[ابواسيد]

كم مرة رحت للبنك عشان تفتح حساب ، وقال لك الموظف / ما أقدر افتح لك حساب إلا لازم تحط مبلغ معين ؟! بعض الموظفين يقولك 10 الاف وبعضهم يقولك خمسة الآف وبعضهم الف وبعضهم يقولك أي مبلغ تقدر عليه ..!!

خذ النصيحة هذي مني ..
إذا قالك الموظف مثل ذا الكلام .. أضحك في وجه .. وخذ الامر ببساطة ، وقل له .. ممكن اعرف اسمك .. إذا كان مو حاط اسمه ، والا فالمفترض يكون الموظف اسمه مكتوب او حاط بطاقة على صدره فيها معلوماته .

إذا قال ليه ؟!
قل بس ابغاه ، وإذا انت ما تبغى تقول لي اسمك .. برضوا أنت حر .. وبرضوا ابتسم في وجهه ..!! عادة اذا طلبت اسمه يعرف الموظف انك راح تشتكيه وراح يتدارك الموضوع وراح يقولك اوكي .. راح يصرف الموضوع بأي طريقة وراح يفتح لك بأي طريقة بدون اي مبلغ .

إذا مسكت مع الموظف عناد وبدأ يسوق عليك العبط ... وأصر على المبلغ لفتح الحساب ..

أطلع لمدير الفرع ، وبلغه باللي حصل من الموظف ، وقله بكل بساطة انا جاي افتح حساب والموظف طلب مني مبلغ عشان افتح الحساب ..!!

وشف المدير .. وش راح يسوي في الموظف ..!!

بس لحظة ..؟!
ممكن يكون المدير صديق للموظف ولا يبغى يحرجه وممكن يتعاون مع الموظف .؟!
اذا وقف المدير مع الموظف ... برضوا اضحك .. وابتسم ... وخذ الامور ببساطة ...!!
لكن قبل ما تطلع من مكتب المدير قل ذا الجملة .. وشف كيف تكون ردة فعل المدير
قل له / اوكي ، إذا انتم مصرين على أني افتح حساب ولازم احط مبلغ ..
انا راح اتصل الآن على إدارة البنك ، وراح أكلم مؤسسة النقد .. بالكلام اللي قلته لي أنت و موظفك ...
وقتها ... شف مدير الفرع وش راح يسوي ..!!
راح يتغير لون وجهه ... ويختبص ... ويرتبك ... وراح يترجاك ان الموضوع ما يكبر ...!! لأن مدير الفرع اكثر واحد يعرف وش معنى العميل يشتكي على ذا الموضوع ( بالذات ) وهو موضوع فتح العميل لحساب ب مبلغ مالي ..!!

النظام يقول ، واللي موظفين البنك واحد واحد يعرفونه ، وهو من ( ابجديات العمل المصرفي ) ...
إن ( شروط فتح الحساب للسعوديين البالغين : هي البطاقة الشخصية فقط لا غير ، و يمنع منعاً باتاً طلب أي مبالغ مادية من العميل إذا اراد فتح حساب ) .
اذا اشتكي العميل لمؤسسة النقد ، ممكن يغرم البنك بمبلغ كبير ، وإذا اشتكى العميل لإدارة البنك عن طريق الرقم المجاني شكاوى العملاء ، راح تلعن الإدارة ابو خامس مدير الفرع والموظف ، والموضوع ابداً مافيه اي تساهل من اي ادارة بنك . لكن اكثر الناس ... ما يعرفون .


...........................

2

إذا رحت تلغي الفيزا ..
لا تكتفي بـــ الإجراء اللي يسويه الموظف .... وهي انه يأخذ البطاقة ويقصها او يخرمها قدامك ... وتوقع على نموذج الغاء البطاقة ...
بل .. يجب أن تطلب ( مخالصة نهائية ) من البنك ..
وهذي عادة تتأخر شوي لأنها تصدر من ( إدارة البنك ) مش من ( الفرع ) ... لكن مو مشكلة ..
لأنها في احيان كثيرة ... النموذج هذا اللي تعبية في ( الفرع ) ، غير كاف لإلغاء البطاقة ، وراح تكتشف بعد شهور إن البطاقة لازالت محسوبة عليك .. ويمكن يصدرون لك بطاقة جديدة ( مجددة ) بدون علمك ..!!
المخالصة تضمن عدم احتساب أي مبالغ على البطاقة وتضمن عدم تجديد البنك للبطاقة .


................

