[أطوي جروحي بضحكتي]

يأخي يالصمصام
لوتصور مع شوي
وخلك عن موضوع البنات والسوق
لوتلاحظ الفروق بينك وبين أختك مثلا بالمشتريات والحاجيات
البنت تغلب وأحسب هالشي
من شباصة بالشعر اوربطة الى القدم ...وأنت أيها (الرجل )الشي اللازم خلينا انقول (شماغ _طاقية _ملابس داخلية _ثوب_وشوز )وتكميلة 2 او 3 وكبك ومديلية والحركات الخفافي
هذي من جهة الحاجات العامة __أفرض فرضنا

الحاجات الخاص
مثل المناسبات >>الرجل نفس الاغراض اللي فوق تقريبا
البنت >>>لا عكس يعني الروحات العادية في الباس تختلف عن المناسبات أو العزايم الكبيرة

ومثل المدارس أو الجامعات >>برضو نفس الحكاية احتياجات الرجل نفسها اللي فوق>>فية بعضها تطلب نوع من البدل بالوان محددة
البنات لبس الروحات وطلعات الدورية يختلف عن لبس المدرسة تحت ضوابط والكليات نفس الشي الالوان محددة والبلايز تكون أكثر رسمية وكذللك لبس البيت والزواجات


تصورت معي الحين النقطة هذي >>اللي بعدة

لو تبصر النعمة اللي عايش فيها انك تقود نفسك لاشغالك وتزين حاجاتك وانت بتم شبابك وصحتك وماوراك احد يمنعك هذي أعتبرها في حد ذاتها نعمة كبيرةومن أكبر النعم عطاها ربي أياك لاتصبح في مذلة أحد >>>>>أغبط الشباب من هذة الناحية
بتقول وش دخل هذا الكلام في صلب الموضوع أنا أقول لك ..
تخيل طلبات البنات وكثرهن ماتنجزهن هي بنفسها وذي ملكات من الله وحنا مسلمين هالشي(وراضين بحكم الله )والبنت مسكينه تشحد أخوانها والا أبوها والا عمها أو زوجها
وأن أي غرض أوحاجه سواء لمناسبة أو لمدرسة أو طلعات عادية أوملابس للبيت بأكملها لابد من مشارك يشاركها وهو صاحب السيارة وبالحنة والرنه وبطلعة الروح تجيب أغراضها ...ويأتي الرجل ويقول وببساطة ,,ياحبكم للسوق

والله يشهد ..لاتحسبن أني أقارن لأجل ..أسوي بلبلة والا جدال بالفاضي ...بس أبيك وأنت تودي مشاور أحد من خواتك أومحارمك ..أنك تحط الشي نصب عينك ...وتخيل أنك مكانها ....وأبيك تحس بالرحمة للضعيفات ماتمن ولاتهاوش وتقدر المعاناة




أمي بجنبي وتقول .......كفاك تخيل ..يابنيتي ..ماذبحتس غير التفكير..

اقتباس كود قبل ماأروح أقدم موجز بأهم المشتريات لحضرة أخوي ثم يدرس الموضوع مدة يوم ثم يرد علي بالنتيجة وماعلي إلا الرضاء بها سواء كانت إيجابية أو سلبية .. ياحليلهم القصمان من هرجة تقولين ذا مايقوى يحك رأسه وهو أنواع الخربطه .. هههههههههههههههههههههههههههه>>>أضحك الله سنك كأني أشوف واقف عند باب الصالة ومسوي روحة مشغول شكرا أخي حمده من الأعماق أدري إني شغلة بس تبي أخت بلاش كم من شخص وشخص يتمنى له أخت مهمة مثلي ... أمووت على الواثقين >>خخخخخخ..اللي مثلتس مايجدع

[شهقه فراق]

والله خلني اكــــــــــــــون صريحه معكـــ

بالنسبه لي احب طلعه الســــــوق لاكن بمعقـــــول

مثـــل عندكـ الرياض غاليري سوق روعـــه تتمشى فيه اكثر من انكـ تتسوق

وسنتيرا سنتـــر فيه كافي فــــــــوق شي خيــــال
وغيرها وغيرها


يعني الحين الاســـواق صارت تصمايمها تفتح النفس منها تسوق ومنها
نتمشــــي ونغير جو مع الاهـــــــــل


عــــــــاد الحين الاسواق مزحومه لانه موسم التخفيضــــات


الله يخلي لي اخوي اهو الي يطلعنا معنى وع قولتك يكره شي اســـمه نرجع الي نشتريه



موفق يارب




شــــــــــــــــهقه فــــــــــراق

[قُنصـل ~]

/،ْ..





