[CARNIVAL]

بسم الله الرحمن الرحيم

السلام عليكم ورحمة الله وبركاته

مهاوي بنت ناس .. وأخلاق تمام التمام ..
تخرجت من الكلية .. وقاعدة لا شغل ولا مشغلة ..
إذا شكت الحال على أهلها >> تلمح تبيهم يدبرونه بواسطة .. قالوا له قومي أشتغلي >>> وراه شغالة
بعدين ترد : أنا أشتغل بس مب حاله دايم بين أربع جدران .. لا أتكلم مع أحد ولا أحد يتكلم معي ..
البنية بدت تهاوش وتكب اللي بقلبه .. ما انتبهت إلا وهي لحاله .. قاموا وخلوه تكلم نفسه ..

وصارت حياته روتين ممل .. تدور وظايف بالجرايد .. ومن جريدة لجريدة .. ولا تقعد على النت ..
ولا نووووووووووووووووووم ..
وهي تقول : والله لو إني دارية إن نهاية البكالرويس كذا كانت قصرته من أوله ..
بس رغم هذا تحاول تعيش يومه .. وترضي ربه والوالدين ..
وشعاره { فلها وربك يحلها }
صح اختفت ضحكته .. وصارت نكدية شوي ..
بس ما له إلا الصبر وكثر خيره ..

بنت خالته (سمية )سوسو أصغر منه بسنة ولا بعد تخرجت .. سنة تنجح وسنتين ترسب ..

طبعاً مها ما تستانس إلا إذا جت طلعتهم للاستراحة ..
طبعاً لأنه بتلاقي أحد يعطيه وجه .. ويسولف معه ..

المهم وهم بالاستراحة جالسين سوليف ودق حنك ..

إلا تشوف مها وحدة من البنات بالثانوي يدق عليه رقم غريب .. والبنية مبتلشتن بوه .. وأزعجه ..
وهي تابع الموقف .. إلا تشوف وحدة من بنات المتوسط تاخذ الجوال .. وترد : خير !! وش تبي ؟؟ وتعطيه كم كلمة .. سب .. هواش .. ضحك .. اللي تبون ..
طبعاً أنواع الاستفهامات براس مها ..

المهم مرت أيام وشهور على السالفة هذي ..

إلا تجي سوسو تقوله : مها فاتك واحد دق علي ..
مها : وش يبي ؟
سوسو : يلعب ..
مها : وش سويتي ؟
سوسو : أزعجن إزعاج .. آخر شي خليت أختي الصغيرة ترد عليه .. وقلت تقول له اسم خرابيط ..
مها : وش الاسم
سوسو: أحلام .. وصار يرسل مسجات .. وأشياء تموت ضحك .. لا ويوم أزعجن زيادة .. وحدة من صديقاتي بايعته .. منسمه .. عطيته رقمه واتصلت عليه وهاشته .. وقالت له : عاد لو إن صوتك زين يومك تغازل .. هههههه ..
مها : طيب وش صار ؟
سوسو : عطا رقمي خويه .. وكل يوم مسجات واتصالات .. ههههههههه .. متعبين حالهم ..
مها : !!!!!!!!!!!! وأكبر استفهام بالدنيا فوق راسه ..
وتقول بنفسه : هذي أنت يالعاقلة !!

المهم راحت السالفة ..
وجاء يوم على مها .. كانت مرة متضايقة وحالته حاله .. صاير له مواقف هدت حيله ..
إلا ويتصل عليه رقم غريب ..
مها : نعم
......: هلا أم جواد ؟
مها : لا غلطان ..
وتسكر ..

طبعاً أرسل رسالة .. يطلب منها رد .. ويخربط وما أدري إيش ..
وهي العبرة خانقته .. وجا الزفت يرمي نفسه بطريقها .. دعت إن الله يعصمها .. وينور طريقها .. وراحت عطت الرقم أخوه وقالت له السالفة ...
طبعاً الأخ صار يرسل رسايل الوله والشوق ..

مرة يقول ..

والله ما انسى صاحب مانساني ..
مها بينه وبين نفسه .. من متى المعرفة .. ووين وين .. صار به ذكرى

وثانية يقول ..
يا صوتك الدافي الفاتن..
يسري كما الدم بعروقي

وثالثة يقول ..
شعورقلبي لك اهديته..
ونبض الفرح فيك حسيته..
ولعيونك الشعر خطيته

لا وبعد من زود الموانة يعاتب ويقول ..

كلمة اخيرة بخاطري احكيها
يا للاسف نظرة عيونك قصرت

وثانية يقول فيها ..

حياتي لو تجاهلتي غلاك بقلبي المجروح .........
والمسجات تطول .. لا والمكالمات أكثر ..
تمل وتحول الجوال صاااااااااااامت .. ترجع تلاقي 47 مكالمة خلالة ساعة ؟!
مها في نفسها وتم أشهر على أول مكالمة منه وللآن ما زال طامع فيني رغم إني ما أرد على اتصالاته ولا مسجاته ..
تضحك مها .. وقلبه ينزف ألم .. وشر البلية ما يضحك ..
يارب اعصمني .. يارب اعصمني واحمني واهدني ..

أنا بين هالمجرم .. ويبن التهميش ..
طريق الضياع ما أبيه .. طريق معروفة نهايته ..
يارب تيسر أموري ..

هذي قصة تتكرر .. بس تختلف الأسماء ..
يا بنات نبغى نعطي حلول فعالة لها المشكلة .. اللي تعاني منها كثير من البنات .. وبعضهم بصمت ..
لأنو ممكن بنات ماقدروا يتخلصون منها أو بنات وقعوا في حبائلها تحت وطأة الظروف اللي هم عايشينها .. وتأثير الشيطان .. وإصرار الذئاب البشرية وتملقهم ..

أتمنى أن أكون وفقت في الطرح ..

ĉĄŘŅîṼĄĻ