[إبداع قلم]

تمر الأيام وتنقضي السنون , ونحن من عجيب إلى أعجب ..حالنا حال غريبة ! كيف وماذا ومتى وأين ؟!
الحميدي ولد رقية ( بلهجة العوام ) يقول :
والله الدنيا عجيبة . قصدي الناس الي ببريدة وغيره من المدن ! سبحان الله !
منول الأبو مايرد على عياله إلا بعين حمراء وعرجد رطبة ( يعني أي كلمة خطأ علطول صبخ ولحط ) أغلب الناس كذا تعاملهم وحياتهم مع عيالهم ..
تخيلو الأبو براهيم يسحب دحيم والعبدي والحميدي والصلحي على وجيههم وهم نايمين لمنهم عيوا يقومون لصلاة الفجر ..وأمهم موضي تروح للساقي تجيب بالطاسة ماء وتصبه على وجيههم تساعد زوجه .
لا وبعد لمنهم ماصلوا بالمسجد قام الامام يعد والي ماحضر يرطبونه رطب وياخذون شماغه .
يعني شيء مايصدق .
لا وأزيدكم ..تشوفون موضي هذي معزرتن ببناته فطيمة وحصة ومنيرة تخليهن يجيبن من مزرعة جدهن ماء على روسهن كل فجر وظهر حتى يغسلن ثيابهن ويسقن البقرة العرجاء ..همن لاجابن عشرة ردود قالت لهن: روحن مع أختي حشن حشيش لبقرتنا وبقرتهم .
يعني كرف .
الأبوابراهيم لاصلى الفجر قام وراح يروس , وقبل يروس يجر دحيم والعبدي والحميدي والصلحي يخليهم يلبنون وينقلون حجر حتى يبنون ويلطسون بيتهم عقب المطر ,,ولامنهم قضوا قال : يالله روحو احفروا القليب الجديد ..
يعني مافيه أبو وأم يصلبونهم صلب طلعوهم رجال.
عاد تعالوا نفرك القناة ..
ماجد وريم مايقومون إلا الساعة ست وربع ..والشغالة عاشة الاندونيسية من الفجر مولمة القهوة والفطور تنظرهم يقومون يصلون الفجر .. والسواق مشغلن الفان يحتري أم الشباب يوديه للمدرسة ..
تقوم ريم وتنغز ماجد قم : صيفت على عملك باقي شوي قم كل لك توست ..لاحظوا ماقالت قم صل الفجر ..!!
عاد يقوم ماجد يغسل وكله نووووم ويقول لريم قولي للشغالة تصحي شوق ورهف وياسر للمدرسة بس خليه ترفق عليهم وتسمي ..
لاجو الظهر مع السواق تستقبلهم الشغالة وتوكلهم وتنومهم ولا صار قبل المغرب قاموا ,,همن يروح أبوهم ماجد يوديهم للألعاب وبعد العشاء ياخذ ريم معهم لسينيز ومن باكر لهرفي وعلى هالحال !!
ولارجعوا بدا ياسر لعب بالاستيشن لادراسة ولا أحد يقوله شيء ..عاد شوق ورهف كل وحده بغرفته مع هالمحمول والله يستر بس.

أعود من جديد لألقي نظرة الناقد الموضوعي :
بالأمس صرامة وحزم , واليوم ليونة ودلال .
بالأمس رجال ونساء , واليوم ( البعض) أشباه رجال ونساء.
بالأمس يخدمون الأبوين , واليوم بالعكس .
بالأمس هيبة وعز , واليوم ذل وضياع هيبة .
بالأمس نفتخر , واليوم الله يرحم الحال .
بالأمس وبالأمس واليوم وواليوم !!
ياليت ننتبه لحالنا - وأنا أولكم - لكن قلت لعل وعسى أن نحل شيئا يفيد الأحباب والأصحاب والمجتمع بأكمله .( موضوع كتبته على عجل وبدون ترتيب للأفكار لأني مشغول وأنا أكتب , فأرجو الصفح والعفو عن الزلل , وما كتبته بالعامية أمر مقصود ,وحديثي عن البعض دون الكل) .

[انسان من بني آدم]

آهــ ياليت الزمن مثل اول

ميخالف شقى وتعب

بس يكفي شي انه ماحد يشوف نفسه

[يرجو ربه]

زمن ماله مثيل وشكرا لموضوعك القيم يامبدع .

فعلا أسلوب خلفه مواضيع كبيرة .

[قمر زماني]

طرح رائع وأسلوب أروع

[MEA]

مشكووووور

[ابن بريدة.]

شكرا لأسلووووبك الراااااااااااائع

[ツ ĴốỖḓ ツ]

ودك تمزج الشدة والمحافظة على الواجبات وتحمل المسؤلية مع هالزمن
يعني حلو إن الله ريح المرأة بها الوقت بالخدم والسواويق
بس بشرط نكون محافظين على ديننا وأوامره وعاضين عليه بالنواجذ
وفقك الله

[شكوسه]

آلله يآزمآن آؤؤل تحؤؤؤلَ

وآلله كلآمكـ صحيح , بسس وين التربيه اللي به ششده مخلين عياله وبناتهم على راحتهم ولايبون يزعلونهم ابد ,

آلله يصلحهم يارب

ويعطيك العافيه ,

[الوزير2]

لا إفراط ولا تفريط ...........

[ولد مجمع سلطان]

الله يرحم حالنا ويلطف بها ويعيننا ...
أسلوووووووووووب رااائع شكررررررررررررن

[الصافنات الجياد]

آسلوووبْ رآقـــيْ ..وطرحح مميّز ..

من آككثر الموآضيع التي شّدت إنتباهيْ ..

فعلاآ ليت آيام الزززْمآن تعووودْ.. آيام جميله تختلف عن هذا العصصرْ عصر التكنلوجيا والتخلف والضيّآع ..

[Bleeder]

أصلن ماحاس هالجيل إلا الشيبان اللي قبل
الواحد يصلي الفجر خوف من ( أبوة ) مهب من ( ربه )
أبوه معودهم على التصييخ والجلد وشي طبيعي إن الولد يبي يكره أبوه ويبي يتمرد عليه إذا اشتد عوده
الافراط في الشده هي اللي حاست جيل هالوقت

[مهزله]

هو انت توكـ تدري كل شيء تغييييييييييييييييير ..

[نبع الوفا]

اييييييه يالحميدي الله يرحم زمان اول