[ah666med]

عقبال ما يقفل الي عندنا من زينه
الى المحرقه ماكدنلز
وتفتح جميع فروعه بالمحافظات ويقفل عندنا ببريده
مطعم فاشل وصخ وعقبال كنتاكي وهارديز
وجميع وجبات الهامبرجر

[صوت البحر]

اقول خلوكم من المطاعم وعليكم بطبخ البيت ابرك لكم وانظف تبارك الله

[ابو سراج 1]

اقتباس المشاركة الأساسية كتبها صوت البحر اقول خلوكم من المطاعم وعليكم بطبخ البيت ابرك لكم وانظف تبارك الله

نعم طبخ البيت افضل من المطاعم

[onaiza]

من المعروف ان ماك من أسسها يهود
واليهود هم من يتحكم بالأقتصاد العالمي
فمن الطبيعي أن لهم بعد نظر
عموما ومن موقعكم أشكر ماكدونالدز لأنها رجعتكم للخلف كثيرا"
واذا قمتو بمقاطعة ماك
سوف نقوم بحملة بأسم لاتأكل إلا من ماك
عنيزة وبريدة عينان في رأس
يجب أن لا تاخذكم العنصرية إلى أكثر من ذالك .
ومالكم باالطيب نصيب

[تسيف تسذآ]

اقتباس انتم للحين بريدة وعنيزة؟؟ بالله ماتستحون فشلتونا؟؟ وش الفرق بين بريدة وعنيزة؟؟ اتوقع لو ماكدونالدز فاتح ثلاث فروع بعيون الجواء ماضاقت صدوركم بس انه يفتح فرعين بعنيزة وبريدة مافيها الا فرع فالموضوع كبير وخطير قسم بالله اننا بالشرقية ما نشوف هذا من بريدة وهذا من عنيزة واللي يسألنا من وين نقول من القصيم ياكثر اللي من بريدة ومتزوج من عنيزة والعكس صحيح وانتم ماعندكم الا من بريدة ومن عنيزة اعوذ بالله منكم

^ كلآم سليييييمَ : )

..

غير تسذآ مهمآ كتبتوآ من موضيع تبقى بريدههَ بً آلصدآرره

وحتى لو كآنت عنيزه آفضل من نآحيه الشوارع و المطآعم و غيرههَ ,

[حربي القصيم]

نآس تشتغـل وهمهآ تطوير محآفظتهآ
عكس آللي هنآ
اللي مآهمهم آلآ مصآلحهم.!

[Loacker]

مانبي ماكدونالدز ملينا منه نبي مطاعم ثانيه

اه لو يفتح أفضل مطعم هامبرقر بالعالم
(( مطعم شيك شاك ))

قسم بالله ان تسحب علي ماكدونالدز والبيك وطقتهم
بامريكا عليه طوابير اجل عندنا وش بيصير

متي يجي الحلم ونشوفه فاتح ياناس

Shake shack

[!aspirin~~أسبرين!]

بإسمي وإسم كل شرفاء وعقلا بريدة
نتبرأ من فكر ومنطق وضيق نظرة صاحب هذا الموضوع ومن جاراه بالطرح من بريدة وعنيزة
ونعتذر من شرفاء وعقلا عنيزة
ونرجو ان لايجرهم مثل هذا الطرح للنزول الى مستواه

مايضيف لبريدة يضيف لعنيزة والعكس صحيح
نعم بريدة بحاجة اكثر من فرع
لكن لايعني ان لايتم إفتتاح فرع بعنيزة الا بعد ان يتم افتتاح اخر ببريدة
قد تكون اسعار الاراضي في بريدة هي من حالت دون إفتتاح الفرع حتى الان

واتمنى من ادارة المنتدى المبادرة بحذف مثل هذه المواضيع التي لاتضيف للمنتدى
بل على العكس تسيء له وللاسم الذي يحمله

[طالبة قانون]

انا اليوم اكتشفت إن أكبر همنا بطوننا ووش بناكل ..


