[برجس]

تمهيد /

كثيرمن الناس عندهم مواهب وهوايات لكن القليل منهم من ينميها ويستثمرها بشكل كويس [ حكمه اغريقيه :D ]

مريت في احد الشوارع خارج نطاق العمران ( يعني بعيد عن البيوت لاخواننا القراوه ) واشوف عالم متجمعين، 95% منهم لابسين طواقي

ازداد مفعول الانضغاط عندي ووقفت اشوف وش عندهم .
اول ماوقفت الموتر ونزلت الا واسمع صوت واحد معلق البوري وجاي يمشي الف ، التفت للصوت واثره واحد يفحط ويحذف الموتر يمين ويسار لين آخر الشارع .
جازت لي حركات التفحيط وانزل واقعد على كبوت موتري، اتفرج على التفحيط مع هالعالم المتجمعه لين جت الدوريات وكلن ركب موتره وحط رجله [ وأنا أولهم :D ]

بيني وبينكم اكتشفت ان الشباب السعودي عنده مواهب لكن وين اللي يستثمرها ويصقلها، يعني بصريح العباره يبيلهم واحد يصقلهم :D .
من بكرا قررت اروح لنفس الشارع واتفرج مره ثانيه ( ماقلت لكم جاز لي الوضع ) ، لكن هالمره اخذت معي زمزية شاهي وحب وبساط .
وقفت الموتر وفليّت بساطي ونزلت شاهيي وبيالاتي وزبنت فوق ربوه مرتفعه لزوم المنظر الجوي من فوق .
كان الشارع وقتها فاضي .. قلت اكيد يبي يتجمعون بعد شوي ، انتظرت ثم انتظرت لكنهم ابطوا .. قلت خل اقطع الوقت بشيء يفيد .. فتحت باب الموتر وشغلت الرادو على اذاعة MBC .
تبون الصدز .. انا منيب من مستمعينها ، لانها قناة تافهه وكلها أغاني ، لكن اخبارهم على الاقل اهون الف مره من اخبار استقبل واستدبر وودع وآكل وشرب .
شكلي شطيت عن موضوعي ودخلت بالسياسه :D .. نرجع للموضوع اصرف

اقولكم شغلت الرادو وقعدت اسمع الاخبار والاحداث العالميه، واتابع مايجري لاخواننا الفسلطينيين لين يجون حقين التفحيط .
مهما يكن الواحد لازم يتابع الاحداث والاخبار في جميع الاوقات ولا وده ينقطع عن العالم .
شوي الا جايه طوابير سيارات وراء بعض كنهم في جنب عرس .
وكل واحد وقف في مكان ونزل من موتره كنه ينتظر شيء!!!

في دقايق ازدحم الشارع ، وانا صار وجهي تسذا = ==>

قبل شوي الشارع فاضي ولا فيه الا انا وبيالاتي والحين امتلا عن بكرة ابيه ( بكرة ابيه والا حاشي امه :D ) .
ثم بدأ الاستعراض التفحيطي وبدت اساريري بالاسفهلال والانبساط والانشقاح ( تعرفون واحد توه طايح بحب التفحيط ولازم يصير له كذا )
وحنا قاعدين نتفرج بدوا الناس يزدادون ويكثر عددهم ويختلطون ويقربون من بعضهم البعض .
مادريت الا بمجموعه شباب تجمعوا قدامي وحجبوا عني الرؤيه .. صوّت لهم وقلت : ياشباب اجلسوا وخلونا نشوف زين .
التفت واحد منهم وقال : وين ياعمي جالس في مدرج ملعب تتابع مباراة الوحده وضمك :D .
كعوا اللي معه ضحك وقعدوا يناظروني باستهزاء .

عيال اللذينا انا ما ادري وشلون عرفوا اني توي طايح بالتفحيط؟؟؟!!!!
استمروا على وضعهم لين فكني الله منهم وذلفوا .



بعد مدة جاء واحد سلم وقال : عن اذنك بيالة شاهي على الماشي . قلت : تفضل .. صبيت له بياله وقعدنا نناظر التفحيط ونحلل حركات المفحطين اللي تصير قدامنا ونسولف سواليف عابره ومختلفه .
جاء راعي ماكسيما يفحط وهجت به على الردميه وبغى يضف هايلوكس واقفه بجمب الخط .

