[فؤادعنتر]

لا يخفى على الجميع المستوى الحلزوني الذي بلغْتٌه من القدرة على تحليل الأمور وسرعة البديهة ودقة المعلومة وإصابة الرأي السليم ما لكم بالطواااااالة .
كعادة الزملاء يستشيرونني بما يلم بهم من مصائب ومشاكل ، وآخر من استشارني أحد الزملاء عن علاقته بأهل زوجته أنهم ناس ما يقدرونه ولا يحترمونه وانه أذا جاء لمناسبة ما يسلمون عليه بحرارة مثل أزواج البنات الثانيات مع كونه يخدمهم وهو اللي يجيب طلباتهم ويوديهم لزوجات ولاستراحات وكل البنات يركبن معه بالسيارة بعد انتهاء الزواج أو طلعت الاستراحات ووزعهن على بيوت أزواجهن وأزواجهن جالسين بالاستراحات مع الشباب وأبو زوجته إذا سلم عليه ما يسلم زى الناس يعطيه جبهته تقل سلام معزا ((معزا مفردها عنز )) واخذ يسرد كل المشاكل اللي يواجها مع أهل زوجته وإخوانها وأزواج البنات ويقسم انه كفل ثلاثة من إخوان زوجته بسيارات ولا سددوا ويوم طالبهم زعلوا ولا يكلمونه الحين !!!!
وان أم زوجته عليها حركات بايخه مثل أنها ما تحضر زواج خواته وتتعلث ( تتحجج ) أنها مريضة و أذا جاء زواج خوات عديله نطت أول وحدة بالجمس ما بقا إلا تسوق ؟؟؟؟ و إذا قال : روحي معنا لمكة ترفض وتروح مع العديل الثاني وإذا جابت حقاق (هدايا للأطفال من فيشار وخلافه) ما توزع لما يجون أولاد عديله وإذا ما جو قالت : بعدين نوزع وإذا تأخر هو حصل الحقاق موزع ( اعناد ) يقول : حتى الشغالة يأخذونا بالشهر والشهرين ولا يقولون جزك الله خير ؟؟ ولا يراجع بالمستشفيات لم زوجته وأبوها إلا هو ويحلف انه كد رافق مع أبو زوجته بالمستشفى شهرين يوم صار عليه حادث وبالأخير يقوله أنت طمع بإجازة المرافقة عشان ما تدوم ؟؟؟ المهم جلس يتكلم حوالي ثلاث ساعات لما أنا قلت له ((صه)) يعني اسكت خليني ادرس الموضوع وعلمك بالنتائج والحلول تعرفون الشيء ذمه وما بالعجلة خير كان الحل جاهز عندي وهو ((الطلاق)) بس قلت لا تستعجل يا ولد خلينا ندرس سبب المشكلة ، وبعد يومين توصلت لنتائج وقلت لازم أخليه يطلع عليها وبطرح عليه بعض الأسئلة يمكن العيب فيه ؟؟ تعرفون الدنيا تبي والآخرة تبي ، سألته هل أنت مقتنع أن ما معهم حق وهذه التصرفات اللي يسونها عيب ولا غير مقتنع ؟؟؟؟؟ قال : أنا مقتنع 100% أن تصرفاتهم خطأ قلت له : طيب ليه صابر عليهم ؟؟؟؟ إما انك ضعيف الشخصية وإلا البنت زينه( يعني جميلة وصح بكل شيء) و ما راح تلقى مثلها ولا تدور الأجر وهذا بعيد كل البعد فالأجر بصلاة الفجر وأنت ما تصلي الفجر ألا مع الظهر (اعرفه وسبق سكنا مع بعض وسافرنا مع بعض ما أحب افضح بالرجال ) وأمك لها سنه تصيح عليك ضاع لها أكثر من موعد بمستشفيات الرياض وأنت تقول ما افرغ (( اللي يسمعه يقول الراجحي)) قال : بصراحة البنت حلوة وتعبت لين حصلت المواصفات اللي أبيها قالت : إيش المواصفات اللي متعبتك لين حصلتها قال : وجه طفولي مع غمازات بالخدود وإني ما حصلت ألا بنتين وحدة رفضوني عشان أبوي سبق تطالب مع أبوها بالمحاكم عشان قطعت ارض ويوم شاف أبوي وعرفه طردنا وقال : لو أنا داري أن أبوك هذا ما دخلتكم البيت يالحرامية ، وزوجتي قالوا: تصبر سنتين عشان عمرها 14سنة وصبرت لين تزوجتها (( طايح بالدبس اللعين )) سألته عن علاقته بالعدلاء ( أزواج خوات زوجته) قال : بعضهم ما يطلع معنا إلا أذا صار ما فيه قطيه وبعضهم يمدح عائلته وتواصلهم ورحنا ورحنا وهو ما كد طلع ألا عام 1403 هـ يوم يحج بزوجته والثالث نفسية ينام ثلاثة أيام متواصلة والرابع يتعلث بالمسجد لا عزمته قال : عندي مسجد وأخاف أصيف على الجماعة والخامس لا صار الطلعة فيها حريم جاء يحب المناظر والموايق و لا صارت طلعت أرجال ما شفناه قلت : ايش نظرتهم لك ؟؟؟ قال : يقولون أن زوجتك لاعبة عليك وشلون تشتري ارض وتكتبها بسمها ؟؟ (هم صادقين ... ابعذره وجه طفولي وغمازات وين ذا فيه) سألته وين أنت ساكن ؟؟؟ قال استأجرت دور جنب بيت اهل زوجتي عشان ما اضرب مشاوير قلت : ليه تستاجر بيت أمك فاضي وهي عجوز كبيرة تحتاجلك ؟؟؟ قال : شارطين على بيت ( ابعذره وجه طفولي وغما زات ) قلت له : أنت إنسان طيب وحبيب بس أهل زوجتك ما عرفوا قدرك وشبيت عليه لين كرهته بهم وقلت شف اخوي (( ادحيم )) ما يشوف انسباه إلا يوم عيد الفطر لا وبعد عيد وراء عيد ولا يدخل بالنسباء والعدلاء ويهابونه ويحترمونه هو صحيح طلق بس إلى الحين لاشفوه يدعون له يقولون ما شفناه الله يوسعله ، والحل لازم تدور عائلة جديدة تفرض أسلوبك عليهم من البداية وتستفيد من أخطائك السابقة والمؤمن لايلدغ من الجحر مرتين قال : بس أنا عندي من زوجتي بنت أخاف تضيع قالت : شف نفسك أبوك مطلق أمك وصرت أحسن الناس ما ضرك قال : صدقت واقتنع الرجال وطلق زوجته وطاح عنه إيجار البيت وسكن مع أمه الحبيبة ( الأم مدرسة ) لا وزيدكم من الشعر بيت حليت مشكلة زوجته أرسلت لهم ولد عمتي يدور زوجة ويوم قلت له: فيه وحدة وجه طفولي وغمازات لا وبعد لها قطعة أرض بالشمال انجن وقال الفزعة ولك السعي قلت : ما أبغى السعي ابغا الدعاء بس خطبها الرجال وتزوجها بس اشرطوا عليه أن بنتها تكون معها وما كان راضي بس لازم يوافق (وجه طفولي وغمازات وأرض ) وقلت : لا تخاف البنت نحصل لها تصريفة بس لا كبرت وتعلمت تسوق السيكل تروح تستأجر بيت على شارع الثلاثين تقاطع شارع الستين عشان نشتري للبنت سيكل ونخليها تلعب بالتقاطع (الدنيا تبي والآخرة تبي )

