[الغضارة]

بصراحة ماني عرفة كيف ابدأ لكن اقولها بملئ فمي..مدارس اعيالنا في خطر...خطر....خطر عظييييييم
واذا ماتكاتفنا كأهالي وطالبنا حكومتنا ومشايختنا ودعاتنا واعلامنا بالتصرف السريع وكل على حسب مسئوليتة لردع كل من تسول له نفسه الاعتداء على كرامة اولادنا وانتهاك براءة الطفولة فأذنوا بجيل والله ثم والله يتفشى به الشذوذ والامراض النفسية

انا وكأم مكلومة...ربيت ابنائي على الخوف من الله والشفافية... واحتوائهم والدعاء لهم واستوداعهم الله في كل الاحوال...
و لازلت اعتبر نفسي مسئولة في التبليغ عن مايحدث من بلاء داخل اروقة المدارس والاعظم امام بوابات المدارس...
ابني في المرحلة المتوسطة يعاني من استدراج فضيع له ولغيره من الطلاب في مدرسته
فهو عندما يخرج يجد عشرات السيارات تتربص به امام مدرسته فهذا يعرض عليه توصيلة وهذا يتكلم معه بكلمات سوقية والاخر يتغزل بشكلة ويعمل له حركة...حتى وصل الامر ان بعضهم حاول بخبث ان يركبة بسيارته ولكن ولله الحمد انا استودعه الله في كل لحظة وكنت قريبة منه بكل الاحوال
ولكن ابى هؤالاء المبتلون والحمدلله الذي عافانا ممن ابتلاهم حاولو الا ان يستدرجون ابني وغيره من المراهقين بأخبث الطرق والوسائل
قبل ايام عندما خرج ابني من المدرسة اعترضته سيارة بها اربعة رجال اعمارهم تتجاوز ال35 يعني ماهم شباب
اخذو يتكلمون معه ويسألونه اسألة غريبة وهو يحاول ان يسرع الخطى...قالو له عندك ايميل عندك سوني..يقول ابني حاولت ان اتملص منهم لانهم كبار بالسن واشكالهم تخوف بعدها رجع للبيت
وفتح الماسنجر عشان يتواصل مع اصدقاءه...جاه طلب اضافة من ايميل غريب وهو ظن انه واحد من اصدقاءه بالفعل اضافه وهنا كانت الكارثة...قال له انت شفت اليوم سيارة فييها شباب وتكلمت معهم قال ولدي ايه من انت..؟؟؟ بعدها ارسل له روابط كثيرة..ولما فتحها ولدي كانت وبكل اسف لمواقع اباحية..طبعا ولدي ماله بالكمبيوتر الا انه يستفسر عن الالعاب الخاصة السوني ونادرا مايكلم اصدقائة بالمسن
وجهاز الكمبيوتر خاص بالعائلة وموجود بمكان مفتوح عشان يكون تحت نظري..لكن وقتها انا كنت منشغلة..المهم ولدي ان سواله باند وبعدها تكرر الموقف وجاه طلب اضافة من ايميل ثاني ولكنه رفض
اليوم الثاني وهو طالع من المدرسة شاف نفس السيارة مسرعة ومتجهه ناحيته و حاول يهرب لكن اعترضة صاحب السيارة وفتح الباب وصار يصارخ وحاول يتهجم على ولدي وقال له ليش تسوي لي باند..وحاول يسحبه داخل السيارة ويقول اقولك اركب معنا بالطيب...والا بفعل فيك..!!!
ولدي وقتها حس بالموت والرعب ويقول حاولت ما اقاوم لانهم كثار وقلت له طيب وش تبي قال اذا طلبت منك اضافة ماترفضها واي موقع ارسله لك لازم تتفرج عليه تراي عارف كل حركاتك بالكمبيوتر واذا علمت احد ياويلك مني.. قال له ولدي طيب خلاص والله بسوي اللي تبي وهرب للبيت..نسيت اقول ان سائق السيارة كان متلثم...جا ولدي للبيت ولاحظت انه مرتبك ونغزني قلبي...لكني وكنت واثقة انه لو يحصل له اي شي اكيد بيقولي...بعدها لاحظت عليه الشرود وبرضه ما ارتحت الا لما مسكته وقلت وش فيك حاول يتهرب لكن بألحاح مني صار يبكي بقوووة و خبرني بالقصة..بعدها الدنيا دارت بي وصرت اشوفها سودا..والدم تجمد بعروقي..قلت له طيب ليش ماقلت لي من البداية....قال هم هددوني وقالو حنا عارفين كل تحركاتك ولو تقول لاي احد بتندم..قلت له طيب انا معودتك على الصراحة
حاولت افهمه انهم جبناء ومايقدرون يسوون لك شي ولو فيهم خير ماتلثموا وحاولو يستدرجونك بالمواقع الاباحية..طبعا ايميل اولدي كان معطيه اصدقاءة واكيد ان هالخبيث وشلته اخذه منهم بطريقته

