[قطرات]

وينك تأخرت ؟ ننتظرك
لك كل شكري على ماابدعت

[شمـوخ !]

ومازلت أنتظر بحماس

[أكــــــــابر]

تـــــبــــــون اكمل لكم انا عادي اذا تنازل اخوي ماسنجر بكملهإلا بحووووووسه لكم

مبدع وربنا يوفقك يادكتوووووووووووور ننتظرك

[أبو رُبـــــى]

ننتظر بشغف يا دكتووووووور

لا تبطي الله يرحم والديك .....

أخي ... د / ماسنجر ..... مبدع ... إبداعاً ... رائعاً ....

شكراً لك ....

[د / ماسنجر]

.

.


قبض سامي الرسالة بيده .. وعاش ثوانٍ يسيرة سارح النظر والبال .. يفكر ويُقلب بصره :
وش خلا ليالي تتذكرن ؟! .. معقوله يوم سافرت تحركت مشاعره تجاهي !! ، سبحان مغير الأحوال ..

سمع هاني تلك الهَمْهَمَات التي خرجت من سامي .. وبكل هدوء اقترب منه :
ليالي .. من ليالي !!
سامي : لالا .. لا ولا شيء ، مشينا
هاني : سامي وش بك !! علمن وش السالفة !!
سامي : ياهاني الرسالة زي ما قلت أنت لي .. يعني معليش شيء خاص
هاني : بكيفك .. شيء خاص شيء خاص ..
سامي : لا تزعل ياهاني لا رحنا أعلمك بالسالفه ..
هاني : فيه سالفة يعني !!
سامي : إيه سالفة طويلة شوي ..
هاني : طيب منهي ليالي أول شيء !!
سامي : أعلمك بعدين .. مشينا
هاني : مشينا

ومشوا للخارج .. إلى النزهة .. وإلى الضحكة والبسمة .. ولكن كيف يطيب الابتسام لسامي والجُمل والمشاعر تلتف بعقله كالأفعى ؟! .. تأخذ فِكْره من هنا .. وتارةً من هناك .. وتعود بهِ .. وتذهب به .. يرى البشر أمامه وهو يسير على " السكيت " كما سمّاها هاني .. ولكن كلهم ليالي .. يرى الشمس في كبد السماء .. ولكنها ليالي ! .. ويرى ضحكات النساء من أمامه .. ليالي .. كل الجَمَال ليالي .. فهي الوردة في ذاك البستان .. والزهرة على ذاك الرصيف .. والهدية بين يدي تلك الشابة الواقفة بعد أن مر بها .. و قطعة السُكر في ملعقة ذاك الرجل الماكث فوق الكرسي أمام محل قهوة .. والحلاوة في يد تلك الطفلة التي تركض خلف أمها تلعقها تارة ، وتدور بها تارة .. وتغريد الطيور على أغصان الأشجار التي عَبر من تحت أوراقها .. وهي ذاك المنظر البديع الخلاب ، الذي جمّل المكان وسحر العين .. ولف عنقه يميناً ثم إلى الخلف وهو ذاهب ليرى ابتسامة ذلك الطفل البريئة ويقول في قلبه : ليالي .. أبحرَ بإبحارٍ لم يُبحر بهِ من قبل .. فالإنسان ، يسير في هذه الحياة كالنهر الجاري بهدوء .. ويختلفون البشر باختلاف جريانهم .. ولكن سامي سقطت الأحجار الكثيرة في نهره .. وبعثرت سيره لأنها : ليالي .




