[تباشير المطر ~]

بسم الله الرحمن الرحيم
السلام عليكم ورحمة الله وبركاته







الشاعره !



يوم حنا بزارين اختي طايح قميصه وتتدوره وصار بالارض
ويقاله تنشد .. تقول .. وين قميصي وينه طايح لاتوطينه ..
و جازت له ان العبارات متناسبه خخخ » وتتطير لأمي تقول يمه طلعت شعر ..
المهم انه جازت لي انا بعد .. ويقاله تقهرن انه تعرف تشعر ، ومن الشر قلت له : تراي انا الي مطلعته موب انت ِ ..
وصدقت الدهدره خخ ، ووتدخل على أمي وهي تصيح وانا الحقه اقول امزح امزح ،
وامي ياويلي نيمه .. قامت تحسبنا بحريقة ولا شي ، قالت : وشبكم وشبكم ؟
واختي بشهقه وحده : يمه انا انا الي مطلعه الشعر وتباشير تقول انه هي والله انه انا .
» خخخ والله من التفاهه بنا ..





بنك أم عبد الله !



خالتي الطعيمه فتحت حساب بالبنك ..
وقالت لبناته بعفوية : بقولكن شي ولا يطلع يابنياتي .. تراي فتحت بنك ..





الي ما يطول العنب حامض عنه يقول !



سلمكم الله امي رافضه يدخل بيتنا عرايس بهن عيون ،
ومره رحنا لسوق وشافت ليون عروسه نفس طوله ونهبلت عنده
وتبدا تخممه وندور بالمحل وهي عنده هههه المهم قالت ابي اشريه ، قلنا له : لا ماما تعيي وحرام تشرينه ،
.. يوم جينا نطلع .. وتكش على العروسه تقول كش عليتس كش هههه
+ السالفه قديمه قبل الايبود والاجهزه الي خلت البزران مايفرحون بالالعاب .. !
اللحين تقول اكسروا لي الحمايه ابي اللعبه الفلانيه » بزارين أخر زمن خخ !




لعيون العروسه !



بنت خالتي تقول : يوم حنا صغار عند الجيران عروسه كبيييييره المهم
وناديت بنات خالي وقلت ناموا عندنا عشان نروح للجيران بكرى
ونلعب بعروستهم الكبيره خخ ، المهم لاعادت من روحه ،ام الجيران قالت لهن : وحده تسبع ، ووحده تكنس ،
ووحده تغسل دورة المياه ـ اكرمكم الله ـ عشان اخليكن تلعبن بالعروسه .. » ياويله من الله ص١ خخ




بيت الاحلام !



صديقتي تقول اول ماسكنا بيتنا ( مسكة الباب أو البعض يسميها العروه ) لونه ذهبي
وحاطين ثريا مليانه كرستال .. تقول اني اقول لصديقاتي بابنا من ذهب
وبصالتنا مجوهرات .. هههه تقول وانا افتح الباب الي عروته من ذهب احس اني اميره خخخ




إحرااااج !



امي بعزيمه كبيره .. جاء لمه اخوي يبي ريال
قالت : والله انه مامعي ..
واثر وحده من الحريم .. بتفتح شنطته .. وامي حلفت عليه
والله ماتطلعينه ياحبيلتس .. قالت المره : والله اني .. وقطعت كلامه وتحلف عليه ماتفتح الشنطه
وذيك تقول يابنت الحلال انا .. تقطع كلامه اقولتس حلفت ماتفتحينه ..
المره بدت تضحك قالت : والله اني يابعدي مامعي ولا ريال ياليت معي ، بس ابطلع الجوال .. ! هههه
» امي تدورون وجهه ماتلقونه خخخ




ههههه !



هذا الموقف هو الي شجعن اكتب الموضوع و ماكتبت له عنوان عشان ما احرق عليكم الموقف ،
بنت خالتي توفى خال رجله .. ودقت على أمه تبي أحد من اخوانه يصلي عليه مع حمولته ..
خالتي ضاق صدره .. قالت البنت : يمه ان شاء الله انه بخير لايضيق صدرك لانه تعبان ( منغولي )
ـ مرض متلازمه الدااون ـ ولا عليه شي بإذن الله .. » تقصد انه مثل الطفل .
خالتي دقت على ولده : قالت له رح صل عليه ولا يضيق صدرك ياوليدي الرجل تعبان انه ( غوريلا ) !
ههههههههههههه .
+ نحن لانضحك الا على غلطة خالتي بأسم المرض وحاشا ان نستهزء بـ أحبابنا وابنائنا المصابين به .




تفكير غير !



يوم حنا صغار نحسب الي بتلفزيون مايدرون انهم يصورون
نحسبه شي يصورهم ويحطهم .. عاد لو تشوفون التدلع بالمشي ولا الحركات
ولانتهاوش يقالنا بتمثليه .. خخخ
واقول بقلبي اكيد الناس يشوفوننا بالتلفزيون اللحين خخخخ




على الوزن والقافيه ذذ !



هذي صديقة وحده من البنات .. توه متزوجه وبعزيمه كبيره ،
وامه توه جايه من مكه .. المهم قالت خالته : الحمد الله على سلامة امك يافلانه ..
العريسه مستحيه قالت : الله يسلمك .. قالت خالته : قرة عيننتس ..
ومن شد الحياء لأن الناس يناظرون حوارهم .. قالت : الله يقرقرتس .. » خخخخخخ




لعبة الدكتور .



لعبة الدكتور لازم بكل اجتماع .. بس ذاك اليوم متنا من الضحك
انا وبنات خالتي دكتورات والثانيه سستر حاطتن منديل وشباصتين يمسكن المنديل خخ
وباقي الاطفال مرضى ومطلعينهم برى البيت وياويل الي يعلم وش صار له ..
عاد ولد خالتي يقاله يخوفهم قالوا : وش حطوا لك .. قال : الله يعينكم بيبكون عليكم قدر ماء حااار !
» هههههه حشى وش هالمستشفى !




هذا الموضوع المتواضع إكمال لـ [ حكايا ]
أتمنى أن ينال على رضاكم وإستحسانكم ..
و للجميع إبتسامه دائمه