[مجنون بريده]

السلام عليكم ورحمة الله وبركاته




صباح _ مساء الخير للجميع



مشكلتي الجديدة في الحياة تكمن عند ذهابي للنوم , فلست كغيري ممّن يذهب لعالم النائمين مباشرة عبر ضغطة زر ( تف عليكم ماشاء الله عليكم )



أعاني معاناة لاتوصف عند كلّ مرّة أذهب فيها للنوم ( يالله إن الشكوى لك )



يعني أجلس ساعتين أتقلّب على السرير هذي مايبيلها كلام , والقهر إن أخوي يدخل علي بعد ساعه ويسمع له محاضرة بجوّاله وينام قبل مايبدأ الشيخ بموضوعه



ولا تسمع إلا شخيره ويزيد الطين بلّة , ( برضه تف عليك , ماشاء الله عليك )



مرّة من المرّات استشرت ولد العم الراحل : أبو سعود ,, عن هالمشكلة فقال : قلّ النوم وكثر الحبوب اللي بوجهك أساسهن وسادتك اللي ماعمرك غسلته



طلّعت فراشي بالحوش , وشبكت الدينمو ولايهون صابون التايد ,, ولاجديد في الحكاية !



قرّرت أستشير العمّة منيرة فقالت : ماودّي أتفلفس عليك , لكن لاتروح للسرير إلا إذا جاك النوم ( ماعقب أتفلفس شئ )



يوم ضاقت بي الحيلة قلت مالك إلا أبو خالد لبى قلبه , فقالي : ياجنيني أنت , مالك إلا تقرأ لك جريدة قبل ماتنام , وراح تنام دايركت والجريدة على وجهك , واسأل مجرّب



بصراحة جازت لي الفكرة وجرّبته , وما أخفيكم إنه وحده بوحده , لكن مشكلته إذا قمت أسكّر نور الغرفة يطير النوم



عاد فكّرت إني ألزم القراءة قبل النوم وبنفس الوقت تكون الغرفة مظلمة على الآخر , فقلت مالك إلا تقرأ من هالروايات , وحالك حال الناس ياعمّو كريّم ( الله يمسّيك بالخير ياعزّام )



ومن حسن حظّي إن أول رواية قريته ,, بشروه إنّي أبرحل ,, ( أنواع وأشكال الصياح والبكبكة وسيلان الدموع )



ومع مرور الوقت أدمنت قراءة الروايات لدرجة إني أنتظر متى يجي وقت النوم عشان أكمّل الرواية اللي موب راضيه تنتهي !!



وأغلب الروايات عاطفيّة , لأن مجتمعنا مايدهن سيره إلا إشعال قضيّة الحب



وعلى قولة محمد عبدالجواد , مافيه شكك ,, إن الإنسان عبارة عن كتلة إحساس ( الشرهه على قناة الجزيرة )



والقهر إن كلّ الروايات متشابهات إلى حدّ كبير ,, كلّها خيانة ,, وإن ماصارت فيها خيانة ومشت الأمور تمام



قبل الزواج كالعاده , تموت ليلى بمرض خبيث ,, أو يموت قيس بحادث مروري مروّع



وحنّا هالمساكين ندخل جو ونحزّن ويسيّر علينا هالقولون على الفاضي , واللي فينا مكفّينا وموفّينا !!



مع كثرة قراءتي للروايات ,, بدأت دموعي تنزل بإستمرار بسبب قرب العين من الجوّال والتركيز الشديد بوقت طويل !



