[شهم المنتدى]

بسم الله الرحمن الرحيم
السلام عليكم ورحمه الله وبركاته

صباحكم, مسائكم.. خير ورحمه ومتعكم الله بالصحه والعافيه ...

"في ظهر يوم الثلاثاء الماضي وبتحديد ونحن _معشر الطالبات_ راجعين لبيوتنا بالباص مع السائق الاندونيسي وزوجته وسائق الباص المتعطل الاندونيسي ايضاً >> اللي مايعرف لا عربي ولا انقلش
المهم.. والسواق ماشي يودي البنات كل وحده لبيته ,,, وبينما نحن باحدى الشوارع العموميه ,, وبالتحديد ناوين نلف وكان على يميننا جيب ربع وهـهـ وحنا نلف طوووخ تصادمنا " واجهيه الربع صدمت وسط الباص >> تقريبا كذا ماأعرف اشرح زين "
والحمد لله الصدمه خفيــــفه جداً جداَ وكانت الصدمه من الجهه اللي كنت فيها ولله الحمد والمنه مافيه اي شي والصدمه ماأثرت لا بالباص ولا بالربع ويمكن اثرت بالربع خفيف لكن ماشفنا حنا فييه شي ..! المهم نزل السواق وراعي الربع والباااص واقف في نص الشارع العمومي .. !! انتظرنا انتظرنا .. توقعناهم شوي ويركب السواق ويمشي لكن ,,طولوا واخيراً جت الدوريات ,, وخلوا الباص يتحرك من مكانه اللي هو وسط الشارع,,حنا للحين متحملين لاننا لللحين ماطولنا كثير ,, وبعد مده جاء جمس ووقف اثاريه ابو احد البنات وتنزل بنته وصديقاته وراحوا ,,,!! وبعد مده قصيره جاء احد باصات مدرستنا قالنا اكيــــــــد جاي
يشيلنا .. ويوم وقف وينزل السواق من الباص ومرته وماشالونا ,,؟؟ شالوا محرم باصنا وبناته التوئم اللي اعمارهن ماتعدت شهر وشوي >> لانهن ياحرام مايتحملن .. وراحت المحرم وبناته وحنا جالسين بالباص ..؟ المهم حنا منشغلين على اهالينا لانهم اكيد قلقين علينا لاننا تأخرنا على موعد رجعتنا للبيت نصف ساعه...,, الاندونيسي اللي مايعرف لا عربي ولا انقلش جالس بالباص طلبنا منه "جوال. موبايل . نوكيا .." >> ولا حياه لمن تنادي مافهم او فهم ماندري عنه ..؟ القهر ولا واحد فكر يعطينا جوال ندق على اهالينا نطمنهم.. بعد برهه من الزمن جاء حارس مدرستنا(بجمسه) والمحاسب>> لاننا بمدرسه اهليه..,وبعدين الحارس بعد ماشاف الاحوال والأوضاع شال بعض البنات اللي من حي واحد ومشى ... وبعد طوووول انتظار تحرك راعي الربع وخوياه وتحرك باصنا بحمدالله اييه صح وبعد قبل مااوصل لبيتنا وقفتنا دوريه دقيقه بس ومشونا ...وبنعمه من الله وفضل وصلت لبيتنا بعد ماتأخرت ساعه إلا ربع على موعد رجعتي ...
لكن سؤالي ..!
* ماموقف أهل بنت تأخرت بنتهم ولا يملكون رقم للسائق ولا اي وسيله للتواصل مع اداه المدرسه .؟
*مادور الدوريات اتجاه الحوداث اذا كان احد طرفي الحادث سائق باص " وخاصه اذا كان الحادث خفيف يعني والحمدلله مافي اصابات ولا اي شي يذكر "هل يأخروننا كل الوقت ,او المفروض انهم يتأخذون اجراءات ثانيه ؟!
** ماموقفكم لو كنتم داخـــــــل الباص ومنرصين ساعه الا ربع "وبين نارين" ؟!

(( والحمد لله على سلامتنا اولاً وآخراً ))
دمتم بحفظ ارحمن ...وكفانا الله واياكم شر الحوادث ..والله يجعل العواقب دايماً سليمة...

(( شاهدت العيان أخت شهم المنتدى))>>!

[غ ــموض ح ــائر]

اها
اخت شهم المنتدى

وانا اقول وشولون الاسلوب اسلوب بنت

والمعرف لولد

عموما الحمد لله على السلامة

وحنا بعد تسد صبخ باصنا سيارة فورد ويقعد راعي السيارة يصارخ وييصارخ هيه ياهيييييييه
والمشكلة ان راعي الباص واقف مامشى
حنا قلوبنا بدت تردع ههههههههه
وراعي السيارة بس يلج ويهاوش شكل الصدمة كبيرة
ونزل سواق الباص وعطاه كرته وركب بسرعة

[د/منوشـآ]

^^^^^^^^^^^^^
~

هههههههههههههههههههههههاي
تمزعت تسبدي من الضحك ياغموض
عالعموم الحمد لله عالسلامه

[شهم المنتدى]

اقتباس المشاركة الأساسية كتبها ســـنـــايـــدي الله يعينكم ..! ذكرتين بسواقين الباصات "الأمين" والله ياهم غشيمين , دائم أحصل لهم حوادث ...

