[كراثه فوشيه]

هذا موضوع لنقاش هاااادف ..... لاتنطلونه بقسم الحريم

تبون تحطون رواق حطو بس لا تنطلونه... هه هه هه

بدخل بالموضوع على طووول ...
اختي اللي اصغر مني هي بثالث ثانوي هالحين ولابعد اعرست. ومصممه وراكبتن راسه الا تتدخل طب وانا ابد موب جايزن لي رايه واحس انه مايصلح لنا ولا يناسب عاداتنا ابد.

وانا ابي اعرف رايكم بدراسة البنات للطب؟؟
هل انا ابالغ بردة فعلي والا معاااي حق؟؟
انصحوني وش اقولها

[حصيصه*بنت القصيم]

اختي كراثه
انا اشوف ان دراسة الطب شر لابد منه يعني مين بيكشف علينا وعلى بناتنا يالحريم !؟
اذا مافحصونا بنات ديرتنا مين بيكشف علينا اجل ؟ هاء ؟
هو صدز انه خطر وبيأثر على سمعته ويمكن لا سمح الله يتأخر عرسه بحكم ان مجتمعنا مجتمع محافظ
ومايجب ان الحريم يشتغلن بمكان مختلط عشان ماتنتشر الفتن بين البني لأن عرض البنيه هو اهم من صحته !!
سامحوني يابنات بس هاذا الصدز !!

[أم جمانه]

عااادي جدا كل انسان له طموح يرغب في تحقيقه فلا تحرموها حقها في المجال الذي
هي ترغب فيه
اهم شي ولي امرها راضي ومقتنع الكل ينظر الى مهنه المراء في مجال الطب نه اختلاط ومخالفه تقاليد
العفيفه عفيفه وان وضعت بين مليون رجل
قولي لها (( الله يعطيك خيرها ويكفيك شرها))

والاسلام لم يعارض هذه المهنه



رفيدة بنت سعد الاسلمية من الأنصار من الخزرج وقد أقامت
خيمة إلى جانب مسجد الرسول عليه الصلاة والسلام تمرض فيها من يمرض أو يصاب من المسلمين ، وفي غزوة الخندق
أقامت أول مستشفى ميداني عندما نصبت خيمتها هناك لتداوي جرحى المسلمين.

تقبلي مرروري بصدر رحب
اختك القتيله

[الصهباء ياسمينة]

احس انه ما يصلح يعني فكري به من يب ياخذه وهي دختوره
بعدين احراج عليها الدوام بجانب الرجل تعرفون غرفة العمليات صغيره وقد يحدث تلامس او اختلاط بطريقه غير مباشره
اختس صغيره وطايشه وماخذته العزه انصحيه وان ما قدرتي انا مستعده ويا نساء المنتدى

[الصهباء ياسمينة]

اقتباس المشاركة الأساسية كتبها القتــيــلــه.... عااادي جدا كل انسان له طموح يرغب في تحقيقه فلا تحرموها حقها في المجال الذي هي ترغب فيه اهم شي ولي امرها راضي ومقتنع الكل ينظر الى مهنه المراء في مجال الطب نه اختلاط ومخالفه تقاليد العفيفه عفيفه وان وضعت بين مليون رجل قولي لها (( الله يعطيك خيرها ويكفيك شرها)) والاسلام لم يعارض هذه المهنه رفيدة بنت سعد الاسلمية من الأنصار من الخزرج وقد أقامت خيمة إلى جانب مسجد الرسول عليه الصلاة والسلام تمرض فيها من يمرض أو يصاب من المسلمين ، وفي غزوة الخندق أقامت أول مستشفى ميداني عندما نصبت خيمتها هناك لتداوي جرحى المسلمين. تقبلي مرروري بصدر رحب اختك القتيله

ايه مااااا قلنا شي بس هي مهيب معالجه صحابه !! يمكن تعالج غرب ويمكن فيهم دشير !!
وقتنا وقت صعب فيه نت و جوالاااات وبلوه توووووث

