[خمائل مختاله]

اجل تبون تعرفون ليه جيران اليوم غير جيران اول انا اقولكم السبب بما اني مخضرمه وعايشت

وتعايشت مع الجيلين سبب تباعد الجارات اليوم انهم فاهمين الاتكيت غلط يحسبون حساب كل حركه

وكل شارده ووارده تكون عندهم بلحسبان يعني من تكلم الحرمه عليس وتقولس ابسير ليه يختي

تختبين وتدهرين وتشيشين وتقومين تهاوشين عيالس وتتصلين علي رجلس يجيب طلبات الحلا

وتتوترين وتروحين للمستودع تطلعين المواعين الغاليه وتكلمين امس ولا اختس تجيب شغالتها


بسرعه بحجه عندس عزيمه حريم وتهولين الموضوع وتستشورين الكشه وتطردين رجلس وتحبسين

عيالس وخاصه البنات بغرفهم ليه ليه ليه علي قوله زكيه زكريا المهم ليه تسوين في بيتكم حاله

استنفار تراء اللي بيزورك حرمه مثلك علي باب الله مهب صاحبه سمو ملكي ترها حرمه جايه تغير

جو عندكم ملت من ابو ريالين ومامعها ام خمس عشان تروح ملاهي جت عندكم تدور سعه الصدر

ماجت عشان تعاين وتسوم بيلاتكم وفناجيلكم والصياني هي غاليه ولا رخيصه جت تبي تقعد بصاله تبي

البساط احمدي ليه تفتحين لها المجلس المجلس للرجاجيل يا بنت ابوي تراء الناس يرتاحون نفسيا

للمره البسيطه اللي تعاملك كا اخت وتمون الميانه الحلوه الميانه تراها زينه مهب وقاحه عادي ياختي

اذا زرتك لا تتكلفين تراء والله ما ننقد عليك لو حطيتي بيالات بادريق مع الشاهي وحب ومع القهوه تمر

وكليجا يا سلاااااااام احلا معروض تكفون ارجعو زي اول نحط بس بسكوت مالح وجرجير وخبز تميس

مع شاهي وحليب ولا فواكه لا تحومون كبودنا بلحلا التالي اللي كله سكر وهيرشي وزبده ودريم ويب

وحليب مركز الله يديم النعمه كرهت الجالكسي من كثر مايلعبون فيه الحريم بلحلا علا بالهم يخترعون

عودو للبساطه لكي تعود الجارات زي اول وتري عادي تقابلن جارتك بلبس البيت ما يحتاج ترصين

عمرك بلجنز بزعم انك متطوره وانتي تحترينها تقضب الباب عشان تلبسين الروز


_________________________________________

اضحك الله سنها ..رهيبه ..وجابتها على الجرح

[الحبيبة]

كلالالالالالالالام واقعي تشتكي منه كل البيوت..

والله وقعت على الجرح..تركنا الروحات والجياااااات والسبة هالزبرقة والتكلف اللي ماله داعي
سلمت يمنااااك ماخطته يداااك ياسماوة
ننتظر ابداعات اناملك