 |
|
|
|
|
11-09-2009, 08:30 PM
|
#1 |
|
عـضـو
تاريخ التسجيل: Dec 2006
البلد: قارب الشجن .. !
المشاركات: 3,234
|
.. { لاهمّ الا همّ العرس ولا وجع الا وجع الضرس ! : (
1
  < شفتوا خشة هالصغنطوط .. كأنها خشتي قبل فتره ..  السلام عليكم ورحمة الله وبركاته .. يالله حيهم , ياهلا والله وسهلا .. ياهلا والله ومرحبا , ياهلا والله باللي مبطين عنهم , ياهلا بخلفاتهم , ياهلا بالوهـ بسـ كلهم ..  والله اني مهيب من عادتي انزل موضوع بالرمضان .. بتلتن معتكف بس مادري وراي ..  >  صباحكم آلام ..  > يسمع بالتحيه !  شسمه ..  قبل الرمضان بفتره لجّ علي ضرسي وبهذلن بهذله , وتوي افطن اقص القصّه ..  انا الصراحه أسمع كثيير بأمثلة كبار السنّ وقراشيعهم وقوانينهم ونظرياتهم وفرضياتهم .. وماآخذ منها كثير .. مدري ليه ! ربما أتبعت هذا القول : نصائح الشيخوخه مثل شمس الشتاء تضيء دون أن تدفئ !  لكن هالمره ابي اخذ , وأبي آخذ بقوه بعد  " لاهمّ الا همّ العرس ولا وجع الا وجع الضرس "  واااااااااااااااو , والله يالمثل هذا بالصميم , العرس اولاه بس ..  >  !المهم .. صباح يوم جمعه كئيب , قمت من النوم وخشتي زي هذا >  مادري ليه !  . قمت ورحت عند الوالده الله يحفظها , ونمت عنده وقومته واقلقت راحته .. لما قامت الله يعطيه العافيه وحلت المشكله ببعض الأدويه الشعبيه !  وفي نفس اليوم , قبل النوم ليلاً , جتّ الجنيه بتوع السنون .. وااااااااااوك .. آلام مادري من وين ! مافيش تسوّس .. مادري شالقصه ! حاولت انام , اتقلب يمين يسار , فكرت , تخيلت , نمت على جنبي الايمن والايسر , استغفرت , لعّنت , فتحت الجوال , ناظرت المقاطع , فتحت الرسائل , قريت قصه , اتصلت على 902 , قلبت الفراش , شربت ماء , فصخت القميص , كل شي سويته .. بس مااااااااااش عجزت انام من الوجع ! وكالعاده الوالده الله يخليها ماتروح بعيييد .. جتّ لمي , وعطتني علاج .. وخلتني احط يدي على الوجع واقرأ الفاتحه سبع مرات .. > دينه الوالده ! المهم خفّ الوجع والحمد لله ونمت وقمت قرير العين > قرير العين ماتحسب , بس جايزتن لي وأبي اقوله .. وكالعاده مسك علي سنّي بالليل ماادري وش القصه !  قلت مافيها .. ابي اروح المستشفى , شغلت السياره ورحت لمهم , دخلت ولقيت الموظف بالرسيبشن , انا : السلام عليكم السلام . الله يخليك ابي عيادة الأسنان .. الموظف : حياك  .. والله ياعمي مافيه دكتور مختص , ولازم تجيب لنا تقرير من المستوصف اللي عندكم !  انا : طيب الله يخليك المستوصف حقنا مسكر الحين , يعني لازم اقمز عليهم , وش الحلّ برايك؟ الموظف : الحلّ تدخل على الدكتور اللي مش مختص يعطيك مسكّن لما يصير بكرا وتجيب لنا تقرير من مستوصفكم ! أنا : اها الله يخليك .. سلام عليكم .. > اروح آخذ مسكّن امي احسن لي .. الفاتحه وحركات ..  طلعت ورحت ووقفت عند صيدليه ودخلت عليه قلت الله لايهينك عندك علاج لسنوني ولا اقلعهن كلهن ؟ واثر البايع مصري يحوم التسبد استغفر الله , قال ياعمي ماتشيلها كلها ياعمي .. قلت ياملحك بعد , اقول عطن مسكن الله يرضى عليك .. وعطاني مسكّن وعلاج الصراحه اول مره اشوفه , وانا الصراحه شاكّن بأمر البايع هذا .. هون :  حسيت ان العلاج اللي هو معطين حبوب حمل ! احد منكم يعرف العلاج ذا ؟ واخذت العلاج هذا ولا فاد ولا شي , ماغير زاد الوجع .. 