[حفيد اعقيل]

.
.
.

[poem="type=1 font="bold large 'traditional arabic', arial, helvetica, sans-serif""]أنا أشهد إن الجيب ياناس فلّة = مركوب راعين القنص والسـلاطين

كامل وصوف ولايعيّر بعلة = كنّه هنوفٍ توها دون عشرين

شيكٍ مصدق بالطواري تفلّه = كنزك إلى من الدهر بيّن بشين

وعزي لمن شاف الغثا والمذلّة = ركبت مركوب الشباب الصغارين

شريت عقب الجيب كسرة كروله = وصرنا على ماقال طايح فراشين

لاني شريت اللي يقوم بمحله = ولاني شريت اللي بديلٍ يكفين

يالله طلبتك من عناها تحلّه = وتعيضنا بالجيب مايملأ العين

لكزس جديد تو جا بالمجلة = يعلن عنه ماشيف وسط الميادين

أبي إلى من المزون المهلة = هلت على داري من الوبل يومين

نخيت من يسكن بذيك المظلة = وعبيت له بنزين خمسة وتسعين

جيب محمل باللوازيم كلّه =ومكمله شخص عزيز على يمين

اللي إلى سولف حشا ماتملّه = رفيق دربٍ بالشدايد مع اللين

ورقيت في ذيك الطعوس المطلّة = على فياض كنها رسم تلوين

ماطبها مخلوق من قبل لله = تسمع بها للطير عزفٍ وتلحين

ونار السمر شبيت وأركيت دلّة = وحمست ماأظنه على الكيف يكفين

ودارات سوالفنا بدقه وجلّه = وكتبت لي من زين الأمثال قافين

بيتٍ مثبت بالحجج والأدلة = أقول غير الجيب ماعاد يغرين

وصلاة ربي عد طلع الأهلة = وعداد ماطافوا على البيت داعين[/poem]

.
.
.

[غربة غريب]

أضحك الله سنك أخي حفيد اعقيل

أجل بعد الرفيع الشاخص اللي مالي العين
تركب الطامنة اللي كل شيء يطره ،

الطمع مشكلة وبيعة الجيب بالشتاء ولو كان به زود ، إلا تستاهل وإقعد تفرج على الكاشتين والمستانسين ،
وتعال يافلان مرن ،،، وتكفى لاتنسان

لكن اصبر واحتسب ترا الناس حولك بكل ديره صابرين ، وانت اصبر وصابر نفسك على الهم ، وكلن على همه سرى .

[درع القصيم]

صح لسانك يالنشمي ..
والله قصيدة يا رجل .. منتب سهل أثرك ..
تصدق أكثر ما أسمع وأحب الشعر الوصفي والمدح ،، وجبتها على الطلب ،، ويا زينها لو كانت شيله بعد ..
الحين سيارتي مليانه سيديات كلها شيلات وصفيه ..
لكن أقولك أحد يبيع موتره في هذا الوقت .. لا تبيع إلا وأنت مأمن بداله موتر ،،
والله يعينك الجيوب نيران مرتفعه شي مو معقول ..
ويالغالي أنت ألحين مضبط ديوان لشعرك ،،
وبعدين ما خفت أن قصيدك هذي تنسرق وتنسب لأحد ثاني ..
والله يرزق الجيب الزين النظيف ويطعمك من خيره ويكفيك شره ..

[صعب المحال..]

قصيـــدة جمــيله جـــداً
أعجبتنـــي .. صــح لســانك أخي ( حفيــد إعقيـــل )
كل الشكــــر لك ولحـــروفك الرائعـــه

شكـــراً لــك

[قائد المجد]

صدق ضرسك اخي
_
تخبرون لي فكسار 2012 ب 30 الف

[حفيد اعقيل]

اقتباس المشاركة الأساسية كتبها غربة غريب أضحك الله سنك أخي حفيد اعقيل أجل بعد الرفيع الشاخص اللي مالي العين تركب الطامنة اللي كل شيء يطره ، الطمع مشكلة وبيعة الجيب بالشتاء ولو كان به زود ، إلا تستاهل وإقعد تفرج على الكاشتين والمستانسين ، وتعال يافلان مرن ،،، وتكفى لاتنسان لكن اصبر واحتسب ترا الناس حولك بكل ديره صابرين ، وانت اصبر وصابر نفسك على الهم ، وكلن على همه سرى .

