[بندر 1430]

السلام عليكم ..

أحياناً ولستُ أقول دائماً الحاسد يظن الناس مثله فيحاول إخفاء ما لديه من نِعم ..

و أكثر أسباب (الجحادة) من وجهة نظري الخوف من العين والحسد بسبب مواقف حصلت سابقاً ..

للمعلوميّة فإنها ليست محصورة على مكان أو بلد معيّن ..

شكراً لكِ أختي الكريمة ..

[ميميات]

اقتباس المشاركة الأساسية كتبها بندر 1430 السلام عليكم .. أحياناً ولستُ أقول دائماً الحاسد يظن الناس مثله فيحاول إخفاء ما لديه من نِعم .. و أكثر أسباب (الجحادة) من وجهة نظري الخوف من العين والحسد بسبب مواقف حصلت سابقاً .. للمعلوميّة فإنها ليست محصورة على مكان أو بلد معيّن .. شكراً لكِ أختي الكريمة ..

اخ بندر شكرت على المرور..

[رواء الروح]

اممم بصراحة ماأدري وش اقول
هوصحيح ان الجحادة منتشرةبس صدقوني الناس مايعطون خير وهذا اللي خرب علبهم
والله مو من طبعي اجحد وماأحبها بس وش تسوين بالناس
مايعطون خييييير

اذا مادريوا ازعلوا
وذا دريوا ضروك
ومع ذلك والله ماأحب اجحد عن احد


راح اقولكم المبرر اللي يخلين اقتنع برأيي

زوجة اخوي ربي يحفظ لها عيالها
اول حملها كنا نعلم الكل
المرة الأولى ولدت بنوتة بالشهر السادس كذا واختارها الله اسأل الله ان تكون شفيعة لأهلها
حملها الثاني علمنا الكل وسقطت بالشهر الخامس

المرة الثالثة راحت لشيخ من بداية حملها
قالها ابقرأ عليك طول حملك ولاتعلمي أحد بالحمل
وطبقنا اللي قاله لنا الشيخ والحمدلله الحمل تم وجابت بنوتة مثل القمر ربي يحفظها
..................
يعني لاتلومون الناس اذا بدو يجحدون
تحيااتي

[ملكة بلا مملكة]

هكذا بعض الناس (يجحدون) يكتمون اما القصد الخوف من العين أو لا يودن مشاركة غيرهم او حاجة في انفسهم أو خوفا من الناس الفضولين كثيري السؤال
ولكن اعتقد الامر معروف وعادي لماذا نخفية مثلا شبكة زواج منزل الكل سوف يفرح ويشاركون معك
دائما وأبدأ استعن بالله والحرص ع الورد ولا تخفي اجعلك كتاب مفتوح

[ميميات]

عطرتو ياااحلوين..!

[إمتزـآج روح]

مشكلة بعض الناس يطبون بالجحاده مرة وحده ويجحدون كل شي
والعين تجيهم من تصرفاتهم لانهم بجحادتهم يفطنون الناس
واحد من اقاربي قريب قووووووه لي مادرينا عن زواجه الا بعد يومين ولادرينا انه خاطب أصلن
بتصرفهم هذا صاروا حديث المجالس على بالهم خايفين من العين >>جبتوا العين لانفسكم وكأنكم تقولون للناس انحتونا

عن نفسي كنت انسانه صريحه لأبعد الحدود اللي بقلبي على لساني بس ألحين تقل اني تأدبت
لأني تعرفت على وحده كنت اقوله كل شي بس تعذبت منه عذاب مايعلم به الا الله
لاني مااكتشفت ان عينه حاره الا بعد سنتين من معرفتي له

من المواقف اللي صارت لي منه ..