بعدها يا اخواتي الاتي لم تلدهن امي بعدها ماطبقت عيني ولاعرفت طعم النوم..حقدت وكرهت كل شي...وين الحكومة وين الدعاة وين المعلمين وين الاعلام وين الاهالي اللي نايمين وتاركين عيالهم يفسدون بالارض بدون مراقبة او رادع...حاولت اكلم الهيئة من يوم الاربعاء لكن ماردوا علي..مع الاسف ان الهيئة انشغلت بكامل جهازها على ابتزاز البنات لكن المصيبة الكبرى هو ابتزاز الاطفال والمراهقين اكبر واعظم لانهم يعيشون ببيئة وحدة ومحد يستنكر وجودهم مع بعض
يا اخواتي بقدر ما احترق قلبي على ولدي بقدر ما قاعدة احترق على شباب بعمر الزهور قاعدين يتعرضون للابتزاز والاستدراج كل يوم امام مدارسنا...ولدي من ياخذ حقه ...ولو اخذت حقه مارح تطفى النار اللي جوا قلبي وانا اشوف غيره كثيييير يتعرضون لمثل موقفه ويمكن فات الفوت...يقول ولدي بعض الطلاب مثلي يحاولون يهربون لكن مع الاسف اغلبهم مسكين ويقع بشباكهم..شباب يعطونهم هدايا وفلوس وحتى وصل الامر للمخدرات
مدرسة عيالي ماهي بحي مشبوة ولكنها في حي معروف ومحترم ومع ذلك ماسلمنا
مع الاسف المدارس صارت بؤرة للفساد والشذوذ واغلب ادارات المدارس يقولون حنا وش دخلنا ومايصدقون يرن جرس الخروج وكلن يركب سيارته ويمشي...والاهل يقولون المدرسة هي المسئولة والاعلام نايم في العسل لانه اعلام فاسد ويغلب عليه بنو علمان
وصارو فلذات اكبادنا كورة يتقاذفونها هؤلاء لابعاد المسئولية عنهم
وينكم يا اباء...وينكم يا امهات ليش ماتوقفون وقفة حازمة وتطالبون بحماية ابنائكم..المصيبة في اغلب التحرشات يخرج منها المجرم بالتنازل او السكوت خوفا من الفضيحة
قبل يومين ولد يغتصب اما البقالة في حارتنا داخل سيارة فيها شباب وشافوهم المارة وانقلبت الحارة ضرب وانتشلو الطفل وهو بحالة يرثى لها وودوه لامه اللي كانت مرسلته للبقالة عشان يجيب اغراض
يا امهات بسكم بسكم ترسلون عيالكم للبقالات خافوا ربكم عساي اموت جوع ولا ارسل ولدي لبقالة
يا امهات ويا باء اولادكم ليش اغلب وقتهم بالشارع بحجة لعب الكورة
يا امهات ويا اباء كل المدارس يطلعون الساعة وحدة بالظهر لكن تعالو شوفوهم امام المدرسة ينتظرون اهلهم للعصر