قلت فرصه خل ازعط واتفلسف على اللي جالس معي قلت : هالزلابه راعي الماكسيما لو ربط فرامل او جر الجلنط قبل ياصل للهايلوكس عشان مايصدمه كان أحسن .. لكن وش تقول الغشيم غشيم ( على بالي أعرف التفحيط وتصريف المواتر :D )
ناظرن باستغراب وعرف ان ماعندي ماعند جدته مزنه ثم قال : صب شاهي الله لايهينك .
بعد ساعة تقريباً بدو العالم يختبصون، عرفت ان الدوريات جت .

قمت وضفيت بيالاتي وبساطي وحطيتهن بالموتر .
شوي الا واقف قدامنا راعي كامري عشبي ويضرب بوري للي كان جالس معي ، راح له وقعد يكلمه ثم التفت علىّ وقال : تخاوينا يابرجس؟ رديت : وين؟
قال : نبي نروح لمكان التفحيط الثاني في شارع الجنوط .
بصراحه شدني الاسم وقلت بيني وبين نفسي اكيد يبي يصير فيه تفحيط احسن من ذا .. ياولد رح معهم ولا تجي الا العافيه .
قفّلت موتري وطمرت معهم بالكامري .

عرفني خويي على السواق ، هذا الاخ برجس توي متعرف عليه ، ثم اشر على السواق : وهذا الاخ غازي طاط .. مد السواق غازي طاط يده وسلم وقال : حياك الله .
داس للموتر مع العالم اللي يمشون قدامه ووراه .
وحنا رايحين لشارع الجنوط لاحظت ان غازي يمشي مليووون ويزورق بين السيارات ، قلت بكل براءه وقلبي طايح بين رجليني : يا ابوطاط ما اشوفك تدق اشاره اذا بغيت تسقط على المواتر اللي قدامك وهذا يعتبر خطأ .
التفت غازي عليّ هو وخويه وكعوا ضحكه الى يومكم هذا ما ادري وش يضحكون عليه!!!!
وصلنا لشارع كبير اكبر من الاول وفيه عالم متجمعين كنهم ينتظرون احد!!
قال الراكب موجه كلامه لي : هذا شارع الجنوط يابرجس ثم غمز لغازي وقال : سلسلها يابو طاط .
الرجال ماكذب خبر وحذف الموتر يمين وهو يمشي الف ومن قوة الحذفه صفقت بالباب الثاني ثم حذف الثانيه واصفق ببابي الاول ومع كثر الحذفات والتجديع صرت كني بونقه على طاولة تنس مغير اصافق بالبيبان وياما رحت يمين وياما رجعت يسار.
وبالاخير ختمها بسلسله من قوتها طحت عند دعاسات الرجلين ، وماتشوف الا العالم تصفيق وتجديع بالشمغ والطواقي .
التفت عليّ الراكب خويي وهو يضحك : سلامات برجس .. عسى ماجاك شيء؟
قلت وأنا اتنافض من الروعه : الله لايسلمك .. ليش ماعلمتن بانه اكبر مفحط ؟!

ابوطاط مهوب معنا وكان مندمج مع الوضع وناوي يكمل الجوله، عقب ما عدل الموتر وكتم الدعسه قمت وتعنقطت برقبته وانا اصارخ : طالبك توقف وتنزلن .. الله يرحم والديك .. تكفى يابوطاط نزلن وطس بوادرين .
وغازي يصارخ فك رقبتي جعلك البلا .. وخر عني يالكمخه .
العمر واحد وياروح مابعدك روح .. والله ما افكك لين تنزلن .
جدع الموتر يمين ووقف ثم قال : انزل وفارقنا .
نزلت عند مجموعة شباب ، ناظروني باعجاب وقال واحد منهم : يحق لك ، من قدك راكب مع غازي ابوطاط .
قلت بنفسي على تراب وانطم لابارك الله فيك ولا في ابوطاط .


المشكله كان بطني يمغصني والامور مختلطه من الرج اللي قبل شوي .
ابعدت عن التجمعات ورحت طيرت الشراب وركدت شوي .
سحبت نفسي من هالتجمعات وآشرت لراعي ددسن وصلن لموتري ثم ركبته ورحت للبيت تغشاني الروعه وتلفني آهات الانين الموجع .

