[مستقبل ماضي]

السلام عليكم ورحمة الله وبركاته

هذا اول موضوع اكتبه
بصراحة موضوع اقلقني وناقشت لين شبعت هل معقولة المرأة تسوي كذا واكثر
كم اناس عاشرتهم وفي غمضة عين ونتباهتها ساء حالهم بعد حسنها
كيف للمرأة ان تعبث بهيبة رجل كان وما ادراك ما كان ..!
سالت شخص قلت يابو فلان متى العرس قال وشوله عاجلين ع الشبك
واخر متزوج يقول انصحك اذا تبي تتزوج لا تاخذ وحدة له خوات
واخر امون عليه عزمني في بيته قلت ما شاءالله قال لا يغرك جمال البيت
واخر يقول والله اني يوم كنت عزوبي افضل بكثير بعد ما تزوجت وحتى لا يوجد مقارنة وهذا حال الكثير
واخر ينصحني بان لا اتزوج الا بعد 35 يقول عش حياتك قبل مماتك يقصد الزواج
مالسبب في ذلك ؟ اي شاب له اخ او قريب يرا ما ارى ..!
ليش اغلب بنات هالوقت مسترجلات متسلطات مستقويات متعنترات بدون خطوط حمراءات
اغلب اللي يتزوجن تضرب بالعالي عشان ما ياخذ عليها وش هالتفكير ..
اغلب المتزوجين اللي اتناقش معهم بيوتهم جحيم وخارجها جنان ....
المرآة سكن للرجل اما الان اصبحت شرٍكة تكدك كد الويل
ليش المرآة ما تراعي ظروف زوجها وتكون بجانبه بدال الاصطدامات
99.9 من بني هالوقت يبن لبس جديد مع كل مناسبة ناهيك عن اللبس اللي اسعارهن فلكية
اللبس مالن هالدولاب قصدي الدواليب كله عشان فلانة شافته علي ما ابي تقول ما عندك الا هاللبس
وطلعات من البيت كل يوم بدون فايدة ( وقرن في بيوتكن)
اما السوق حدث ولا حرج خروج للسوق بدون حاجة وفوق هذا الطيب لاخر الشارع

لا ننسى ان الزواج هو نصف الدين
لكن اتحدث عن بني هالوقت ما بقلوبهن رحمة
ما اقول حنا مهنا احسن منا يا معشر الشباب لكن الواقع يقول الاسوأ اكثره منكن >> خوذوا الموضوع بأريحية

في المقابل يوجد من يجعلن بيت زوجها هو قرة عينه لكن نسبة تكاد لا تذكر بالنسبة ليييييي
احسست بما اراه ان الزواج هو عالم اما ابيض او اسود لكن اكثره سواد

اعذروني
موضوع كتب ع عجالة .... افرغت شيء لا يذكر

[الـعـابـر]

ههههه
موضوع لم يأتي بجديد
ولكنك من هول ماترى و تسمع استنكرت الواقع فكتبت و كأن اخبار الحياة الزوجية اول مرة تصلك
ليس عندي ما اقوله سوى ان معلومتك عن الارتباط من زوجة ليس لها اخوات خاطئة
لأن المشكلة ليست في الاخوات فقط
وانما منتديات النت هي الممول الوحيد لأنتاج مثل هذه النوعية من النساء
و اليك منتدانا هذا وهو اقرب مثل
يوجد لدينا اناث اعتقد ان مايجري في عروقهن ليس دم
وانما موية نار تريد ان تحرق كل ما تبقى لدى بناتنا من احترام و تقدير للطرف الاخر
عالم النت اصبح وسيلة تواصل بين امرأة غير طبيعية مع امرأة سليمة الطبع
لكن الشيء الوحيد الذي احمد الله عليه و اشكره بهذا الخصوص
هو انني متزوج قبل خروج هذا التسونامي النسائي المخيف  

[bsoma]

وعليكم السلام ورحمه الله وبركاته


موضوع يستحق النقاش ل بعض الناس اللي يشوفونه ب المنظور هذا مثلك

اقتباس لكن اتحدث عن بني هالوقت ما بقلوبهن رحمة

ب كلمتك هذي اخوي رجاء لا تعم

وثاني شي

اقتباس موضوع اقلقني وناقشت لين شبعت هل معقولة المرأة تسوي كذا واكثر كم اناس عاشرتهم وفي غمضة عين ونتباهتها ساء حالهم بعد حسنها كيف للمرأة ان تعبث بهيبة رجل كان وما ادراك ما كان ..!

