[*العمدة*]

السلام عليكم ورحمة الله وبركاته

كيف حالكم اليوم طيبين إن شاء الله


الـحـلــقــة الأولـــى
يـقـول الرستشار:

بعد يوم مليئ بالمفاجآت قمت من النوم مبكر وكالعادة بديت أتمغط وما يردن إلا أطيّح شي بجنبي ولا أطيح أنا من السرير.
المهم قمت ورحت للمغسلة والله وأناظر وجهي بالمراية تقل بس مبخوبه: (الشعر طويل)قلت مادامي قايم مبكر وراه ما أروح للحلاق؟.
..
يوم وصلت للحلاق ويلاو متروس ترس(مليان)قلت وش وراي أبقعد أناظر الجرايد.
وأنا أقلب بهالجرايد ويردن إعلان(سابق معنا واربح تذكرتين سفر حول العالم).
وقعدت أفكر لو فزت من آخذ معي؟؟

أبو ألوان
قلت أصادق(سعود)..بس المشكلة إنه إنسان مذبذب كل يوم له حال:a،أحياناً يجي يضحك ويمزح ويتقبل كل كلمة،وفي بعض الأحيان يجي كنه مذيع أخبار في قناة الجزيرة..جاد..ناشف مثل الحطب..نشتاق نشوف ضروسه..كل مزح يسميه كلام أطفال.. وكل نكتة عنده سخيفة..وإذا ضحكنا كلنا..أشوفه كنه ياكل ليمون!!
أقابله يوم فيسلم علي بكل حفاوة ويسأل عن أبوي وأمي وإخواني وخواتي وعماني وعماتي وخوالي وخالاتي والشغالة.. ويحلف إنه اشتاق لي ويلزم علي أتغدى عنده.-(يلزّم:عملية دعوة لضيف ثقيل أحياناً يوهقنا ويوافق)-أو أتعشى أو على الأقل أشرب عصير..ثم يجي يوم ثاني ويقابلني بكل برود ولا يزيد على(هلا)..حتى إنه مرة فشلن في مجلس كبير،فسلمت عليه بكل حفاوة فتفاجأت به يسألن:من الأخ؟!فكاد يغمى علي..أصلاً هذا مايصلح صديق..هذا يورط وقت الضيق(كتاب:التوهيق وقت الضيق).

طاووس فاضي
(راشد)يحاول يصادقني لكنه مغرور وغريب،إذا اقتربت منه أبعد عنك،وإذا أبعدت عنه قرب منك،إذا بغيته يعطيك وجه.. لا تعطيه وجه..وإذا بغيته يسألأ عنك لا تسأل عنه..والعجيب إنه مغرور وليسه مهب نظيف..تجرأت مرة وسألته:يا راشد....
ألاحظ إنك ما تهتم بملابسك..فقال وهو يحاول ينكت: (أصلاً ما فيه أحد يسوى نلبس له ثوب زين)!
ومرة دخل الصف في المسجد،شاف عن يمينه هندي وعن يساره باكستاني..طاع من الصف ورجع للصف الأخير!
والمشكلة إنه مغرور ولا أحد يدري وش السبب..لا مال ولا جمال ولا منصب ولا جسم ولا دراسة.. ذا يصلح صديق؟!!

بنزين وكبريت
(ناصر) شاب كل شي فيه زين.. لكنه عصبي.. نار مشتعلة ..إذا غضب نسى أمه وأبوه ونفسه.. فشلون يتذكر صديقه؟!
مرة أخذني بسيارته عشان أساعده غي نقل عفش بيتهم،وبعدين وقف في محطة بنزين وعبى بنزين،وبعدين طلب الباقي من عامل محطة البنزين وكان الباقي ريالين..وبعدين قاله العامل: (صديق أنا فيه يرجع ريالين)وبعدين غضب ناصر وأصر على الريالين..وبعدين أنا أخطأت وقلت له:خلنا نمشي وأنا أعطيك (الريالين)وبعدين عصّب علي وقال:أنا أصلاً ما يهمني ريالين ولا تهمني أنت،وبعدين طلّع مية ريال من مخباته وشققها وجدعه من الدريشة فتافيت..وبعدين انطلق بكل سرعة ووقف عند باب بيتي وقال: انزل..فقلت:وعفش بيتك ما نقلناه! فقال: انزل..واحمد ربك إني ما نزلتك عند المحطة! فقلت:وبعدين؟!
ومرة في اختبار مادة الجوجيا-(أنا محتاريكتبونها جلوجيا أم جورجيا وفي النهاية قلت أحسن شي جوجيا)-في الجامعة.. قال له المراقب:يا ناصر أغلق الجوال..ما تسمع؟
فقام ناصر،ومشى..ووصل إلى المراقب..وقال:خذوا ورقتكم!
حاول الجميع إرجاعه..وقلت:يا ناصر الموقف ما يستاهل،وأنت ما كتبت ولا إجابة..شف ورقتك بيضاء،فقال بكل سخرية: (بيضاء زي القشطة)انقلع ولا أخذت ورقتك وقطعته.
بلعت ريقي واستبعدت فكرة مصادقة ناصر،لأني أصلاً أخاف أصادقه وأسافر معه في رحلة الشخصين،وبعدين يغضب ويدعسن بالسيارة!

أبو أرانب
فكرت في (ماجد)شاب طموح..سمين ضحوك..قررت أصادقه..بس تذكرت إنه كذاب نصاب-(نصاب:ابن عم قصاب،الأول يفت القصص والثاني يفت اللحم)-يقولك القصة بكل حماس كنه صادق،،ويتضح كذبه من إن كلامه يمشي حسب رغبة المستمع،وهو إذا كذب كذبة احتاج عشرين كذبة يداري كذبته الأولى،،،وكل شي هو شافه قبل الناس،وكل حدثة كان فيها،وكل شخص درس معه بالإبتدائية..وحتى(الجن)بسم الله..حكاياته معهم مثل السلام عليكم،فهو طاق معهم صداقة على كيف كيف كيفك.
وأسرع كلمة عنده: (والله العظيم) ياليته يغيرها ويخليها : (جعلي أموت).-(ويخطىء بعض الناس ويقول:<جعلي أموت كل سنة>)-

ألقاكم في الحلقة الثانية


وداعــــــــــــــــــــــــــــــــاً

[طالب علم]

موضوعك لم أقراه كاملا لكن أظنه جميل يا .........

[طالب علم]

نريد موضوع من مواضيعك الرائعه يا عمدة المنتدى كله

[^المستشار^]

مشكور..وننتظرالمزيد..

[alhaoy]

والله موضوع أكثر من رائع ...



تحياتي لك أيها العمدة ...