[التويجري]

طيب واذا كان الرقم المجاني يقول اذا بغيت تشتكي موظف ارسل فاكس باسم الموظف هاذا ..

ياعلك للطبيلة لو ابرسل فاكس ماجيت ادق عليكم ..

ولوعندي فاكس ماانتظرت ان تصدر لي امر بارسال فاكس ..

هل مهمتك هي توزيع التعليمات فقط ..؟

لماذا لاتكون هناك خطوط ساخنة للشكاوي تتصل بمن له ثقله بالإدارة ..؟

الكل يكاد يجمع على أن البنك الحائز على جائزة أشين أخلاق للموظفين والموظفات هو بنك الراجحي ..!

ففيهم استعلاء على عملائهم بطريقة عجيبة ..

ولايوضع مثل هؤلاء إلا في أماكن الإحتكاك المباشرة ..

مثل الصرافين أو خدمات العملاء ..

يعني بالواجهة ..

وأما من يتميزون بالخلق أو من يفرض عليهم الخلق لمصلحة المصرف فهم في غياهب حسابات وأرصدة التميز يعني للهوامير فقط ..

لأنه لو سحب قروشه يبي يطبعون ..

وليته توقف على ذا لا يمكن بعد يجتمع مع هوامير همن يمسحون بالمصرف العالمي بالبلاط بسحب كل الأرصدة ..

فيصبح مصرفنا خاويا ً على عروشه ..

إذا كان الشايب رجليه تسحب بالقبر بمقام أبو الموظف بل أبو الراجحي نفسه ..

يدخل ويقول لأحد الصرافين ياوليدي أبسدد فاتروة الكهرب للمزرعة ..

ويقول له الموظف لك حساب ..؟ توهق وقال ايه ..

قال رح مع الصرافة وإلا راجع شركة الكهرب ..

قال ياوليدي ماأعرف اغمز بهالجدران اللي ماتوحي << يقصد الصرافة :D

والشركة تسايدتن علي بعيييدة ..

قال ماعندي غير تسذا ..

أمر يقعد الشايب يلزم عليه أمر ينفخ عليه الموظف وقال ياعمي لو سمحت تراي مشغول لو سمحت ..

لكن الشايب يعرف له قال للموظف شف وجه العنز واحلب لبن ..!! وعطاوه مقفاوه :D :D

كروا اللي بالبنك يضحكون وذاك مطيرن عيونه يضرس على باله وزير وهو
صراااااف ..

امر يجي الشايب لمي قلت بس صارت الدقة بي قال تعال نغز لي بالجدار ذا قلت سم ابشر ..

لعنبوا ابليسك وشو شغلك اذا ماخدمت هالشايب وخليته يطلع مستانس وينشر عنك وعن بقالتكم سمعة طيبة ..

أيهم تفضل يمشي الشايب ويقول للجماعة رحت لبنك الراجحي واستقبلون ناس حبيبين وخلوقين وخدمون الله يجزاهم خير ..

وتكسب هوامير الشيبان وماادراك ماهم ..!

وإلا يطلع يسب ويهوش ويلجلج وينشر سمعة سيئة همن الشيبان يحطون قروشهم بشنطة حديد وإلا بتجوري أحسن من أنه يجي يذل روحه بالبقالة ..

ولنبقى في هم التداول ..

فلسنا بحمد الله من صرعى الأسهم الهوامير ..

إنما هي تجربة جعلنا الراجحي بعدها نحرم شيء اسمه أسهم ..

أزمة البلاد أو بالأصح أسهم بنك البلاد ..

أربعة أسهم فقط أقمنا الدنيا ولم نقعدها لأننا نريد البيع فوريا ً ..

لكن عند مين يابويا ..

يقول موظف الراجحي البيع الفوري بأوامر داخل الصالة ..

طيب بسم نبي ندخل الصالة ..

كم حسابك والله حسابي به لقيمات يقمن صلبي ..

يقول لك دحدر الله لايهينك وتسلف لك 100.000 ريال علشان تدخل عند الشاشة ..

طيب يبو ياحبيب يالبيب ياعدل يابدل مافييييييييييييه ..

يبن الحلال انا منب هامور ابقعد مكوكي اتابع بهالشاشة انا عندي 4 اسهم اببيعهن بسعر اللحظة يعني اعبي الامر واتوكل واضف خلاقيني ..