هاني : سامي لي شوي أتكلم معك وما ترد !!
سامي : أهوجس والله معليش ..
هاني : بمن تهوجس يعني !!
سامي : بليـ ... بالعالم .. بالعالم اللي حولنا ..
هاني : طيب وش السالفة !!
سامي : أي سالفة ؟
هاني : !! .. بالبيت تو تقول بعلمك سالفة !!
سامي : سالفة !! أهاا .. قصدك سالفة الرسالة !!
هاني : إيه بس لا تسرع خلك على الوازنية هذي لأن الطريق نازل خفيييف ..
سامي : ماعليك بس خلك ماسك يدي ..
هاني : طيب ..
سامي : السالفة يا طويل العمر .. إني يوم كان عمري تقريبا 11 سنة .. كانت أمي تخلين أنام ببيت أهل ليالي .. يعني كنت أجلس بالأيام عندهم ..
هاني : جيرانكم هم ؟
سامي : لا مهب جيراننا هي بنت خالتي .. ، بداية السنين كنت ألعب أنا وهي .. مافيه شيء يخلينا نكره بعض ولا نتهاوش أبداً حتى لو اشتريت ألعاب أنا إذا رحت لمهم أخلي ألعابي عنده .. شف البراءة وش وصلت عنده .. مرت أيام وأيام .. سنة بعد سنة حتى يوم من الأيام كتبت لي خربوطة صغيرة به ألوان وتشكيلة رسوم قلب حب ونهر وشجرة واثنين واقفين طبعاً رسوم عادية تعرف صغار يعني ...
هاني : اهااا
سامي : واحتفظت بالورقة هذي ببيتنا .. كان به كلمة أحبك وأنا صديقتك وتعال عندنا دايم .. كلمات صغارين .. كبرنا للمتوسط طبعا فارق العمر بيني وبينه يمكن 7 شهور أو 8 ما أدري بالضبط ..
هاني : الغريب إنك ماقد علمتن عنه بحياتك كله ..
سامي : عاد أيام راحت وشف الحين علمتك !! ، أقول لك للمتوسط وصلنا واكتشفت إنه فعلا البنت كبرت ومازالت تحبن .. بيننا كان مراسلات ورق تعرف الورق المقوّى !! اللي بالمدارس أحيانا يستخدمونه .. !!
هاني : إيه اللي يجي خشن شوي !!
سامي : لا مهب خشن قصدك عليه نقوش !!
هاني : إيه نقوش كانه رسوم ظاهرة على الورقة !!
سامي : إيه إيه .. هذا هو .. كنت اكتب وأعطيه أياه بدون ما يدرون أهلي .. وكانت هي تكتب لي على ورق دفاتر المدرسة تكتب ولا خلصت تشقه .. بعدين وصلنا للثانوي وكانت مدرستي الثانوية عند بيتهم .. إذا طلعت يجي أبوي ياخذن من بيت خالتي .. وأحيانا يتركن أبوي لين المغرب أنواع الوناسة .. ثلاث سنين وأنا كل ظهر إلا نادراً أكون عندهم .. ولحكم إننا صغارين ما تغطت عنّ إلا يمكن بثالث ثانوي .. بعد ما يسمى غطا .. يسمى تسكيته لأن ماقد شفته متغطيه زين إذا دخلت وجلست أحس إنه وده تشوفن ..
هاني : من قدك ياخي .. وحده من العالم تحبك مفروض تستانس
سامي : عساك ماتطيح بالحب .. يوم كبرت أنا مسكت سيارة ، وبأولى كلية وبيوم من الأيام كنت أنا عندهم وكانت خالتي منكسره رجله وكنت أجيب له أحيانا علاج ولا شيء إما من الصيدلية ولا من أمي يعني .. جاه وقت ليالي ماتاكل وضعفت صحته ياويلي .. أغمي عليه فجأة وتصرخ خالتي سامي ساااامي .. وأجي لمه قالت لي : ليالي أغمي عليه والتفت وألقاه طايحه على جنب بسم الله عليَه كانت عند التلفزيون .. جبت ما على طول ارشه وارشه وأحرك وجهه يوم صحت عاد غطيته .. قالت لي خالتي : وده للمستشفى الحين الله يعافيك ياولدي ومدري وش لون .. أنا إنحرجت يا هاني وش أوديه المستشفى قلت خاله خلي أبوه يوديه قالت لالا وده ميخالف .. راحت وهي دايخه ليالي وجابت عباته بعدين ركبت ورى وأنا الهواجيس تروح وتجي ما أدري وراه .. وديته المستشفى أخذوا تحاليل وعطوه علاج وفيتامينات قعدنا ساعه ونص يمكن ورجعنا للبيت .. طبعا بالسياره سواليفنا كله عن العلاج وعن : كولي زين يا ليالي عشان صحتك .. وعن : الله يسلمك يا ولد خالتي .. وأنا كنه معطيتن وردة وهي تقول كذا ..
هاني : وردة ! إلا بستان .. إيوه كمل .. !
سامي : بعدين وصلت البيت ودخلنا على خالتي وارتاحت وهاشته وعطته كم كلمة كذا .. بعدين ياطويل العمر يوم مرت سنتين جان خبر موثق إن البنت تنهبل على شيء بالحياة اسمه سامي وإنه تتمنى تعرس علي .. خصوصاً إني تخرجت من قسم زين الحمد لله زي ماتعرف ماكملت ولا سنة .. يعني الحين نظرته أكيد إنه غير عن قبل ..
هاني : الكلام اللي تقول جاك عنه متى ؟
سامي : قبل تقريبا سنتين ونصف من الآن .. والحين أنا متخرج لي فترة ..
هاني : اها ، اسمع المنعطف الجاي نلف معه زين وتراه منحدر شوي مهب مثل هذا وبعده منعطفين يسار ويمين وبعدين تجي الملاهي .. كمل
سامي : طيب .. بس هذي السالفة تقريباً .. يعني كل الأمر إنه تحبن ..
هاني : وأنت طيب !! وش مشاعرك تجاهه !!
سامي : والله مشاعري ماتوقع مثل مشاعره لأنه أقوى زي ماعبرت لي .. يالله شف التعبير وش لون أول تقول : تعال عندنا وأنا صديقتك والحين أسلوبه قوي ماشاء اللـ ....
هاني : سامي انتبه انتبه وقف السكيت وقف ..
سامي : ليه !! . . . لاااا . . آآآآه

