[الـصـمـصـام]

آآه .. قضية التعامل هذه قضية تتعبني نفسيًا خاصة في المستشفيات ، أنتي الآن تفتحين في ذهني عدد من الملفات الصعبة و المسكوت عنها ، و تثيرين أعصابي و أنا أستحضر تلك المشاهد .. أذكر قبل أكثر من سنة لما أُخبرتني الدكتورة عن حاجة أمي إلى عملية قلب مفتوح ، أنا مباشرة سقطت بسبب انخفاض الضغط و الأسلوب الجاف .. و جاء و كملها الدكتور السوداني وهو يقول لأختي الأكبر مني سنًا ( دايرين نقطع الصمام و نرميه في الزبالة و نركب جديد ) الأخ عايش بورشة ..!

طبعًا كلنا أنا و أختي رفضنا العملية ، بسبب هالأساليب اللي زي وجيههم ، مع أن العملية مهب بالصورة اللي كنا متوقعين ..! حتى جاء بعد هالشخصين ( المطفوقين المصفوقين ) شخص عاقل ، و طمنا و ريح قلوبنا ، و وافقنا على طول على عملية الوالدة . قسم بالله أحيانا أتخيل أنني داخل مجزرة و أمام جزارين .. و لا زلت متشائم جداً جداً من هالمستشفيات اللي إذا دخلتها زاد مرضي و تسارعت نبضات قلبي و عانيت من انخفاض في الضغط .. و الله بدون مبالغة ..

قبل فترة كانت أمي عند خالتي ، و اتصلوا علي الساعه 12 و قالوا إن أمي تنتفض و تعبانة ، و أنهم بالاسعاف .. و لحقتهم للمسشتفى .. طبعا المستشفى يقولون لخالتي ( انتم مهب تبعنا ) ..! و يخلون امي بالسيب مجدوعة قرابة الساعة و الدكاترة يمرون من عندها و يهي تنتفض و يناظرون .. و الوضع عادي جداً عندهم ... و أنا قفلت معي .. رحت للاسعاف أقول له تكفى أمي طلعها لأي مكان أحسن من هالمستشفى ..! قال والله ممنوع ننقل مريض من المستشفى .. حنا ننقل من بيوت أو أماكن أخرى .. و النظام ما يسمح أننا نطلع مريض من المستشفى .. قسم بالله حسيت أنهم يعتبروننا حيونات ولا يحاولون ينتقمون ، و لا يسوون عمليات تصفية بتعاملهم البارد الوقح ..!

حتى ألحيت عليه و ذليت نفسي ، و اتصل أحد من أقاربي الكبار و غسلهم بكم كلمة ، و طلعتها لمستشفى خاص على حسابي .. علمًا أننا مرينا على مستشفيين حكوميين من أكبر المستشفيات بالرياض .. بس الرد معروف ، و الحالة المرضية انتقلت لي أنا ..! بسبب تعاملهم ..

إذا كنتي نزلت دمعتك خوفًا على أختك ..
فأنا والله بكيت و بكيت دم .. في بعض الحالات الحرجة داخل المستشفيات ..
و أمري لله ..

و عندي أكثر و أكثر .. لكن الله يصلح الأحوال ، و الأمل بالجيل القادم بإذن الله ..