3

البرامج اللي تقدمها بعض البنوك ..
برامج ... للزواج .. برامج للابناء ... برامج أدخارية ومستقبليه و ما ادري إيش .. !!!
مهما حاول الموظف انه يقنعك فيها ... طنش ...!!
كلام فاضي ... والفائدة من ورائها ... شبه معدومة .. إن ما خسرت فيها .. ما راح يجيك الا راس مالك ... وإذا جاك ربح .. فهذا الربح .. مايسوى .. انك تتعلق مع البنك ... لسنوات وهم يخصمون من راتبك ..!! العملية كلها ببساطة ( هي ربط العميل مع رقبته ليكون اسير للبنك ( عملية تسويقيه بحته ) ، والفائدة الكبرى للبنك .
لكن الموظف مجبور انه يسوقها عليك كعميل ... لأنها محسوبة عليه ، فالتقييم الربع سنوي للموظف واللي ممكن تساعده في الترقية غير البونس ... فيه جزء كبير منه العمليات التسويقية اللي يقوم فيها الموظف ..!!!
إذا ما حقق الأهداف المطلوبة منه .. مثل تسويق هالبرامج او بطاقات الائتمان او القروض الشخصية ..او العقارية ... راح ينعدم في التقييم .. وبالتالي يأثر هالشيء على ترقياته ... وهذي من لعانة ادارة البنك اللي تجبر الموظفين على الكذب على العملاء وتزيين هالبرامج الخربوطية وزحلقتها على العملاء

[جودالسمآء]

بارك الله فيك نصائح جدا مفيده ..

[الحزين]

شكراً لك معلومات قيمة ..

طيب ماهو نظام ( خمسين ريال للبطاقة وعشرين ريال لدفتر الشيكات )

شكرا لك

[$مــمـــيــــز$]

انا طلبوا مني الراجحي عند فتح الحساب رسم قدره 75 ريال عشان البطاقة ..

هذا صح ولا لا ؟

[البلح]

مشكور على الإيضاح

[ألوان وتناتيف]

أخوي طيب أنا لي حساب بالراجحي ورحت بفتح حساب ثاني باسمي ورفضوا .. وبغيت أسألك عن حساب الإدخار كيف طريقته وهل له بطاقه صراف جديدة ولا أستخدم له نفس بطاقتي ..

[ابواسيد]

السلام عليكم اهلا اعضاء منتدى بريدة ستي هي رساله جتني على البريد واحب اضعها لابناء منطقتي وهي انظمه كثير مانعلم عنها


اما عن رسوم البطاقه هي من تلعب البنك وعن دفتر الشيكات مجاني لكن بعض البنوك تضع عليه ضريبه واذا ارتم السياسه الصحيحه بالبنك هي قسم التميز

[1مهستر]

من كلامك .... انت تقصد ان البنك يتحاشى فتح الحسابات للافراد المفلسين نوعا ما .....

لكن البنك ايضا له طريقه ثانيه في تحاشي فتح الحسابات للعملاء المفلسين .....

وهو اخذ بعض النقود شهريا اذا قل رصيدك عن مبلغ معين ....

[رضاء الله أولا]

هل اذا طلبت من الموظف مخالصة نهائية من الممكن اذا اردت فتح حساب مرة ثانية يفتح لي البنك حساب جديد واي فرع كان ام لا رد علي ضروري

[نضرتي هيبه]

مشكور اخوي يعطيك العافيه

[عبدالله الصالح]

البنوك السعوديه أكبر بنوك العالم فائدة .. لأن العملاء لايريدون فوائد .. ومع ذلك هي أقل البنوك نفعاً وإسهاماً في خدمة المجتمع للأسف ..

كن بخير.

[على بلاطه]

مشكور على المعلومات القيمه وبسألك الله يخليك انا طلبت مشهد من بنك الرياض طلب مني خمسين ريال هل هذي من حق البنك مع انها ورقه وحده ماتستاهل مع العلم ان راتبي ينزل على البنك نفسه؟؟

[ibraheem]

