[abo suliman]

مبارك عليكم حلول قروب شهر رمضان المبارك ..

والله يوفقكم على صيامه وقيامه ..


,

قبل كل بدئ .

المفروض الموضوع بالسواليف لكن لأهمية الموضوع وأحتوائه على فرائد الفوائد . ولما سيتطرق لعدة جوانب مهمة قبل حلول شهر رمضان المبارك .

,

أول صلاة تراويح .. تلقاك فرح . والأيمان والكرشة فل ..

ومتنقي لك مسجد صح .. سراميك . و فرشات لينات . وميكفات سبلت اللي واقفات مهوب الكسر اللي ملزقات بالجدار .. لو تستأجر أفغاني ينفخ عليك تسن أبرد

وتحرص يكون المسجد مهوب زحمة ولايكون مصلى الحريم بجنب حق الرجال أقصد يطقون لك رواق آخر المسجد وهذا للحريم .. أنواع مصايح البزران .

واحرص يكون الإمام مهوب راعي تطويل وصوته يسير إكه .

ولا تصف بجنب عمال توهم هابسين من مخيم تفطير صائم ثمن يجون أنواع المتاغر والأبط يسير بوهـ دويرهـ سودا من العرق .. هلابيك .


لاحصلت المسجد بهالمميزات ذي .. عزا الله أنك تبي تخشع وتبي تدعي لي .. بس مالظاهر تلقاوهـ . وإن لقيت أهم شي يكون بوهـ ماء نوع هنا . ويكون قارورهـ مهوب كاس ..

وأنتبه هههههههههههه وأنتبه ومن واقع مجرب ..

لاتصف بجنب مصري صغير .. توهـ طافن بالصلاة والخشوع .

والله من الرياء أستغفر الله .. صف بجنبي واحد العام الماضي ...

سمين وعليه ريحة بنت الريح . الله العالم أن الشامبو حقهم .. فص كامل ثوم ..>>> حاشرته الإبتسامة .

همن لادخل يسبح مكع له حبتين وبدأ يتدهن بهن .. وتطلع الريحة .. ووف صانصيلك بالجح

المهم . لاسجدنا .. يطب على الأرض تقل مطيح من جبل يبي يحجز محل أكبر ويفحج ذيك التفحيجة .. ودي أقوله لاينشق السروال بس .. .

همن لاقام الإمام للركعة الثانية .. يفز تقل حصان طراودة >>>> متعوب عليه ههه

ويكبر .. والأيدين تقل المثلثة اللي تجي مع الهندسة . لاجيت تمسح خشمك ولا تحكه .. تنغزهـ . يعني أبعد يديك شوي .

همن لاسلمنا .. وانت أنواع العطش من مزاحم هالطعمية .. يهجم بكل ما أوتي من قوة على الماء .. ماتسمع إلا الدردبة .. ولا يصب بسهله أبن .. الأيه

لا من نغالته بعد . بالتسليمة الأولى يفك واحد ولا يكمله .. همن الثانية يفك واحد جديد ولا يكمله .. حتى يضمن أكبر عدد .


وأهم شي واللي ودي أوصي عليه .. وتكفون والله يرحم والديكم ووالدين الجميع .

لا أحد يجيب فراخته معه للمسجد .. إلا أن تسانه يبي ينتبه لهم

قولو وراهـ ..

وراه .

كراهـ >>>> قديمة ههههههه


.

لاصفيت والله المستعان بالصف الثاني . مع أني متسد صفيت إلا بالأول >>> أيه هين

ويسير بزر قدامك .. وابد تقل يناظر تلفزيون .. قاعد ومركي أيدينه على الروضه ( الخشبه اللي بالصف الأول ) ..

ويناظر ورا .. لابغيت تحك خشمك ولا ترفع شماغك . ولا تبكي ولا شي

العيون متوجه لمك ... ولا أصبرو اليوم .. بزر قدامي قاعدن يعد المصلين ..

