "ما من جُرعَةٍ أعظم أجرًا عند الله من جرعةِ غيظ كظمها عبدٌ ابتغاء وجه الله".

وعن أنس رضي الله عنه أنه قال: إن النبي صلى الله عليه وسلم مَرَّ بقومٍ يصطرعون؛ فقال: "ما هذا؟" قالوا: فلانٌ ما يُصارع أحدًا إلا صرعه، قال: "أفلا أدلكم على من هو أشد منه؟ رجلٌ كلمه رجلٌ فكظم غيظه فغلبه وغلبَ شيطانه وغلب شيطان صاحِبِهِ"

وعن معاذ بن أنس عن أبيه رضي الله عنهما أن رسول الله صلى قال: من كظم غيظًا وهو قادرٌ على أن يُنفذه دعاه الله عز وجل على رؤوس الخلائق حتى يُخيِّره من الحور ما شاء ..

[كرييم]

جزاك الله خير على الموضوع ,,,,,,

[ابو عبدالله.]

والله انك صادز يابن الحلال خل هالعالم تهايط ... ويعطيك الف عافيه ...

[بولوهي]

انا معك اخوي باكثر شي قلته بس فيه مشكله
وصار لي ذي .
يخطي علي واحد واطنب عليه واكبس واذا وصلته لقيته يهوش علي اانا ..؟ مع انه ه المخطي .. قلي وش تبي تسوي .؟
وبالنسبة للاشاره واللي ياقف يمين يمكن انا ولا انت وغيرك مستعجل وعنده حالة طارئه ويبي يروح يمين ..؟ ليش يسد الطريق بوجهه .؟
وهذي بعض الاشياء اللي انا اتوقعها
والحمد لله ما تسد عصبت على احد الا اللي يمشي بالسيار ويهدي او يخطي واذا نبهته يهوش عليك انت وكانك انت المخطي .؟
شكرا لك مرة اخرى

[ابو شذى]

كريم / ابوعبدالله
شكراً لكم ..
أخي بوبوهي / أن لا أتكلم عن الحالات الطارئة .. وبعدين حتى لو كنت مستعجل ما اتوقع ثواني بسيطة بتغير الوضع بالنسبة لك .. ومن حقك تطلب من الشخص اللي قدامك يفتحلك الطريق بس بطريقتك أنت اللي تمثل شخصيتك وأخلاقك .. وأنا أشوف انه مجرد انك تدق اشارة وتاقف وراه كافي انه ينتبهلك
واذا سوى نفسه لاهي او قاعد يكلم بالجوال اصبر واحتسب .. وصدقني بتحس بلذة العفو لو كان أمر بسيط .
حاول انك ماتعصب حتى لو لقيت احد مهدي على قولك او مسوي مخالغة بالطريق .. فكر بحلول ثانية
انما الحلم بالتحلم . وفقك الله

[teacher]

الاخلاق واجبه على الجميع ويجب احترام الجميع

ولكن اذا احد اعتدى عليك وانت في طريقك ماترضاها ابدا

يعني لما يوقف يمين والاشاره حمراء هذا شخص يعتدي على حق من حقوق السائقين

فكيف تريد الناس ان يحترموا شخص يتعدى عليهم

[خالد ملفي]

صحيح

....

[.ابووليد.بريداوي]

صحيح انا برايي راي صاحب الموضوع الغالي

[بولوهي]

اقتباس أخي بوبوهي / أن لا أتكلم عن الحالات الطارئة .. وبعدين حتى لو كنت مستعجل ما اتوقع ثواني بسيطة بتغير الوضع بالنسبة لك .. ومن حقك تطلب من الشخص اللي قدامك يفتحلك الطريق بس بطريقتك أنت اللي تمثل شخصيتك وأخلاقك .. وأنا أشوف انه مجرد انك تدق اشارة وتاقف وراه كافي انه ينتبهلك واذا سوى نفسه لاهي او قاعد يكلم بالجوال اصبر واحتسب .. وصدقني بتحس بلذة العفو لو كان أمر بسيط . حاول انك ماتعصب حتى لو لقيت احد مهدي على قولك او مسوي مخالغة بالطريق .. فكر بحلول ثانية انما الحلم بالتحلم . وفقك الله

صدقت ان ثواني ما تضر
وانا معك بهالكلام ذا صارت الاشاره ثلاثية او تبي تفتح ااما يوقف واحد من اول ما تصك فهذا راح يكلفن دقيقتين او دقيقه ونص . وهذي تبي تفرق ..
وياليت كل الناس زي ما قلت اذا دقيت اشاره يمين يوخر ..؟ بس فيه ناس اذا طنبت له او كبست يوخر شوي اما فيه ناس يعيي حتى وهو يقدر .. وهذا اللي يقهر .

[أبوفارس الخالدي]

قديما قال السلف السفر والمصاهرة والمخادنة تظهر مكامن أخلاق الرجال ..

والآن الخلف يقولون قيادة المركبة في الطريق المزدحم تظهر مكامن أخلاق الرجال ..

يظهر الرجل على حقيقته أثناء قيادة السيارة وخاصة عندما يكون متأخراً عن عمل ما عن العادة ..

ولهذا من يريد أن يهذب أخلاقه ويحسنها بقوة فليحاول الصمود في هذا الأمر ..

[الشمالي]

يمال العافيه والله
وتسلم هاليدين اللي كتبت الابداع ..

فعلا للاسف الشديد لما تطلع للشارع تشوف اخلاق عجيبه غريبه ..
هذا واحنا شعب مسلم وعرف عنا قوه الترابط والتراحم ..

لما تطلع الشارع تشوف اخلاق سيئه اخلاق وكانها تحمل العداوه والكراهيه ..
مافيه اي التزم تلاقي اللي يلف علي ويخطم عليك وفوق هذا كله يهاوش .. تلاقي اللي يوقف خطا وويسكر عليك ويطلع يهاوشك , تلاقي اللي يسكر اخر مسار ايمن في الاشاره رغم انه ماهو من حقه
تلاقي اللي يكلم الجوال ويملك الشارع يلف يمين يلف يسار يعترض بوجهك ولاكانه داري عنك

سبحان الله اخلاق منحطه تشوفه بكل شارع ,,

تحياتي ..

[ابوولعf]

والله كلامك سليم100%

[GDD]

كلام جداااااااااا جميل

[ماركو]

كلامك سديد , لكن في بعض الاحيان و أنا ماسك طريق يجي واحد يتجاوز علي من اليمين و أذا وصل لمي ضرب بوري بقصده يربكني , هذولا أول من أشوف بالمراية أنه بيتجاوز يمين أحذف بوجه السيارة , خله يضرب فرامل لليل علشان يتوب هو وشكله .