[المستشار]

بسم الله الرحمن الرحيم ..

السلا م عليكم و رحمة الله و بركاته ..


قبل البداية : أنا أخترت هذا القسم لأني ما أدري و ين أكتب الموضوع ..
أخبر إنه عندنا منتدى أسمه نسمات برية ، أتمنى أنه يفتح لا سيما أن الأجواء هالأيام تخلي
الواحد يكشت ، غصب ، الله يديم الخير ، ..






خطة السير :
ركبنا ( الضفدع ) من بريدة إلى صعافيق ، تناولنا الفطور [ كبدة ع الصاج ] ، ثم الزلفي ثم أم رقيبة
ثم رجعنا و في طريق الرجعة ، توقفنا بالدهناء لتناول الغداء . ثم رجعنا آخر العصر ..


الصور :


هذي الصورة للضفدع حقي بالمكان اللي أفطرنا به ، الصبح بدري ، بصعافيق ، و كان الجو باااارد
، و الأرض مرتويه جدا ً جدا ً من الخيرات و الأمطار و عقبال ما نشوف العراجين بإذن الله .





شبينا على الرمث ،




و هذي الكبدة على الأصول ...






عكر جوّ الرحلة ، شخص [ هداه الله ] قام بالكتابة على جدارن المساجد بالقرب من الزلفي
عبارة أرشادية و أسهم تدلك الطريق إلى روما .. قصدي إلى أم رقيبة ..
أنا ماأدري هل وزارة المواصلات و الطرق ما ملوا عينه ؟
و لا الرجال ما يهنا له لمين يشوف شخاميط ؟؟ بالجدران ..
و اللي يقهرن أنه ما يكتب إلا على جدران المساجد ..

طبعا ً هذا خامس مسجد على التوالي كلهن مكتوب عليهن [ أم رقيبة ، حفر الباطن .. الخ ]




المهم ..

وصلنا إلى أم رقيبة ،، العجيب أنني ما شفت بعاااااااااااااارين .. و لا شفت مزاين أبل و لا بطيخ .. .
كل اللي شفته ، ناس متجمعين و خيام كثار ، و كلهم يبيعون ، يعني بالعربي سوق سودااااااااااء ..
أي شي براسك تلقاااااااااااااوهـ و خذ هذه الأمثلة و النماذج ..


هذي سوبر ماركت ، يعني جيان يعضض أظفوووره خطر أنه يسحب البساط من حدره ..



و هذا يبيع هدايا و ألعاب [ أنا ما أدري من الي يبي يشري لعابيب بالبر .. !



و هذا يبيع أواني منزلية و قراشيع ، و لا حظ أنه كتب على كيس الشعير[ يوجد لدينا أشرطة كاميرة فديو ]



و هذا المطعم التركي الحديث <==== حديث مين يا عم ،




وهذا قصاب يبيع لك لحم ، ما فيه تبي نص ذبيحه و لا ربع ،



وهذا يبيع هواااااااااء .. عمرك شفت هواء يبااااع ؟؟



و هذا حلاق .. عاد هذي اللي ما راحت و لا جت .. ممكن تحديد شنب يا باش حلاق . .


وهذي الصورة مكبرة لنفس الحلاق ..




طبعا ً و دي تلاحظ معي كثرة الناس و زحمتهم .. شف وشلون :






قررنا الخروج من السوق السوداء .. و جدت أنه هناك مكان مخصص لمزاولة رياضة التطعيس . .



رجعنا لنفس الطريق متوجهين للأرطاوية ، و قبل الدهناء فيه مصلى على قارعة الطريق <=== لا تفوتك قارعة الطريق تراه مكلفتن علي و ااااااااااااااااااااجد ..

أقول المشكلة هيي هي يبدو أن الأخ الحبيب هذا فيه حالة مهب طبيعية الرجل متخصص شاخميط على جدران المساجد ..



الله يهديه ..



دخلنا الدهناء ، سوينا الغداء ..





إنتهينا من طبخ اللحم ..





و الحين جين للكلام اللي يضيق الصدر
تبون صورة الرز و هو مكبوس على اللحم ..

تهي تهي تيهي ..





[ لا يمكن عرض الصورة ]


لأن الرز طلع تقل حلاو قطن ، كثرت الماء و إنفش الرز ..
الله لا يوريكم شر ..








و السلام عليكم و رحمة الله وبركاته ..
أبو محمد ،،

[مدحت شوقي بريده]

هلا بالبي ابو محمد ..
اقول يالبي .. تصدق أحسب أم رقيبة بسطح المسجد على هالسهم الله لايعمينا ..


اقول يابي يابو محمد .. أنت رحت تشوف وش هالألعاب ..
شكل اقل لبعة بارود ..


بعدين ودي أعرف ..
وشواله الحلاااااق حاطن بابيين .. يعني تموية والا وش الساالفة ..

ودي تمطر وهو يحلق الرجاااااااااااااااااال .. الله من زين ألأمور .. يحلقة والزنك ينقط على خده ..



سلاااااام يالبي سلااااااااااااااام ..

