[manedl]

السلام عليكم ياشباب وياصبايا بريده ستي كأعضاء وزوار
ياأخوان أعذروني على سؤ الإسلوب فأنا سوف اتكلم بعفويه تامه وبساطه وسأسمي الأشياء بأسمائها لعلها تصل وتجد آذان صاغيه.
أحبتي كلنا نحب ننبسط ونعيش حياتنا لكن بحدود صح ولا أنا غلطان ؟!!!
انا عندي استراحه تأجير يومي وبصراحه ضيق صدري مايحصل من بعض المستأجرين الله يهديهم والله العظيم وربي بيسألني عن ماكتبته يوم لاينفع مال ولابنون ويوم يجعل الولدان شيبا من هول الموقف , نسأل الله العفو والعافيه
بصراحه بقدر مايوجد مستأجرين يخافون الله تجد هناك فئه قليله ولله الحمد لاتقدر نعم الله واني حزين لأمرهم أشد الحزن
اليوم صبيحة هاليوم المبارك يوم الجمعه خفت ربي ان ينزع نعمته ويسخط علينا .
رحت الأستراحه وشفت شي يهول شي ماهو طبيعي ابدا.
النعمه منثوره ومحيوسه بكل مكان من الإستراحه , قسما بالله كيستين من اكياس النفايات الكبيره مليانه خبز وقطع لحم مشاوي وفاكهه وسلطات بحوش الاستراحه من كثر ماهي مليانات تشققن وانتثرتنعمة ربي بالأرض لا وقطع الكيك بكل زاويه ومديوسه بالأرض وتحت المراجيح وعلب مشروبات مفتوحه ومليانه , والفرن عليه قدور مليانه رز ماأخذ منها الا القليل وواضح عبث الصغار فيها لأن ارضية المطبخ مليانه رز مكبكب وللأسف أشد الأسف حاولت اشيلهم وأوصلهم لأقرب مزرعه فيها أغنام لكن انصدمت يوم شفت أعزكم الله ان من بين بقايا الأطعمه حفائظ أطفال وفوط صحيه نسائيه وأشياء يندى لها الجبين , والله العظيم شي يضيق الصدر , شلتهم ورحت لنفود قريب ودفنتهم بالرغم اني حاط بالإستراحه ارقام تلفونات فقراء محتاجين بناء على طلبهم والله يعلم بحالهم ماكلف واحد من عقلائهم نفسه ودق عليهم؟!!! .
انا ماأبي اتكلم عن الأشياء الخاصه بالإستراحه ومدى تلفياتها خشية انكم تقولون القصد من مقالك هذا المحافظه على الإستراحه لاوالله قصدي التنبيه والنصيحه والخوف من الله .
خافوا ربكم واللي نظيف ببيته يبقى نظيف بكل مكان , كيف عيالكم يشوفون سواياكم وانتم قدوه لهم !!!
امحق من قدوه !!!
الله يهدينا وياكم ويصلح امورنا جميعا , فحذاري من غضب الله
طولت بالسالفه واتمنى انها وصلت الفكره واله المستعان .
والله يحفظكم ويرعاكم
وأعتذر من سؤ تعبيري
ياناس ياعالم خافوا ربكم وتذكروا جياع المسلمين
قسما بالله العامل يقول ( هذا نفر خربان ) استحيت منه والله
دمتم بود,,,,,

[احلام 99]

الحمد الله ع النعمه
ايوه والله انك صادق اخوي الله يهديهم يارب

[مـغـتـرب]

كيف تكون التربية الحسنة , وهم يفعلون هذا بما أنعم الله عليهم..
أم كيف نأمن العقاب من الله؟ ونِعَمُه تُداس تحت الأقدام!
اللهم ارزقنا شكر نعمتك ..
بوركت أخي الكريم

[الــنــســيــان]

قد ينعم الله بالبلوى وان عظمت ..... ويبتلي الله بعض القوم بالنعم

انه الترف سيدي فقط هو الترف ...!!!

ولعنة الله على مثل هذا الترف..!!

سيدي هؤلاء ابتلوا بالنعمة فأحرقوها ليحرقوا قلوب أرقام وضعتها..!! على وريقة خلف باب استراحتك..!!

وكذا التفهاء ما ان يعطوا النعم إلا قلبوها فحق عليهم القول ..!!

وصدق الرب القائل..!!