مرتين تدق علي بوقت كنت بطلع فيه للسوق استأذن منه وأسكر السماعه
المره الاولى رحت وأول مادخلت السوق سرقت فلوسي ورجعت البيت وبي العبره

المره الثانيه اتصلت وانا لابسه عباتي امي سبقتن وركبت وانا وراه يوم جيت اركب
مادريت الا واخوي يروح ويخلين ( ماتأخرت )
انا اسكت على بالي ان اخوي يستهبل يوم يمشي
قلت اكيد بيرجع بس يبين اعصب بعد عشر دقايق دقيت عليه !
قلت وينك بلا مقالب يالله تعال ماودي نتأخر وكأن احد معطين كف عيا يرجع ولا ادري وش السبب اللي خلاه يروح عن



مره ثالثه كنا بأبها وتونا جايين مالنا الا يوم بسسسس اتصلت علي الفجر وكنت من زمااان ماكلمته
قالت وينك قلت انا بأبها آآه بس ليتي صاكه فمي وماقلت له شي بعد ساعتين طلع ابوي متضايق
قال حملوا قشكم بنغير الشقه عجزت ارتاح
ركبنا السياره والضيقه اللي فيه زادت مادرينا الا وهو ماسك طريق الباحه
انا قلبت الطريق صياح ابوي ولا كأنه ابوي اقتلب شخصيه ثانيه
كنت اصيح على غبائي على سذاجتي لاني ادري ان عينه حاره وحسووووده ليش اقوله
وصلنا الباحه ولسه ابوي متضايق كمل وماوقف الا بالطايف ومن بكره على بريده


والمواقف كثيييييره وأسفه على الإطاله بس عشان ابين لكم ان بعض الناس ماتعطي خير
وتووووبه أكب عشاي على أحد إلا اللي أعرف أن قلبه نظيف ومايبيلي إلآ الخير



عشان كذا اقول الوسط زين لا افراط ولاتفريط
لاتقول كل شي ولا تجحد كل شي عشان ماتفطن الناس عليك
وأهم شي قرأة الورد والتوكل على الله والإيقان التام بأن الله بيحمينا ويحفظنا
وأنه لن يصيبنا إالا ماكتبه الله لنا

[ارجوانه]

والله من الشرافه عندك
اانا ابي افهم شي واحد بس
وش الفايده اذا عرفتي انه قاصه شعره والا لا
قسم بالله اشياء تخليك تمسك راسك من القهر جد والله
يعني لازم تعرفين كل شي
يااختي انا حر ماابي اقولك والا تقولين عني جحود
غريب امركم
والله العظيم اذا كنتي تفكرين بالامور هاذي كثير والله تصيبك نفسيه
ليش هاذي ماقالت لي وليش هاذي تجحد وبس سوالفيك عن الجحاده
وهذا اكبر وصل فيك كتابة موضوع في المنتديات عن الجحادة

( للمعلوميه = اخو ارجوانه سرقت معرفها عشانه هالموضوع بس )

[ميديم]

والله مدامه ماراح يضرني بكيفها خليها تجحد والا تقول براحتها..
اصلآ ماأحب أسال وينكم ووين رحتوا..(دعوا الخلق للخالق)
بس اللي يقهرر ان هاللي تجحد هي أكثر الناس فضولا وتطفلا..

فيه وحده من قريباتي كذا أسلوبها(رحتوا للمكان الفلاني عشان اقول لاااااااا رحنا لكذا)
بس انا لها بالمرصاد أخنق فضولها في مهده

[البروفيسور.........]