[هايين]

الله اكبر
الى قاعدات ببيوت اهلهن ماتزوجن كلهن دكتورات

خلوها تدخل وتنتبه لنفسها

وحده من جماعتنا تزوجت قبل تخلص من دراسه الطب وكملت والحين جابت بنت

الله يوفقها

[بنت آلمذنب]

بنظري مافيها شي
وعمري ماتحسرت على شي قد اني مادخلت علمي وكملت
طب
لكن الله ماكتب شي
وبالنسبه للرجال اختك تقدر تدخل تخصص ماتعالج فيه الا الحريم اللي مثله وبس
مثل النساء والولاده كله حريم بحريم
واللي به ومابه لو بغت قله الحياء والرجال مو لازم بالطب
والله لونه جالسه ببيته
خلي اختك تدخل اللي تبي
وشجعيه على هالشي ..,

[كراثه فوشيه]

حصيصه و القتيله وياسمينه وبنت المذنب

اشكر لكم مروركم وتواجدكم


يعني افهم اني ظلمته ؟؟

[BnT CoOL]

هااي قيرلز !
كيفكم؟ إنشالله كويسين؟
أنا جديدة في المنتدى وجذبتني مواضيعكم وقلت لااااازم اشترك بذاء
بالنسبة لموضوعك أختي كراثة (لبى قلبتس انتي ونك نيمتس لووول مره استملحتتس)
بدخل ف البوينت على طووول, يعني انا ما افهم المجتمع القصيمي متى ناوي يتطور انشاءالله؟ خلاااص ياربيي تيك ات اييييييييزي !!! وشفيها يعني لو بتدرس؟ هذا وهي بتدرس بحجركم تحت عيوونكم!! اجل لو هي قايله بتدرس بالخارج وش سويتو؟ تساان اعوذ بالله صلبتوا البنت بمكاانه!! أنا اقوول.. الرفق بالمراهقين ياجماعة الخير اللي تسوونه هذا مايزيدهم إلا اندفاع وعناد وتمسك أكثر بقرارتهم.. وأنا وبكل صراحة اتكلم من تجربة شخصية
انا ياما وياما عانيت مع اهلي! بس بإصراري واسلوبي وتفاهمي معاهم توصلت معاهم لحلول وافقتني ووافقتهم.
إي نعم اهلي ما يحادثوني , إي نعم اهلي متبرين مني, إي نعم لو حاصلهم يذبحوني ذبحووني! بس خلاص!
هم بطريق وأنا بطريق.. انعدم التفاهم بالتالي انعدم الانسجام!
انا كنت مراهقة اثناء معاناتي اكيد بس مااتخذت قراري بالإنسحاب حتى وصلت مرحلة النضج والشباب.
وها أنا معتمدة على نفسي وما لأحد حق علي.. ويااللله من فضلك مرتاااااااحه ومريّحه
خلي أخيتك يا اخت كراثة تسوي اللي براسها لا تسوي اللي اردى منه

وارجع اقوول .. تييك إت اييزي ياجماااعة! هدوا اللعب .. الدنيا حلوه بس نفهمها
بااي قرلز تيك كيييير
اكس اووو اكس اووووووه

[الصهباء ياسمينة]

