[الـعـابـر]

اقتباس هل المهر يحدد قيمة الفتاة؟ موضوع للنقاش الجاد

لا لايحدد قيمة الفتاة الا اذا ارادت الفتاة او اهلها ان يقيموها بسعر
قد ترى قطعة بمحل قيمتها مبلغ زهيد لكنها لا تمثل لك اي شيء وربما لو كانت بالمجان لن تأخذها
و يأتي شخص من بعدك و يشتري هذه القطعة و هو ( طاير ) من الفرحة ويقول لو عرضتها علي بالملايين لأشتريتها منك ويأخذها و هي تساوي عنده عينيه
واما المهر بالنسبة للشاب فالمشكلة ليست بمن سينتفع منه او لمن سوف يُستخدم كما تفضل به بعض الاخوة هنا للإندراج تحت ( حقوق المرأة ) و الفزعة لها
اقول
ولو كانت على كذا فبعض الشباب مستعد ان يتقبل عروسته بثايبها العادية خالية من اي زينة سوف تزال خلال ساعات
لكن المشكلة في جمع هذا المبلغ و تأمينه

[آبو عمآر]

المهر ليس هو الذي يرفع من قيمة الفتاة فالمغالاة في المهور والمباهاة بكثرتها أمور مذمومة في الإسلام، بل إن العكس هو الصحيح، والدليل على ذلك أن الشرع قد جعل قلة المهر دليلا على يمن الزوجة وبركة النكاح، فقال صلى الله عليه وسلم في الحديث الصحيح : أعظم النساء بركة أيسرهن مؤونة . وفي رواية : إن أعظم النكاح بركة أيسره مؤونة . رواه أحمد والحاكم وقال : صحيح على شرط مسلم.

[الامل الواعد]

اممم المسأله ذو حدين ...تعرفون قصة الي مهره بيبسي وقام رجله على الطالع والنازل يعايره تراك بريال<<ماراءيكم هنا هل يدل المهر الغالى على قيمتها
وبالنسبه للغلااااااااااا وحده اعرفه دفع رجله ميه الف والحين متزوج عليها<<؟؟
الحمد الله عندنا المهر الاكثريه منهم 30والاقليه40 وقلييييييييييل جداا 50 ولكن ارى ان البنت لاترضى بالقليل بحكم غلاء الاشياء التى تريد شراءها كالذهب

[بنت الشرقيه بدم بريده]

هل المهر يحدد قيمة الفتاة؟

مدري بس
انا عن نفسي لا ايش التخلف والتفكير والعقل الصغير على اساس انهم يقولون كذا ويطلقون مثل هذا الكلام وينتشر بين الناس

وهل المهر القليل يقلل من كرامتها بين الناس وفي عين زوجها ؟
انا عن نفسي يصغر بعين من منهو كان ويطيح من عيني ولا اعتبره كبيره او كبيره واشوفه صغير
بس
الحين تعريفين كيف الاسعار وخاصه الذهب ومصممات فساتين الزواج وحتى المشاغل او المحلات الجاهزه اساسا شوفي اسعار فساتين وتيورات المناسبات والسهرات مو عاد فستان زواج"فستان العروس"

كما في قصة تعالي يا أم ريال
بعض العقول وللاسف اكثرهم يب تفس الحاله والعقليه والتفكير ومو بس الزوج او الشباب والرجال حتى البنات والنساء"الحريم " والامهات وخاصه الطبقات والمجتمعات الي تكون اعلى من مجتمع العروس وقليل تلقين احد عاقل و واعي وتفكيره كبير

ام يطرح بالزواج البركه كقوله صلى الله عليه وسلم في معنى الحديث ((اقلهن مهورا اكثرهن بركة))
انا معاك بالنقطه هذي
واساسا المهر عندنا 60- 70 وفيه 50
وامي كان مهرها 60 مدري 70 "الوالده"

وسؤالي إلى البنات ايضاً:

هل ترضين بالمهر القليل؟
انا عادي عندي ومو فرق مع غلاء الاسعار صار كله واحد يالله تلحقين على الفستان والمسكه والطرحه والذهب وباقي اغراضك لليله هذي
والباقي يا اهلك يساعدونك لانه فشله واساسا تستحين وعيب تقولين لزوجك عطني زياده ماكفاء المهر تجهيزي اغراض ماشريتها ايش بيقول عنك

