[اسطرلاب]

مدير أحد المواقع المعروفة زميل خاص
وحبيب قلبي الروح بالروح ( يعني شخصية صح !! )

المهم ذكر لي موقع عن الزواج .. وأنه موقع فيه طلبات واقعية
وجيدة .. صالحه للاستخدام الأدمي ..

فقمت بزيارة خاطفة لهذا الموقع ..
قلت يمكن الله يرزقك يا اسطرلاب بفتاة الأحلام ..

وكانت فعلا .. فتاة أحلااااااااام

وبينما وأنا أقلب شروط هالبنات اللي يبون الستر !!
وشروطهم بصراحة ماتنطبق إلا على مايكل جاكسون أو بيكهام !! <-- وأنتم بكرامة

طحت لي على بنت يا جماعة ..
عقبها تفنقست من الضحك وانسدحت على الأرض وأنا ميت من الضحك :D !!

وتعلقت رجليني بالمروحة وهي على نمره واحد !! .. <--- عينة بهارات جديدة للتجربة فقط!!


الحاصل البنت مسيكينة فيها عدة عيوب الله يستر عليها ..

أولا / مطلقة .. ولا هو عيب كبير لكن يعتبر نقص
ثانيا/ كبيرة بالعمر (حول الثلاثين)
ثالثا/ ومتربية على الأخلاق العالية!!
رابعا/ سعودية .. وهذا مربط الفرس ( والله وصدناهم!!)

طبعا مواصفاتها الشكلية عادية جدا ..


واقرأ معي شروط البنت في الرجل الموعود ..
وتمتع برحلة الخلود ......
ومع مواصفات رجال الجنة :D


شروط البنية الله يحفظها :


ارغب بشخص عمره ما بين الخامسة والثلاثين والخامسة والأربعين
( والله ظالمها يا اسطرلاب .. شف متواضعه البنت !! )

طوله يتراوح بين 175سم و 185سم
( يعني لابد يكون لاعب سلة !! أمممممم مب مشكلة ندور لك زول !! )


سعودي الجنسية ابن عائلة معروفة جدا !
( البنت تبي الستر يارجال .. شكلك ظالمها )

وثرية جدا جدا ( عفوا لهذه الجملة ولكنها شرط اساسي لأستطيع العيش بحياة افضل )
( بدينا الشغل .. يالله ياشباب زهبوا فلوسكم !! )


صاحب اصل عالي المستوى ( يفضل ان يكون امير او شيخ معروف )
( ياحرام , فيه أحد يعرف أمير يتوسط للبنت !! )


غير ملتزم او متعصب دينيا
( معليش يا الصمصام مالك حظ بالبنت .. خل عصبيتك تنفعك !! )


وبشرط ان لايشرب الكحول
(مدحت شوقي بريدة .. راحت عليك )

او يتعاطى الحشيش او غيره
( مسكين يا المنخرش .. دايم حظك نحس !! )

تعليمه لايقل عن الماجستير او الدكتوراه ..
( أحم .. شكلي أبتقدم لها :D !! )

وسيم ورياضي البنية والوزن غير مهم
( أكيد الوزن غير مهم يالذهينه دامه رياضي!! )


اذا كان متزوجاً او اعزب شرط ان لايكون مطلق او ارمل باولاد
( عاد شوفي هذي قوية .. يعني رجال بيصوم 35 سنة ماتزوج !! أفلقني )

شرطي الأساسي عدم الإنجاب
( طبعا طبعا .. يكفينا ياحبيبتي الولدان المخلدون !! )

لأني اريد التمتع بحياتي مع شريكي قدر الامكان
( والله المتعة واضحة .. تبينه غني جدا جدا جدا )

ان يكون على مستوى فهم عالي جدا جدا جدا يستطيع توفير كافة طلباتي وسامنحه كل الحب والرعاية
( أكيد أكيد .. ولا يهمك بحط عندك دفتر شيكات كل شهر مصروف !! )

وان يكون رومانسي جدا جدا جدا يعرف كيفية التعامل بكل رقي مع المرأة
( والله شكلها تكره مدحت شوقي بقوة )

يفضل ان يكون من مواليد برج الأسد او القوس
( طيب لو جيران برج الأسد مايصلح!! )

وان لايحاول مهما كانت الظروف ان يطغى بشخصيته على شريكة حياته
( يطغى .. وش قالولك .. فرعون :D !! إلا دجاجة صقعه اللي بياخذك ! )

بالنسبة للشكل وسيم جدا
( هذي خلوها لي ياشباب .. شوفوا اللي بعدها تكفون:D )

لون العينين عسلي او اخضر
( يالهوي ...:D )