اقتباس المشاركة الأساسية كتبها ميميات السلام عليكم ورحمة الله وبركاته.. كيفكم وش اخباركم .. المهم ندخل بالموضوع سيدا.. الموضوع زي ماشفتو بالموضوع..الجحاده.. كثير من اهل القصيم عامه وبريده خااصه يحبون الجحاده والله لو يشترون من البقاله يجحدون انا بفهم ليش؟؟هو عيب اذا قلت؟؟بينحتونك يعني؟؟صح بتقولون ماله فايده الواحد يقول صح عليكم ماله فايده طيب فيه قليل جدا جدا من الاشياء تحتاج الجحاده وفيه بعضهن لاااا طبعا وفيه بعض الاشخاص مايفرق بين الشي الي يجحد والشي اللي مايجحد!!!!.. مثال؛ وحده ذاك اليوم تقول كنت انا عند خوالي تقول عاااد فيه وحده من خالاتي جحووده قوووه تقول مره خالتي هذي الجحوده ماجو تأخروا يعني ماجو لبيت خوالي المهم تقول حنا ماشلنا هم قعدنا نتقهوا يوم صار يمكن بعدساعه او نص ساعه جت خالتي..المهم وجلسنا نسولف مع بعض وكذا..تقول وحنا نسولف قلت انا ليش تأخرتوا عسا ماشر؟؟ قالت لا ولاشي سلامتك..انا سكت عرفت انه ماتبي تقول مب لازم هع.. تقول عاد كملنا سواليفنا وانا ماشلت له هم تقول وقمنا نحط العشاء تقول يوم حطيناو وقضينا وقعدنا نسولف على السفره جاء ولد هالخاله نفسه ولده الصغير قال ياويلي انتم ما اكلتو من مطعم وحنا ما كلين تقول انا انفجرت ضحك..تقول مادريت الا الولد يصيح قامت خالتي ولفعت ولده!!!!!!!!!!!!!!! ليش كل هذا؟؟؟ طيب الولد صغير عادي وبعدين هو اصلن وش قال؟؟ ..تمت.. يشرفني ردودكم.. تقبلوني ميميات..

ياوخيتي ,,,
انتي ينقص منك شي اذا ماعرفتي ؟؟؟

ابعلمك على شي صدقين والله العظيم وبالله الكريم انه مريحتن من كل شي ,
وهي انك من الافضل لك انك ماتعرفين كل شي ,,
والله ان تعيشين سعيده مره مره مره , وتصيرين تلقائيه وبدون حزازيات ..... الخ


وفي نهاية كلامي , وش رايك بقول الحبيب صلى الله عليه وسلم (واقضوا حوائجكم
بالكتمان )........

[ورود الأمل]

صدقت والله فيه ناس يجحدون كل شيء مع العلم انك انت تخبرينهم بكل شيء تصدقين السفر يجحد واي زياره يقولون رحنا لدريب ههههههههههههههههههههههههههه مادري ليش طبعا فيه اشياء تجحد للخصوصيه لكن اللي اشوف اشياء تافهه تجحد وش السالفه مادري ايش يخافون منه الله يعافي من ابتلي بهذا الداء ولاتبتلينا

[الجادي المدوف]

تسنكم دارين إني أموت بشي اسمه جحادهـ
أتفنن وأستمتع بالجحادهـ

[ورد وبيلسان]

وانتي ماتجحدين

عموما في امور مايلزم ذكرها للناس وليش من حق اي احد ان يعاتب غير الوالدين فقط

بعدين نمشي من منطلق "استعينوا على قضاء حواجئكم بالكتمان " فكيف بوقتنا هذا عووووووووووووووووع حسد وحقد وغيره

[البيااان]

شوفي أختي من حسن اسلام المرء تركه مالا يعنيه ..((حطي هذا نصب عينيك يالغالية))
لماذكرتي::_كثير من اهل القصيم عامه وبريده خااصه يحبون الجحاده والله لو يشترون من البقاله يجحدون انا بفهم ليش؟؟
هو عيب اذا قلت؟؟بينحتونك يعني؟؟صح بتقولون ماله فايده الواحد يقول صح عليكم ماله فايده طيب فيه قليل جدا جدا من الاشياء تحتاج الجحاده وفيه بعضهن لاااا طبعا وفيه بعض الاشخاص مايفرق بين الشي الي يجحد والشي اللي مايجحد!!!!..-