وبالاخير اقول الان حنا على ابواب اختبارات وكلكم يعرف ان هالفترة فترة خطرة والكل يحذر منها والكل من ضعاف النفوس ينتهزها فرصة لاستدراج ابناءنا لاوكار الرذيلة والشذوذ والانحراف والمخدرات والسرقة وغيرها...نبهوهم وحذروهم من مغبة الوقوع بشباك هؤلاء..اذا راحوا للمدرسة استودعوهم الله واذا انتهى الاختبار وطلعوا لازم يكون ابوه اخوه عند الباب ومايتأخر عليه ولا دقيقة
استغرب من بعض الاهل يخلي ولده عند باب المدرسة ينتظر احيانا الى الساعة ثنتين او ثلاث
ارجوكم اعلنوها حملة ننادي بها اجهزة الدولة بكافة مجالاتها ولاعلامنا خاصة اللي انشغل بقضايا تحرير المرأة ونسي ماهو اهم من ذلك وهو ان يسلط الضوء على قضايا التحرش في المدارس والشوارع وان يحمي ابناءنا من هؤلاء ...ايضا وين دور دعاتنا ومشايخنا ليش مايسوون حملات توعية في مدارس الاولاد...ترا شبابنا فيهم خير ومحتاج بس اللي يمسك ايده ويدله على الطريق الصحيح...ليش ماتوضع ارقام لحماية شبابنا من الابتزاز..؟؟
واكيد اننا مانغفل عن الدور الاكبر وهو البيت....ارجوكم يا اباء ويا امهات.... ابناءنا امانة بأيدينا..تابعوهم وراقبوهم واحتووهم اشبعوا احتياجاتهم النفسية قبل المادية...حنا مانبغاهم ينجحون وياخذون شهادات وهم مهزومين نفسيا ويعانون حنا نباغهم يكونون رجال بمعنى الكلمة يعرفون كيف يحمون انفسهم ويحمونا بعد الله..عودوا اولادكم على الخشونة عودوهم على المرجلة عودوهم على الصراحة..يالوالد لاترمي بحملك على الام ويالام لاترمين بحملك على الاب..الاسرة هي منظومة واحدة وكيان واحد..نصيح ونبكي ونتحسر لما ننحرم من نعمة الاطفال ولما يرزقنا الله بهالنعمة نهملهم لحد يطيحون بشباك المفسدين
ابني وابنائكم يعانون وبصمت متى نتحرك ونحميهم

كتبته بدمي وبقلبي وبلهجتي البسيطة لاني لا اجيد فصاحة الحديث..ولكن كلماتي خرجت من حرقة قلب ام مكلومة..اتمنى ان تلقى رسالتي هذه صداها للاهل خاصة والمسئولين في اجهزة الدولة عامة..
ارجوكم ساهموا بنشره عسى الله ان يحمي ابنائنا من كل من تسول له نفسه خدش براءتهم وكرامتهم وطفولتهم

منقول والواقعة جديده بتاريخ 18-2-1432هـ ,

[اشكي]

جزاك الله خيرعلى التنبيه
حفظ الله ابنائنا وجميع ابنا المسلمين من كل مكروه

[سمو الكلمة]

جزاك الله خيرا

قلوبنا تحترق على اولادنا لكن مابيدينا حيله لردع هولاء الاان ندعو لهم بالصلاح وان يكفينا الله

شرهم عن ابنائنا وابناء المسلمين

[.. ورحـلت الـغاليه ..]

جزاك الله خير

الله يحفظ لك ولدك واولاد المسلمين أجمعين

الدنيا الحين تخووووف ...

[روحي تحبكـ]

جزاااك الله خييير و والديييك ..

اللهم نسسألك حفظ ابنااااء المسسلمين يارب العالمين ..

[سمو الكلمة]

تصدقين من البارح وانا افكر بولدك ربي يحفظه

مادام الامر وصل الى ايقافه من ناس خارج المدرسه اتصلي على الهيئه وان شاء الله ما راح يقصرون

وخلي ولدك يحفظ رقم لوحة سيارتهم

او اتصلي على المدير يوكل كل يوم معلم يوقف برا لين ينصرف كل الطلاب

ولو سمحتي ارسلي لي على الخاص ولا عليك امر

اسم المدرسه وباي حي لاني ناويه انقل ولدي الترم الثاني واخاف اطيح بها

ربي يستر على عيالي وعيالك وعيال المسلمين