[عسـول]

رحلة عمرة في باريس ..

المهم انا عاد مثل منتم خابرين بار(بار ولا ديسكو) <-[داشر هالولد]
انا بار بوالديني،عاد قبل اسبوع قالت لي اميمتي قم يابو جبيهه(شفتوا امي تدلعني)
ودني انا واخوانك وجدتك نبي ناخذ لنا عمرة. قلت انت تؤمري ياجميلة ياماما ياست الحبايب ياحبيبه
.وما امداني اكمل حتسوتي الا اشوف قوطي تونه عالق في جبهتي، وتقول اقول انطم ولا يكثر بس
. قلت سم امري، يالله ازهبوا(يعني اجهزوا..للي مايتكلم باللغة العربية)
المهم عاد انا عندي اخوان مشاء الله عليهم فوق روسهم دويره ولهم اجنحه ولابسين ابيض
في ابيض وانواع البراءه تقطر من خششهم. عندي اثنين واحد اسمه دحيم 24 ساعه
يلاحق في القطاوه ويقول اذا كبرت ابصير طرزان. والثاني اسمه عليان وهذا عين
الله تحرسه آخر العنقود، وهوايته الاولى انه يرقى فوق السطح او مع الدريشه ويقعد
يتفل على الرايح والجاي(انا اللي قاهرني وين يجيب السعابيل منه لعنبو خامسه ماتخلص)!!!
والطرف الرابع جدتي وهذي حدث ولا حرج ماخذه الدنيا على جنب ولا عندها في احد
تقول انها متعرفه على جدي يوم انه كان يصيد دخل
(الدخل= نوع من الطيور)
وبالغلط وهو ماوزن النبيطه جاب دمجتها، وصار الحب من اول صفقه.
المهم قلنا نبي نروح في طياره اسرع وعشان جدتي ماتهون لأنها راعيت مسكات.
المهم وبما اننا وجميع العائله دلوخ رحنا للصالات الدوليه!!!!!
تقولون لي وشلون ركبونا الطياره و وشلون صارت جوازاتنا معنا، اقولكم( المخرج عاوز كده).
المهم ونركب والله في ذا الطياره واول ما ركبنا ولا العالم شبه متستره، وامي تقول
يا الله انك لا تعاقبنا شف هلي ماتستحي على خشتها لابستن غطوه شفافه جعلها الماحي!!!
ويستلمونها امي وجدتي.
<- البنت راحت للطيار تقول ياترجعني ياتذبوني من الطياره (البنت استخفت)
وفعلا" ذبيناها من الطياره وهي تقول نعم للحريه، وممداها تكمل حتسوتها
الا زنوبة جدتي في خشتها!!
صراحه تبطينا جده ماوصلنا ومير تقول جدتي انا هونت ابي اعود لبيتي (جتها الحاله)
وانا اقعد اسايرها واقول لها انتي ماتبين تعتمرين،ماتبين تحطين لتس ولو
حسنه في ذا الدنيا قبل لاتودعين
->(نذل)، وهي اللي تناظرني بعين الحقد وتقول جعل يومك قبل يومي، قلت اعوذ
بالله مابعد مليتي اللي في عمرتس الحين عيالهم يتشهدون، ومير تناظرني امي وتقول
جعلهم يعزوني فيك (تبون الجد هالعائله خرطي)
وانا اقول لامي وين عيالتس المهبل؟؟؟ قالت مدري عنهم يمكن انهم يلعبون منا ولا منا؟!
وانا اللي اروح ادوور في هالطياره ادور عليهم!!
الا اشوف المظيفه واقول لها هي انتي ياسستر-> (يسمع بالمستشفى) وهي اللي تناظرني
وهي تحقد زود على حقدها وتقول وشتبي؟؟ قلت ماشفتي طفلين حلوين هنا قالت لا لا
. وانا اناظر الا اشوف اخواني دحيم داخل الحمام ومشلح اللي فيه كله وقاعد يسبح
من داخل والناس برا مزنوقين. وانا اللي افتح عليه الباب الا يرشني بالمويه
ويقول ياقليل الادب<- موب عاقل اشوا انه يسبح بثيابه موب حيا منه بس عجز لا يفصخها.
المهم وانا اللي امسكه وامحطه بالعقال، واقوله وين اخوك؟؟ قال مدري بس اخبره
محجر لبزران ورى. واروح اشوف الا اشوفه محجر لبزران هاي هاي ويقول لهم انت
وياه طلعوا الهدايا اللي عطوكم ايها الطياره هذي طيارتنا
(الحمار امه ضاحكتن عليه ومصدق انه يبي يصير طيار وهذي اذا كبر له).
المهم وانا اللي امسكه وارجع اللي زارفه من البزارين لهم وهم يصيحون ويقولون مانبي شي.
<- اثره الملعون قايل لو خذتوها بفقع وجيهكم وخايفين المساكين.
واجمع اخواني واروح اربطهم في كراسيهم، واشوف الوالده وجدتي الحبيبات موقفين
المضيفه عند راسهم وانواع القهوه<- خلصوا ثلاث دلال ويمشون في الرابعه.
راح من الوقت 3 ساعات ولا وصلنا جده؟!؟
انا قلت بس شكل الطياره مخطوفه-> (مشكله الدلوخ اذا فكروا مشكله)
وانا اللي اسأل المضيف واقوله هلحين المختطفين وين يبي يودونا؟؟؟