وفَجأة .. ! بغمضة عين .. ترتطم سيارة البَريد بسامي من جانبه الأيمن .. ويسقط على جانبه الأيسر فوق الإسفلت محدثاً ذلك السقوط جروحاً عدّة :
سامي !! عسى ماجاك شيء .. !
سامي : آآآه ..
هاني : وش يوجعك وش تحس به !!
سامي : ساقي اليمين .. وأطرافي متجرحه ..

احتشد البَشر في ثواني .. ينزل صاحب السيارة ويُلقي نظرة على مقدمتها .. ويقترب لهاني ويشرح بيديه ويتحدث :

I Did not see him..I Did not see him
I apologize!! I was walking all the Balance..
But he suddenly came out and he Seems to be skiing fast which
has lost his balance .. I'm sorry( لم أراه لم أراه .. أنا اعتذر .. لقد كنت أسير بكل إتزان ولكنه خرج فجأة ويبدو أن تزلجه بسرعه أفقده توازنه .. أنا أسف )
هاني غاضباً : !! Well,, Contact ambulance .. .. call now ( حسناً .. اتصل بالإسعاف الآن !! )

سار الرجل بسرعة لسامي وجلس ماسكاً يده بلُطف :
Excuse me ... Believe me, I didn't see you
I was scurry away by this credulous .. Please Excuse ( المعذرة ... صدقني لم أراك .. لقد كنت منطلقاً بهذه الساذجة .. أرجوك أعذرني )
سامي : آآآه
الرجل : Ambulance ..!! There is an accident at an intersection with 34 Street 25 Street brought quickly ( الإسعاف .. !! هناك حادث في تقاطع شارع 34 مع شارع 25 احضروا بسرعة )

الآه .. يطلقها سامي بين ثانية وثانية .. وهاني خلع الذي بقدمه وقدم صديقه .. وبعد عدة دقائق يسيره أتى الإسعاف وحملوه وتوجهوا به إلى المستشفى .. انقلبت فرحتهم حزناً وحكاياتهم صمتاً .. والنزهة إلى كَدر .. لقد كدر صفوهم ذلك الحادث المُقدر .. كانوا ذاهبين إلى الملاهي والألعاب !! .. وأصبحوا ذاهبين للعلاج .. قضاء الله ، مكث هاني مع صديقه .. بعدما أنهوا التحاليل والفحوصات والنتيجة هي كدمات في جسده ويجب أن يمكث يومين إلى ثلاثة من أجل راحته ، وذهب للمنزل وأبدل ملابسه وأتى بملابس لسامي فهي غير ملائمة .

