[تخ تش]

في مرتن من مرارير السنون(لاتدققون) :D

كنت في الديره (ديرتنا انا وبطل العالم مهب ديرتكم الي كله حمام وطرطعان)

وكان عندنا مدرسه مصريه(ام هشام) ومعها زوجها(ابو هشام)<--الي هو محدت شوقي :Dجاي معها محرم ولا معه شهاده ومعهم ولد دلوعه(هشام) وبنت حلوه
(اخت هشام) <<<<<<< مانيب اعرف اسمها:D

المهم وكان هالمصري مدحت يعطينا دروس خصوصيه (وهو ماكان معه شهاد ه وجاين محرم مع المدام )

<<<<<<<اذا شاف له واحد احمراني واصلع يحسب كل العلم والتعليم عنده

وكان ايامها جدتي عندها غنم وكنت اذا جبت الاستاذ ابو هشام يدرسني اجيبه في ظلال البيت
وهو نفس المكان اللي تلعب فيه تيوس جدتي بكل براءه وتاكل من الكلأ والعشب<<<<<<<امحق كلأ <<<<<بس يمديكم على قولة كلأ؟ :D

وفي يومن من الايام وابو هشام يحك صلعته يفكر في مسأله سهله وانا كنت عارفن حلها بس استقعاد مني قلت مافهمت لاني ادري انه هو اللي ماعرف الحل

وحنا جالسين وتيوس جدتي تلعب حوالينا وتطامر ولاهيب تزعجنا ابد,,, الا هشام الدلوعه متنح في واحد من التيوس وفاكن معه
ويقوم ويصيح هشام قال له ابوه : مالك ياهشومه؟ وانا اقول عساك انت وهشومه للي يهشم ضلوعكم (اقولها في نفسي)<<< مهوب خايف ابد :D
قال الدلوعه هشومه وهو يجر الونات ونتن ورى ونه ودموعه اربع اربع تسنها وايت يهرب تانكيه (بتشديد الياء) وخشمه يصب تسنه دش عزوبيه(دش حمام مهوب دش السطوح )
قال : بابا انا عاوز القمل دا(بعير=حاشي=جمل بالمصري)
يؤؤؤؤؤؤؤ جمل؟

هو قالها من هنا وانا انبطح وارفع رجولي في السماء وارافس بهن فاطسن من الضحك
الا هشومه كان يقصد واحدن من التيوس والتي تعود ملكيتها لجدتي <<<<<<<< احلى ياملكيه (بضم الميم)

ومسكت مع هشومه الا ياخذ هالجمل

وانا اقول في نفسي ابرك الساعات ياهشومه والله مسكت على شي زين
(التيس اللي يقول عنه جمل كان تعبان ومرضان وكنت اعد له كم يوم ويموت وماكان يقوى حتى يوقف على رجوله)

قال ابو هشام وهو يناظرني : ماتجيب الجمل للعيل؟(يبيني اعطيه له ببلاش ) قلت :مهيب لي لجدتي لكن مني وعد اخليها ترخص لك <<<<<دبلوماسي

مير ويسألني : ليه مابيلعبش مع اخواته وينطنط معاهم؟

صرفتها وقلت : التيس سلمك الله البارح سهران وتعبان من السهره ويمكن يكون مكثر من اللي تخبرون انتم عاد :D

ومشت التصريفه على المصري وعلى اني كلمت له جدتي ووافقت(ماجيت جدتي ولادرت عن السالفه) وبعته عليه بـ 150 ريال(طبعا حنا الكسبانين)

وتمر الايام ويجي ايام وتروح ايام وتجي ايام ثانيه وتروح ايام ثانيه بعد,, وتجي ايام غير اللي جوا قبل وتروح بعد <<<<<< اخلص علينا

المهم ومدحت شوقي طلع مهوب هين صار يعرف للتيوس (بلاه مايباعدهن )
وصار مودن التيس للبيطري وجايبن له علاج
<<< كان يمرض ويوصله الموت ماحد وداه للدكتور
وابو هشام صار يدلع التيس ويجيب له اكل ماقد كليناه ويعطيه حتى فواكه(الفواكه ماكنا نعرفها ولاكانت تدخل بيوتنا ) :D
(التيس صار ولد عز ولاهوب تيسنا اللي نعرف )

واقوم اقلبها في راسي وش السواة ويطري على بالي ذيك الفكره اللي ماتخرش الميه

وادعس على السيكل لبيت ابو هشام مير واطق الباب وتفتح لي ذيك(اخت هشام)

وتضيع علومي قلت :م م م م مممم (قققق) <<<<غصيت
وتقوم تقوطر سعابيلي عليها والله ياهي حمراء عطراء <<<<ماحد يمديه على الوصف
الاكيد لو يشوفها الحلو ولى الصريح علينا ليروحو وطي
<<<<<<يعرف ذوق الحلو والصريح هههههههه
البنت راحت تنادي ابوها ولاعبرتني وانا جالس اناظرها وهي مقفيه(مانيب ادقق ابد في البنت لي قفت)
ويجيني مدحت قال :ايوه
ولاتسنك تعرفني يابو هشام؟(قعيطي مايبي يقول لي اقلط)
المهم واقوله مافيه الاسلامتك يابو هشام العقوز (العجوز بس عنده العقوز) في البيت وتصيح علينا فاقدتن تيسها الدلوعه وتبي ترجعه :D
الا يوم انهبل المصري قال ترقعوه ايه؟ التيس مش على حزوكوا(حظكم بالمصري)0
قلت لاحظنا ولاحظك العجوز تطير وتوقع في البيت وتقول والله لي مارجع لي وليفي لاشتكي المصري عند القسم و لابلغ عن المصري انه يدرس دروس خصوصيه وهو محرم مهوب مدرس

ابو هشام ضاعت علوم قبايله واحس انه صغر بعد ماقلت هالكلمه:D<--بس خل عنك لعبتبه

ويقمط وجهه ويبرد ويقوم يندب حظه على الفلوس اللي راحت في العلاج والفواكه0 وبعد تفكير طويل من ابو هشام(دام دقيقه الا نص الدقيقه)
طلع معه انو خسارة 450 ولاخسارة التدريس الخصوصي(يعوضها في حصتين)
ويجيب التيس والله والتيس ولاتسنه يعرفني هو بعد<<<جحود, نسيت ماضيك يالتيس؟
وكان وجه التيس اول ماشافني تسذا >>>> eek قلت والله تعفس خشتك ولا ماتععفسها اليوم انا وانت خويا لسوق الغنم
ومير من بيت ابو هشام للسوق على طول وابيعه بـ450ر يال(بعد مارجعت له الـ150 حقته) <<<حقاني لكن ماش خساره( كنت ابي ابيعه بالدولار بس كنت مستعجل ولاوفقت ذاك اليوم ) :D
مير واشتري لي سيكل جديد والباقي اباشر به على الشباب بيبسي وغوار وبسكوت ديمه<<<<<قديم

ملاحظه
جدتي ماجابت خبر التيس اني بعته (يعني ماعرفت بالسالفه )على ابو هشام من الاول مهوب عاد في التالي ومرت الايام ولاحد درى الا انتم لكن لاتقولون لاحد
<<<<<<< امنكم على سره

ختاما اشكر جميع من قرأ الموضوع ومن لم يقرأه<<<< يمديكم على الاخلاق؟

مدحت :- بنتك تكفى ابخطبه :D
والتيس يخلف الله عليك:D