[قمة النايفات]

اقتباس المشاركة الأساسية كتبها *لينا* هذا انتم يالسعوديين تبون المره ملاك منزل من السماء وماتناظرون لعيوبكم اللي لو نقعد نعد فيها من اليوم لبكرا ماخلصنا<<بتتسطر دفاشه+شينة نفس+مكده+ماتبان ضروسه الا اذا كلم خويه+اوامر وتعالي قولي له ودنا للمكان الفلاني ماتسمعين الا اللعان والشتم معليش انتم اللي بديتوا بالحرب والبادي اظلم واذا على الاندونيسيات هذي شغلتهن ويتقاظن عليه فلوس ماجت تخدمك لجمالك وسواد عيونك جايه عشان تكد على خلق وراه يالله عاد روقوا الجو واتركوا عنكم الهواش<<يوم طلعت اللي بقلبه

كفو والله ...
والله إنك بردتي تسبدي يابعدي..كلامتس درر وعين الصواب وزيدي عليه:
لا تحوس وتنقم فصفص بالصالة على كيف كيفك ثم تطلع ولا كأنك سويت شي وتبي أحد بس وراك يظفظف
لا تجمع تماسيحك أخر الليل بالمجلس و تحوس أنت وياهم ثم تطلع وتبي من يظف وراك
لا تعفس غرفك تقل متهوش أنت وياه وتبي من يظفها
طلع خواتك يوم ورى يوم وتشوف وش يسون طبعا" من دون هواش وألعان ومذله والله إن يشيلن البيت فوق روسهن..وللمعلومية ترى أبوك ماشرى لك السيارة إلا علشان تنفع أهلك وتنقلهم مب بس مطوزل أنت وشلك 24 ساعة لا بعد ماتستحي تطلب من أبوك و إلا خواتك حق البانزين..
على الأقل حنا قنوعات نبي طلعات وتشوف شغلن أحسن من الأندونيسيات مب مثلهن راااااتب.

[قمة النايفات]

اقتباس المشاركة الأساسية كتبها أشعة في بلقع الحقيقة حريمنا و بناتنا زينات بس يبي لهن وعدم السماح لهن بــ وعدم السماح بــ ثم سنشعر بــ

تصدق إنك مجرم أو ودك تجيرم,,,الله يعين خواتك عليك أحمد ربي وأشكره إنك منتب أخوي..
ترى كلامك هذا مو من صالحك أنصحك إنك تسحبه أو تراك تبي تقعدبه>>أغدي خواتك يسمعنك كوده إن شاء الله يارب.

[قمة النايفات]

اقتباس المشاركة الأساسية كتبها أشعة في بلقع الظاهر واضح ليش اقول : تبون نتزوج اندنوسيات ... يكفيها نوم خمس ساعات .. وكرف بالبيت ولا تقول تعبت .. ولا يمرضن .. ولا روحه للسوق .. ولا اكل من المطاعم .. ولا تبي شغاله :

هذا الكلام قبل ماتاخذه..وإذا أخذته أكيد يبي يكبر راسه:
1- ماتقوم إلا إذا أذن الظهر>>على الأقل حنا نقوم الضحى.
2-كل يوم تشكى من كرفن وراك
3-مافيه أحد مايمرض>>على الأقل حنا نعالج أنفسنا بأنفسنا(فكس ومره وقران..........)
4-تبي النخيل و العثيم 24 ساعة>>على الأقل حنا نرضى بشارع الصناعة وقبة رشيد.
5- تبدى تروح للمطعم كله بكبره>>على الأقل حنا نرضى يجابلنا في البيت.
6-هذاك أول والله إن تقولك جب سيرلانكية أو هندية أو فلبينية ماتبي أندونيسية>>علشان ماتذكرها بماضيها ولا تعايرها حظرت جنابك.
7- تبدى تزن وتحن علشان تجيب أهله وأفراد قبيلتة..>>على الأقل حنا أهلنا وأعروقنا هنا.
8- تطالب بإنك تسافربه لديرته>>على الأقل حنا نرضى بيومين في الرياض أو الشرقية..
9-اللغة عندك تصبح نعااااااااااااااال.>> تصير مايفهملك ولا كلمة يبيلك مترجم.
الله يعينــــــــــــــــــــــــــــــــــــــك..:o o

[تباشير المطر ~]

اخــي ..