يعني عادي عندي 60 او 70 او حتى 50 الف بس
يكون خلوق ومحترم وذوق سواء بالكلام والمجامله"مجامله الناس" وترحيبه بهم واذا جاء يتكلم واهو يتكلم معي او مع غيري وخاصه اهلي وابوي وامي واخواني
وتصرفاته واخلاق وطبعه كويس ومو عصبي او حار ومو كل شي عنده بسرعه بسرعه وخاصه السواقه"واهو يسوق السياره" اكره شي عندي السرعه وخاصه اذا كنتي بتروحين لمشوار او بتزورين احد من اقاربك هذا ما احب احد يسرع ولا راعي"مو راعي" نظرات
مثل قبل امس رحت انا واهلي ومعنى ابوي على اساس نقضي لبيتنا ومر واحد مع اهله معاه 3 مدري 4 حريم ما انتبهت وقاعد يكلم راعي المحل والي يشتغل فيه ويساله عن حاجه ومرينا واتلفت وصرا بوجهي وعيني فتحها على وسعها انا انصدمت وبغيت اكفخه واطيحكه واشوته واضربه بس فيه ابوي ولا ومن زينه وقوي عينه قزم يمكن ما يجي نصف طولي او اقل ولا ودي ضاربنه برجلي ودافته بيديني وتافله عليه الي مايستحي لو انه مو هامه احد ولا هامه الي ربي كاتبه وامره وقاله اقل شي
ولا هامه حرمه غيره ومايجوز وحرام انه يناظر بحريم مو محارم له احترم وخاف على الي عندك ومعاك
والمشكله مغطيه عيوني ورافعه شي بسيط ويمكن لو انه مو راعي نظرات كان ما انتبه ومن زين العبايه الي لابستها وانا ما اقول انها مو عاجبتني بالعكس عاجبتني وافتخر فيها لو مو عاجبتني كان ماشريتها ودفعت عليها فلوس ولبستها من الاساس بس
قلتها تعبير عن شكلها وشكلي الي يشوفني يقول ام عيال وبتزوجهم"بتزوج عيالها او مزوجتهم" من الي يشوف شكلي بالعبايه وانا مرتاحه وعاجبني اقل شي افتك من الشباب والرجال بس الحمار ما استحى ولا عطى ابوي اي اهتمام ولا احترمه واستحى على روحه ولا ودي اني ادبته بس ابوي فيه ولا كان عطيته كم تهزيئه وخليته يحترم ويعرف قدر نفسه ويشوفني بنظره حسيته بنفضه وقشعريره والدم نشف وانصدمت وبغيت اشهق وجمدت بمكاني بس على طول صحيت بس على اساس اروح لـ اهلي قبل لايروحون واضيعهم واقعدور عليهم
بس جد انقهرت وبغيت اصيح بسبب"بسبت" نظرته ومن الي يشوفه يقول لابسه عبايه تفتن ولا شفافه او مفتوحه وطالع لبسي"ايش لابسه" او عبايه ملونه او فيه موديل ولا فيها حركات او فيها طبقات او فيها لون واحد داخل او محدده بـ لون معين على اطراف العبايه او فيها لمعه

وانا عندي اهم شي ما يكذب علي ويصارحني بكل شي
وماله"وماعنده" سوابق سواء بـ النت او برى النت سفر ولا مو سفر جوال مكالمات اورسائل او مكالمات ورسائل سواء نصيه او وسائط او بلوتوث
ومو جوال مكان عام او مو مكان عام اكيد فاهمين ايش اقصد مو لازم اوضح

أم أن المهر القليل يجعلكِ قليلة المستوى بين الناس؟
لا ايش النظره والتفكير بس
تعرفين الاسعار كيف وخاصه الذهب وفستان العروس غير الطرحه والمسكه وووووو ......... الخ وانت اعرف مني ومن البنات بالاشياء هذي

وقاعه الزفاف هذا اذا ماكان اهل الزوج قالوا بنساعدكم بالنصف او نقسم احد عليه العشاء واحد عليه القاعه والتقديم يعني حسب الي بتاخذ منهم العروس وتناسبهم ويكونون حمولتها"حسب العروس ومن حمولتها"