طلعت من النقاش ب اشيياء سلبيه والله لو دورت ع الايجابي بتحصل كثير
لو كملت نقاشك اكثر مو معقول انت والاشخاص اللي سالتهم بس تقولون كذا
من كل الشباب

وترا اذا انت شايفنا كذا احنا بعد نشوف فيكم كثير وخصوصآ
اللي صاير الفتره هذي واشوفه ب مجتمعي تعدد الزواجات عشان يفرض
رجولته لا اكثر بس لما نشوف مثل كذا معقوله بروح واناقش وابحث ع سلبيات
واعقد الامور اكيد لا

ولا اتوقع فيه انسانه تعبث بهيبه رجل اذا مو مقصر ف حقها

وكويس انك ب الاخير ذكرت انو فيه جزء من الزوجات تمام
و شغله بسيطه حاول تشوف الموضوع من ناحيه ابيض

وربنا يسهل واسفه ع الاطاله

[تميمي عنقري]

السلام عليكم
والله كلامك معظمه صحيح وخاصه انه مسترجلات البعض وليس الكل .

الشي الثاني الوضع تغير الحين بعد الانتر نت والبلاك والجهزه الحديثه البنات تغيرن والله الاغلب .

والشي الثالث بعد بعض الرجال يسوي نفسه انا الرجل الي اذا قلت كلمه خلاص لاتتكلمين وانا الرجل المسموعه كلمتي ولا تناقشه زوجته ولا شي ويعني نظامه قديم المراه لها حق وانت لك حق

واخيرا

( التفاهم بين الزوجين = حياة سعيده بعد توفيق الله)

وشكرا اخوي على الموضوع

[قائد المجد]

اخي
التعميم لايجوز بارك الله فيك
انت قم باختيار الفتاة الصالحه (اظفر بذات الدين تربت يداك)وهن كثر ولله الحمد
ولن يخيب الله املك
تقبل مروري...

[المفارق]

اولا يابعدي الاطباع تغيرت مهب بس النساء حتى الرجال المشكلة ان اهلنا اول كانوا عايشين حياة بسيطه ومتفاهمين
ومشاكلهم يحلونها بكل سهوله اما الحين البنت اول مايصير مشكلة طارت لاهله تشتكي وتبكي وماعنده قدرة على مواجه مشاكلها مع زوجها والادهى والامر تسمع كلام اللي حولها من خوات وصديقات حتى لو ما عندهن خبره بالحياة الزوجية وبالنهاية هي اللي تخسر والنتيجة الطلاق واللي منتشر الحين عند الزوجات كثرة العناد وصعوبة تقبل توجيهات الزوج الا من رحم ربي انا في كلامي هذا لا اعمم ولكن هذا اصبح منتشر بالمجتمع الحين انا اقول لازم الازواج سوا الرجل او المراة انهم يثقفون انفسهم في حلول المشاكل وعدم التسرع في اتخاذ القرارات والغيره عند البنت لازم تصير بحدود ماتصير غيرتها جحيم على زوجها وتصير البيت نار على الزوج بدل ما تكون سكن واستقرار واسف على الاطاله وشكرا

[دُرر مضيئة]

مثل مالشباب خايفين وكارهين ومترددين من الزواج


لمعلوميك


أكثر أغلب ,,البنات أخذات فكرة سيئة عن الزواج



السبب


ببساطة لأن ماعاد فية رجـــــــــــال بالوقت الاقلة !