هم سمعوا مختطفين وانواع الحوسه في الطياره!! ويجون عشره فوقي وانواع التربيط
ونفضوني نفض يحسبوني ارهابي. بس بعد عناء طويل يالله جت المضيفه وفهمتهم
اننا عائلة دلوخ ولا علينا شرهه وتركوني (اول مره احس ان الدلاخه يمكن تفيد)
المهم وانا اللي اسأل المضيفه كم بقى ونوصل جده؟؟
وهي اللي تناظرني باستغراب، قالت خير وش تبي انت؟؟
قلت ابي واحد بيض واثنين كبده!!
وهي اللي تمسك الصينيه اللي معها وتسفها علي وانا بحركه سريعه تفاديتها وتصفق
في دمجت جدتي!! عاد هي مودعه خلقه وجتها هالصفقه عز الله راحت.
وانا اللي اروح للمضيفه واقول ياويلتس ياويلتس من امي->(ابو البزران كلهم ياشيخ)
وهي اللي تقول انقلع انت وامك->(خربتها الاخت)
وتقوم جدتي وبعصاها تتل المضيفه مع رقبتها وتمسكها مع اذنها وتمصعها لها مصع
لين ماقالت المضيفه ابي كراث.
المهم وبعد 8 ساعات ونص او زود ( لاتقولون بسرعه وصلتوا اقول الطيار كان عنده
موعد وداز الطبلون...واذا قلتوا طولتوا اقولكم انه بنشر علينا الكفر في الخط..)
قالوا اننا وصلنا لباريس؟!؟!
->(طارت بوهته) وغدت حواجبي تقول كنها الساعه وحده وربع. ومير اروح لميمتي
واقول لها وصلنا، قالت لبيك اللهم لبيك، قلت وش لبيكه انتي الثانيه حنا في باريس.
قالت وش عاد مايخالف ناخذ لنا تكسي ويودينا لمكه.
<-( الحبيبه تسمع بجده)
قلت ياميمتي حنا برا السعوديه.
قالت وين حنا فيه؟؟ في امريكا (مايعرفون غير امريكا من لعانتها)
المهم قلت لها ايه امريكا
(والله لو ابطاولها تسان حطيت موضوع كامل بس عشان اشرح لها..عاد انا وارث الدلاخه منها)
المهم والله وننزل في المطار يوم غدت خششنا (لاتعليق)
المهم عاد هناك انواع الفصخ وجدتي وامي مايستحملون المناظر هذي
<-(صايرات مندوبات الهيئه في باريس) وكل شوي ماسكين وحده وانواع الهواش معها.
ثمين تعبن وجلسن.
امي: اقول ياميمتي الله لايخزينا وش ذا المارجات الجعلهن الماحي.
جدتي: دوتس هذيك مطلعتن عصاقيلها جعلها القص.
امي: اقول يابو جبهه
<-(عاد انا وذا المهبل فاقين خششنا وانواع السعابيل تقول كنا بزابيز برادة مسجد تهرب)
قلت: يالبيه
ما امداني اقولها الا جدتي تكمل لبيك اللهم لبيك لبيك لا شريك لك لبيك<-(تسمع بالعمرة)
وانا اللي امسكها انطلها مع العفش
قالتلي امي: اقول جب لنا تكسي خلنا نروح نتلين في فندق، قلت طيب
وادور اخواني الا القاهم جايني يمشون الفين، و وراهم كلب وش كبره
<-( الملعن مرجمينه)
وانا اللي امسك جدتي واذبها مثل العظام ويلحقها الكلب واشوف غبره وطقاق
وآخرتها لقيت جدتي راكبه فوق الكلب ورافعه اصبعين
قالتلي جدتي: اقول قم جب تكسي انت ولبسك تقول كنك صبي بوفيه
قلت: من زينتس هلحين انتي وذا اللبس تقول كنتس قراطيس زباله
قالت: اقول انطم لا امسك خشمك بعصاي وادق سلفك
قلت: تكفين لا هالحين افصل الحجار(البطاريه) اللي تشتغلين عليها لان مدة صلاحيتس خلصت
-> (مهوب يستحي ابد)
ومادريت الا امي طابتن معها وصفقوني تصفيق،خلوني اتكلم فرنسي من الطق.
المهم والله واخذ تكسي واوديهم للفندق.واول ما حجزنا السويت ورقينا نتلين (نرقد شوي)
رحت انا واخواني نبي نجيب غداء.
ويوم عودنا وافتح الباب!!!!
الا اشوف جدتي معها كاس وثلج وتطل من الدريشه وتتفل على العالم، وامي ماسكه الديرم
وتكتب على الجدران يعيش بن لادن وتسقط امريكا (سياسيه البنت)
المهم وانا اشوف وش السالفه؟؟؟
اثرهم شاربين من الشراب اللي في الثلاجه يحسبونه عصير...واقعد ساعه اركد فيهم.
<- الملعن اخواني راحوا لجدتي وعطوها دخان ويقولون لها مزي يا ام عزيز...
وهي تقول عصبوا الشباب عصبوا الشباب(لاتواخذونها فيها عرق لبناني)

