[مدحت شوقي بريده]

هلا بألبياااااااااااااتي كلكم ..
يابعد معاليق مصاريني انتم ياأهل بريدة ..
ويابريدة ياديرة هلي ..
ياعزوتي ياعيال علي ..

نئود اليكن بئد فاصل من الطرب <<((== مدحت يحيي مجرشي ..

ومع بااااااااااص ابو علي لنقل المعلمااااات ..
لتكملة الجزء الثاني ..

( الجزء الأول / باص ابو علي لنقل لمعلماااااااااات .. جو بي جوق ..

تعرفون بالجزء الأول ابوعلي وصل المعلمات للمدرسة ..
والآن يبي يرجعهن عقب مادق جرس ( الطلعة )





××××



عند الاشارة تكون الساعة الواحدة وثلاثون دقيقة ..
تررررررررررررررررررررن .. طاليعة طاليعة ..
وفي هذه الاثناء تخرج المدرسااااات ( ناحرااااااات ) باص ابو علي ,.,
وأبو علي جالس يحتريهن بالباااااص ..

وقبل مايركبن .. ماشافن أم علي ..
فقالن .. وين أم علي .. عسى ماشر ..

لاأبد ماهنا الا العافية .. هذيك مايجيه شي .. راضعة من بسه أم سبع أرواح ..
تصدقون اني مره سويت روحي ماشفته .. ووطيته بالباص :D :D :D ..
وقامت ولاكأن شي صار ..

بس عاااااااااااااااااااااد أبقولكن شي ..
ابشركن .. أم علي ( ولدت )

ماشاء الله .. وش جاااااااااااااااابت ..

ما أدري وش جابت .. اتصلت على المستشفى .. وردت علي السستر .. وسألته ..
قالت ايوه .. ام علي في ولاده .. قلت له وش جابت ..
قالت ممكن ولد ممكن بنت ..
قلت له : لاياشيخة والا ماجابت عنز :D ..
أكيد ولد والا بنت انتي وخشمتس هاللي كأنه براية ..

وعقبه زعلت وقالت انت كلااااام كثير وصكت السماعة بوجهي ..




××××




المهم يالله نمشي .. بس وين أبله نوره .. وراه عيت تركب ..
يعني لاااااااااااازم محرم ..
خلااااااااااااااااااااااااص قولن له آخر ثلاث مدرسات ينزلن مع بعض ويتصرفن
والا بحريقة ..
هذه جت ابله نوره يالله اركبي ..





××××




ويوم ركبت قاله ابو علي مره ثانية ..
( ابله نوره ياعيوني ياللي لابسه الليموني )

انثبر بس هين أوريك والله لااعلم ام علي اخليه تعلقك بالمراية ..
علشانه مهيب معنا قعدت تهمق علينا .. أنت وسنونك هالمخرثااااااااات ..
امش بس ولا تتكلم معنا ولا كلمة ..

وتحرك ابوعلي ..





××××





وبعد خمس دقائق .. اووووووووع ..
ابو علي يوقف عند بيت ابله ( نوف )

يالله يابله نق تربيع انزلي وصلنا ..
ودخلي هالمثلث اللي انتي مطلعته مع الدريشة ..
كل شوي صافقن بعلبات واحد ..
وشيلي عدتس هالمنقله والفرجار اللي كبر قريح ..
اعوذ بالله انتي المفروض تروحين للمدرسة بتريله من كثرعدتس وكبرهن ..

يالله بس مع السلاامه .. اووووووووف ..






××××





وبعد ثلاث دقائق .. اووووووووع ..
ابو علي يوقف عند بيت ابله نوره الثانيه اللي توه معرسه ..

اوووووووووع ..
هيه أنتي .. يا ( مجنونة ابوكم )
ترى وصلنا البيت حولي الله يرحم حالتس ..

وهي دايخة ماغير تكتب رسايل لزوجه ..

هيه حولي .. شوفي قيس يحتريتس عند الباب .. هو وسنونه اللي واصلتنن سره ..
ومن زين الخشه معه وردة حمراء .. اقول لاتخلينا يالرومانسي :D ..
اللي يشوفك يقول اسمك اياد والا رامي .. وأنت اسمك سليمان ويعيرونك ابو نشقة :D ..

لاوفاتح اثمه .. والله ما ادري هو يضحك والا يتثاووب ..
يالله مع السلاامة .. وقولي لوه يصك اثمه ترى شفنا المثانه من كبر اثمه :D ..