.
.

صدقت أخي غربة غريب ..

وترى المسألة مهيب طمع لكني بديت أشوفه يتضوكع
والقادم إن شاء الله أحلى ..
أما الكشتات فالحمد لله إني ماقعدت ولاخميس ماكشت
.
.

[أبو سليمان الحامد]

أخي الكريم حفيد عقيل :
أصبت الوصف بقابلك الشعري الجميل

والشيء من معدنه لا يُستَغرب ..

وبالمقارنة بين الجيب والكورولا مقارنة ظالمة

فلكلٍ ميزته

قبل أيام دخلت سيارتي الباترول الورشة للصيانة , واستأجرت أكسنت ( هونداي )

صراحة صرت نكتة , من بعد الجيب والعز , صرت بهاللقمة اللي تنشب بقوطي بيبسي !

لكن الصراحة فيها ميزة الوذافة , تلبق بأي محل , تزرق بين السيارات بكل أناقة ورشاقة ,, حتى ولدي سليمان يحسبها لعبة , يقول : أبي وحدة ألعب بها بالحوش


وربي يعوضك أخي حفيد , وإن بغيت نصيحتي : خلك حول الباترول , واترك اللاندر كروزر , تراه قفش بس ,,, إلا إن كانت دراهمك واجد فازبن الجيب الليكزس ..

وبالتوفيق ..

[وقاري]

مادحوك كثيرأخي فاانت لا تحتاج إلى ثنائي هنا....
والنقد مفيد جداً للشاعر....
فابعض أبياتك ثقيله وهي متباينة في ذالك.ايضا من إبداع الشاعر وتمكنه
بعده عن الألفاظ والكلمات العامية المستهلكة...
هناك شطر بيت لاادري ماذا تقصد به وهو قولك:
(ماطبها مخلوق من قبل لله)

[ونـاسه]

كلامات وأبيات جميلة جداً ,..

أنا من الناس اللي لآيمكن أن اتخيل نفسي أشتري سيارة صغيرة ,..
الجيب هو العزّ وبس ,..

كلمآتك هذي ذكرتني بابيات لازلت أحفظهآ .. يقول :

[poem="type=1 color=#ff0000 font="bold medium arial, helvetica, sans-serif""]والله يالجيب لو البنّ مطعومك
إني لأصب لك فنجالٍ من الدّلة
تستهال الكيف والأنذآل يفدونك
ياللي خوّيه من المشوآر ماملّه
لاشفت حمر الطعوس ولمست متونك
بتهوش هوشة شجاع ناسي الذلة[/poem]

ولايهمك أبو سليمان يقولك باترول ... اشر لك جيب ربع واستاااااانس .. والا اف جي ,..

[مخاوي الصمت]

الله يعينك على سرقة القصيدة مثله مثل غيرهــ
.
.

أجل لعبة يا أبو سليمان
واحد الشباب يقول الأكسنت أخاف أخذ به مطب بسرعة يطيحن الحجرات من تحت السيارة

[درع القصيم]

^^^^^^^^^^^^^^^
يا مخاوي إلا وراك ما تقول أحسن أن فيها خيط من الخلف تسحبه بقوه تمشي قدام بسرعة وحده ،،

حرام عليكم ولله أنكم ظلمتوها المسيكينه ،، ..

