[دار حاتم]

./.




بسم الله ./

ادور قسم مناسب مالقيت الا هنا ./.؟؟
عاد المشرف تسان بغي ينقلوه للقسم ثاني بكيفوه

ابي اسئل عن معارض السيارات في بريده وين احصصصله ومتي يبداء المعرض في بريدهــ
ابي وصف دقيق

عندي موتر للبيع اكسبلور 2006 ذهبي الممشي 157 كم ./


وشكرا

[O X Y G E N]

أنت في أي حي عشان اوصف لك بدقة ..

[O X Y G E N]

عموما الوصف كالتالي وبدقة :

اكيد تعرف دوار النهضة الي بشمال بريدة الي يمينك مطعم الصواني ويسارك أسواق العثيم روح باتجاه الشمال تجيك اشارة الراشديات الي فيها الكبري برضه روح باتجاه الشمال ، تجيك اشارة ثانية ، أطلع يسار بعدين طوالي ( تجيك محطة على اليسار ) روح طوالي قبل حرف t هذي المعارض يمينك .. عاد ادخل مع أي منفذ أو طوالي لين يجيك التي واطلع يمين وطوالي هذي المعارض يمينك " واسئل عن موقع الحراج " ..

أما بخصوص أفضل وقت هو يوم ( الخميس ، والجمعة ) .. والأفضل قوة يوم الجمعة ..

ويوم الجمعة واحيانا يوم الخميس ، شفت المحطة الي اقولك تجيك يسار وانت مطول اول ماتتجاوزها تشوف العالم متجمعه عند منفذ على اليمين هذا نهاية الحراج عاد انت صفط مع هالجهة أو أمشي باتجاه التجمع ووقف بالمكان المناسب ..

أما اذا بغيت الحراج

موقع الحراج : شفت حرف t الي اقولك في الوصف اذا جاك اطلع يمين وطوالي لين يجيك معرض الدوحة على اليمين بالزاوية بعده لف يمين طوالي وتحصل الحراج يمينك أو قبل ماتلف يمين تشوفهم يأشرون لك بالشمغ بعض الشريطية ..

أما بخصوص الاكسبلور ، مادري أحس سوقه في القصيم مايمشي ، فانت ليش ماتعرضه في موقع " حراج " ..

عادي افتح الموقع الحين وطقطق لك اعلان ( وحط جوالك ) شوف يمكن يجيك شراي قبل بكرى ، لأن الاكسبلور صراحة له زباينه صحيح ولكن نادرين ، وبيني وبينك السوق مو مرة الا اذا كان يبي يزين هالاسبوع لأني الاسبوع الي طاف كنت فيه ، ماغير الناس تسئل لاتشتري ولا تبيع ..


ملاحظة : وأما اذا كنت جاي مع طريق حائل فقبل ماتدخل بريدة يجيك كبري مكتوب على لوحة ( معارض السيارات ) أطلع معه وروح يسار ، طوالي لين مايجيك نقليات ( البسامي ) بوجهك .. بعدين أطلع يمين طوالي يجيك بنك الراجحي على يمينك بعده أول منفذ خش معه .. هذا الحراج ..

عاد أعتقد أن الوصف كافي ووافي ..