اووووووووووووووووووف ..





××××





وفي أثناء هذه اللحظااااااااات .. يوقف ابو علي عند سيارة عسكريم ..
وراك وقفت يابو علي ..
ابد .. ابشريلكن عسكريم ..
ومن قالك اننا نبيه وش جايك اليوم انت منهبل .. يالله امش ..
بعدين ماشاء الله عليك ماآمداه تغيب أم علي ..
الا انت شايلن دعاء السفر وحاطن صورة نانسي عجرم ..
يالله شله والا لاعاد تجينا تآخذنا .. وأمش يالله ..




××××




عااااااااااااد تحسبهن ذا طلعن من المدرسة كل وحده ماسكتن المرتبه وساكته من التعب عقب الشرح ..
لا لا لا .. ماشاء الله عليهن يبتلن يهمقن ..
ابله فطيمة تقول لأبله حصه ..
ماشاء الله أثر أم علي هذا شهره والله اني احسبه توه .. ماشاء الله ماله بطن ..
تقولين حاملتن بفاااااااااااار ..
ايه الا هذا شهره .. هي واختي مريم شهرهن وااحد ..
اجل تحري لأختي مريم هاليومين ..

هيه ياأبله حصه .. ترى وصلنا وأنتي ماغير شهري وشهره
<<((== شهره هذا واحد منبح حلقه ويقول ( شعره ) ==))>> جرب ستجد النتيجة ..

يالله مع السلاااااااااااامه ..
اووووووووووف ..





××××





وبعد أربع دقائق .. اووووووووع ..
ابو علي يوقف عند بيت ابله فطيمه ..

يالله يابله فطيمة حولي ..
طيب اصبر شوي يبي ينزلن باقي المدرسات معي ..
ولاتروح ابجيبلك غدا ..

آلو اقول ياعايشه .. حطي شوية رز مع نص دجاجة بحافظه وكزيهن مع اخوتس
لأبو علي عند الباب زوجتوه والده ولا عنده غداء ..
ويالله انزلن يابنااااااااااات ..

اقول ابو علي خذ هالغداء اللي مع الولد لك ..
شكراً .. بس عسى فيه صنوبر .. بعدين وراه دجااااااااج .. مافي لحم ..

اقول ماودك اذبح لك ذبيحه بعد .. احمد ربك بس ..
تبيه والا كبيته لبقرتنا ابرك منك ..

يالله مع السلااااااااااااااااااامه ..




××××





اووووووووووووووووووووووووووف ..
ويشلع ابو علي بالباااااااااااااااااااااااااص رايحن للمستشفى يبي يشوف ام علي وش صااااااار عليه ..

وسلاااااااااااااااااام عليكم ..



وترقبوا ابوعلي يعتمر بالمعلمات بالعطلة الصيفيه ..

[الإعصار]

ما شاء الله هذه الحلقة الأخيره وإلا بقي شئ

وش رأيك نعتمر معهن مع أبو علي .......... أهجد بس

وأهم شئ بعد تعلمنا وش جابت أم علي
بنيه وإلا وليد


تسلم يا مدحتنا الغالي

[الـصـمـصـام]

ولو أم علي له ثقل بالمجتمع
اثره مربيته

تلقاه من يوم اعرسوا هو تسمع بالعسكريم ولا تدري وشو
تحسبه من الفواكه

و آخرته يجي هالتعبان و يشري لذولي
.
.
عاد تحري العمرة تعدي على خير .؟؟
ماشاء الله .. موضوعكـ به همزات !!!
بس ولو به غليطات غير مقصودة ..

[فهد703]

هههههههههههههه
ننتظـر العطله الصيفيه

[فهد703]

اجل يالاعصـار
وش رأيك نعتمر معهن مع أبو علي
ههههههههههههههههههه

حلوه والله
ولاتنسونن تراي ابروح معكم

[مدحت شوقي بريده]

اقتباس المشاركة الأساسية كتبها الإعصار ما شاء الله هذه الحلقة الأخيره وإلا بقي شئ وش رأيك نعتمر معهن مع أبو علي .......... أهجد بس وأهم شئ بعد تعلمنا وش جابت أم علي بنيه وإلا وليد تسلم يا مدحتنا الغالي

هلا بالبي الاعصااااااااار ..
يالبي وين تعتمر معهن .. هاللحين الباص حق 16 راكب ..
ولا بوه الا 9 مدرساااااااات .. لأن كل وحده مآخذه كرسيين ..
تعرف مايقعدن بالكراسي كود يتبطحن وهن يسولفن ..
يسلموا يالبي يالاعصاااااااااار ..

