[عآشقة قسمهآ ..]

السلام عليكم ورحمة الله وبركاته أخواتي ..

أحببت أن أذكر لكم يومي الذهبي في المشغل _قبل عدة أيام_ من البداية للنهاية..
لطرافة الأحداث التي وقعت فيه ولطول الوقت الذي قضيته هناك مع الوالدة الغالية..
وباللهجة العامية ولازم أخلط معها حبيبتنا الفصحى شوي..
أول مادخلنا المشغل طبعآ بديت على طول لأن المشغل فاضي "يهش الذبان"
وطبعآ استغربت لأنه مشغل مشهور وبمكانه عالية وشغل ممتاز إلا أن الأسعار خيالية ..
وربما كان ذلك هو السبب ..
عاد تصدقون انهبلت العالم كلهم خضر !! الدنيا أخضر بــ أخضر ..
والسقف كله أعلام وصور لإبو متعب ..
والكوافيرات لابسات شاربات وطنية وبروشات وأساور بعد !!
والله اني انهبلت وسألت وحدة قلت اليوم هو "اليوم الوطني" ؟؟!!!!!! ..
فضحكت وقالت لا الله يرحم حالتس !! .. قلت بعذري وراه الدنيا تسذا أجل ؟؟!!!!!!
احتفال متقدم ولا مخبطين "ضاربة الفيوزات يعني" ولاشو؟؟!!!!
>>>>>>>>>تراه للحين محتارة ولاتدري وش السالفة ؟!

المهم بدأن الكوافيرات بالعمل علي
وكان معي في المشغل إمرأة واحدة فقط فسلمت عليها وشرعنا في "السواليف"
وقد كنا في غرفة واحدة لأننا جئنا لغرض واحد..
ثم بدأت تحكي لي عن نفسها ومجتمعها وقالت الأخت (و): احنا البدو غيركم يالحظر ..
اذا مالطسنا وجيهنا بالمكياج مانعتبر البنت حاطة شي ومايعجبنا شكلها ..
وتقول الأخت (و) : ولازم يكون روميلنا (الشدو) ألوان ومن فوق العين وتحت بعد ..
واحنا نحب المكياج "جفش" مثل خواتنا الكويتيات .. أما انتم تحبون الناعم مثل اللبنانيات..
قلت: أكيد لو أحط اللي تقولين كان يفضحونن أهلي و"ينقدون" علي الخلق كلهم ..
ضحكت وقالت : ياحليلكم لا وحنا بعد لازم وشي واجب إن العرس يكون فيه طق
وحركاااااااااااااااااااااات ومكياج كامل للبنت والمتزوجة ..
قلت : ياسعدكم زواجاتكم دائمآ خبه وفلللللللللله ..
حنا زواجتنا أغلبها عائلية ورجال بس >>>
وإن صار فيه عرس مايميزه إلا الطق وفيه اللي يسون حركاااااااااات حلوة بس قليل !
()انتهى الحوار ..

بعدها قمت وجلست في الصالة الرئيسية وبَلشت بالفلبينيات " اللي أبلشنن هن وأسئلتهن" ..
وحدة تقول : انتي زواج؟؟
قلت : لا حرام عليتس والله اني صغيرة .. تونا يابنت الحلال..
قالت ثانية : ايش انتي سكوول ؟؟
قلت : أنا كلية يأختي ..
قالت وحدة : آه طيب ايش أودروس [ يعني وش تدرسين "التخصص"]
قلت : رياضة >>>>>متأثرة بالدكاترة المصريين..
ماسمعت إلا صرخة .. وااااااااااااااااااااااااااااااااو ..
ايش انتي رياضة كاراتية ولا تيكوندو ولاكونغ فو ولا....... >> وين عآيشين
وهذآ طبعآ لأني لعبت عليهن وأنا أقول رياضة أسوي حركات رياضية ..
قلت: لا ياحبيلتس أنا ..ون , تو ، ثري 1,2,3ماث >>> فهمنآ ريض ..
قالت : أووووووه قوود.. >>> الله يسلمه مير أول وحدة تشجعه..
قالت ثانية : كم باقي سنة؟؟
قلت : لسه أنا خلص واهد بس >> تأثرت بهرجهن!!
قالت ثالثة: كم عومري ؟؟ >> طبعآ تسأل عن عمري أنا مو عمرها هي ..
قلت : 18يير آند ثري منث >>> لا تستغربون تراي متقدمة ..
ماسمعت إلا صراااااااااااااااااخهن >>> توحشت قلت وش قلت أنا بس؟!!
قالت: وااااااااااااوه انتي مررررررة طوييييييييل [ يقصدن إن الطول مكبرني]
قلت: قولن ماشاء الله اخذتن طبع القصيميات بالنشدة ما أمداكن تجن لبريدة
[ لأن المشغل توه فاتح هينا ببريدة وكنت سابقآ أتعامل معه في الرياض ..]
قامت " آيرين" >>> وحدة من الكوافيرات
وبدت تمشي وتميل خصرها وتسوي حركات ..[ عرفت إنها تقصد عارضات الأزياء] ..
قالت : انتي طويل والله اذا انتي اشتغل كذا فيه فلووووووووس كثير
[ تقصد ان الطويلات مرغوبات لعرض الأزياء ..]

وبعيدآ عن جانب الدين لأن الأخوات الفلبينيات متفلتات ..
قلت ببساطة : لو أصير عارضة أزياء _بسم الله علي الرحمن الرحيم الله لايقوله_
كان أهل أنا خنننننننننق وأشرت بيدي على رقبتي (ذبح)..
وبصوت واحد لقيت الجميع فاطسين ضحك ..

ثمينن جت الوالدة وقالت يابنيتي وش رايتس أزوجتس فلبيني
[حرااااام عليتس يممممه بايعتن..قضينا من عرض الأزياء ننجي للفلبيني ..
وراكم تسلطتوا علي هاليوم..]
فقالت أمي لآيرين : عندتس أخو ياآيرين نزوجه " عاااشقة"
آيرين فقعت ضحك وقالت: فلبيني مسكين مافي فلووووس زي سئودي (سعودي)
[وه قضينا من الشغالات الأندنوسيات نجي للكوافيرات الفلبينيات بتنحب هالسعوديين وفلوسهم ..]
عاد أنا بأبين لها إن الله يأخذ ويعطي ..
فقلت : مو لازم الفلووووس أهم شي يعرف يسوي لي مكياج واستشوار و .....الخ
فضحكت الأخت آيرين ..

[وهنا تمنيت اني معي كتب للجاليات لعلهن يستفيدن من قرائتهن .. ]

وأُذكر بأهمية ذلك لباقي الأخوات ..
فلنحمل معنا دائمآ كتب بلغات مختلفة للأخوات المسلمات وغير المسلمات ..
لعل الله يحرم بسبب ذلك وجوهنا من النار ..

+في الحقيقة أعجبني شيء في المشغل وهو أني لما سألت عن التشقير _مع أني لا أؤيده_
فقط مجرد فضول ومعرفة الأسعار ..
فأشارت آيرين إلى لوحة .. فإذا بها :
[لعن الله النامصة والمتنمصة]
ممنوع التشقير ..

حقيقة أعجبني ذلك كثيييييييرآ وحمدت الله لازال في مشاغلنا خير ..

قصص المشاغل ماتنتهي .. ياليت تتحفونا بمواقفكم ..
وهل شاهدتوا شيء أعجبكم من حِفاظ ديني؟..