اقتباس المشاركة الأساسية كتبها BnT CoOL هااي قيرلز ! كيفكم؟ إنشالله كويسين؟ أنا جديدة في المنتدى وجذبتني مواضيعكم وقلت لااااازم اشترك بذاء بالنسبة لموضوعك أختي كراثة (لبى قلبتس انتي ونك نيمتس لووول مره استملحتتس) بدخل ف البوينت على طووول, يعني انا ما افهم المجتمع القصيمي متى ناوي يتطور انشاءالله؟ خلاااص ياربيي تيك ات اييييييييزي !!! وشفيها يعني لو بتدرس؟ هذا وهي بتدرس بحجركم تحت عيوونكم!! اجل لو هي قايله بتدرس بالخارج وش سويتو؟ تساان اعوذ بالله صلبتوا البنت بمكاانه!! أنا اقوول.. الرفق بالمراهقين ياجماعة الخير اللي تسوونه هذا مايزيدهم إلا اندفاع وعناد وتمسك أكثر بقرارتهم.. وأنا وبكل صراحة اتكلم من تجربة شخصية انا ياما وياما عانيت مع اهلي! بس بإصراري واسلوبي وتفاهمي معاهم توصلت معاهم لحلول وافقتني ووافقتهم. إي نعم اهلي ما يحادثوني , إي نعم اهلي متبرين مني, إي نعم لو حاصلهم يذبحوني ذبحووني! بس خلاص! هم بطريق وأنا بطريق.. انعدم التفاهم بالتالي انعدم الانسجام! انا كنت مراهقة اثناء معاناتي اكيد بس مااتخذت قراري بالإنسحاب حتى وصلت مرحلة النضج والشباب. وها أنا معتمدة على نفسي وما لأحد حق علي.. ويااللله من فضلك مرتاااااااحه ومريّحه خلي أخيتك يا اخت كراثة تسوي اللي براسها لا تسوي اللي اردى منه وارجع اقوول .. تييك إت اييزي ياجماااعة! هدوا اللعب .. الدنيا حلوه بس نفهمها بااي قرلز تيك كيييير اكس اووو اكس اووووووه

اللللللللله يخلف على امن جابتس الله يصلحتس اجل متبرين منتس ياخزياااااااه
ياللله لا تخسف بنا عودي الى صوابتس
!!؟؟ بعدين وشي ذي اكس اوووووو اكس اوووو تلعبين

[BnT CoOL]

الأم اللي جابتني مادرت لا عني ولا عنك خليها مع كراثها وقهوتها
والصواب اللي انتي تتكلمين عنه هو طريقي ودربي اللي اخترته
والاكس او الاكس اووه يابعدي هذا اكسبرشن بالانجليزي معناته هقز آند كسز (احضان وقبلات)
ولا فاضيه انا العب معاكم الله يجزاكم خير؟؟
انتو شفتوا آرائكم وعقولكم اللي أكل عليها الدهر وشرب ؟
إههههههه.. توكلي على الله بس

[كراثه فوشيه]

اقتباس المشاركة الأساسية كتبها BnT CoOL الأم اللي جابتني مادرت لا عني ولا عنك خليها مع كراثها وقهوتها والصواب اللي انتي تتكلمين عنه هو طريقي ودربي اللي اخترته والاكس او الاكس اووه يابعدي هذا اكسبرشن بالانجليزي معناته هقز آند كسز (احضان وقبلات) ولا فاضيه انا العب معاكم الله يجزاكم خير؟؟ انتو شفتوا آرائكم وعقولكم اللي أكل عليها الدهر وشرب ؟ إههههههه.. توكلي على الله بس

شكلتس تشتغلين ببنك اختلاط

[قوووت القلوب]

رأي انها مهنة إنسانية عظيـــــــمة ،، لكن ينبغي الحذر كل الحذر من الإختلاط فالشيطان حريص ..

وأهم شئ (( الإستخارة )) فكما تعلمين الخيرة فيما اختارهـ الله

وفقها الله ويسر أمرها وأرشدها لما هو خير لها ...

،، ودي ،،

[ملكة الرومانسيه]

فعلا لابد من الاستخاااااره

وبعدين الاختلاط مابه شي !
كبروا عقولكم الى متى وحنا نفكر كذا
الى متـــــــــــــــــــــــــــــــــــى

اهم شي انس تثقين باختس .. وتثقين بتربيته وان شاء الله ماعليه شر
لاتوقفين بوجه احلامه وطموحاته . .الله يستر عليه