راح أقولكم وجهة نظري بشكل محايد
بما إني 0 عنيزاوية
وطالبة جامعية ببريده
يعني يومياً اجيكم


أولاً :
ماكدونلدز
قبل كل شي لحد يقارن ماك عنيزة ببريده
لأن .. 1- فرع عنيزة صغير جداً ومساحته لا تقارن بمساحة ماك بريده
2- عدد الطاولات قليل وكل طاولة أضوق من الثانية والممرات ضيقه
3- ماك بريده واسع جداً جداً والطاولات كثيره ومتنوعه فيها الحجم الكبير والصغير
4- فرع بريده زبائنه غالباً من بريده أما فرع عنيزة فهو الأقرب لغالبية مدن القصيم
5- رغبات السكان في كل مدينة يختلف عن الأخرى

من تجربتي ..
بشكل إسبوعي لازم أمر على ماك بريده
مرتين بالاسبوع تقريباً
بحياتي ماجلست أنتظر طاولة تفضى أو حتى طاولة تنظف
ودائماً السواق يوقف بالمواقف الضيقه ويدخل ويطلع بكل سهولة
يعني مافيه ضيق أو زحمه
حتى طلبات السيارات ماتزيد عن 5 سيارات
للمعلومية أنا رحتله بأوقات منوعه الصبح الظهر الليل بكل وقت
مازال على الطعم القديم

نجي لماك عنيزة
أروح الظهر وإلا أروح بالليل
ما أشوف مواقف بنده من كثر زحمة السيارات الي على ماك
يوصل صف السيارات للساعة من كثرته
أدخل لقسم العوائل ما أقدر أمشي من كثر الناس وكثر الي واقفين انتظار
وكثر الي يطلبون
حتى السواق يرفض يروح لماك عشان يجيبلنا طلبات
نتصل عليهم عشان يوصلون يقولون زحمه مايصيرون فاضين إلا المغرب
الطعم تغير ماعاد مثل أول ..

بالنسبة لي لما اشتهي ماك
أقول امشو نروح لبريده
وإلا أتغدى منه إذا طلعت من الكلية


ثانياً:
عنيزة أحلى ومدري ايش !!
لاتضحكون على أنفسكم

صحيح عنيزة أحلى من ناحية الشوارع والطرق وغيرها
لكن عندنا وعندكم خير
بعد أنتم تعلموا تسوقون قبل عشان يضبطون ششوارعكم

أما من ناحية كل شي عندنا
لاتقعدون تتخيلون

شوفوا كم مطعم هندي عندكم .. دام تفكيركم بالمطاعم !!
وشوفوا كم مطعم صيني .. إيطالي .. وغيرهم
الطازج فرعين .. الداجن فرع كبير وحنا ماعندنا ولا واحد منهم
وإذا بتحسدوننا على بيتزا هت وع مانبيه تعالوا خوذوه تراه مقرف ووصخ وعمال يعصبون عليك ويطردونك من المطعم من قلة أدبهم وماعندهم كل الوجبات وينظفون بأدوات وصخه يعني تقعد على الطاولة تشم ريحة شي ( مدود ومقرف )
نرجع ...
كم كوفي وكم مشغل وكم مكان نسائي !!
حنّا لا يجون يفتحون شي يخص النسائ تصير بلاوي الدنيا بعنيزة وكل شي حرام وكل شي ممنوع

مستشفى الحبيب عندكم
فندق الموفنبيك عندكم .. يعني حنآ حتى فندق راقي وعلى سنع مافيه
كل المكتبات الي توفر كتب الجامعات وغيرها عندكم
نوادي صحية نسائية برضوا عندكم حنا كل شي تابع لعيادات ويجيب الهم

وش بعد !!

