[الخفيات]

قدر الله علي اليوم ورحت للبنك أبي استبدل بطاقة الصراف الألي المنتهية ويوم دخلت الفرع وعلى طول أخذرقم مسوي فيها نظامي يالله إلى موظف خدمة العملاء ها الشاب الحبوب اللطيف صاحب النظارات الجميلة وكل واحد من المراجين يعطين ركبه وينطن مالكم بطوالته عرفت أن ربعي ما يعترفون بالدور والنظام قلت ياالطيب بطاقتي منتهية عطنا الجديدة خطم علي واحد ابغى كشف حساب حق شهر يماني ما قصر الموظف عطاوه ورجع لي خذ عب البيانات وقع هنا وهنا عبينا البيانات وتوكلنا على الله لكن وش المشكلة أني ناسي بطاقة الأحوال مافيه لازم تجيب بطاقة الأحوال قلت والله العظيم إني جاي من مكان بعيد والبطاقة ليس معي في المنزل ما معي إلا الرخصة قال طيب شف المدير إن وقع لك مشيناه لك رحت للمدير ولا وش أشوف مدير حبيب لبيب أنيق لطيف وسيم قال وش عندك تفضل قلت يا بعد قلبي أنا ناسي بطاقة الأحوال والمكان بعيد وما معي إلا الرخصة أغديك تدبرنا يا وجه الخير قال أنت عميل عندنا قلت نعم قال وأخذمنا قرض قلت نعم وأيضا متزوج منكم عجل علينا يالذيب ضحك الحلو وقع على الورقة وبعدين رجعنا للحية الغانمة موظف خدمة العملاء طك كم توقيع وقال رح للشباك خله يوقعه وجبه على طول رحت على طول وقفت اشوي وأشرت له قال تفضل قلت توقيع بس على شان يعطونن بطاقة الصرافة أخذ الورقة وقال استرح أشوي جلست مع الناس على الكراسي ولا ماهيب الكراسي الأوله الي أنتم خابرين هذي كراسي تهفش وناعمه تخليك كأنك نايم على .....؟ ونظرت ولا الكمرات بكل مكان فوق الرأس وخلف المحاسبين وتحتهم شئ يروع يالله سترك توجهت للجهة الثانية ولا وش أشوف مكتوب المبيعات وبه واحد يفرفرالكرسي يمين ويسار من الوناسة جاي يأخذ قرض مقعدينه على كرسي مجخر من تحت على شان يبرد عليه قلت بنفسي هين يجيك يوم وتصير مثلي أول أتفرفرعلى الكرسي وتاليته تفرفرن اقصادهم الي عيت تنتهي ناد على الموظف وأخت اورقتي ورجعت للحبيب في خدمة العملاء ويوم طلع البطاقة الجديدة يبي يعطين ايه طاحت قال وراه شكله ماتبيك قلت صدقت لأنه عارفتن كثر سحبي لادراهم المراهم عطان ايه وقال رح للموظف الي هناك تدخل الرقم السري يوم رحت لمه ولا ماعنده كرسي اجلس عليه قلت زين هذا الرجال ما يعطل الناس ويخلصهم بسرع أبشركم دخلنا الرقم السري وقلنا له شكرن ويوم جيت اطلع التفت على اللحية الغانمة موظف خدمة العملاة وقلته مشكور وما قصرت بارك الله فيك قال حياك الله يوم تعديت ندان مره ثانية قلت الله يستر لاتصير خمسين البطاقة رجعت وعطان حافظة للبطاقة وشكرته مرة ثانية وخرجت من البنك بمثل ما استقبلت به من حفاوة وتكريم

[أبو رُبـــــى]

أجل أنت من ضحايا الراجحي ....؟؟؟؟ قل آمين الله يسد دينك ودين من عليه دين .. قصة رائعة ومعاناة جميلة ..

[حي الصناعة]

فرع الخبيب الجديد ..... طنات مرة يصيرون حبيبين ..... ومرة يسلطون عليكــ الحارس
يقعدك غصب الكرسي

لكن الهم الوحيد أن الراجحي لا تزال نسبته بالدين أعلى نسبة من البنوكـ ككل

البنكـ العقاري فكروا مؤخراً بأسقاط الدين حال الوفاة تأسياً بالبنكـ ساب الأبريطاني
وبنكـ سامبا الأمريكي

متى يسقط الراجحي وأعضاء المجلس ......... القرض عن كاهل الورثة

[مدحت شوقي عنيزة]

يالخفيات
الحمد لله على سلامة استلام البطاقة سليما معافى 0

يقولون إن
الذيب ما يهرولش عبث
هم عارفين مصلحتهم وقايسينها بالملي
أجل هم يخدمونك من شان سواد عيونك !!!

شكرا ليك

[سبار]

اقتباس المشاركة الأساسية كتبها ابو ربا أجل أنت من ضحايا الراجحي ....؟؟؟؟ قل آمين الله يسد دينك ودين من عليه دين .. قصة رائعة ومعاناة جميلة ..

انا احد ضحايا الراجحي وتخبطاته العشوائية وغباء وبلاهة موظفي الخط المجاني 800124
والله لو اقول قصتي كان تصيحون بس ماودي اضيق صدوركم خميس وجمعة

لكن اقوووووووووووووول عليهم من الله مايستحقون

[بريداوي ينبع]

موضوع ماله داعي وبدون فائده للقارئ.

[صطيف]

كويس البطاقة تطلع على طول اول كانت بعد اسبوع الحين فيه تقدم الله يكثر البنوك الاسلاميه آمين

[يتيم50]

إدفع 50 ريال وخذ بطاقة صراف

وإلا أقضب الباب

الراجحي وراك وراك حتى اللحد

[داعي إلى الخير]

الله يوفق مصرف الراجحي إستثمار وأسهم حلال وحسابك عندهم حلال
فيكفي الراجحي أنه المصرف الأول الذي نال ثقة كثير من الناس
بارك الله بمصرف الراجحي وبارك الله باآل الراجحي قمة الخلق والتواضع والكرم

ماشاء الله لاقوة إلا بالله

[ميمون]

غيرت بطاقتي عند الراجحي مرتين غير أول مرة أصدرت فيها البطاقة ولا أخذوا مني ولا ريال!!
رغم أني لست عميلاً لهم.. يعني حسابي عندهم خاوٍ على عروشه