""" وإذا أردنا أن نهلك قرية أمرنا مترفيها ففسقوا فيها فحق عليها القول فدمرناها تدميرا""

[الرادو]

جزاك الله خير

[!!..Wolf]

قال تعالى :

""" وإذا أردنا أن نهلك قرية أمرنا مترفيها ففسقوا فيها فحق عليها القول فدمرناها تدميرا""

88
الله يسسستر عللليينا ..!!

[بنت كفو]

لاحول ولاقوة إلا بالله ،
الله يهديهم ويتوب علينا وعليهم ،
(هذا نفر خربان ).

[حربي عابر دربي]

الله لا يبلانا ولا يواخذنا بما فعل السفهاء منا

هذي الله يسلمك هي التربية والقدوات السيئة مع الاسف الشديد

وقاعدة ( خلن نحلل اقروشنا )

الله يعينكم

[ـالتُفاحة الورديّة]

^^
مبدأهم مو تحليل القروش هذا إسراف وفسق


النعمة تبي شكر

( ولئن شكرتم لأزيدنكم )

الله يتوب علينا

[ااانا]

اقتباس المشاركة الأساسية كتبها حربي عابر دربي الله لا يبلانا ولا يواخذنا بما فعل السفهاء منا هذي الله يسلمك هي التربية والقدوات السيئة مع الاسف الشديد وقاعدة ( خلن نحلل اقروشنا ) الله يعينكم

وشدخل تحليل القروش باللعب بالنعمه ؟؟؟


حسبي الله ونعم الوكيل عليهم

[manedl]

اقتباس المشاركة الأساسية كتبها ااانا وشدخل تحليل القروش باللعب بالنعمه ؟؟؟ حسبي الله ونعم الوكيل عليهم

فعلا اوخيتي بعض الناس الله يهديهم له نظره غريبه جدا وقاعده يمشي عليها ويعلمها لأبنائه ومن تحت يده بكل أسف وهي قوله ( هو معطينياها بلاش خربوا وحوسوا لو بأثمن شي عنده ) ويتناسى ان صاحب الإستراحه لم يضربه على يده لكي يستأجر .
رحم الله والديكم جميعا

[المقصل]

بداية أيها المبارك أحب أن أهنئك على هذه النفس الغيورة السامية و لو كنت أعرف اسم الاستراحة لكانت من أول الخيارات لدي , فهذا الاهتمام قل ما اسمع عنه من أصحاب الإستراحات و أماكن الاجتماعات و هذه و الله من يسعد القلب فالحمد لله أن جعلنا من بيننا أمثالك , و فكرة التواصل مع المحتاجين و تزويدهم بالطعام فكرة جميلة جداً ليت أصحاب قصور الأفراح و الاستراحات يستفيدوا منها فأسأل الله أن يجزيك خيراً و يبارك لك في مالك و ذريتك و يفتح عليك أبواب الرزق إنه سميع مجيب .

أما عن موضوع الإسراف و التبذير و كفر النعمة ففي قلبي الكثير الكثير تجاه هذا الموضوع و حسبي بحديثك هذا موعظة لمن كان له قلب منا , انظروا و اسألوا عن حال البلد قبل النفط و بعده, ذكر لي أحد كبار السن أن الرجل يجلس ثلاثة أيام لا يجد ما يأكل , و حسب حديث الخبراء أن النفط لا يعلم متى نفاده فلربما كان قريباً و لربما بعيداً و الله أعلم , فلسنا سوى بشر كغيرنا من البشر ممن طحتهم الحروب أو قوم هلكوا جوعاً , و للأسف أن قضية الصومال ليست ببعيدة و الصور منشورة على صفحات الإنترنت لطفل تبيس و برزت عظامه و مات لانعدام الأكل و في إحدى الدول الإفريقية أكلوا أوراق الشجر حتى نفدت فما بقي لهم سوى أن يشاركوا النمل في أكلها و الحديث ذو شجون
نعوذ بالله من سخطه و نسأله شكر نعمة

بارك الله فيك

[manedl]

بارك الله فيك أخوي المقصل وجزاك الله خير على دعواتك

نسأل الله انه يديم علينا نعمه

[ام البنات99]

صدقت والله اني اشوفهن باالسوق وانقهر تلقاه تجلس تاكل وتقوم تخلي النعمه باالارض يوطونه البزران او تسحب بزره وهو معه اكل وينكب منه والناس وراه توطي الاكل ولايهمه النعمه ولاتخاف من الله
الله بس لايسخط بنا ولايحرمنا شكر النعمه