أنا أشوف ان( بعض )أهل القصيم ,,وغيري يقول الغالبية ,,هداهم الله يحبون الشراااااافه والتدخل في خصوصيات
الغير
يعني أبفهم
راحولمطعم
راحوا لجنيف
راحوا بقاله ..وبعدين وش راح يصير اذ مادريتي خلوا العالم بحاله والله راح ترتاحين أنتي أولا وراح يرتاح غيرك

يعني يمكن هم ما يحبون يقولون رحنا تعشينا احترام لكم ولأهل البيت الي طابخين لهم ,,وما أحس انه شي مهم عشان يقولون لكم ,,
شوفي يا أختي أنا ماعشت في القصيم وأزورها كل سنتين أسبوع بالكثير وربي اني أكره بعض تصرفاتكم منها كثرة الأسئلة
واللقااااااافه والله يوم واحد تجتمعين معهم مايخلون شي ما سئلوك ولا يمكن يعرفون شي فيك أنتي ماتعرفينه عن نفسك
يا ناس استحوا على أنفسكم واتركوا الخلق للخالق والله ما أحب أجي للقصيم عشان بعض تصرفاتهم
وفيكم جرائة زايدة عن حدة يعني
أضرب لك أمثله
*ممكن أشوف جوالك هذا اذاقالت ممكن وتنبشه خلال دقيقة عييييب
*تجيك بنت من بناتهم عندك صور لخوانك وريني عييييييب وربي عيب هالتصرفات
*بكم شارية الشنطة
*.ساعتك غالية صح عييييب رخيصة غالية عيب السؤال ماخذت من جيبك. عييييييييب
وشتسمين لما توك واصلة للقصيم عشرين سؤال يوجه لك خلال ربع ساعة ياناس فية شي اسمة عيييب
وربي لو أنتي عايشة برا القصيم وتشوفين كيف العالم كلن عايش بعالمه الخاص ما يتدخل باحد وكلن يفرح لثاني بافراحه وأحزانه

أنتم الله يصلحكم لو تقولين لهم فلانه أوفلان راح يتزوج وزواجه بعد 3شهور يزعلون لية ما علمتونا ياناس عيب لازم يجون ياخذون رايكم بالخطوبه!!!
والي عندنا والله مادروا الا اذاوصلتهم البطاقة وتلقاهم فراحانين لك مع اختلاف الجنسيات
أذكرلك مثال// كتب الله لبنت خالتي تاخذ واحد ساكن بالقصيم والله تقول شي عجيب ناس فيهم عرق القااافه تعودوا على هالشيئ يعني
مثلا هي رايحه المستشفى مراجعة تجي الي جنبها تسألها وش اسمك وشعندك في المستشفى
**يعني وشتبي تستفيد من سؤالها يعني مثلا عندها علاج ..<والله ما ضنتي بس شي اعتادوا علية ,,
لو يطلعون ويخالطوا العالم بيحسوا بالفرق <<
وكم أتمنى أعرف إيش الأحساااااس الي يحسونه بكثرة الأسئلة وإيش الفائدة العظيمة الي حصلوها من هالأسئلة.. يمكن شي اعتادوا عليه فصاروا ما يستنكرونه,,لكن لو الواحد قبل ما يسئل يراجع نفسه وش راح يستفيد!!!!

عذرا أختي على الإطالة وأتمنى ماتاخذين بخاطرك بس شدني موضوعك فحبيت أضيف ليراجع كلن نفسه"ولم أكن أقصدك بذاتك,,
لنكون صريحين مع البعض لعل الفائدة المرجوة تصل..

شــــــــــــــــــــــاكرة لك ومقدرة..

[الدرة المصون]

ياحليله هالخاله لكم

شبهته على خالة لي
الله يذكرهم بالخير
ترى ماله داعي انك تسالين ابكيفهم

(من حسن اسلام المرء تركه مالايعنيه)