تبي تعتمر معهن .. ولو مبطي ماجاك ملاااااااس يطبع بجبهك انت ..

يابعدي يابو بصير ..
جوق بي جوق ..

[المواطن]

صـــارت مسلسل يامتحت !!!

ورا ماتخلي باقي الحلقات لرمضان الجاي >> ايه مثل طاش ما طاش

[عابق الذكرى]

اللي يشوفك يقول اسمك اياد والا رامي .. وأنت اسمك سليمان ويعيرونك ابو نشقة ..


ههههههههههههههههه أجل ابو نشقه شكله جنون المخطوطه على غفله

ننتظر بشغف العطله الصيفيه

جوق بي جوق

[مخاوي الصمت]

اقتباس لاأبد ماهنا الا العافية .. هذيك مايجيه شي .. راضعة من بسه أم سبع أرواح .. تصدقون اني مره سويت روحي ماشفته .. ووطيته بالباص :D :D :D .. وقامت ولاكأن شي صار ..

ههههههههههههههههه
صراحة حسيت إنك منتهي يا متحتنا

اقتباس قالت ممكن ولد ممكن بنت .. قلت له : لاياشيخة والا ماجابت عنز :D ..

أثناء قرأة هذه الجملة خرج كل الجلكسي الي كنت أكله
حسبي الله عليك أنت وسسترك

اقتباس ويوم ركبت قاله ابو علي مره ثانية .. ( ابله نوره ياعيوني ياللي لابسه الليموني )

شكله شايب صغير ابو على وإلا أكيد إنه من عنيزة
هم اللي شيبانهم منسمين

اقتباس انثبر بس هين أوريك والله لااعلم ام علي اخليه تعلقك بالمراية ..

متحت أكيد ما عمرك جربت المراية ههههههههههههه

اقتباس علشانه مهيب معنا قعدت تهمق علينا .. أنت وسنونك هالمخرثااااااااات ..

والله أشوف إنه موهب بس هو اللي حاط عينه عليه حتى هي تمقلته تمقل لين حفظت شكل سنونه المخرثة
وينتس يا ام علي؟

اقتباس ودخلي هالمثلث اللي انتي مطلعته مع الدريشة .. كل شوي صافقن بعلبات واحد

واااااااااوك تخيل إنك تمشي الظهر تافلن العافية همن يجيك معلب يحبه قلبك من نق تربيع وش تبي تسوي؟؟؟؟؟؟

اقتباس هيه أنتي .. يا ( مجنونة ابوكم ) ترى وصلنا البيت حولي الله يرحم حالتس ..

أما هي أنتي حسيت إنه قاطن معه ابو الشباب
الله يقوم أم علي بالعافية...

اقتباس وهي دايخة ماغير تكتب رسايل لزوجه .. هيه حولي .. شوفي قيس يحتريتس عند الباب .. هو وسنونه اللي واصلتنن سره .. ومن زين الخشه معه وردة حمراء .. اقول لاتخلينا يالرومانسي :D .. اللي يشوفك يقول اسمك اياد والا رامي .. وأنت اسمك سليمان ويعيرونك ابو نشقة :D ..

تحس إنهم طااااااافين بس الله يستر عقب كم سنة وش يصير الوضع
الله يوفق كل شباب وفتيات المسلمين لكل خير في الدنيا والآخرة

اقتباس لاوفاتح اثمه .. والله ما ادري هو يضحك والا يتثاووب ..

فاتحه من الهدارة وأنا أخوك

اقتباس يالله مع السلاامة .. وقولي لوه يصك اثمه ترى شفنا المثانه من كبر اثمه :D ..

أجل شفت المثانة وهذا أول يوم الله يستر وش يبي يشوف عقب اسبوع
وإلا مير لا جت العطلة تبي تطلع إعلومك يا أبو علي

اقتباس وفي أثناء هذه اللحظااااااااات .. يوقف ابو علي عند سيارة عسكريم .. وراك وقفت يابو علي .. ابد .. ابشريلكن عسكريم .. ومن قالك اننا نبيه وش جايك اليوم انت منهبل .. يالله امش ..

اليوم عسكريم وباتسر مفطح
هلا بيييييييييييييييييييييييييييك

اقتباس بعدين ماشاء الله عليك ماآمداه تغيب أم علي .. الا انت شايلن دعاء السفر وحاطن صورة نانسي عجرم .. يالله شله والا لاعاد تجينا تآخذنا .. وأمش يالله ..