ويالله هجدنا الموضوع واطلع شوي وارجع الا عيت علي امي ادخل تقول عندنا حريم لا تدخل

-> فق خشته وش حريمه؟؟
اثرهن مدخلين( ال؟؟؟؟؟) اللي في الفندق.
طبعا" امي وجدتي الا اللحين مابعد فكوا،واطل عليهم واشوف جدتي تقول لوحده
انتي وش تدهنين رجيلاتس به، اقول حصيصه(حصيصه امي) شوفي لعنبو خيرهن
ماعندهم ركب موب مثل بناتنا اتقول فاركتن ركبتها في زفلت!!
المهم والله واروح للامن واخليهم يطلعون البنات، وجدتي انواع الحلوف انهم يتعشون عندنا
<- طبعا مافهموا شي بس مبسوطات على العجز
قالت امي انا بروح اتمشى ودني السوق(ياحب الحريم للسوقه)
والله ونروح ونجلس في كفي وتجلس جدتي مع وحده عجوز يالله تتحرك عمرها
يطق 300 وتخرط هي وياها
واخواني قاعدين يلاحقون الحمام وكل مامسكو وحده نتفو ريشها وحطوها على جنب،
شوي الا اشوفهم متهاوشين مع واحد فرنسي واحد كبر بليس، بس الرجال خايف منهم
سمعهم يقولون والله لانجيب لك بن لادن يلعن خامسك
<-هذاك سمع بن لادن وهو اللي يشخط
واشوف اميمتي جايبينها الشرطه يقولون انها سارقه من محل
<- الحبيبه شاريه وماخذه زياده تقول لها هذي عاد هديتن لي واللي تبيع قامت تضحك..
امي حسبتها تقول مايخالف وهي اللي تحطها في الكيس وتمشي.. وتطمر هذيك تنادي الشرطه
..ويالله فهمتهم الموضوع
شوي الا جايه جدتي تقول ليش تترك امك بروحها يالملعون وتصمخني بالعصا ويغمى علي
واقوم الا انا في الطياره وهم يعلنون عن وصول الرحله الى جده
الا وجدتي تخبطني بالعصا وهي تقول لبيك اللهم لبيك قم يالله شل شنطتي
واعتمرنا عمره الله لايوريكم كلها مطاق وتلعين
الله يقبلها بس..


،

منقووله

[قائد المجد]

رحله موفقه...&#191;
بس لاتنسى تنزل الصور ·_~

[*ذيب الليل*]

هههههههههههه
وش هالحلم ؟؟؟
ياهو طويل


مشكووور على الموضوع
تقبل الله منكم

[قــــراقــــوش]

هههههههههههههه

قسم بالله رهيبة مرررررة..!!

فطست من الضحك..

مشكور أخوي .. وكل عام وأنت برحلة مثل هذي << بس لازم تكون الجدة معك << على حسب كلامك تتوقع تكمل للسنة الجاية..

[m.a.s.i_1]

المفروض تسميها رحلة اللعان كلهن لعن ولعين هداك الله