[سفرجل]

ماشاءالله تبارك الله
اخي المستشار
صور روعة كاني رايحن معكم
كذلك الكبدة على الصاج والكبسة
وبلهنا و العافية عليكم

[al7nooooon]

تغطية متعوب عليه يابو حميده>>>أوالله تدليعه


يابو محمد ماصارت يابو محمد!

تقول تغطية رحلتي لأم رقيبه وكل السالفه أكل برنامجكم بالرحله،فطور،غداء،تدقيش [شابوره وما إلى ذلك:D ]،عشاء

كل التغطيه يابو صور كبده ورز ولحم وخيرات وأرزاق وكاتم إإإإضررررررب




صارت تغطية غداكم والحلاق ذي

المهم بما إنك وريتن صور غداء وتسبده وحلاق وأنا جوعان وشعري يبيله تحديد عليك حق من صاحب السمو هيمو حفظه الله

تعشين وتحلقن بأم رقيبة

إنتهى>>>>>>>وش عندوووه كاتبن تقرير وفاة

وفاة وإلا منيرات



رحلة موفقة يابو حميد وتغطية حلوة مثل حلاتك

شكراً خيو

[(<*أبولجين*>)]

أبومحمد

تبقى كبير في شخصك وحتى بمواضيعك ... فلقد شوقتنا للأسبوع .... الله يجمعنا وإياكم على خير



تصوير ولا أحلى



أخوك
أبولجين

[ابوخشــــه]

ماشاء الله تبارك الله
والله انك شهيتن اكشت الله يهديك كان صبرت لاخر الاسبوع

اقول اخوي رايح شايب معكم لان رزكم يصلح للي مالهم سنون بس ماعليك تقاطرت سعابيلي عليه ماشاء الله

اما الضفدع خوش اسم شي

[لكزس]

هههههههههههههههههههه حلاف في البر بس يالمستشار والله من شكل اللحمه طعمها زيييييييين جالس اقزز على اللحمه بشوف هي لحم غنم او حاشي بس من شوفتي له كأنه غنم واكيد صح
تصوير خيالي وانت اروع من الرائع

[abo suliman]

بعدي والله يأبو محمد ....
وفرت علينا .. تعب المسير. >>>>> الأخ ناوي يروح .

[خوي السرور]

يادافع البلا وش هالتقطيع للتسبدهـ !!

[المستشار]

-*-*-*-(( مدحت شوقي بريدة الدسوقي ))-*-*-*-
هلا و الله أبو إبراهيم ، هذا يابعدي طلع كاتبن أم رقيبة من حاااااااااااايل إلين تاصل أم رقيبة
الرجال شكله من أهل حايل و أول مرّة يطلع يخاف يضيّع و حط اللوحات الإرشادية ..
بس أعلمك و الله يا هو خطااااااااط ..





-*-*-*-(( سفرجل ))-*-*-*-
حياك الله ، و إن شاء الله تكون معنا في الرحلات القادمة ..
أهلا وسهلين ..



-*-*-*-(( الحنون بالإنقليزي ))-*-*-*-*-
هيمو ..
أبشر بسعدك .. أنت تبي عشاء بس ..
تأمر أمر ، أنا أخبر أننا حاطبين شوش رمث أبا أشوف إن كان باقي شي ..
أبا أخليك تقلط عليه ،، محادير العافية إن شاء الله





-*-*-*-(( أبو رجلين ))-*-*-*-
منور يا ألبي منور ..
تشرفنا بحضورك يا فخامة الرئيس [ فادي ] ..
فااااااا دي ..
فااااااا S ...

[وحيد المعنى]

[أنوار المنتدى]

هههههههههههههههههههههه
ههههههههههههههههههههههه
هههههههههههههههههههههه

الحين الحلاق وشولة حاطن بابين اقاله علية سوق بهالشموس والله ياهي كسل ياويلي يحلق بهاكالصومعة >>>>>>>اللهم لاشماته

تغطية رائعه اخي المستشار

بالتــــــــوفيـــق

[قرناس]

يقولون مزايين الإبل يبي يشرفن الأسبوع الجاي تسان صبرتوا عشان تكحلون عيونكم بسفينة الصحراء .. بس المشكلة الزحمة والمشاغبات الصبيانية اللي بتصير تبي تنكد الكشتة .. يعني يا الله الخيرة


والله ياصورة الإبريق وشبة الرمث أنه لحاااااله .. واللي أجمـــل منه الحلاق أكبر منسم بأم رقيبة مدري منهو الجزوم اللي بيقص شعــــره عنده شكله يحلق بمخلب الله يستر عليه ..

أما الكبدة أف أف أن تسان جاكـ مغص ولا تفحيط وسط البطن تراااااه عين من .. عاشت أيامــــكم صارت الرحلة أكل وشوي أم رقيبة ، مير أعوذ بالله الواحد ماوده يقول ياليتن بطن على هالحشمة اللي تجيه منكم

بالعافية يابعد مازولا أنت ..


الأجواء كانت جداً رائعة هالأسبوع هذا نسأل الله من فضله والأرض شربت من الماء مايبشر بالخير والربيع في هذه السنة خاصة أننا بالوسم .. ولئن شكرتم لأزيدنكم .

موفق يابومحمد

[الإعصار]

جميلة هالتغطية ورائعة
شكرا لك أخي المستشار

والحفل الختامي خميس هذا الأسبوع