الشعر بني او اشقر دافئ
( ياخرابي .. مايصلح شعر نص استوى !! )

يعمل بوظيفة مرموقة جدا جدا بالدولة
(والله أعرف شباب بالهيئة مرموقين جدا )

وصاحب شخصية قوية
( مايحتاج .. استتري .. عندهم مثبت سرعة )

على معرفة ممتازة باللغة الانجليزية ولغة اخرى مثل الفرنسية اوغيرها
( يصلح لغة الأفغان بشتو!!:D )

مرح يحب الحياة والسفر والتجديد في كل شيء
( مايحتاج .. ازهليها .. كل اسبوع نبي نجلدبك طريق مكة وإلا المدينة:D )

اهم شيء ان يكون من سكان الرياض وبغير هذه الشروط الواردة اعلاه سيتم حذف اي طلبات تخالف الشروط المذكورة.
( هاه .. لعلك تستخير الله يا خوي السرور .. وأنا أتوسط لك ولايهمك ):D





ياشباب .. قولوا الحمد لله على نعمة العقل
هذه العينات .. فقط للعرض ..
وحتى تعرف مستوى تفكير بعض النساء ..
ومثلهن الآن في ازدياد .. لا كثرهن الله!!

[الفتاك]

عااااااااجل انا لا اريد ان اتزوج بها

ههههههـــــــهههههـــــــ

الحمد لله على نعمة العقل

سلام..

[عاشق الشلهوب]

عااااااااجل انا لا اريد ان اتزوج بها

ههههههـــــــهههههـــــــ

الحمد لله على نعمة العقل

[د/ المعتصم]

بعض الفتيات تحلم بفتى أحلامها ..

الذي يركب الحصان الذهبي ..

ويذهب بها إلى القصور والخدم


اسطرلاب بداية موفقة

[المحب4006]

أخي : اسطرلاب
من باب ضم النظير إلى نظيره أحب أن أضيف إلى موضوعك أن نسبة الطلاق في منطقة القصيم بلغت في عام 1427هـ
24 % .
أسأل الله أن يحفظ على المسلمين أسرهم وعوائلهم .

[المتزن]

صدز والله : عور وينشق

هذي والله أعلم تبي تصفي على بواب مدرسة بالنهار وسواق تاكسي بعد العصر وعمره حول 50 سنة ويتتن والدنيا مشوتته لمين داخ وعنده 10 بزران ولا يدري وشلون يملا اثامهم اللي تلقف ما يسقط على الأرض .

أستغفر الله العظيم .


جاي يقال لي أباخذ أجره .. لكن هونت . :D


وتقبل تحياتي 00
المتزن

[الــنــهــيــم]

شكلها تستهبل يا رجّال .. !
او انها مهب صاحية .. وش هالحتسي الله يدفع البلا ..
مير قل لرفيقك راعي الموقع .. ترى فيه ناس يستهبلون .. مو كل شيء فيه جاد .. !
ايش هالكيلام هاض .. أجل تبي عيون خضر وشعر بني دافئ ..

اقتباس جاي يقال لي أباخذ أجره .. لكن هونت .

سبحان الله9القلوب عند بعضه . .

هذي والله ياااالله عبدالعزيز بن فهد وبعد يبي يستخير لأانه فيه كثير من الشروط وأهمها الدكتوراه مب معه إلا كانه يبي يآخذ دكتوراه فخرية . .



الله يخلف على بنات المسلمين . .
هذي والله تسني أشوف ( رجله ) الله يقر عينه بوه أنواع الجلافة ماتسد سمع رومنسيّة ولا حب ولا كلام فاضي ، النوم عقب الأخير والعشا قرصان والثوب خرايط ولا سولفت قال انثبري تراتس أقرقتينا ولا قالت أبي السوق قال عطاتس العما همانا العيد اللي راح شارينن لتس ( كسو ) ولا حكه لسانه وقالت ودنا نطلع نتمشى قال ( أها ) عندتس هالحوش تطارد بوه الحمير أركضي معهن . .



الله المستعان . .

[الـصـمـصـام]

..