مِن طَبِيْعَة الأنثى حُبُ الجَمَال وَالتجَمُّل وَاتِّبَاع كُلِ جَدِيْد يُسْهِم فِي زِيَادَة جَمَالِهَا وَأَنَاقتِهَا ..
وَمِن الْمُسلّم بِه وَالْمَعْرُوْف أَن الْوَسَطِيَّة فِي كُل الْأُمُور هي الْحَل الْدَّائِم فَلَا إِفْرَاط وَلَا تَفْرِيْط ..
وَلَكِن أَحْيَانَاً تَأْتِي ظُرُوْف وَأُمُوْر تُجْبَر الْشَّخْص عَلَى الْتَفْرِيْط فِي أَمْر مُعَيَّن لِحُدُوْثِ الْوَسَطِيَّة فِي أَمْرٍ مُهِم ..!
وَمِن هُنَا ماوَدَدت أَن أَبْدَأ بِه رِسَالَتِي .. لِكُل أخ .. لِكُل أَب ..وَلِكُل زَوْج !

الْأَسْوَاقُ الْيَوْم لَيْسَت كَمَا هِي عَلَيْه فِي الْأَمْس !
عِدتُ أُمُور وَظروف طَغَت عَلَى جَوِّ الْأَسْوَاق وَأُولاها .. الْلِّبــَاس !
فَكَوني إِمْرَأَة وَاعْلَمُ بِأَمْرِ الْسُّوْق .. أَتْعَبُ كَثِيْراً .. كَثِيْراً .. فِي تَحْصِيْلِ الْجَمِيْلِ الْسَّاتِر !
وَهَذَا يَأْخُذ مِنِّي وَقْتَاً لَن أَقُوْل لَيْس بِالْقَلِيْل .. بَل بِأَكْثَر مِمَّا تَتَخَيَّلُوْا ..!
كوني أُرِيْد الْجَمِيْل الْمُتَنَاسق الْسَّاتِر هَذَا يَأْخُذ الْكَثِيْر لِتَحْصِيْلِه ..!
فَأَرَى يَوْمِي قَد انْتَهَى وَأَنَا لَم أَكْمِلهُ بِبَاقِي (الإكسسوارات ) .. لِأَنِّي لَم أَجِد (تنورة طويله) ..!
فَأُضْطُر لِلْمَجِيء يَوْماً آَخَر ..
وَتَقْرِيْباً هَكَذَا مَع كُل (تيور ).. ! وَمَع كُل أُخْت ..!!!
حَتَّى الْأَطْفَال لَم يسلموا !
فَأضْطر أُستّر بـ ( الهيلاهب ) وَغَيْرِه ! وَهَذَا سَيَزِيد مِن أَمْر وَقْتِي !


لِذَا أَيُّهَا الْأُخْوَةُ الْكــِرِآم أَعِيْنُوْا أَخَوَاتِكُم وَبَنَاتكُم وَزَوْجَاتِكُم .. بِهَذَا الْأَمْر
وَلاتَجْعْلُوهُن يَسْتَسْلِمُوْا لِلْقَصِيْر وَالْعَارِي بِحُجَّة ( مالقيت وماعندي وقت ) !
ولاتُربِكونَهُنّ بالسوق بسبَبِ اسْتِعْجالِكُم ..!



كَوْن أَبِي وَأخوتِي الْقَرِيْبِيَّن لِي لَم وَلَن انسَى مَايَقُوَلُونَه (ويشق ) بِخَاطِرِي وَيُسْعِدُنِي وَأَفْخَر أَنَا وَوَالِدَتِي وَشَقِيقَاتِي ..
( خوذن الوقت اللي يكفيكن واللي يريحكن اهم شيء تلقن اللي يعجبكن ويرضي الله )
لاحرمهُم ربي دعائَنا ..~
+

أَرْجُو أن لا تَرُدّ وتقُولْ أقصِد ( المكثرات في امر خروجهن بكثرة مفرطة )..!
فأَنْتُم أَرْسلْتُم لإَخواتِكُم ونَحْنُ نرُدّ على إِخْوانِنا !