والي يقول كيف اجيب مهر مره وحده بالمبلغ الي تبغاه
فيه شي اسمه افتح حساب ولا تسحب منه ولا هلله لو تقعد بالبيت ولا تطلع منه غير للشغل
مو تبغا تتزوج وتكوون عايله لازم تتعب ولا تنسى انه بيكون من فلوسك انت وفوق كذا بيكون حلال يعني من تعبك وعرق جبينك لو تتوظف وظيفتين باليوم او ثلاث وظائف مو حسافه او تقول تعب لا مو تعب ولا شي بتضيع وقتك وبتستفيد وبتطلع فلوس وتكسب خبره وتعرف للشغله هذي وتجمع حق المهر والبيت وزياده بعد بس اهم شي ماتمل وتعزم انك تشتغل من اليوم اي وظيفه

انا لي يومين فاتحه قناه بدايه وانصدمت بواحد يمكن عمره 22 سنه يعني صغير او يمكن اصغر مشارك بس على اساس يعلم ويشوفونه وكلامه ولا رجال واخلاقه وتربيته ويقول ولا اجلس بالبيت احد يصرف علي ابغا اعتمد على نفسي ومتى بدى يشتغل قبل ثلااث سنـــ 3 ــــوات اشتغل وكون نفسه بس على اساس يعز نفسه ولا يمد يده لغيره مدام عنده يدين ورجلين والحمد لله سلم ومافيه شي او مو تعبان ليه مايشتغل وماشاء الله تفكيره كذا من يوم اهو مراهق ومع كذا فكر انه يشتغل وفكر تفكير ارجال وفكر صح ماقال انا توي بدرس وبكمل وتوني صغير ومراهق وبكون مثلي مثل غيري لا بالعكس ومع كذا يشجع على الشغل والاعمال الحره

وترك الدراسه بعد ماخلص الثانويه يعني ماكمل جامعه ولا درسها اساسا بس على اساس يثبت ويعلم انه الشغل مو عيب وتقدر تشتغل حتى لو كنت مو معاك شهاده جامعيه ولا درست جامعه والحين فاتح له شركه خاصه فيه ويشتغل فيها


الشغل مهما كان مو عيب حتى لو كنت تبيع بالعثيم محاسب سوبرماركت

وخاصه انتم يالشباب والرجال لكم مجالات عمل وتقدرون اي مكان تشتغلون فيه واي وقت اكثر مننا يالبنات
مو مثلنا يالبنات مو اي مكان يصلح لنا ولا نقدر نشتغل باي وظيفه وعلى حسب المجتمع الي احنا فيه والنظره والي يشوفونه ومقتنعين وعادي عندهم انه البنت تتوظف بالوظيفه الي يشوفونها عادي وتصلح ومناسبه لـ اي بنت وفيه بعض الاهل مو كل وظيفه بس الي تكون من نفس تخصصك وشهادتك ولا اقعدي ببيتكم ولا اذا توظفتي بعد ماتكلمينهم كذا مره بتقولون عندك وقدامك او من وراك كلام او يضايقونك بكل شوي بكلمه بس على اساس تتضايقين ويكرهونك بالوظيفه الي متوظفه فيه من غير اقتناع تام ومقتنعين فيها مره والود ودهم انهم يوظفونك بالوظيفه الي يبغونها اهم وكانهم اهم الي بتوظفون فيها مو انت ويختارونها اهم لك مو انت هذا غير الكلام الي من وراك "الكلام الي من ورى ظهرك"

[تيجان]

أغلب الشباب نايم ببيتهم واذا بغى يخطب راح لم أبوه يعطيه المهر ويدفع عنه أجار الشقة أو يسكنه عنده
رجال اليوم ذكور وماعندهم أحساس بالمسؤلية وأكبر هم لهم الأكل ونصب السيارات والأسترحات وأول ماتجيه الفرصه سلم زوجتة كل شي وصار فقط ظل رجل ليس ألا

[ماعلينا من الناس]