لا خلق ولا دين يتمنين - أو يتمنون - و إنما هي مظاهر شكلية ، تقوم على شفا جرف هار فتنهار بهم في أقل من ثلاث سنوات ، و هكذا تتزايد حالات الطلاق و تتقدم لمُنافسة حالات الزواج ، و الويل لمن فرط بـ ( فاظفر بذات الدين تربت يداك ) أو ( إذا أتاكم من ترضون دينه و خلقه فزوجوهـ إلا تفعلوا تكن فتنة في الأرض و فساد كبير ) .. و للتنبيه فإن الإسلام لا يهمل الاعتبارات الأخرى ، لكنه لا يجعلها هي المعيار و المقياس ، و محل النظر كله ، لكن يجعل لها حظاً من النظر ، و لو تمثلنا هذا الهدي النبوي الكريم لفزنا ببيت صالح ، و تكاثرت البيوت الصالحة و صلح المجتمع ، لكن للأسف أن الإعلام في الاعم الأغلب يرسم كما رسم هذا الموقع بتوجه أعضائه ( منهج الإغراق في المظاهر ) ..على حساب أشياء كثيرة ، و الضحية ( مجتمع كامل ) ..


شكرا يا اسطرلاب

[اسطرلاب]

قبل شوي اطلعت على طلب يقول :

أرغب بزوج متحرر ..
وتكررت هالكلمة في عدة طلبات .. والمشكلة
إنها تقول ملتزمة أو عاقلة!!؟

ويقهرك .. أن الملتزم الآن هو اللي يصلي بالمسجد!!؟

يعني ملاهي مايقول لا..
اسواق مايقول لا ..
حدايق مايقول لا..
يسافر برى .. مايقول لا..
يجيب خدامة متى مابغينا .. مايقول لا
حمار مكده ولا يعرف يقول .. لا



ياشباب .. وش رايكم نروح أقرب حلاق بس !!؟؟



الله يالدنيا .. في زمن التحرر ..

صار المطوع ماله كرت !!

وين أيام المطوع مايباع فيه ولا يشرى !

[تالي حياتي موووت !]

( يطغى .. وش قالولك .. فرعون !! إلا دجاجة صقعه اللي بياخذك ! )


هههههههههههههههههههههههههههههههههههههه
ههههههههههههههههههههههههههههههههه
ههههههههههههههههههههههههههه
هههههههههههههههههههه
ههههههههههههه
ههههههه
ههه

الحمد لله والشكرررررررر ياربيه فيه ناااااااااس كذاااا !!!!!!!!

ما صدق ابد ابد .... يعني ماتستحي على وجهه ؟

عـــــــيـــــــب من متى البنت هي اللي دور الرجل !!؟

________________

أولا / مطلقة .. ولا هو عيب كبير لكن يعتبر نقص

الطلاااااق عمره ماكان نقص اوعيب ... وياليت ماقلتها لان فيه تجريح للبعض ..

ثانيا/ كبيرة بالعمر (حول الثلاثين)
ثالثا/ ومتربية على الأخلاق العالية!!
رابعا/ سعودية .. وهذا مربط الفرس ( والله وصدناهم!!)

طبعا مواصفاتها الشكلية عادية جدا ..

وبعد وكل هــــــــذا وعــــــــــــــــاديه !!!!!!!!!!!!!!!!!!

يا إلاه العجب كيف هذا يصير ؟؟؟

يعني الحلوااااات والجميلااااااات ماقالوا مثله ..... الله يستر علينا بس ..

مشكوررر مع انك ضيقة صدري على خرابيط هالمرررره ...

يسلموووووووا خيووووووووا

[الامبراطـور]

اصحاب العقول في راحة

[تالي حياتي موووت !]

اقتباس المشاركة الأساسية كتبها اسطرلاب قبل شوي اطلعت على طلب يقول : أرغب بزوج متحرر .. وتكررت هالكلمة في عدة طلبات .. والمشكلة إنها تقول ملتزمة أو عاقلة!!؟ ويقهرك .. أن الملتزم الآن هو اللي يصلي بالمسجد!!؟ يعني ملاهي مايقول لا.. اسواق مايقول لا .. حدايق مايقول لا.. يسافر برى .. مايقول لا.. يجيب خدامة متى مابغينا .. مايقول لا حمار مكده ولا يعرف يقول .. لا ياشباب .. وش رايكم نروح أقرب حلاق بس !!؟؟ الله يالدنيا .. في زمن التحرر .. صار المطوع ماله كرت !! من قاااااااااااال !!!! كلااااااااااااام فااااارغ نوعاً ما أنا اعرف بنااااااات كثير رافضاات يتزوجن الا من ملتزم .... كثيررر صغار وكباااار لكن للأسف اللحين الملتزمين مايخطبون هم يخطبون ..... يعني !!!!!!! وين أيام المطوع مايباع فيه ولا يشرى ! لاااااا تقوووول كذاااا !!! فيه بنااات يتمنونهم ..... لكن مثل ماقلت لك لازم هديه ....!!!

.............

[يوسف 5]

انا عن نفسي كل الشروط متوفره الا

لون العيون