[نجديــــة]

,,


ســــــــلام مــن الـرحـمــن أبـعـثــه إليـكـم أجـمـعيـن
مـعـطـر بـرائـحـة الـفـل وبـأزكـى عبــق الـريـاحيـن

صبـــاحكم / مســائكم ... خير بحجم السماء

منذ زمن ياعزيزاتي ليس بالبعيــــد
كنت أفكر في إنزال موضوع يكمل سلسلة "العقد الفريد"
في كتابة مايحدث كل حين من موقف طريف جديد
لتدوم لنــا الإبتسامة وتجعل أيامكم كلها أيام عيد


"إهــــــــداء"



إلـى تـلك القـلـوب السـمـاويــــة بـصـفـائـهـــا
والـبـيــضــاء الـنـقـيـــة بــأرواحــهـــا
هــا نـحـن سنـضـع لـؤلـؤتـنـا الثـالثـة بـمشيـئـة الله
فـي تـلك السـلسـلـة السـمـاويــة ... فـلنتـوكـل عـلى الله


(1)

وحدة من الحريم الكبار (متوفيه الحين الله يرحمه ) فاجأها مرض ألمّ بها وأودعها المستشفى
وكانت الدكتورة المشرفة عليها (ألمانية) تلبس مايشبه الجلابية عندنا
المهم ..أن العجيّز إذا أشتد عليه المرض كانت تلتفت حوله
وماتشوف إلا الممرضات "عاد هماه لبسهن أبيض كلّه ومهب طوال"
كانت تناديهن العجيّز تحسبهن بنات الدكتورة وتقول لهن :
(ياحبيلكن يابنيّاتي روحن نادن أمكن وأشرطلكن) وهنّ يدربن الدميجة

تنسيم ذيك العجيّز .. الله يرحمه

(2)

وحده معنا بالطاولة تقول : أن ذاك اليوم عزمنا عمومتي وعمّان أبوي ببيتنا(رجال فقط )
والعزيمة شوي رسمية .. عاد تقول أن من الصبحية وحنا بالمطبخ أنا وأمي والشغالة
ومابه طبخة بالكتاب ماطبخناهـ .. يعني بالمــرة متكلفين وشايلين همّ العزيمة
المهم .. يوم بدينا نقلط للعشاء بالمجلس .. حطينا طاولة طويلة وحطينا فيها الأكلات
وكيذا شوية حركات "إيقاله بوفيه" >>شرهتك على اللي يعرفه مير ..
المهم تقول أومير تحط أمي شموع بالأطراف من شان يزبط الشغل
وطلعنا وجاء أبوي وقلط الرجال للمجلس .. !
عاد تقول أن أبوي قال :ياعمّ وراه ماتاكل من الرز أخبرك تحبّه ..؟
قال عمّه: ودّي ياوليدي بس بلاي "هالضيّان" عجزت أخذ
(يقصد الشموع) .. تقول أمر يفشل أبوي قال :طفهن ميخالف
قال عمّي الثاني : لالا خلوهن يدّفن العشاء
>>>>> عاد بالله عليكم ذولا حقيّن بوفيه أولاه ؟


(3)

أختي تحكي تقول معنا وحدة بالفصل مهسترة ومطنشة الشعب
عاد مرة قالت له أبلة التدبير :قومي يافلانة جاوبي
ولا قامت البنت وكل بنات الفصل يناظرونه يحترونه تقوم تجاوب
وهي مسكتة ماكأن الأمر يعنيه أبـــــــــداً
قالت الأبلـــى : ماتسمعيـــن أقــولك قــومــي ..؟!
قالت : وش تبين أســـوي أستــاذة .. رجــلي نيــمة ماأقــدر أقــوم
فـهـتــزت درايـش التـدبـيــر من ضـحــك البـنـــات

(4)

طال عمركم هذي وحدة من صديقاتي منسمة + مقلعة = بــرائـة
تقول ذلك اليـــوم كنّــا رايحين للمدينـــة المنـــورة .. فذهبنا مع الأهــل
إلى جبــل أُحــد وغيرها من المعــالم والآثــار هنـــاك ..
كان اللي يسوق بهم ( ولد خالته الكبير) وبجنب ولد خالته أخوه كبير بعد
عاد تقول مرينا من عنــد شلالات ميــاهـ ..شكلهن خوقآآآق
أمــر أصــرخ فجأة : يـــــــــااااااااااااااااااااااااااي
أمر يلتفت ولد خالته لمّه متفاجأ ... فشييييلة
يوم مرينـــا من عنــد شلالات ثانيــة .. قال لي : شــوفي هــذا يااااي ثاني


(5)

أخوي الصغيرون فروسي عليه طلعات ذلك الــولد مهب لم ديــرة أبـد
شافتــه زوجــة خـــالــي مـرة قالــت لأمــي : يازيــن بدلـــته ماشاء الله تهبــل
قالـت أمــي : الله يسلمك .. هذي بدلتــه حقت العيــــد أصــلاً
قــال فروسي : لالا هذا مهب ثوب العيد .. ثــوبــي



(6)

(أ): أمـــي ذلك اليـــوم حمقت على أختي الصغيرة .. قالت له : والله مهب أحسن لك يابنت الريح
(على دخلة أبوي)
قال :هوّ .. صرت ريــح أنــــا