عاد يوم وصل رقم سته .. هههههههه بيقول اللي بعده قال ( خمث وعثرين )

أنا هههههههه الله يعفي عن ماغير أناظرهـ وضحتس . مهوب ضحتس ضحتس صدزي لا . بالقلب

المهم .. أن يسير البزر اللي قدامك أنواع الإستعراض . وجلب العيون ..

وتعرفون بليس حريص ... لو تمر خنفسانه . ثمن يجرون أختبار شرح للخنفسانه .. حلف أن آخذ الأول .. كل شين عرفته به . شلون تمشي وشلون لونه . >>> يقاله سؤال


.. عموماً .. هي دعوة للأباء . ولأولياء الأمور ولمن يهمه الأمر ..

إحضارك للطفل أمر جيد وامر حسن .. لكن إذا كان الطفل لا يفقه الصلاة وأهميته ..

مثل يجيك واحد يجيب أبو ثلاث سنين للمسجد ... هذا يوذي ولا يدري وش السالفة .. لو اقول لك تذكر يوم عمرك ثلاث سنين .. يوم ابوك يوديك للمسجد ..تسن تقول ماذكرت يوم عمري عشر . أذكر بذاك العمر ..

أقصد . أن الطفل إن كان يفقه الصلاة وإحترامه وعدم أيذاء المصلين .. فجيبته للمسجد أمر جيد .

أما . واحدن صغير . وانواع الإيذاء والصياح واللجة والصجة .. فأقول خله باللبيت ولا لاتصلي لا أنت ولا هو ..

.

فكونا من بزرانكم . وخلونا نصلي بكل راحة وطمانينه .



( كتبت الموضوع بدون تحضير ولا شي بس حاجة بالنفس . وعذراً على الأخطاء فمن عادتي أكتبو لا أرجع مهما كانت الأمور .. والله يوفق )


أحد المتأذين
أبو آدم ..

[دعبل نجد]

حيا الله ابو آدم في بتك الثاني >>> تحلف انه الصمصام

وصدقت بعض الصغار يضايقك في الصلاة وينرفزك حتى تكاد تقطع صلاتك

ولا يهونون بعض الشيبان . . .

خلاصة الكلام ..

اقتباس فكونا من بزرانكم . وخلونا نصلي بكل راحة وطمانينه .

[A N A S]

جزاك الله خير على هذا الموضوع الرائع الذي أتى في وقت رائع .


موفق أخي الجني .



تحياتي لك

[abo suliman]

اقتباس المشاركة الأساسية كتبها دعبل نجد حيا الله ابو آدم في بتك الثاني >>> تحلف انه الصمصام وصدقت بعض الصغار يضايقك في الصلاة وينرفزك حتى تكاد تقطع صلاتك ولا يهونون بعض الشيبان . . . خلاصة الكلام ..

هههههههههههههههههههههههه مهوب عادزل

حياك الله يأبو عاصم ..

ووجودك بالموضوع .. أكبر شرف وفخر .

لاعدمناك يألبي . لاعدمناك

متى عاد يجي عاصم .. ويبلشك يبي يصلي بالمسجد ..

[abo suliman]

اقتباس المشاركة الأساسية كتبها بريدة city جزاك الله خير على هذا الموضوع الرائع الذي أتى في وقت رائع . موفق أخي الجني . تحياتي لك

وأياك حبيب ألبي . بريدة ستي

كلن يوصل همومه .. لكن لعله تاصل

شكريات على تواجدك .

[أبورائـــــــــد]

اقتباس لو تستأجر أفغاني ينفخ عليك تسن أبرد

هههههههههههههههههههههههههااااااااااااااااااااااااا اااي

تصليع ياشيخ ..

كلامك سليم ..