ليــس كــل البنـــات مـثل بعــض ..

اريد ان اقول نصيحه اتمنى ان لاتنسـاها ..

انه يجب ان تفكر بالامور قبل قولها او كتابتهــا ..

ركز على ماتقول ونظر إلى الأمور عن بعد ..

وفقك الله لما يحبه ويرضاه

[س م ي]

يا اخوي البنات على الأم
والله إن بعض الحريم لا شغالات والبيت يلق
لأن الأم سنعه

إذا بغيت تضمه أسأل عن أمه

[أبريسم]

اخيتي

لا تحطمك توافــــــــــــــــه الامـــــــــــور


وحماقات الجهله ...

فإن رضا الديـــــان وراحة الــــــــــبال لا تقدر في هذه الدنيا بثمـــــــــن...

[mr.khaled]

الله يوفقك مع الإندونيسية
..

[ذوقي توب]

خابرتن شغالتنا وده تعرس

[&شقردية شمر&]

هههههههههههههههههههههههههههههههههههه

والله ارحمكم ياويلي مالقيتو موضوع الا سب بنا

الحمدلله البنات قرماااات ياحبيلنا بلاكم النغر منا والله

عاد اعجز شي انتم,, البعض يدخل ويصوع الشماغ تقل يبي يضرة اذا علقه بمعلاق او حطه على كرسي او شي لا ويطلع من المطبخ ويقول لاخته جيبي لي فنجال طيب توك طالع كان جبت معك
والبعض يبرد الكبد شقردي صح ماشاالله عليه

يسلمو على السب اقصد الموضوع

والي بيتزوج اندونيسيه يعلمني اخطبها له

[ريف]

اقتباس كل أناء ينضح بما فيه ياالنهيم ابدري شلون عممت على كل الشباب كذا !!!!!!!!!

لاولك وجه تعارض شف ردكـــــــــــــــــــــ قبل

والله عالم

اقتباس جيدين بكثرة النوم، وإذا قام الواحد طلع وما ينشاف إلا قبل أذان الفجر !

ولهم وجه يعترضون بعد
ويستهترون

اقتباس فوالله إنهن أغلى من الغالي , , , كيف لا وفيهن الأم الحنون . . والأخت الغالية . . والزوجة الطاهرة

. .

بوركتــــــــــــــــــــ





حبيبتي رزان ماقصرتيــــــــــــــــــــــــــــــــــــ

كفيتي وفيتي

[أبو رُبـــــى]

أشعة في بلقع ....

والله يا نا خابرن لك أندنوسية ... 100% على كيف كيفك ...

الطول / 50 سم
العمر 43 سنة
اللون / أزفد
شكل الوجه / متعرفط
الجسم / نحييييييييييييف
الرجلين / شطوب

[المسفهل]

.
.
.

وما زال مسلسل الإستركاض قائماً



.
.
.

[امتنان حمد]

والله فيه بنات كذا وبنات كذا !
وحرام تعمم وتقول البنات كلهن كذا !
وكله يرجع لتربية الأم واهتمامها ببناتها ..

[أشعة في بلقع]

اقتباس المشاركة الأساسية كتبها صفراوي اخوي .. اشعه في بلقع وانا اقراء مشاركتك وكأنك تصف بيتنا قبل وبعد الشغاله والله كلامك عين الصواب ..

يا اخي الكلام هذا موجود في كل البيوت لكن زي ماتعرف( الحقيقة) ما تعجب احد وكلن يزعل عليك
ويجب ان لا ننخدع بمقوله (البنات مو زي بعض) كل البنات فيهن هالشيء والا وش تفسر كثرة الشغالات في البيوت

واحد اعرفه قام وشرا سيارة ... يقول : جبنا شغاله وضاقت السياره
شف كثرتهن بالعزايم كأنك باندونيسيا


يقولون : الام السنعة بناتها عجازات
اما المتنبله فلا هي ولا بناتها

نعم فيه شواذ عن هالكلام لكن ما ينذكر من قله