ما أقبح الحزن المفاجئ .. إنه يشتت الحياة كلها .. ويجعل كل ما يَعْبر من أمام العين لا قيمة له .. يبدأ الإنسان بتذكر كل لحظةٍ أمضاها في حياته وبالعفو عن كل من أخطأ عليه .. هي لحظة ضعف وانكسار .. هي لحظة الشعور بأن النقص نعمة لأنه يذكر ذلك المريض بأن العافية نعمة .. والإنسان لا يُحسّ بثمن الشيء ويُدركه إلا عند فقده ولو لبرهة .




الساعة 7:13 مساءاً

في غرفة التنويم .. وعلى السرير سامي .. ناهضاً ظهره قليلاً ليُغير من أجوائه في مشاهدة التلفاز .. وهاني بالكُرسيّ على جانبه الأيسر يشاهد ويُقلم أظافره :
اتصلت على ليزا وعلمته ترى ..
سامي : زين إنك اتصلت كنت بقول لك تو ، نتصل على أبوي نقول له !
هاني : لالا ما يحتاج .. دامك بخير .. ولا تقول له بعدين حتى لو رجعت ..
سامي : طيب ..
هاني : إيه يا سامي كني اسمعك تقول فدوة للغالية صح ! ( ابتسامة لتهدئة الأوضاع )
سامي : ههه غير القناة بس ..
هاني : نغيره .. ومالو .. أهم شيء إنك تنبسط ..

أعينهم على الشاشة .. وهي تتقلب من مسلسل إلا رياضة إلا خبر إلا برنامج إلا مالا نهاية .. ولحظة صمت تخيم على أفواههم .. يلتفت سامي بكل هدوء لهاني وبنظرة حُزن :
تبي الجد عاد يا هاني !
هاني : نبيه ليه لا ..
سامي : إي والله أحبه .. أحبه يا هاني ..

وذَرفت من عينه دمعة .. جمعت كل ذكرى حدثت مع ليالي .. بل إنها أنسَته ذلك التعب وتلك الآلام .. ذرفها بعد أن احتشدت في عينه وسقطت .. تشتعل فوق خده .. بعد أن تجاوزت مكانها مسرعةً في سيلانها .. وانقضى عهدها اليسير على ثوب التنويم :
ياسامي ياغالي .. وسع صدرك تراه تحبك .. وهذا اللي عرفته منك .. ماراح يفيدك البكاء ولا الذكرى ..
سامي : ...
هاني : أكيد إن الرسالة به شيء مضيق صدرك صح !!
سامي يمسح تلك الدمعة بأنملة سبابته : لا والله .. مابه شي
هاني : أجل تعوذ من الشيطان . كله كم يوم وأنت راجع ومتزوج عليه .. عاد أنا أعرفك زين يا سامي عقبه تبي تنسى نيويورك وبرونكس وهاني وكل شي ..
سامي : ياهاني الحب هذا له حول 13 سنة من الآن .. يعني ما هو بالسهوله إني بأهمله ولا بالسهوله إني بأهمله وأرجع له ثاني لأنه مهب على كيفي يصير ..
هاني : يابن الحلال يمكن هي صار له ظروف عاصية ماقدرت إنه توصل لك أي كلام يمكن كانت تفكر يمكن أمه تدري وهاشته يمكن ويمكن ..
سامي : كل أهلنا يدرون بس ما انتشر الأمر .. لذلك تقدر هي توصل السلام عن طريق أحد .. يعني بعد الثانوي سنتين جلسنا بمجلس أكثر من مره بس مهب لحالنا وسافرنا وكل شي ولكن ماجا طاري بس السلام وعليكم السلام وأمي تبيك وزي كذا من مواقف ..
هاني : أنا قلت لك ياسامي .. طيب هذي الحين هي وجتك وكتبت لك رسالة !! معناه إن البنت مازال بداخله حبه لك ..
سامي : انت تشوف كذا يعني !!
هاني : هذا اللي وضح لي لو هي ماتبيك !! وش تبي ترسل لك وأنت بهالمسافة عن ديرته !!
سامي : صح ..
هاني : الله يعين .. طيب الحين جوعان أنت !!
سامي : والله عقب الفطيرتين ما أحس بجوع كانك جوعان أنت عادي جب اللي تبي
هاني : أنا والله جوعان ، أخاف لا شفت الأكل تخدّش معي لأنهم بيجيبون العشاء الحين ..
سامي : طيب مو مشكلة ..

