[زمرديه]

السلام عليكم
بدون مقدمات اصلا المقدمات خلصوا من كثر مانكتب عن كليتنا ((كليه القصيم الاهليه)) اللي تطمح انه تكون ثاني كليه اهليه بالمملكه بعد كليه اليمامه << حلم .......
مع هاقرارات والله ما اظن تتحركون من مكانكم
بقولكم مشكلتنا مع هالكليه اللي عنده انظمه وقرارات تتوزع بالمجان ولا تحسب حسبان للطالب اهم شي مصلحه الكليه الخاصه وين تكون فيه الكل ينقاد له
المبنى والفوضى والحر و و و ... هذا صار عادي وملينا وتعودنا وما عاد يهمنا !!!!!!
المشكله احبتي انه عميد قسم حاسب الدكتور عبدالله العرج طرا له قرار وطرحه بمجلس الامناء والقرار هو الغاء التدريب التعاوني ((التطبيق)) ويكون مشروع تخرج قرار مفاجيء للطالبات وصدمنا فيه ..
اثناء تقديمنا على الكليه سالنا الشؤون عن التدريب قالوا للطالبه حريه الاختيار اما مشروع او تدريب وهذا قرار يرضي الطرفين اللي تبي تتدرب او تبي مشروع لها الحريه درسنا سنه ونصه على الحاله وفجأه بس صرنا بمستوى رابع وخامس نزل القرار !!!! كلمنا الدكتور عبدالله وقال ادرسوا الحين ويصير خير لا تشغلون انفسكم <<
رفعنا خطاب له نرفض القرار ونطالب انه يرجع مثل ما كان لان ولا جامعه بالعالم كله تغير خطه الدراسه على الطالب بنص الطريق اذا فيه تغيير يكون على الطلاب الجدد وتكون لهم خطه جديده
جلسنا شهر وحنا كل فتره نكلم العميد ولا حياه طبعا حجتنا قويه لانه نص المواد اللي درسناه واللي ندرسها لها عملي وما يوفروا لنا المعامل ولا منهج لها طيب على أي اساس تطالبني بمشروع تخرج وانت مو موفر لي شي ... عالجوا المشكله بمشكله قالوا انه راح تدرسكم رئيسه القسم الدكتوره وفاء راح تعطيكم دورات عن الاشياء اللي المفروض تاخذونه !!! الصراحه حل متعوب عليه ؟؟؟!
ليه هو في وقت ندرس موادنا او ندخل دوراتكم ترنا بشر ليه تضغطوننا ليه تحملونا مسوليتكم واخطائكم لا كادر يشرح مثل العالم والناس ولا معامل متوفره اذا بعض المواد مابدوا يشرحون الا بعد شهر ونص من بدايه الدراسه وكل هذا على روسنا تخيلوا اضافوا ساعات اضافيه علينا بالجدول ع شان يلحقون يخلصون المنهج وشرح الله واعلم فيه
طبعا كل المشكله هذي كلمنا فيها اعضاء مجلس الامناء الدكتور عبدالرحمن المشيقح والدكتور عبدالرحمن الشتيوي والدكتور عبد الله العرج
وعلى علم بكل شي يصير داخل اسوار الكليه وما تغير شي ؟؟؟!!
انا كتبت الموضوع لكم انتم اشكي لكم الحال واتمنى ما احد يغلط غلطه عمره ويدخل هالكليه واتمنى كلامي يوصل للوزاره خليها تشوف المهزله اللي جالسه تصير
دعواتكم لنا ان الله يخلصنا من الكليه على خيييييييييير

[المكتب التنسيقي]

الله يجزاك خير

[زمرديه]

اقتباس المشاركة الأساسية كتبها المكتب التنسيقي الله يجزاك خير

امييييين واياك

[شهبندر]

ترى الأردني/الفلسطيني أحمد شاهين إلي مسكوه يزوّر شهادات ماجستير ودكتوراه يشتغل فيها

[احترم الاخرون يحترمونك]

صااااااااااااااااااااااااااااااااااااااادقين لاحلم ولامستقبل

[يوسف 2000]

سادة وتستاهلون من يدخل مثل هذه الكليات الفاشلة والمزورة ويبحث عن الدف والنجاح بسهوله يستاهل كل الي يجيه , ومن عاش حيله مات فقرا .

من يتراخص اللحمة تخونه المرقة

[منهد حيلي]

والله ي اختي جانا التبلللللللللللللللد منهم
جينا ندرس ونفهم وندري وش حنا ندرس
وندخل ونطلع ندربي روسنا
حتى صارت الدراسة بس لجمعتنا ع القهوة والفلللللللة
اما دراستنا كـ قسم الحاسب بقسمية مثل اللي يدرسون انقلش !! لالا
وش مثل الانقلش الا مثل اللي يدرسون شريعة وقانون لكن بطريقة اصعب شوي
لا تدريب ولا توفير اجهزة
وبعد شر البلية ما يضحك
يطالبوننا بالمشروع والغاء التدريب التعاوني <على اساس دارسين المواد العملية عملي مو على حبر وورق
يالله الله يسهل علينا باقي المشوار وبررردي وريحي بالك مثلي

[أبومزيد]

لاحيات لمن تنادى
الطلاب قسم الشريعه والقانون كذلك الان المستوى الثامن ، اتى قرار من الوزاره بتغير مسمى القسم
من شريعه وقانون الى قانون حاف، المسمى الايخدم المتخرجين

[نايف123]

اذا كان على المقارنة إن كلية القصيم ثاني كلية أهلية بالمملكة فهذا غير صحيح كليات بريدة الأهلية رغم إنها عادية لكنها أفضل من كليات القصيم هذا في القصيم فما بالك بالمملكة

موضوعك حساس جداً وإذا لم يتم حله من قبل الكلية فالحل الأمثل هو آمر واحد لاغير الإتجاه إلى التعليم العالي وتكتبون أسماكم أيتها الطلبة المتضررين ومضمون الشكوى وترسلونها إلى التعليم العالي بواسطة مؤكل أو محامي وسوف يأتي الرد باسرع وقت وسوف ترون الكلية تستجيب لكم خوفاً من إلغاء الإعتماد

لان من شروط التعليم العالي للكليات الأهلية توفير جميع المتطلبات المذكورة ومن ضمنها هذا الموضوع

[عبدالله]

أكتبوا بسبق أو عاجل أفضل وأسرع للوصول للمسئولين

[مهمومه بريده]

سبحان الله الكليات الاهليه اول ماتفتح مهنا زينهم وبعده حدث ولاحرج

[وداعا ماركو]

عاد انا اخر سنه فيها ....دعواتكم ..



والله يوفقك ياختي ..ويصبرك ..
ويحقق لك اللي ببالك .. يارب ياكريم..

اللهـمـ اميـــــن ..

[strowbreey]

شي طبيعي لا الحكومي ولا الخاص معطي الشعب ابسط حقوقه.

[نجد داري]

الله يصلح الحال