(ب): تقول وحده من صديقاتي .. كلنا بنات وماعندي إلّا أخو واحــد هو أصغرنا
و ذاك اليوم حطّينا "حنـــا" بشعورنا .. أمر يجي أخوي وياطأ الحنا بالأرض مانتبــه
ويجلس يصيح ويأشر على رجله ويقول : به أنتم .. به أنتم
(ولو متأثر بالضمائر ..أنتم , حنا )

(ج): مره جالسين أهلي بالصاله وكان أبوي وأخوي يتكلمون .. !
وأنا كنت أزين السماط وأقلط السفرة وتعرفون >>سنعة
عاد والله من الصقاهة والهفاوة بي بعد .. جادعة أذني ودّي أدري وش يقولون بس شرافة
وكانوا أصلاً يتكلمون عن مبارة "برشلونة و..مادري من بعد"
المهم أخوي بس يردد كلمة "برشلونه" و"برشلونه" .. وماش عجزت ألقط وش يقول بالظبط
وماسمعت زين .. قلت مستفسرة وكلّي برائة :منهم الحين اللي "فشلونا" ...؟!
أوميـــر يموت أبــوي من الضحــك .. قال أخــوي :خليتس بالتقليــط بس



(7)

وحدة من الحريم الكبار منسمة شوي (غير الأولى )
تدرس بدار تحفيط القرآن .. عاد يوم صار أخر يوم أجتمعوا عياله ببيته ..أمر تدخل عليهم
معه الشهادة توهـ جاية يابعدي من التحفيظ .. قالوا عياله : بشري يمّـه .. عساك ممتاز ..؟
قالت :أيه إن شاء الله .. أن الأبلى تقول أنك أخذه العاشرة على الفصل
قالوا عياله :ماشاء الله تبارك الرحمن .. وأنواع المــدح :
يوم شافت بنته اشهادنه ..أثر عدد الفصل كلّه "عشرة"



(8)

مرة جدتي جالسة على سجادته تسبح وتهلل ماشاء الله .. وحنا جالسين حوله يالبنات
أمــر تجــي لـمـّه بنت عمتــي تبي تســـلم عليـــه .. قالت : بالخيـــر يمّـه وشلونــك
قـالـت جـدتـي وهي تـنــظــر إليـها نـظـرات متـفـحصـة :
بخيـر الحـمـدلله ... بسم الله عليك يابنيتي وش الّي بـ(فـمّـك) الحــديــد اللّي يلمــع..؟!
قالت بنت عمتي: هــذا تقويـــم يمّــه .. حطيته من شان يرجع أسناني شوي متقدمات
قالت جدتي : تسم هو به (كم هو به) ... أيّ: بكم سعرة
قالت : 500 ريال
قالت جدتي : إييييه .. لو نبيعك كلك ماجبتي 500

أمّا نحن فلا تسألي عنا ..قد تشقلبنا من الضحك
تنسييييييييييم جدتي قســم بالله .. لو أبتل أسولفلكم عنه ماتملون ياحبيله
على أنه تفشل أحياناً بس غصب تضحكين.. تصير سالفة التفشيلة كلن يقوله
وهـ بس

(9)

ذلك اليوم بالفطور في رمضان .. وحينما أقول رمضان فأول مايستبادر إلى الذهن
بطبيعة الحال شيئين بالنسبة لنا (سمبوسة+ توت) ..!
ولأن لي إخوة صغار يفشلون شوي .. لازم نحط بـالكاسات (شفّاطات)
عشان مايخط شارب .. ولسبب ما أيضاً ..جازتلي الفكرة فبدأت أنا أيضاً شيئاً
فشيئاً أشرب بالشفّاط ..حتى بدأت كل العائلة هكذا .. !
فذات يوم شافتنا جدتي كلنا نشرب بالشفّاط .. وشكل الوضع ماجاز له ..!
قالت : الحين أنتم مالكم خشش يوم أنكم تشربون بهاللّيات ياخزياة مير

طبعاً بما أني حاظرة الموقف ..فأني كعادتي شقلبت من الضحك
فلذلك قد ترون الموقف غير مضحك !

(10)

مرة أخوي الكبير يسولف مع فروسي "أخوي الصغير" بالسيارة
أمــر يجي فروسي ويلمس شعر أخوي .. قال :أنت عندك شعر
بس بابا شعره منكســر (أبوي شعره صقعه مع قدام)
تنسيـــم البزران ..أمّا منكسر
يعجز الطفل عن التعبير أحياناً


أخيراً وليس أخراً :
أحبكم كلكم .. وأدري أني أحيانا أصير مالغة
والمواقف ماتصير مضحكة بالحيل .. بس هماي حاضرة الموقف
أحس أنه ينكت .. عاد أنتم أضحكوا وسعوا صدري
إن أصبت فمن الله .. وإن أخطأت فمن نفسي والشيطان !


مع تحيات :
أخواتكم من خلف السماوي :
1-أشيقرية
2-BU7OOR
3-نبض المشاعر
4-صادقة الود
5-فتاة الورد
6-نجديــــة


والســـلام عليــكم ورحــمة الله وبركــاته