2 من بكرا الحقيقه أني ماداومت يوم الأحد ولا يوم الأثنين .. من الوجع , حتى الوجع مايتسلط علي الا قبل النوم أو بعد صلاة الفجر .. هآآآلمهم , صباح يوم الأحد , ذهبت لمستوصف أهلي , ودخلت عليه , وطلع سوري .. دخلت عليه بعد ماأنتظرت سراء ساعه ونصف .. > إنتظار ساعه ونصف .. ! صوره مع التحيّه لمصلحة المياه .. صوره مع التحيّه لمكافحة التسوّل .. > سامعن به ولا ادري وين تقال معليييييش .. المهم , دخلت عليه , وسدحن على الفراش الله يعافيه .. انا عندي الوجع بأسناني الأماميه , مش الضروس .. قعدت الدكتور يحفر بضروسي .. قلت لا لا يادكتور الوجع هنا ..  قال ياعمي ماتخليني أشتغل  قلت خلاص بسم الله عليك هاشن هالداشر .. والله ياهو نرفزن , هذا بدال ماتراعي شعوري ياخي جاي تهوش علي !  ماكسرت خاطركم الله ياخذ هالخشش عاد ؟! المهم قال لي الأسنان حقاتك سليمه ولا فيها شي .. قلت طيب ياعزيزي من وين الوجع اللي بالليل اللي مايخليني انام الا فوق الساعه ثلاث ! المهم اخذت منه عذر للجامعه حق الغياب وحاسبته , كان حسابه 50 ريال كشف و 25 ريال علاج ! , ورحت وخليته .. ورحت لمستوصف ثاني تخصص أسنان فعلاً !  شكل المستوصف اللي رحت لمه الأول مشرحه أو أنه مقصب غنم !  الصراحه مايعرف يشتغل , حتى المبنى استغفر الله فسسسسل بشكل .. دخلت على المستوصف الجديد وكان الرسبشين كله بنات .. انا الصراحه يوم شفت الأستقبال طاب الألم , أشويت .. يالبّى قلبهن بس .. وهـ بس , وش اقول بس ! دخلت على الدكتور , وفحص الوضع وأخذ نص ساعه فحص , قال ياخي حالتك غريبه ! يوم قال كذا دخلني الماء , توحشششششششت بشكل ! قلت وش فيه يادكتور ! معقوله أيدز ! : > عاد ماقلت زي كذا بس تبهير للسالفه !  المهم قال مااقدر احدد لك المشكله .. لازم نسوي فيلم بانوراما للفكيّن بتوعك ! يعني تصوير لخشتي !  قلت مافيش مشاكل , دخلت غرفه وصوروا خشتي ! دخلت صورت عند السساتر خشتي :  عاد مصورن السساتر , اللي يبيهن يراسلن ع الخاص ..  > قوست , اتسذب قسم .. هآآآلمهم , طلعت الأشعه وجبتها للدكتور وشافها وقرر الحاله ! بعد ماقعد يناظر التقرير وشاف حالتي قرر يسوي لي عمليه بسيطه , وهي عباره عن حفر للسنّ الأمامي ثم الوصول إلى اللثه ثم إخراج شي من اللثه , ثم حشو السنّ مره أخرى .. > يوم قال لي نبي نحفر ومانحفر ومادري أيش , قلت في بالي قاضين من حفريات الشوارع تجي تحفر بخشتي !!  لكن قبل ماانهي الموضوع فيه أمر قاله لي الدكتور ! قال ياعبدالمجيد في حالتك ماأشوف أي أثر لضروس العقل من خلال التصوير , مافيه أي أثر , ممكن ماتطلع لك .. أو زي كذا قال لي ! قلت يادكتور يعني أنا نفسيه ولا ماهنا عقل ولا وشلون ؟! قال لا عادي , مرت علي كم حاله مثلك , لاتنزعج عادي ! أجل ماهنا ضرس عقل ! اثري رقله .. طبعا حسب تشخيصي لحالتي وحسب علمي العميق أتوقع أن هذا تميّز بالشخص حيث انه مايطلع له ضرس عقل والشغلانات هذي .. > أخيراً .. قرر الدكتور العمليه والحفر والقراشيع هذي , ومدتها 45 دقيقه ..  التصوير للفكين قيمته : 150 ريال .. العمليه اللي بسويها قيمته : 650 ريال .. خابرين لي مسجد كويس أشحذ به ؟! أخيراً .. المعذره على الإطاله ..  دمتم وضروسكم وسنونكم وحقاتكم ذوليك أحسن أحد بالدنيا !
__________________
آخر من قام بالتعديل خوي السرور; بتاريخ 11-09-2009 الساعة 10:04 PM. |
|
| الإشارات المرجعية |
|
|
النمط الأحادي