أتوا بالعشاء .. وبعد دقائق انتهوا من الأكل .. وقضوا بعض الوقت متنقلين من حكاية لحكاية ومن قصة لقصة .. فالأول يود أن يخفف من صَدمة صديقه .. والثاني يودّ أن يبدل الحزن بالابتسامة ، خلد هاني إلى النوم على سرير المُرافق .. ونام بعد أحداث يومِه .. أما سامي .. قام بإغلاق التلفاز .. واستمر بالتفكير .. هنا وهناك .. يَجُول في ذكرى خَالية .. أصبحت في سالف الأيام .. ذكرى بدأت بالبراءة والحب .. ومازالت مستمرة فصولها .. حتى في ابتعاده عن قلب حياته .. مازالت تسير وتجري وراءه .. يذهب بنظره يميناً على ذلك الجدار .. ثم يذهب به عقله إلى سنين الصغر .. وصدى ضحكاتهم يرن في أذنيه .. وكلماتها .. حتى تَعبها في ذلك اليوم الحَزين .. لم ينساه حينما حملها لتَقعد وتستفيق .. وعندما أتى بالماء ليُعيد لها وَعيها .. تذكر عندما كان يقوم بواجباته المدرسية معها .. تذكر عندما كانت تلوّن رسوماته وتعبث بها في كراسته الخاصة .. تذكر عندما كانت تُهديه شيئاً من أقلامها .. عندما كان يجري خلفها في المطر .. وعندما كان يختبئ عنها لتبحث عنه وتنادي عليه بصوتها الرقيق : سامي .. سامي .. ! ، الذكريات كثيرة .. والمواقف جمّة .. ثلاثة عشر سنة مليئة بالحب والوفاء والانتعاش ، ومازالت الذكرى تحرقه .. حتى أوقفها بالضغط على زر طلب الخدمة من الممرض .. أتى الممرض .. وطلب منه قلماً وورقة .. ذهب وبعد دقيقتين عاد ومعه الورقة والقلم .. شكره ثم أغلق الباب .. رفع مقدمة سريره قليلاً .. ثم رفع رجله اليمنى ووضع عليها الورقة واتكأ ليكتب .. ألقى نظرة على هاني .. مازال نائم .. ألقى نظرة على النافذة يَجول بداخله ليجمع مرادفاته وكلماته وكل جُملة يُريدها .. ثم أنشأ :

بسم الله الرحمن الرحيم ..
السلام عليكم ورحمة الله وبركاته ..
إلى ( . . . ) مَع التحية ..



.

.

ومزيداً من الأفكار . !
ومزيداً من الانتظار . !


بـ مقلمة أخوكم / سلمان الجفن
( د / ماسنجر )

[ما تَهَاب]

هل لها بقيــــــة؟!

[د / ماسنجر]

نعم أختي ..
لم تنتهي ..

[ما تَهَاب]

إذاً سننتظر بإذن الله ..

واتوقع الرسالة مو من بنت خالته والله اعلم ..!

[بروق في العتمة]

ذبحتا يادكتوووووور على هالأسلوووب

ماشاء الله

والله يزيدك

لكن ترانا مثل ماقلت لك تراي على الاعصاب

لا تتأخر تكفى

بارك الله فيك...

[مجهول الصفات]

عافاك ربي ..
.
نترقب على أحر من الجمر ..

[زرزور]

عافاك المولى


جميل ان تسطر لنا تلك الكلمات فلك مني جزيل الشكر

[السيد سامح]

اكثر من رائعة

في انتظار البقية

[ابـ قصمه ـو]

ابداع ابداع بمعنى كلمة ابداااااااااااااع

الى الامام د/ماسنجر


بانتظار التكمله.....

[عصير منقا]

د / ماسنجر
الصراحه إبداااااع
ننتظر على أحر من الجمر