أنا قبل عدة سنوات بعت سيارتي في العطلة الصيفية
<<<<< وما يبيع سيارته في العطلة الصيفية إلا المستخف .. إذا صار يبي سيارة مستعملة مو جديدة
أيه عاد بلشت ما لقيت سيارة ، الطلب أكثر من المعروض ..
العالم تروح وتجي وأنا بلش بدون سيارة ،، حتى أني اتصلت على ألي شراء سيارتي وقلت له تبيعها بمكسب 500 قال لا .. قلت بمكسب 1000 قال لا أقول وخر بس .
<< أيه وتجيكم السالفة
عاد وأنا طالع من المعارض حزين طافيات شموعي وضايق صدري أيه وأمر من عند معرض العودة ، والله وأشوفهم ينزلون من التريلة اكسنتات () جدد ،، قلت أشوف كم أسعارهم وأنزل ..
أيه يوم فكرت ولا الدعوة صعبه ويمكن ما ألاقي سيارة أيه وشفت السيارة رخيصه قمت وشريتها قلت أتعبر بها حتى أحصل سيارة ومن بكرى مستلمها هي ولوحاتها ..
بالبداية كنت مستحقرها قلت يكفيني أني أمشي عليها 50 ألف ثم أبيعها ،،
شريت الحمد لله سيارة بعد 8 شهور بس خليت هذي الأكسنت عندي جازتلي ودي أخليها للمشاوير ..
ولله وأمشي عليها إلى 150 ألف وجلست معي 3 سنوات وما في مكان ما طبيته عليه حتى البر أطلع عليها وأصيد عليها وبعض الشعبان الي في البطين أنزل عليها ،، إلى صلالة في عمان رحت عليها ، ومير أبها ركبت فوق التنده شبك مصريين وحطيت العزبه بالشبك وحتى الرواق ومنقل شوي والله اني جايب معي حطب إرطا طول القش مترين فوق التندة تقل موجه لطنطه ،، ومكة يمكن ثمان مرات رحت لها ، وقطر ، والكويت ، ..
بتلت أطاير فيها ،، والبنزين ما تصرف أبد قسم دايم أنساه وأقطع بنزين ،،
ولله ما شاء الله بعته بعد ثلاث سنين ماشي عليها 150 ألف ما حطيت فيها إلا فحمات وكفرات ودزق وكلتش وسير مكينة داخلي بس ..
ويوم أبيعها والله ما ينقص من زيت المكينة ملي واحد وأنا أمشي بالزيت إلى 11 ألف ما أغيرة ،، وتاخذ ثلاث علب زيت بس والسويفون بالوكالة قيمته 13 ريال ،، ..

أيه وأبيعها حبيبت القلب بخسارة 8500 بعد استعمال ثلاث سنين أنواع التوفير ..

لكن فيه عيب واحد وهو أنك إذا ركبتها يستحقرونك الناس وبالذات الشباب الصغارين أي واحد يطلع عليك من تقاطع ما يراك شي والي يحدك ولي يطنب لك ويهوش عليك وأنت ما زينت شي قسم بالله وعاد التفتيشات ياساتر أنواع الحقران يوقفك ويرصك ساعة ثم يقول يالله أمش ..


تنبيه /

اقتباس طول القش مترين فوق التندة

لا عاد متر واحد مو مترين شكلي بالغت أشوي .

[روائع المميز]

الله الله. .
بس عاد إلا الإكسنت ، عيب الإكسنت إنه جيب بر وديرة ومطر وثلج ، وبنزينها رخيص ، وهي رخيصه ، وكل حاجة. .
مبطين عنك حفيدوو. .

[الرواد الأهلية]

الجيب جيب والكرولا كرولا

[حفيد اعقيل]

اقتباس المشاركة الأساسية كتبها درع القصيم صح لسانك يالنشمي .. والله قصيدة يا رجل .. منتب سهل أثرك .. تصدق أكثر ما أسمع وأحب الشعر الوصفي والمدح ،، وجبتها على الطلب ،، ويا زينها لو كانت شيله بعد .. الحين سيارتي مليانه سيديات كلها شيلات وصفيه .. لكن أقولك أحد يبيع موتره في هذا الوقت .. لا تبيع إلا وأنت مأمن بداله موتر ،، والله يعينك الجيوب نيران مرتفعه شي مو معقول .. ويالغالي أنت ألحين مضبط ديوان لشعرك ،، وبعدين ما خفت أن قصيدك هذي تنسرق وتنسب لأحد ثاني .. والله يرزق الجيب الزين النظيف ويطعمك من خيره ويكفيك شره ..

.
.

صح بدنك يالغالي ..

سـعادتي غامرة أن تكون القصيدة قد ارتقت إلى ذائقتك

أما الديوان فمحدثك لايعتبر نفسه شـاعراً على الرغم

من أن لدي العديد من القصائد المنشورة هنا وهناك ..

أما السرقة فقد سرقمني قصائد كثيرة وبعضها طبع ضمن

أحد الدواوين وكتبها بإسمه ولم يغيّر فيها أي حرف !!!

الله يعين ..


.
.