عاد انا من واقع خبره بحقين التفحيط انصح اخواني واقول :
7
7
7
7
7
7
7
7
7
7
7
7
7
7
7
7

لا احد منكم يصادق مفحط

:D:D
:D

[وليد التميمي]

في الحقيقة موضوع جيد


بس ماتلاحظ انك صرت تقل كشنة مشبوب عليه بالزيت


المهم هههههههههههههههههههههههه خخخخخخخخخخخخخخخخخخخخخخ



تنسييييييييييييييييييييييييم أجل تصافق يمين ويسار




على العموم أحسنت على هذا الإجتهاد //// وإلى الأمام....

[شـــــــــقاوي]

أقول / برجس .....ماتخاوين الليله عندنا شغيل...؟؟ :D :D :D

[مالكوم إكس]

أول شيء الحمد لله على السلامة ..
ثاني شيء .. وين هو به شارع الجنوط ماأدري وش اسمه ..
على فكرة إذا شفت غازي الله لا يهينك سلم لي عليه كثير السلام ...
بصراحة مع إني ماأعرف غازي .. إلا إني حبيته من قلب ...

[نور الشمس]

قصه رائعه .. واحداث دراماتيكيه ( حلووه دراماتيكيه ) ..

[البحري]

والله يا غازي ذا منطلدز... ألا انت يالمقرود وشوله تركب معهم لا عمرك تركب مع احد تفهم ---> أبووه على غفلة.


أما يوم تروح يمين ويسار...... شكل الشاهي اللي بطنك صار عصيدة:D



مشكوووووووووور ياخلفهم يابرجس.... على هذا الموضوع الشيّق.....

وإلى الأمام.......

يالله سلالالالالالالالالالالالالالالالام

[برجس]

قلب الذيب :

اجل احسنت على الاجتهاد

وين ياخوي قاعدين بمدرسه؟! :D


مشكورر على الرد والتشجيع ياراعي التمر



شقاوي :


وراه ما اخاويك؟!!

الا اخاويك ونص

ما دامي راكبن بالكامري مع ابوطاط وجلعدته وشلون انت ياشقاوي

شكلك حبيب ومنتب راعي سرعه



مالكوم اكس :

الله يسلمك


بالنسبه لشارع الجنوط فمع سرعة الاخ غازي ما انتبهت للطريق

مغمضن عيوني لين وصلنا

يبلغ سلامك للاخ غازي

هو فعلا حبيب لكن بوه ميزة هالسرعه لو يفكه الله منه تسان يطلع اكه

مشكووور على الرد



نور الشمس :

حلوه احداث دراماتيكيه

ودي تركب مع ابوطاط علشان تعرف الدراماتيكيه على اصوله :D

يحلفون ان تنسى قاموس اللغه العربيه :D



البحري :

سم يايبه

اخر مره

ما عمري اتعود له


مهوب بس الشاهي اللي صار عصيده

الا كلي على بعضي صرت تسني حب مطحون



اجل .. ((( الى الامام )))


تسنك رقيب بالحرس الوطني تدرب مجموعة جنود :D

هههههههه

يعطيك العافيه

[برجس]

نسيت اقولك يالبحري تصغر توقعيك اللي كبر قريح

ياخوي تراك غطيت على موضوعي بهالتوقيع اللي تسنه جبال طويق من كبره :D

[برجس]

:D

[الخاطف]

<<<<< مافي أمل أصادق مفحط

حلوووووووووووو يا برجس - تسلم أناملك والله

بس صز هههههههههههههههههههه إني ميت من الضحك

وودي صراحة إن اللي أشرت له راعي الددسن يصير ( مرتقي بيب ) هههههههه

عشان تكمل ......

طيب وين هو بوه هذا شارع الجنوط ؟

تبي تفحط <<<<<

<<<< لا منب مفحط - عساي أمسك فرامل - طيب

فكك الله زين إنك نزلت يا معود ...... <<<< أجل من قدك >>>> سان قلت القلب يمشي تيرليووون ههههههههههه

سلالالالالالالالالالالالالالالام