ايه أهم شي والي أعاني منه ..
انا ليش يومياً ببريده ؟
لأني أدرس
بقسم مو موجود إلا ببريده

طيب ليش ببريده مع إن ثلاث أرباع الطالبات من عنيزة والرس والبدايع والمذنب ؟
ليش مايكون بعنيزة بما إنها متوسطة بين مدن القصيم ؟
بنات الرس المساكين يمشون 40 كيلوا لعنيزة بعدين 30 كيلوا لبريده يعني 60 كيلوا كل صبح وكل ظهر
مو بس قسم القانون ..
قانون + رياض أطفال + علم نفس

وأفضل المعاهد التعليمية والتدريبية ببريده

الجامعات الأهلية كلها ببريده

حتى المستشفيات عندكم اكبر من عندنا

المستشفى التخصصي .. ومستشفى الولاده والأطفال
تعالوا لعنيزة شوفوا مستشفى الملك سعود
قسم الولاده والاطفال بملحق كبير برا المستشفى
وجميع الأقسام بمبنى واحد مع غرف المرضى


وأنتم فاصلين الاقسام مع إن مبانيكم كبر مستشفى الملك سعود بأضعاف مضاعفة

يعني إذا بتقارنون .. قارنوا بالعقل رجاءً

مشكلتكم تشوفون الي ماعندكم ونحتاجه حنا ..
وماتشوفون الي عندكم ونحتاجه أكثر منكم ..


الي فاتح الموضوع وغيره من المؤيدين
تعالوا عيشوا شهر عندنا
وادرسوا ببريده
وراح تحسون بالفرق والنعمه الي عياشين فيها


- بالنسبة لمقاطعتكم
قاطعوهم يمكن يحسون إنه محد يجيهم ببريده ويسحبونه عندنا ويصير ثلاث فروع بعنيزة



بالنهاية اقولكم لاتصيرون بزران
أجدادنا فرقوا بيننا
وحنا بنفرق بزراننا ونعلمهم الحقد والبغض والحسد

والله عيب
يعني أجدادنا كانوا جاهلين بعض الشيء
حنا نصير مثلهم ؟
تفكير قديم ومتحجر ومتخلف ؟

المفروض نسعى إن محافظاتنا تكون مدينة وحده تسمى القصيم
مو كل واحد لما نسأله من وين يقول من عنيزة من بريده من الرس ..؟ واذا قال ايه القصيم تقول لا من عنيزة

ونستمر بالتفكير والسؤال والمناقشة والجدال
مين يمط .. عنيزة وإلا بريده ؟!

[aBoOora]

ياا حبيابتي العنزاويات الي داخلين عررض بالعافيه عليكم فرعكم الثانيه وهذا مووب سالفتنا
.. واخررر همومنا وش فتح عندكم وش مافتح .. اقري الموضوع زين انتي وياها
نتكلم عن بلديتنا الداجه وكيف تطيٌر المشاريع من بريدتنا ..


عتبي على بلدية بريده .. ؛( موب بس عشان ماك عشان اشياء واجد

[عمر الأحمد]

فعلآ كلآم أخوي عبدالله سليم 100%

لو فتح 10 فروع مآكدونآلدز ببريدهـ هل ستصبح بريدهـ الأفضل .؟

لو نظرنآ إلى أهم الأشياء باالمدينة تجد عنيزهـ أفضل من بريدهـ فيهآ وأهمهآ الموآصلآت

بكل اختصآر عنيزهـ يمتلكون النظرهـ المستقبلية السليمه وحنآ نآيمين للأسف ..


وأذا جت على المطعم المفروض من زمان مقاطعينه عشآن تفهم إدآرة المطعم أنه مجرد مطعم ولآ به زود

بس لآ حيآة لمن تنادي

[ريدااوي]

اقتباس المشاركة الأساسية كتبها onaiza [right]من المعروف ان ماك من أسسها يهود واليهود هم من يتحكم بالأقتصاد العالمي فمن الطبيعي أن لهم بعد نظر

السلام عليكم "
^^
لاتعليق ..!!

