[ملكة الاحاسيس]

عندي ولدي صغير عمره سنتين ونص معه كحه من يوم الاربعاء
ابي علاج له استخدمت تمبرا وبروسبان ومره وزيت السمسم ودهنت جسمه بزيت زيتون وفكس
ودهنت رجليه ولبسته شراب بس ماااافي تحسن ابد
والله لي 3 ايام مانمت زين دايم مواصله انام 4 ساعات بس تكفون حسو بمعناتي ودلون على علاج والا دكتور شاطر لحساسيه الصدر ببريده
الله يوفقكم ولايوريكم مكروه لابنفسكم ولابعيالكم

[عبادي999]

الله يشفي ولدك يعطيه الصحه والعافيه

بصراحه ودي اخدمك لكن ماعندي خلفيه


ان شاء الله يفيدونك اصحاب الخير

[ابتسامة تواضع]

ياعمري ياملكــهـ جعل يارب يبربتس على التعب

صراحه ماعندي معلومه
بس لو انا مكانك كان اقراء عليهـ >لين يهجد هـه

اشكو الله اصبري واحتسبي وعلى الأجـر
يارب اغفر لميمتي والمسلمين اجمعين

[ملكة الاحاسيس]

اقتباس المشاركة الأساسية كتبها رافعه كمي أخدم أمي ياعمري ياملكــهـ جعل يارب يبربتس على التعب صراحه ماعندي معلومه بس لو انا مكانك كان اقراء عليهـ >لين يهجد هـه اشكو الله اصبري واحتسبي وعلى الأجـر يارب اغفر لميمتي والمسلمين اجمعين

اختي رافعه الله يسلمك ويخليلتس اميمتس
قريت عليه وعطيته ماء زمزم بس الله كريم

[بنت الهاشمي]

استخدمي حليب بثوم ممتاز
و فيه علاج ممتاز بلمتر وبيك
الله يشفيه ويجازيتس على هالتعب
اتمنى افدتك

[بندر 1430]

السلام عليكم ..

الدكتور عبدالرحمن الفريح أستاذ حساسية الصدر والربو لدى الأطفال وعميد كلية الطب بجامعة الملك سعود سابقاً

ورئيس جمعية الربو والحساسية بالمملكة ..

أعرفه شخصياً .. إنسان فاضل و مُلم بمهنته ..

لديه عياده في مركز الحبيب بالرياض .. تكلفة الكشف 250 ريال والعلاج قد يصل إلى 200 ريال فقط ..

أنصح بشدة في الذهاب إليه ..

أسأل الله أن يشفي إبنكم و أن يكتب لكم الأجر والثواب ..

[أبوغسان]

روووووووووووووحي صارررررررررروخ للدكتور ابراهيم اللي عند المحيميد
شاطر بتوفيق من الله

[السامي البريداوي]

الله يشفيه وأسمعي كلام بندر فهو طالب طب ويعرف ماذا يقول .

[بنـــــــت عـــــــــــــــز]

ملكه الله يعظم اجرك نفس معناتي ولدي وانا بغرفتي اسمع كحته ...وتركد الحمد لله على العسل مع الحبه السوداء يكون مطحونه ...والله مااكذب عليك عطيته اياه بعد العشاء والحمد لله نام وارتاح وقالت لي وحده حطي زيت زيتون وعسل وليمون تقريبآ على فنجال لكل واحد وخليهن جاهزات عندك ودايم شربيه منه ....الحمد لله ولدي هاجد هاليومين لكن لأننا مابعد شغلنا مكيفات وشايله هم اذا شغلناه ترجع الكحه

[أتعبني غروري]

حطي حليب وحطي معه فصين ثوم وخليه يغلي شوي ثم طفيه وبرديه وشربيه منه
<<سويت هالطريقه لولد أختي ورآحت الكحه ماشاء الله

[ور"جوري"دة]

اهلين ملكة الاحاسيس.....
في دكتور في مستوصف سلامات (دكتور ممدوح)
ممتاز مرررررررررررره لصدرعن تجربه والله لي 12سنه وانا اراجع بعيالي عنده ماشاءالله لاقوةالابالله روحي لمه والله كل من راح يدعيلي بس كود تروحين مع اذان العصر لانه زحمه مره اتمنى دعواتك لي بالشفاءالعاجل

[ديوان]

اذا كانت كحة طفلك حساسية فجربي علاج زاديتين ممتاز جدا لحمى القش (حساسية الصدر) ,,
ودهني بفازلين صدر وظهره ,, وانتبهي انه يعرق (لاني استغرب انك ماشغلتي المكيف لانه الجو دافي وممكن يعرق وبالتالي اي تيار هوائي راح يتعبه ) ,,

وبالنسبة للاخت الي تقول دكتور ممدوح فمن تجربتي الشخصية فقد اخطأ خطأ طب فادح مع طفلي قبل 3 سنوات ,, وتعقدت منه ومن المستوصف كله ..

المهم لاتهملين الحساسية لانها تتأزم لاسمح الله وقد تتحول ربو ,, فبادري بعلاجها الان بارك الله فيك ,,

الله يشفي ولدك ..

[بندر 1430]

السلام عليكم ..

أنصح بالإبتعاد عن أي طبيب أطفال يصرف أدوية تحتوي على مواد تضر الجسم على المدى البعيد كالكورتيزون وخلافه ..

[مسالم خطير]

زيت السمسم ممتاز على ما اذكر لصدر لكن اول مره اسمع انه يدهن فيه الجسم

فية طريقة حلوه خاصه للي فيهم كحة وفيه كثير استخدمة وما شاء الله يوم اويومين بالكثير ويكون فيه تطور ملحوظ


طحينه سايلة وعسل اصلي اخلطيهم مع بعض الطحينه عشان فيها زيت السمسم والعسل عشان تروح مرارة الطحينه

والعسل بكل الحالات مفيد واذا كان اصلي يكون افضل

اهم شي ملعقه قبل النوم وما يشرب بعده شي ..

وملعقه الصبح اول ما يصحى وعادي بي وقت تبين تعطينه ملعقه ولا ثنتين مو مشكله

بس اهم شي اذا تبيه يخف بسرعه الملعقه اللي ياخذها ما ياكل ولا يشرب بعده شي لطول فتره ممكنه يعني لو تكون بعد كل وجبه

يكون افضل

وعسى الله يشفيه ان شاء الله ويلحقه برك