الحين تأكدت إنه من عنيزة
نانسي مرة وحدة
تحس إن الولد يبي حنان

اقتباس <<((== شهره هذا واحد منبح حلقه ويقول ( شعره ) ==))>> جرب ستجد النتيجة ..

اوجعن حنتسي وانا اجرب صرت تقل مهبول انت وقذلك

اقتباس اقول ابو علي خذ هالغداء اللي مع الولد لك .. شكراً .. بس عسى فيه صنوبر .. بعدين وراه دجااااااااج .. مافي لحم ..

صنوبر وش عنده اللبناني
لاويبي لحم لا أشوته يحمد ربه عبرنه
والله يا هو ما يعطى وجه ابد

اقتباس اقول ماودك اذبح لك ذبيحه بعد .. احمد ربك بس .. تبيه والا كبيته لبقرتنا ابرك منك ..

صراحة ما عرفله بعد ام علي الا فطيمة الكدة
بس ولو علمته قدره أجل البقرة أبرك منه والله زين ما سوت شكل ام علي تبي توصله بلاش عقب اللي سوته مع ابو علي العربجي

اقتباس وترقبوا ابوعلي يعتمر بالمعلمات بالعطلة الصيفيه ..

مشوار نص ساعة طلع بهن وشره وتبي يسافر بهن بعد شكلهن يبي ينزلن بشهار
يعني خروج نهائي ههههههههههه


متحت الف عفواً على تمصيع أتسبادنا من الضحك
يا حبيلك شلف شوي شوي علينا ترانا ما نتحمل يااااااااااي

[بريماكس]

:: ينقل إلى "سواليف كشكولية"::

.
.
.


بريماكس

[رافض الفكره]

ههههههههههههههههههههههه

الله يا خذ بليسك يا مدحت...............

مت من الضحك.............

تصدق انك فتحت نفسي للدراسه...........

وقلت لامي ادعي لمدحت.....تري هو الي خلان ادرس

[مدحت شوقي بريده]

اقتباس المشاركة الأساسية كتبها الـصـمـصـام ولو أم علي له ثقل بالمجتمع اثره مربيته تلقاه من يوم اعرسوا هو تسمع بالعسكريم ولا تدري وشو تحسبه من الفواكه و آخرته يجي هالتعبان و يشري لذولي . . عاد تحري العمرة تعدي على خير .؟؟ ماشاء الله .. موضوعكـ به همزات !!! بس ولو به غليطات غير مقصودة ..

هلا بالبي الصمصاااااااااااااااااام ..
هلا بعد معاليق ديودي ..

يالبي ابو علي أول مايعرف سيارة العسكريم ..
تلعب عليه ام علي تقولوه .. هذي اسعاف انحش لايشيلونك يضربونك ابرة ..
همن يهج ياويلي هالهدر ..

بعدين انت مستلم بدال نور الصباح على الأخطاء الأملاااااائية ..
يالبي تبي تتعب ..
انا ست سنين اسقط بثالثة متوسط بس بالإملاااااااااااااااء ..
اخر شي قال المدير شوتوه شوت .. بس خلوه يفارق حوم تسبودنا ..

تغيروا المدرسين .. ومات الفراش ابو سليمان .. وصبغنا المدرسة مرتين ..
وهو الين هالحين ماتخرج .. قاعدن على نهضنا ..

يسلموا يالبي لاتتعب روحك ..
جوق بي جوق ..

[مدحت شوقي بريده]

اقتباس المشاركة الأساسية كتبها فهد703 هههههههههههههه ننتظـر العطله الصيفيه

اقتباس المشاركة الأساسية كتبها فهد703 اجل يالاعصـار وش رأيك نعتمر معهن مع أبو علي ههههههههههههههههههه حلوه والله ولاتنسونن تراي ابروح معكم

هلا بالبي فهد 703 ..
هذا اسمك والا لوحة هوندا ..
ياحبيلك يالبي اجل تبي تروح معهن .. وش يدخلك بهن ..
ايــــــــه نسيت .. اثرك انت محرم لأبو علي .. :D :D :D

ياحبيلك يافهد ..
شترن يالبي على حضورك بهذا ..
جوق بي جوق ..

[فهد703]

العفو يامدحت
بس سجل اسمي تراي ابعتمر مع ابوعلي
اركب ورا والا قدام مهب مشكله