رحمك الله ياشيخ محمد .. الهم احفظ اعنيزه من كل مكروة’

دمتم بحب الله ""

[O X Y G E N]

اقتباس المقاطعه هي الحل الوحيد أنشـــــــــــــــــــروا ببـــــــــــــلاك والواتس اب وتويتر والفيس بوك بحملة مقاطعة ماك لافتتاح فرع ثاني وحددوا اليوم وتاريخ المقاطعه عشان نصير صف واحد لويوم او يوميين عشان يحس ويفتح فرع ثاني

كلام سليم .. وهذا الي صار وراح تزود عدد المشاهدات للألاف وسيتم توزيع الموضوع لأقصى عدد بالبلاك وبمواقع التواصل عشان يشوفون الفوارق ويعلم أن أهالي بريدة ليسو .. نائمين .. سواءاً ماك او شركة أوي أياً كان .. بصراحة تعبنا كل يوم والثاني كل ماطالبنا شي اكتشفناه بالمحافظة المجاورة .. مانقول شي الله يرزقهم ولكن لايسلبو حقوقنا .. الي المفروض تواجدها هنا ..

اقتباس . صدقت , تمت سنـه ما أكلنـآ منـهه كله عشآن الزحمــهه .. يـآليت فرع ثـآني نطــآلب والله ..

مره من المرات جلست حول الساعتين .. وبالأخير ماحصلت الوجبة الي أبغاها .. فصار وجوده يشكل أزمة مع الزحمة الموجودة .. على ايش مضايق العالم .. افتح فرع ثاني وثالث ورابع .. مهب تروح تعاند وتفتح بمحافظة والمدينة تسحب عليها وتخليهم ينطقون إنتظار .. بمعنى .. جازلكم ماجازلكم بالطقاق ..

[O X Y G E N]

اقتباس من المعروف ان ماك من أسسها يهود واليهود هم من يتحكم بالأقتصاد العالمي فمن الطبيعي أن لهم بعد نظر عموما ومن موقعكم أشكر ماكدونالدز لأنها رجعتكم للخلف كثيرا" واذا قمتو بمقاطعة ماك سوف نقوم بحملة بأسم لاتأكل إلا من ماك عنيزة وبريدة عينان في رأس يجب أن لا تاخذكم العنصرية إلى أكثر من ذالك . ومالكم باالطيب نصيب

رجعتنا أو قدمتنا .. مسئلة نروح نمحط كيلوات اذا بغينا حاجة لعنيزة .. وشوله .. يحطون عندنا هنا بالمدينة الي عشرات الكيلوات شمال وجنوب وشرق وغرب .. حاط واحد ومقلق العالم ومزاحمهم .. وعلى فكرة ترى ماجت على ماك أشياء كثيرة مطاعم وشركات ومؤسسات وغيرها .. ونشوف الموضوع طول وزاد عن حده أجل البيك موقع بعنيزة قبل بريدة .. ليش .. على أي أساس .. هذا يدل على وجود خلل .. والخلل هذا لازم ينتهي عاجلاً غير آجل ..

اقتباس مانبي ماكدونالدز ملينا منه نبي مطاعم ثانيه اه لو يفتح أفضل مطعم هامبرقر بالعالم (( مطعم شيك شاك )) قسم بالله ان تسحب علي ماكدونالدز والبيك وطقتهم بامريكا عليه طوابير اجل عندنا وش بيصير متي يجي الحلم ونشوفه فاتح ياناس shake shack

أكيد يبي يفتح بس أول شي يبي يكون بعنيزة .. وتبي تمحطون كم كيلو عشان تروحون تشترون منه ويمكن إذا رجعتو لبيتكم يكون الأكل برد فترمونه أو تسخنونه .. هذا المسلسل راح يدوم ويطول وغير ماك ترى فيه اسواق ومطاعم واشياء كثيرة هناك بتفتح وكأننا من المغضوب عليهم ..