[كَـارِيـزْمَـا ©]

.



صادقة جيهان
السوق الداخلي :s
لا واللي يرحم والديكم لا يلمحه , فشيلة , أخاف يجهز تبرعاته <3,/

+ وهج الأمل >> بالعكس هالموضوع مهم .. أعرف واجد يسألون هالسؤال وأستحي لآني ماعندي إجابة <3

[بدون اسم...]

اقتباس المشاركة الأساسية كتبها جيهان بدون اسم ..من جـــــــد..؟ أخي بندر.. تعرف السوق الداخلي ترا سوق متهالك ماينفع للزياره..[/center]

ايه من جد , وهو أول مكان لازم يزوره يعني مثلا تبينه يروح للنخيل او العثيم << هاذي موجوده بكل مكان



السائح الجيد لابد ان يحرص على زيارة الأسواق الشعبيه للمدينة ..ماشفتي مقطع أمريكي ببريدة الظاهر أنه رايح للامكان هاذي



على فكره اذا جيت لبريده أحب أروح للداخلي مو عشان التسوق أحب الأجواء هناك .. ناس يبيعون بعربيات وبسطات .. والي يسوق لمحله



بقول قربي يا بنت.. وتعالي ترا كل شيء بعشره << عاد ترا لي أربع سنين مارحت أغدين المره الجايه أروح..

[تهاني...]

.

.. اذا ماتحركـ ياليته مايجزم ............

[سيلينا]

^^

لو ما يجي احسن ...
بريده تفشل مافيها أي شي اهل بريده نفسهم
طفشانين و متضايقين و ما يدرون وين يروحون .!!

الشوارع تجيب الهم و اذا اخذته للبر يعني وش كثر راح تجلسون
عسيلان ما اعرفها و البرج يجيب المرض مصدقين انه برج و يطل على بريده
بأختصار ملل x ملل

[الارض الطيبه]

فيه اماكن مثل الضاحي الفاخريه شارع الستيشنات خليه يدور مع اللي يدورن

[ونـاسه]

وراكم يااخوان متشائمين وبعضكم مب عاجبته بريده ..؟

بالعكس انا شايف ان بريدهـ من افضل المدن السياحية اذا كان الجو مناسب ..
خصوصاً هالايام..

اخوي بندر ..
عندك الجردة ممتازة انك تمشيه هناك يشوف الاسواق القديمة والمعروضات التراثية.
ايضاً
عندك مركز الملك خالد الحضاري.. معلم تفتخر به اي مدينة.
ايضاً
عندك مثل ماقالوا الاخوان الطرفية وعسيلان اذا صارت مليانه.. او في اجازة الاسبوع.
ايضاً
عندك المزارع الحلوه والشرحه مثل مزارع السلمان او في جنوب بريده.
ايضاً
عندك جامعة القصيم بالمليدا.. زينه ماعليه .. خذه ساعه تمشية.

[فلاش احمر]

رب اغفرلي

حياه الله ببيته الثاني
يكفيك الجو الخيال والخضره بكل مكان
ياحول اللي ماله بريده

[التيجان]

لايجي ابرك له

[ام لسانين]

والله شف اول مايجي رح بوه لم البر عسيلان خلوه يشوف التطعيس وتسذاا وخلوه يركب دباب وهمن انت طعس بوه بس انتبه لا تقلب بوه وهمن رح بوه لمحطه عسيلان وخلوه يشوف الزحمه وهمن رح بوه لم مخيم واذبح ذبيحه وغدوه وهمن اذا صار المغرب رح لف بوه مر ع النخيل ومر على العثيم << طبعا من برى خلوه يشوف لانه مايدخلون عزابيه هههههههههههههه المهم بعدين رح بوه للبرج ويمين يسار لين يدوخ راسوه وخلاص شاف بريده كلها هههههههههههههههههههههههه

[صوت البحر]

بارك الله فيكم في الردود لكن المفروض الواحد يفتخر في ديرته حتى ولو كانت مافيها سياحة
المهم في اشياء تستحق الزيارة
1 - سوق المهن والحرف اليدوية في السوق الداخلي مقابل سوق الخضار
2- المتحف
3 - متحف الدبيخي
4- سوق الابل الذي يعتبر من اكبر الاسوق في دول الخليج
5 - مركز السنيدي للرحلات ويعتبر اكبر محل في دول الخليج للرحلات
6- المكتبة العامة بجنب مجمع الامير سلطان وتعتبر مكتبة على مستوى عالي
7 - سوق التمور ويعتبر اكبر سوق في العالم للتمور
8- منتزة الطرفيه
9- الجردة والمحلات الشعبية
10 - المدينة الصناعية وفيها العديد من المصانع الكبرى
11 - ايضا لاننسى محافظات وقرى القصيم ففيها العديد من الاثار والمنتزهات

[بندر 1430]

اقتباس المشاركة الأساسية كتبها جيهان بدون اسم ..من جـــــــد..؟ أخي بندر.. تعرف السوق الداخلي ترا سوق متهالك ماينفع للزياره..[/center]

من ناحية متهالك فهو متهالك ولا ينفع للزيارة أبداً لكن نأمل من الأمانة إعادة ترميمه و إظهاره بصورة تليق بمدينة بريدة ..

كل الشكر لكِ

[بندر 1430]

اقتباس المشاركة الأساسية كتبها كَـارِيـزْمَـا © . صادقة جيهان السوق الداخلي :s لا واللي يرحم والديكم لا يلمحه , فشيلة , أخاف يجهز تبرعاته <3,/ + وهج الأمل >> بالعكس هالموضوع مهم .. أعرف واجد يسألون هالسؤال وأستحي لآني ماعندي إجابة <3

لذلك وضعت الموضوع و بعد تردد ..

حتى لو لم يكن لدي ضيف أجده مهم لي ولغيري ..

تقديري لحضوركِ ..

[صوت البحر]

وش فيه السوق الداخلي في الرياض اسواق شعبية وفي جدة اسواق شعبية وفي حائل سوق شعبي وفي مكة المكرمة لكن البعض يحب الانتقاد كن كانحلة لاتقع الى على الشئ الطيب

[بسكــآتي أذلك]

عسيلان والا روح وده لشعيب الاسياح