.. لو كان رجال ماطاع زوجتة بكل شي واستقوت علية وصارت بيته جحيم مثل ماقلت >>هذا مهكاكة !!




لولا نظرة المجتمع الي عايشين فية


ماتزوجنا طول عمرنا

[scorbin]

اقتباس المشاركة الأساسية كتبها قائد المجد اخي التعميم لايجوز بارك الله فيك انت قم باختيار الفتاة الصالحه (اظفر بذات الدين تربت يداك)وهن كثر ولله الحمد ولن يخيب الله املك تقبل مروري...

كلام سليم المهم فتاه صالحه

[Qassime]

ههههههه اشوى اني قاضي ولا تسان اصدق اللي انت تقوله ..

اخي العزيز حتسيك مهوب لم قلم ابببد .. بالعكس الحريم مامثلهن ويهبلن بس انت اعرف مدخاله وتقضي كل الأمـور

الا تسانك ضعيف شخصيه ولك عليك .. ما انصحك بالعرس .. المرأه لينه ومتفاهمه وسنعه بس ادخل عليه مدخالن حسن وعامله بلطف ولاتقصر عليه ..

ومثل ماقال الأولين .. قبل تضمه اسأل عن أمه

الحمد لله اعرف كثير من ربعي متزوجين ومبسوطين وحيآتهم زي اللوز .. ولا أحد بهم أشتكى ولا كل ولا مل

اللي قالك لاتعرس الا 35 ذا مايبيلك الخير .. من وجهة نظري افضل عمر لزواج الرجل هو مابين 25 الى 28 يكون حزته الرجل واعي ويدري وش السالفه ..

واذا انك تبي تتزوج ولا تبيه تشري ملابس ولا تروح ولا تجي .. انصحك لاتعرس وخلك بأستراحك .. المرأه مثلك تبي تروح وتبي تجي وتنحشر من البيت ووده تغير جو وتبي تسافر وتبي تصير مثل العالم .. عاد انت زبط امورك وتبي تزبط حياتك ان شاء الله ..

موفق

اقتباس .. لو كان رجال ماطاع زوجتة بكل شي واستقوت علية وصارت بيته جحيم مثل ماقلت >>هذا مهكاكة !!

+ 1

[❤.. Ťạġħřęęḋ]

احسن شي بالحياة ان المشاكل بس تجي منا..
<< حطو تحت بس عشر خطوط

[❤.. Ťạġħřęęḋ]

اقتباس المشاركة الأساسية كتبها من الجماعة ههههه موضوع لم يأتي بجديد ولكنك من هول ماترى و تسمع استنكرت الواقع فكتبت و كأن اخبار الحياة الزوجية اول مرة تصلك ليس عندي ما اقوله سوى ان معلومتك عن الارتباط من زوجة ليس لها اخوات خاطئة لأن المشكلة ليست في الاخوات فقط وانما منتديات النت هي الممول الوحيد لأنتاج مثل هذه النوعية من النساء و اليك منتدانا هذا وهو اقرب مثل يوجد لدينا اناث اعتقد ان مايجري في عروقهن ليس دم وانما موية نار تريد ان تحرق كل ما تبقى لدى بناتنا من احترام و تقدير للطرف الاخر عالم النت اصبح وسيلة تواصل بين امرأة غير طبيعية مع امرأة سليمة الطبع لكن الشيء الوحيد الذي احمد الله عليه و اشكره بهذا الخصوص هو انني متزوج قبل خروج هذا التسونامي النسائي المخيف

هه مشاءالله..
..وردك هذا ما يحرق ماتبقى من الاحترام للطرف الاخر..
..
الان بدل من تصحح المعلومه وتجعله يكمل نصف دينهـ..
هو وغيره
تأيده بالكلام الذي لا صحة لهـ..

!!