معصي ..

يوم شافوا ان الدعوى به ومابه وكثروا اللي بحساباتهم 100.000 ريال ..

أمر ينقزون بقدرة قادر إلى 250.000 ريال بصالة الخبيب والله على ماأقول شهيد ..

وياكثر اللي عندهم 250.000 فاللهم لاحسد يعني لازالت الصالة شبه مليانة من المتبطحين أمام الشاشة ..

المهم معك 250.000 ريال تدخل مامعك تنطق تعبي هالأوراق ويرسلونهن للإدارة وبعد 3 أيام يباعن لك بسعرهن الموجود في تلك اللحظة ..

يعني لو اليوم سعره بـ 250 ريال على سبيل المثال ..

وبعد ثلاثة أيام بـ 25 ريال تباع أسهمك اليتيمة الأربعة بـ بسعر 25 ريال فقطططط ..

لاتكابرون يالراجحي رحنا لبنك الرياض نعم هو ربوي لكن حدتنا معاملتكم الحلوة إلى أن نبحث عن البديل ..

وندخل لصالة الأسهم ويعطوننا الورق ونعبيهن بوسط الصالة ويبيعون الأسهم بلحظتهن (طبعا أسهم ليست لبنك البلاد) ..

وياحول أنا متعود على بنك الراجحي قلت هاه متى يباعن ..؟

بعد ثلاثة أيام بالحساب نلقاهن وإلا لازم نراجعكم ..؟

ضحك الموظف وقال لي بالحرف الواحد ورااااااه بنك الرجحي ..!!

الحين بحسابك الدراهم ..

قلت وشو ..

قال جاك العلم ..

قلت بيض الله وجهك واتحببه تقل ياشيخ معطين اياهن هدية ..

وتطول السواليف والهواجس والمصائب الراجحية ......

.
.
.
.
.

إلى مالا نهاية ..

لكن عمنا الراجحي أعز الله مقداره حاطن بإذن طين وبإذن عجين ..

يعني جاز لك وإلا صك راسك بألف جدار ..

تبي إسلامي فأنا أبذلك وأذل اللي جابك إلا أن تكون هامورا ً نستفيد منك في قابل الأيام فلك على الراس قبلة ..

جاز لك وإلا رح لربوي يحبك على خشمك ويصب لك شاهي وقهوة ..

بنك الراجحي يتمنطر شكليا ً ليضيف المزيد من السيولة مهب علشان خاطرك يالعميل ..

لا علشان فلووووووسك تحت شعارات براقة ..

والميزة التي بحمد لله تم فك احتكارها عن بقالة الراجحي ألا وهي إسلامي ..

مصيرهالبقالة مصير شركة الإتصالات وعبد اللطيف جميل ..

ليش لا لكل شيء وإن طال نهاية ..

فلو دامت لغيرك ماوصلت إليك ..

تحياتي لكم ياموظفي الراجحي ..

وتحيتي لمحاورنا البوارق الفاضل ..

ولاتزعل علينا لأني أراك خلوق وليت بنك الراجحي كلهم مثلك ..

ومن الأفضل عدم المكابرة ..

ودعوا العميل يحكم ..

فحكمكم على بنككم جائر ..

وشهادتكم لأنفسكم مجروحة ..

لأنكم من المنتسبين له ..

فالآخرين هم من يملك حق التقييم ..

وليس هذا حكرا ً على الراجحي ..

بل الأفراد العاديين ..

فمتى ماأردت أن ترى مدى القبول لدى الناس ..

لا تقل أنا كذا وكذا ..

بل دع لهم حرية القول بما تستحقه - إن كنت تستحق -

ولاتفرض عليهم من نفسك الوصاية ..

وإن كنت ولابد مُصِرا ً على حيازتكم للأفضلية ..

فلنضع هنا تصويتا ً من عدة مستويات حتى لاتظن أننا نريد لكم ظلما ً أو بكم وشاية ..

تصويت من خمس مستويات نطرحها في موضوع مستقل إن أردت ..

.
.
.
.
.



آسف على إطالتي وتحويلي لمسار الموضوع ..


:D :D :D :D
:D :D :D
:D :D
:D