اللهم آمين
الله يهديهم ...يارب
جزيت خيراً

اقتباس المشاركة الأساسية كتبها غ ــموض ح ــائر اها اخت شهم المنتدى وانا اقول وشولون الاسلوب اسلوب بنت والمعرف لولد عموما الحمد لله على السلامة وحنا بعد تسد صبخ باصنا سيارة فورد ويقعد راعي السيارة يصارخ وييصارخ هيه ياهيييييييه والمشكلة ان راعي الباص واقف مامشى حنا قلوبنا بدت تردع ههههههههه وراعي السيارة بس يلج ويهاوش شكل الصدمة كبيرة ونزل سواق الباص وعطاه كرته وركب بسرعة

الله يسلمك ..
ايه هذا انا قدي وشهوله رصونا المفروض اننا مشينا وبعدين يحلون المشكله ولا انا غلطانه !
جزاك المولى خيراً

[غ ــموض ح ــائر]

لالامنتيب غلطانه هههههههه

تسد سويناه انا واختي وبنت جيراننا يوم حنا بالمتوسط
صدم باصنا بعد ههههه\كره ياسواق المتوسط مالي خلقة
الموهيم صدم بنا ذيك الصدمة الله لايوريتس بس
توحشنا وصرخنا
والله وحطينا رجلينا ومشي عالبيت ههههه
وش رايتس ماهنا اذرق منا هههههه

سووري ادري قرقي كثريش هههه

[شهم المنتدى]

حبه خال
غموض حائره
حنانـي تعدانـي~

مشكورين لمروركم ....!

[شهم المنتدى]

رجاءً انا لم اكتب هالموضوع عشان هالكلام اللي جالسين تقولونه ,,,

انا كتبته عشان مايتكرر اللي صار لنا مع بنات ثانين ..

ياناس كبروا عقلوكم الله يجزاكم خير ....

دمتم بحفظ المولى ,,,

[شهم المنتدى]

اقتباس المشاركة الأساسية كتبها غ ــموض ح ــائر وشو الي مايتتكرر؟؟ يعني ماتبين السواقين يصدمون؟؟\\ ايه هين..

اللي مايتكرر ..
رصه بااص ساعه الاربع وهو مافيه الا العافيه

ليش انتن مستهينات بالموضوع .. وغير الرصه خوف الاهل على بناتهم ..خويتي امها فيها مرض قلب الله يشفيها
والحمدلله ذاك اليوم كانت غايبه ولا الله اعلم وش كان بيصير له لو بنته تأخر ساعه عن البيت

[بريده أم المدن]

ههههههههههههههه أحس مغامرات
مع الباص

[لندا]

هههههههههههههههههههه ياحليلتس جايبينه عبره وتسكيته عشانه معرس ومعه محرم ..


ع العموم الحمد لله ربي ستر عليكم ومافيكم الا كل عافيه ..


الحمد لله ..

[هايين]

اولا الحمد لله على السلامه
ثانيا المفروض ان الرقم يكون موجود لان الدنيا تخوف
تذكرين الغبار ...فيه بنات تاخرن لان الباص مايقدر يسرع
وحده اعرفها يقولن بناتها ماندري وش سوت امي..
يوم اوصلن لقنها لابسه عباتها واقفه عند الباب
الله يعظم اجره

شكرالك

[كيان مجروح]

والله مشكلت الباصات تقل ملحوق السرعه مليون
واليوم اشوي ونروح راعي جمس بغايصدمنااشوي ويصدمنا لكن ربي ستر الحمدلله
والغلط من الباص مسرع مرررررره
الله يهديهم لو يقللون السرعه اللي مالها داعي



كيـــــ مجروح ــــــــــــــان

[طيرالمحبه]

الحد لله على السلامه ليش ما تاخذون رقم جوال السواق وتعطونه اهلكم اذا تاخرتو دقوا عليكم

[نبض القصيم]

اقتباس وبعد مده جاء جمس ووقف اثاريه ابو احد البنات وتنزل بنته وصديقاته وراحوا ,,,!! وبعد مده قصيره جاء احد باصات مدرستنا قالنا اكيــــــــد جاي يشيلنا .. ويوم وقف وينزل السواق من الباص ومرته وماشالونا ,,؟؟ شالوا محرم باصنا وبناته التوئم

يعنى معقولة يجى باص مدرسكم ويروح كذا


وصديقاتكن ماياخذن الجوال من ابوهن ولا يبلغن احد


يعنى المسؤلية راحت من الجميع ياناس وين حنا