[حربي عابر دربي]

لن تصدق احصائياتك ولو دعمتها بالبحوث المفصلة

والسبب هو ان مثل هذه الامور متشابكة ولن يقع اللوم غالباً على طرف دون الطرف الاخر

معروف ان الرجولة توقف كثيراً من هذه الترهات التي تستوردها بعض النساء من الخارج

وكذلك الحلم والاناة ( فاذا كره منها خلق رضي وقبل بخلق اخر جميل )

نصيحة لوجه الله

آغلب النساء تكذب وكذلك يقول آشباه الرجال بحجة ( لانطق بعين - والناس ماتجيب خير ) لكن لايعلمون بانهم يكفرون نعم الله عليهم مما وهبهم الله من الرخآء والسعادة ( فلو قال الحمد لله لحمد الله و خرج من الشرح والتشريح )

الكثير من الازواج ( ذكور - اناث ) يعيشون في دوآمة الوهم وطلب المستحيل ) فهم ولاشك يعيشون انفصام الشخصية

الرجال يعاشرون نسائهم بالمعروف فاذا اعوجت حاول اصلاح الاعوجاج بالمعروف والكلمة الطيبة والسبل الشرعية المحمودة )

فاذا لم تعتدل ولم ترتدع طلقها وسئل الله ان يبدله الله خيراً منها . وهذا مربط الفرس ياصاحبي

اسئل الله لكل زوجين من المسلمين التوفيق والتوافق والحياة الاسرية الهادئة

نسيت اقولك

اغلب الشباب اذا اراد الزواج قال لــ أمه ابي واحدة زينه ( يقصد ان شكلها حلو - ) وهذا من حقه لكن يهمل باقي اسباب القبول والتوافق في حياة الزوجية وهي الدين والخلق والمنبت الطيب ( اهل الزوجة ) وبعض الامور الثآنوية

آبد ماعليك دور بنت الحلال ونزل موضوع بقسم المناسبات وآعزمنا وابشر بآلعنية ( خروف ) ههههههه

[الــنــســيــان]

الموضوع " دس " فيه الويل والثبور في | شهر عسل |!

العش الزوجي " حمامتين يغنين معا "! فإن لم يكن كذلك " فتسريح بإحسان "!

ألا تستحق من رضيت بك وعاشت معك كل " موديلات العصر "! والمغرب والعشاء ؟؟؟بلا " وكل فلوسي تفداها بعد "!

ألا تستحق أن تقبل يديها كل ما أتيت لها ؟؟ليست اهانه لك بل تقديرا لأيادي مدت لك " خاتمك الذهبي "!

معلوماتك ربما تكون من فئة " شختك بختك "! فلا تلمني ان جعلتها في سلة مهملات!

بعض الردود تشعرك بأن صاحبها من " ذوي الإعاقات العقلية الخاصة "! فادعوا له بالشفاء العاجل !

همزة وصل !

كابوس العنوان منعني عن التصويت واتجهت للتصويب !

[الـعـابـر]

اقتباس المشاركة الأساسية كتبها ❤.. Ťạġħřęęḋ هه مشاءالله.. ..وردك هذا ما يحرق ماتبقى من الاحترام للطرف الاخر.. .. الان بدل من تصحح المعلومه وتجعله يكمل نصف دينهـ.. هو وغيره تأيده بالكلام الذي لا صحة لهـ.. !!

ردي كان يتكلم عن مشكلة واحدة وهي ان البعض يفسد البعض
ولو لاحظنا الى اساس مشكلة اخينا صاحب الموضوع لوجدنا انه بسبب كلام البعض هذا وهو رجل
فما بالك بفتاة فكرها مستعد لتقبل التوجيهات بغض النظر عن سلامتها
اليوم كلاً يقدم كلام يعتبره نصيحه
اليوم مشكلة تأجيج البعض على البعض هي التي دمرت اغلب نسائنا
اما الاشياء الاخرى فهي على حسب نوعية و هيبة الرجل
مختصر الكلام
النت + الفراغ + مؤججي الفتن = مايخشاه صاحب الموضوع