فلاحظ هالشئ حبيب ألبي أبو ريان,, فقال : عندي لك علاج وحده بوحده ,, فقلت : يقولون إن الدموع تغسل العين يالله من فضلك ( ماله داعي ناكل حبوب حمل ,, ولاننام ولانحمل )



أختم موضوعي بقصّة حصلت لي ,, بطّلت من بعده قراءة الروايات



أذكر مرّة من المرّات طلعت ألعب كورة مع شلّتي الموقّرة ,, فيوم خلّصت من اللعب ركبت السيارة راجع للبيت ,, شفت جوّالي لعلّه مليان مكالمات من أفراد العائلة صغيرهم وكبيرهم ,, ذكرهم وأنثاهم



بصراحه يوم شفت هالمكالمات خفق قلبي على أهلي ,, ودّي أكلّم عليهم لكن للأسف مقطوع ,, حاولت أرسل لهم كولمي ,, لكن للأسف مخلّصهن على الشلّة



دخلت البيت ,, إستقبلن أبو خالد بوجهن عبوس ,, وزعل علي ليش ماردّيت على المكالمات فأقنعته بالسبب ,, فقال : والرسائل ؟! مافيه شئ يمنعك من قراءة الرسائل ؟



ولكن تبريري إني ما أقدر اقرأ هالرسائل ,, لأني واقف على رواية مجنونة !!



وختاما : لن أقف ضدّ من يقرأ الروايات ,, ولكن الشئ إذا زاد عن حدّه ينقلب لضدّه



أعتذر عن الإطالة ,, وكلّي أمل أن تقبلوا عذري



همسة : القصّة من نسج الخيال ,, ولا تمت لواقعي بأيّة صلة



أرق التحايا والتقدير


مجنون بريدة

[الكساندرا]

,,,



حقيقة .. انفجرت ضاحكة على طرافة القصة .. وتمتعت بقراءتها ..
ولأنني ممن يقرأ كل شيء يقع تحت يديه من قصص .. فقد عشت ماتقوله ..
لكني أتذوق الرواية قبل البدء بها .. فإن أعجبتني كان بها .. وإلا طرد أبدي من قائمة اهتماماتي ..

كما أنني لا أبكي أبداً عند قراءتها .. لأن عقلي يظل في حالة ارسال رسالة تقول " إنها مجرد سطور" ..

رغم أن القصة من نسج خيالك .. إلا أنك فيما يبدو لي قد عاصرت شخصاً مهووساً بها ..!!

سلمت يمينك على الطرح المتفرد بروعته ..
دمت كما تحب ..


~~ ألكساندرا ...




,,,

[Bleeder]

اقتباس ولكن تبريري إني ما أقدر اقرأ هالرسائل ,, لأني واقف على رواية مجنونة !!

هههههههه
يا كثر ماصارت مع أختي ،، بالروايه الوحدة يجنه حوالي 10 رسايل ماتفتحهن ..
وأغلبهن من الاتصالاات
شيكرن لك

[على طريق الأمل]

هههههههه
صدق لازم حل
أنا كنت أول عايشه على الروايات
وأقوم وأنام عليهن
بس الحين الحمدلله قدرت أسيطر على نفسي
بديت أذا فرغت قريت
ومازلت أمر بحالات نفسية مع الرواية
هع هع

[غالية الثمن]

الصراحه قريت مره روايه..............وياليتي ماقريته


بس أخذت وضيعت وقتي..وليت له فايده ماله أي فايده


بدال قراية الروايات نقرأ كتب نأفعه

[غاصتني العبرة]

ياقدمة الروايات
الحمدالله تركتها

[بندر 1430]

أول رواية قرأتها كانت باللغة الإنجليزية كدرس في القراءة في معهد لغة (فرض ..!) ..

لم أستمتع بها لأني كنت أعلم بأن أحداثها ضرب من الخيال ..

شكراً لك

[كَـارِيـزْمَـا ©]

؛

اقتباس لكن مشكلته إذا قمت أسكّر نور الغرفة يطير النوم

ياكافي يروح النوم اذا طفيت اللمبة ..هه طيب اقرأ والغرفة ظلآم هماه من الجوال ..


اسلوبكـ ممتع ..

الله يرحم حالنا قصدي بعضنا ..
عادي تصير الرواية 200 صفحة نقرآهآ أحيآنآ بيوم ..مآودنآ نفوت الأخبار
واذا قرينا قرآن عسآنآ نكمل حزب ..