أعرف بزر بالتراويح مهنة يمعط شوش البنااط ..
يعني لا شاف بنت تويدز من ورى الوااق معط شوشته همن يفزعن معه البنات الباقياااات وخذ ياجلد ومعط شوش !
حشا مب صلاة ذي !!

[الدب القطبي]

ابو ادم ايش الفرق بين القارورة والكاس ولا تنسى على دربك تنبه على الطرطعان كل شوي ناقز صرت قدام الامام

[الصباخ]

ههههههههههههههههههه ياحبيلك يا أبوآدم من مبطي عن مواضيعك المهمة.
المهم يابعدي أنا مثل ماقلت أنت أبقول .

والله إنك ببعض الأحيان تقول إنه الواحد المفروض يحط هالبزر بالبيت عند أمه إنه أحسن له.
يا يصلي مع المسلمين ويركع ويقوم.
أو يقعد بالبيت أحسن له "المقصود البزر".

وإلا تلقاه يقاله يقرأ قرآن بآخر المسجد، وهو ماغير سواليف مع اللي جنبه.
وإذا ركع الإمام سمعتهم يركضون علشان يلحقون الركعة، طيب وبعدين!
مدري بصراحة وش اللي يبي يستفيدونه هالمبزره .


شِكراً جزيلاً لك على هذا الموضوع الرائع الجميل.

[brr777]

كلام سليم

بارك الله فيك

[فنتاستكـ]

يبدو أن الهدف من الموضوع إنك تبي تعلمنا إنك تصلي تراويح
عموماً ما شاء الله عليك

حديثك ذو شجون ..
علماً أن هذه المشكلة لن يوجد لها حلٌ إلى يوم القيامة , لأن الأباء يحتاجون تربية عن كيفية احترام الناس قبل أطفالهم .
فيه حلّ اتخذه بعض الأئمة للذين تمتلئ مساجدهم في رمضان - أمثالي - وهو استئجار حارس أمن طوال الشهر للوقوف خلف المسجد , وأي بزر يرفع لسانه عن لهاته ياويله

الجني العبد .. لك وحشة

[الدب القطبي]

:لا ولاتنسى الي يتابعون مسلسلات وقت الذروة لاصفيت التراويح جو مع امامهم يصلون الفريضة ماتدري تسمع الامام الي قدام ولا اللي ورا

[بـــ sunـــــريدة]

وقفت على البزران !

الشنبات يحتاجون تربية قبل البزران ما يقهرك الإ الشنب أذا دق جواله وقت الصلآة ولا المصيبة نغمة
الجوال عزف عود أو أغنية من الأغاني !

ودك تمسكه مع شنبه وتجرهـ الإ الباب وتشوته وتسأله يعني الجوال مهم الإ الدرجه , وبعضهم أذا دق
جواله وقت الصلاة طلعه من مخباته وجلس يطالع الرقم

عموما أذا شفت حركات الشنبات تقول ما على البزران شرهة وأزين حل اللي قاله أحد الأعضاء يلزم
حارس أمن ومعه عصى كهرب علشان أذا أنفس بزر يصعقه ويصعق أبوهـ معه علشان يعرف أن الله حق
وأن أحترآم المصلين وآجب واللي دآخل المسجد عموما .

تقبل مروري وشكرا على فتح الموضوع بالوقت المناسب .

[mr.khaled]

هههههههههههههههههههه موضوع ذو شجون < يسمع به بس تناسب

ع العموم كلام سليم 100 &#37;

وموس الحلاقة تتوقع يفيد ...؟

شكراً لك وتقبلوا تحياتي

[ولد بريده00]

والله كلامك 100%100%

أنا أعرف واحد هو وخويه مدري أخوه المهم تقل ماعندهم لعب الا بالمسجد يقعدون يتضاربون بالظهر واليي يأخذ منديل ويحلته على الثاني واليي يطيح على الثانى بس مأدري وراه يحضرون كل الصلاوات

حشا هاذي مهب صلاة مجمع بزارينن