اقتباس المشاركة الأساسية كتبها ~طريق السعادتين~ بعد إذنكم لو رجعنا جميعا للمقصد الاول من الزواج لحددنا قيمة المهر ... قد يعجب احدنا من فتاة اشترط مهرا كبيرا وجليت في منزل والدها تنتظر من يطلبها ... ليتنا نعود إلى الصدق حقا فيما شرع المرأة كرما لها مهرها ... فياليتها تكرم نفسها ... قلة المهر لاتجعل المراة حقيرة عند مجتمعها إنما الحقير من ظلمها وعيرها ... وفي نهاية الأمر انظروا إلى عادات المدن الأخرى كيف يتمنون عادتنا في تقليل المهر هناك من أعرفها تقول أنه بعد زواجي قال لي زوجي : لقد أحرجني أهلك لما قلت لهم كم تريدون المهر ؟ قالوا ما أعطيتنا رضين بها يقول : فأعطيتهم 300.000 ريال وكنت ما أملك فزادهم احتراما وتقديرا

معقوله ثلاث ميه الف
'
'
اكيد المهر مايحدد قيمه الفتاه لو مهرها ريال

لو رجعنا لاصل التشريع من المهر
هو كـ الدين تحتفظ فيه المرأه واذا هي طلبت الطلاق
ترد لزوجها المهر واذا هو من بادر وطلقها يكون النهر
مُلك لها


وحنا نروح نسوي عرس وعشا وجهاز وملابس وغيره

[حنيني88]

الحمدلله بخير جعلك انتي بعد بخير
عن نفسي والله حرام وربي حرام غلا المهور مدري من هلبنت الي بيأخذونها
والله لو اني ولد ما اتزوج ولا ادفع لوحدة هلقد من الفلوس
حرام والله وراهم غير المهر فندق او صاله اوشئ بيحتفلون فية
والاكل والهدايا فترة الملكة و و و و والله مكروفين هلشباب
من جد رحمتهم ياخي انا ولا انتي محنا احسن من فاطمة رضي الله عنها
شوفو ايش كان مهرها وحنا هنا البنات ابي وابي وابي لية بس من تكوني
حتى لو الزمن تغير الدين ما تغير نسبه الى الحديث الي قلتية
واذا كانت هي البنت الي طلبت وهو عندة كيفهم بس المسكين اذا ما عندة اكيد في بنات راح يقولون اجل ليش متزوج
بعدين نظرة الرجال ممكن تتغير لهلبنت
الله يعينهم بس
يعطيك العافية

[الرجم العالي]

اريد مهرا يُتم هذه الفرحة ومناسبتها ...

ولست أُريد بيع (إبنتي) !!

لأنك لو وزنت كنوز الدنيا بأُنمل من أناملها لم توفي حقها..

( الله يكملنا بعقولنا).

تحياتي...

[الوردة الخضراء]

قيمه البنات في الاخلاق وتحمل المسئوليه بعد الزواج

[أبو داود]

لنفكر معاً في هذا المثال ونحلله :

لو أتى رجل من أفضل الرجال خلقاً وديناً

وطلبتوا منه بمهر بالنسبة له كثير فلم يأخذ بنتكم وذهب يبحث عن غيرها

هل خسر هو شيئاً ؟
هل خسرت البنت شيئاً ؟

الجواب سأجعله لكم.................................ز

[.. ورحـلت الـغاليه ..]

قوله صلى الله عليه وسلم في معنى الحديث ((اقلهن مهورا اكثرهن بركة))


~
قريباتي ثنتين خوات وحده مهره من 40 الى 50 ما اعرف بالضبط
المهم خلص مهره وهي ما بعد خلصت اغراضه طلبت من اهله زياده ..
والثانيه 30 مهره .. خلصت مجهزه وبقى من مهره والله
ربي يسر له وبارك بمهره ..

فالوسطيه احسن شي ...

>وجهة نظر<

[ماعلينا من الناس]

عاد انتم لاتشطحون كثير
لو كنا واقعين حنا بزمن الماده
افضل شي واحد ياخذ بنت من ثوبه ومن مستواه
لايروح لبنات الهوامير ويقول ماقبلو والسبب المهر
هم طبعاً ناس متعودين ع المهور العاليه


وتنتهي السالفه