شيكرن

؛

[سحابة]

شكرا يا أخي لكن

بالنسبة للقصة اللي من نسج الخيال فتقدر تحفظ الرسالة في الملاحظات مع أنه بطيء بالنزول شوي

و بالنسبة للرواية المذكورة : بشروه أني أبرحل

الصراحة رواية تجيب الهم و النكد و نهاية تجيب القولون المعوي

[حبك ملاقلبي]

ومن حسن حظّي إن أول رواية قريته ,, بشروه إنّي أبرحل ,, ( أنواع وأشكال الصياح والبكبكة وسيلان الدموع )


ياااالروعه سطورك كانت اول روايه قريتهااا بس الحمدلله الله رفع عن هذااا الداء بصراااحه


وجع قلب وهم مايتلم......

لكم دعواتي بحياة هادئه

يارب ألهمني................كي ترضى

[فديت القصيم]

يا قدم الروايات أذكر أختي كانت مدمنة عليها عاد شف أنواع الصياح والنكد ههههه
مشكور أخوي على موضوعك الأكثر من رائع

[كرمع]

أنت مبدع في السرد وفي الخيال .
أسلوبك رائع وسلس وجميل وأنت مشروع كتابي قادم لو أوليت ماتبدعه هنا مزيدا من الإهتمام والتنسيق .
من أمس وأنا أنعث في ملفك الشخصي وأقرأ موضوعاتك
تمنيت فقط لو غيرت معرفك من " مجنون بريدة " إلى " مبدع بريدة "
تقبل مني تحية تليق بإبداع قلمك يارجل

[خواش]

انا بالماضي كنت مثلك يوم كنت ببداية عمر 15 سنه دايم اخوي بجنبي بالسرير ينام على طول وانا مانام المشكله مابراسي تفكير ولا هم توي صغير خصوصا لاسافرنا ماعرف انا بفراش مهب فراشي ولا اعرف انام الا بصوت المكيف واخوي الثاني بدأ ينام معي مايحب صوت المكيف ولا هواه اقوله انت طالعن على عمتي مزينه ماتحب المكيف



لكن الحمد لله يجين اليوم الحين اول ماحط راسي خصوصا ان راسي عنيد مانام الا بمشقه طحت بالشيشه اخر الليل اشيش وانحر الفارش ماتتم دقيقه الا وانا نيم وياحلو النومه بس لاحد يشيش تراه متعبه جدا وتوجع الصدر هههه



حبيت اعلق على سالفة النوم ولا داري ان الموضوع له مغزى آخر خخ

[مجنون بريده]

اقتباس المشاركة الأساسية كتبها الكساندرا ,,, حقيقة .. انفجرت ضاحكة على طرافة القصة .. وتمتعت بقراءتها .. ولأنني ممن يقرأ كل شيء يقع تحت يديه من قصص .. فقد عشت ماتقوله .. لكني أتذوق الرواية قبل البدء بها .. فإن أعجبتني كان بها .. وإلا طرد أبدي من قائمة اهتماماتي .. كما أنني لا أبكي أبداً عند قراءتها .. لأن عقلي يظل في حالة ارسال رسالة تقول " إنها مجرد سطور" .. رغم أن القصة من نسج خيالك .. إلا أنك فيما يبدو لي قد عاصرت شخصاً مهووساً بها ..!! سلمت يمينك على الطرح المتفرد بروعته .. دمت كما تحب .. ~~ ألكساندرا ... ,,,

حياك الله أختي الكساندرا


الله يديم عليك الضحكة والوناسه والطهبله


من يبكي عند قراءة الروايات فهو إمّا أنه يعيش عيشهم من الحب العفيف فيتألم بألم ماحوته السطور


أو أنه يدخل الجو سريعا ويصدّق هذه الخزعبلات ,, مثله مثل من يبكي عند مشاهدة المسلسلات ,, وقليل ماهم !


لا أخفيك بأنّي قرأت رواية ( بشروه إني أبرحل ) قبل سنوات ,, ولم أواصل السير ليقيني بأنّها أحرف متكرّرة !


ولكن ماجاء في محتوى الموضوع من قصّة خيالية ماهي إلا دخول لصلب الفكرة


شكرا لك