[أمتي الى أين]

الدنيا تبي والاخره تبي
ونعم النصيحه
متابعه لمواضيعك
وانتظر بعد بعد القادمه

[المتواضع لله]

مشكور اخوي على الموضوع

[صمت النار]

بعض الازواج مع حريمهم واهلهن يصل إلى درجة ان نسميه مغفل ودلخ مستدلخ بدرجة إمتياز
بعضهم من حبه لزوجته يتنازل عن رجولته ( امحق رجاااااال ومالت عليهم )

الزوج الفاهم صح , يعرف كيف يفرض إحترامهم له ..

فؤادعنتر

زين ماسويت للرجال .. ( ماحولك عروس عندها ارض لو بالجنوب مانبي الشمال )

شكراً لك

ورحم الله والديك

[محب الفضيلة]

أنت صادق ولا حلم

تبي الحق .. كل شيء يزيد عن حده ينقلب ضده
هو زودها شوي وأهل زوجته استغلوها
ويمكن تكون حوبة أمه
مشكور بس الكتب صغير ومتقارب وحنا تعدينا الأربعين

[بودرة نونو]

الحين كل هذا عشان الوجه الطفولي والغمازات ..
حلو ماشي سوق الغمازات هاليومين ...

سخافة لكن مضحكة !!

[( ســـويــم )~]

صااادق يااخ فؤاد عنتر ..~
مايصلح كذا يكون الواحد مع اهل زوجه..
للبنات والاولاد الاعتدال مطلوب ..
لا تكن لينا فتعصر ولا صلبا فتكسر ..
وكثييييييييير من الشباب خصوصا يمسكوون خط مع اهل حريمهم
واهلهم معطينهم الخامس ..
وبالاخير مايتحملووون اللي يجيهم من اهل زوجته .. لانهم متغافلينه

[يازين الحر]

وينك من زمان مابينت وقلت قصص جميله
بس واذا وجه طفولي وغمازات تسوى؟؟

[ابتسامة تواضع]

ياالله عليكم يارجال
طيب يتفاهم مع زوجته ولايوصل لطلاق
لاحولا ولاقوة الا بالله
موضوعك بالاخير عجزت افهم قريته مرتين
الله يكون بالعون بس

[ابوولعf]

وصل كلامي له وقله يقول ابوولع دلخ 666 والعظيم لفحط عليهم تخيل اودي حريمهم وش بقى أجل

[فتى الغربة]

ياصاحبي
أستغرب وشلون طاعك الرجال وطلقها
وهي
وجه طفولي وغمازااات

أكيد
من حبهم لبنتهم حبوا زوجها
واعتبروه واحد من عيالهم
علشان كذا أركوا عليه حبتين

إلا ولد عمك إلى اللحين ماجاك يشتكي
علمني إذا جاء
تراي لي فترة أدور أرض بالشمال
قصدي
أدور وجه طفولي وغمازااات
ومال أهلها إلا اللي يرضيهم ويسر خاطرهم

تحياتي لك

[خلفان]

اعميت عيوننا الله يغربل ابليسك

[فؤادعنتر]

اشكر الجميع على الردود والقادم أحلا بدعمكم وتشجيعكم
الدنيا تبي والآخرة تبي

[Warm feelings]

اسلوب مشوق وممتع ..
زادك الله سرعة بديهه وفطنه ..

ننتظر جديدك ..