..عُذْرَاً عَلَى الْإِطَالَة ..
وَشُكْرَاً لَكَ أَيُّهَا الْكَرِيْم فَقَد أَوْجَدتَ لِرِسِالَتِي مَكَان ..!

[قمرالواحدةوالسبعون]

الله يعينك عاد عندكم بالرياض زحمة والاسواق بعيدة
بس عندنا ببريدة الاسواق قريبة لبعض
اما الي ساكنين باخر بريدة ممكن تكون بعيدة شوي

[الصباخ]

ههههههههههههههههههههههههههههههههههههه بروح أضحك ويمكن ما أرجع..
أنا ما ضحكت كثر ما ضحكت على اللي يقولن ما نحب السوق هههههههه ..
وشكلك يا عبدالله ما كتبت هالكلام إلا من حر ما توجس ههههههه ..

[برااسي حتسي]

ياااااااااااااااااااليل وانتم ماعندكم الا هالحريم حطين حيلكم بههههههههههن الي يقول يقول ليش المرأه تطلع كثير واللي عن السوووووق واللي يقول راقبوا خواتكم بصررررررراحه ماقد شفت اعضاء يتشكون من الحريم كثر اعضاء بريده ستي الله يعين حريمكم عليكم

[جيهان]

اقتباس المشاركة الأساسية كتبها الصباخ ههههههههههههههههههههههههههههههههههههه بروح أضحك ويمكن ما أرجع.. أنا ما ضحكت كثر ما ضحكت على اللي يقولن ما نحب السوق هههههههه .. وشكلك يا عبدالله ما كتبت هالكلام إلا من حر ما توجس ههههههه ..

يب وش السالفه وش تحسون فيه وراه ماتصدقون ان فيه بنات مايحبن السوق

وترا اصابعكم مختلفه

[%زعيم الشووق%]

ههههههههههههههههه
والله يالحريم يتشفقن علشاان يسووقن
على العموم يوم من الأياام برووح افجر بالسووق ذآآ

[الثلاثي المرح]

هههههههه توي جايه من موضوع بمنتدى بريده وفيه واحد جالس يشتكي ويقول ليه البنات يتسلقن النفد
لاطلعن للبراري وانت اللحين تشكي وتقول لاتكثرن طلعات لسوق نعنبو ابليسكم يالبرداوين ههه وربي ودكم تحشرون البنات بقفص وتقفلون عليه
يعني البنت وين يبي يلقون لهم متنفس يطلعن له



مير الله يرحم الحال بس العالم في تقدم وانتم حاطين حيلكم بهالحريم المسكينات

[GoOdGirl]

بالنسبة للاسواق والشراء ماني مههووسة ابدا فيهما
لكن احب اتمشى بالمولات والمنتزهات رغم شحها الا انه متنفس بطبيعة الحال

[يعجبني تفكيري]

صحيح السوق مو صلة قرابه بس الانسانه بحاجته
والله تطلع الروحه بطعونه وكل واحد قولي لفلان
والله فيه بنات معسكرات بالمولات خيييييييييرالحمدلله الله لايبلانا
والله يكون بعون الجميع

[ماعلينا من الناس]

ميييير مين بيودينا بكرا للسووق..!
مالت هو في احد بيوديناحتى يحط موضوع وسالفه


مدري بتجلب الفكاهه ولا وشو


اتمنى يحذف الموضوع :$
لان العنوان لااطيق اشوفه حتى بعض الردود

[إبراهيم الضبيعي]

والله ياخي ودك تسكر كل المحلات ما تخلي لهن إلا الوشاح

[الصباخ]

اقتباس المشاركة الأساسية كتبها إبراهــــــيم والله ياخي ودك تسكر كل المحلات ما تخلي لهن إلا الوشاح

من يقولك إن الحريم يحبن السوق؟
كل الحريم ما يحبن السوق ولا يروحن للسوق إلا بالشهر مره ويجلسن بس ساعة .