اقتباس مرة رحت للبنك عشان تفتح حساب ، وقال لك الموظف / ما أقدر افتح لك حساب إلا لازم تحط مبلغ معين ؟! بعض الموظفين يقولك 10 الاف وبعضهم يقولك خمسة الآف وبعضهم الف وبعضهم يقولك أي مبلغ تقدر عليه ..!! خذ النصيحة هذي مني .. إذا قالك الموظف مثل ذا الكلام .. أضحك في وجه .. وخذ الامر ببساطة ، وقل له .. ممكن اعرف اسمك .. إذا كان مو حاط اسمه ، والا فالمفترض يكون الموظف اسمه مكتوب او حاط بطاقة على صدره فيها معلوماته . إذا قال ليه ؟! قل بس ابغاه ، وإذا انت ما تبغى تقول لي اسمك .. برضوا أنت حر .. وبرضوا ابتسم في وجهه ..!! عادة اذا طلبت اسمه يعرف الموظف انك راح تشتكيه وراح يتدارك الموضوع وراح يقولك اوكي .. راح يصرف الموضوع بأي طريقة وراح يفتح لك بأي طريقة بدون اي مبلغ . إذا مسكت مع الموظف عناد وبدأ يسوق عليك العبط ... وأصر على المبلغ لفتح الحساب .. أطلع لمدير الفرع ، وبلغه باللي حصل من الموظف ، وقله بكل بساطة انا جاي افتح حساب والموظف طلب مني مبلغ عشان افتح الحساب ..!! وشف المدير .. وش راح يسوي في الموظف ..!! بس لحظة ..؟! ممكن يكون المدير صديق للموظف ولا يبغى يحرجه وممكن يتعاون مع الموظف .؟! اذا وقف المدير مع الموظف ... برضوا اضحك .. وابتسم ... وخذ الامور ببساطة ...!! لكن قبل ما تطلع من مكتب المدير قل ذا الجملة .. وشف كيف تكون ردة فعل المدير قل له / اوكي ، إذا انتم مصرين على أني افتح حساب ولازم احط مبلغ .. انا راح اتصل الآن على إدارة البنك ، وراح أكلم مؤسسة النقد .. بالكلام اللي قلته لي أنت و موظفك ... وقتها ... شف مدير الفرع وش راح يسوي ..!! راح يتغير لون وجهه ... ويختبص ... ويرتبك ... وراح يترجاك ان الموضوع ما يكبر ...!! لأن مدير الفرع اكثر واحد يعرف وش معنى العميل يشتكي على ذا الموضوع ( بالذات ) وهو موضوع فتح العميل لحساب ب مبلغ مالي ..!! النظام يقول ، واللي موظفين البنك واحد واحد يعرفونه ، وهو من ( ابجديات العمل المصرفي ) ... إن ( شروط فتح الحساب للسعوديين البالغين : هي البطاقة الشخصية فقط لا غير ، و يمنع منعاً باتاً طلب أي مبالغ مادية من العميل إذا اراد فتح حساب ) . اذا اشتكي العميل لمؤسسة النقد ، ممكن يغرم البنك بمبلغ كبير ، وإذا اشتكى العميل لإدارة البنك عن طريق الرقم المجاني شكاوى العملاء ، راح تلعن الإدارة ابو خامس مدير الفرع والموظف ، والموضوع ابداً مافيه اي تساهل من اي ادارة بنك . لكن اكثر الناس ... ما يعرفون .

خخخخ .. لكن ماغاب عن علمك انهم أصبحوا أكثر إحترافاً الآن .. ولم يصبح اغلب اطرق تنطلي عليهم !

وأصبح ردّهم الآن .. لا يوجد لدينا الآن حسابات متاحة .. وأنه سوف يتاح لنا 100 حساب الأسبوع المقبل ..

ومن ثم تنطلي عليك هذه القصة لتأتي الأسبوع المقبل لـ تقابل بنفس الرد .. ويالليل ما أطولك !!

يوم نوويت اطلع حساب مريت تقريباً أربع فروع وكلهم يصرفونن

وفي المره الخامس جبت معي شيك ثلاثين الف وقلت لهم سوف أفتح بهذا الشيك حساب .. ومع ذلك قوبلت بالرفض !

لأنه اصبحت طريقه قديمة ان تأتي بمبلغ لفتح به حساب ومن ثم تسحبه .. وبالأخير كلمت الوالد ورحت انا وياه للبنك ..

ومباشره افتحولي .. طبعاً لأنه عنده حساب تميّز !

[صمت الحزين]

أنا أمس صارت لي مشكلة مع بنك الراجحي في الأحسا لأني متغرب هناك حاليآ و المشكلة هي أني قبل أسبوعين من الأن رحت أحد فروع بنك الراجحي في الأحسا طبعآ وكان هذا الكلام ليلة الخميس جيت أبي أسوي إيداع بأحد صرافات الفرع المهم سويت إيداع بمبلغ 2000 ريال المهم دخلت المبلغ داخل الصرافه و قامت الصرافه بعدى المبلغ فجاءه إلى الصرافه كتبت في الشاشه نأسف لأتمام العمليه راجع البنك أنا أنهبلت المبلغ داخل الصرافه أبي أرجعه عجزت طلعت الصرافه دخلت مره ثانيه على حسابي أبي أشيك يمكن دخلت حسابي ما دخل شيء و أنا جلس عند الصرافه أبيها تطلع ما طلعت المهم أني أتصلت على الرقم المجاني للبنك و إلا يكلمني الموظف قلتله عن المشكله قال مافيه إلى تراجع البنك يوم السبت ورحت البنك و جيت عند الموظف وشرحته مشكلتي و قال لي أكتب طلب و صور البطاقه و صور صرافتك المهم سويت وعطيتها الموظف و قال خلاص نبي نشوف مشكلتك المهم أني رحت و كل يوم أشيك على حسابي و لا رجع لي شيء المهم و أروح للبنك مره ثانيه و قلت للموظف مارجع لي شيء قال هو لي أنت متأكد أنك أودعتها قلت له ليش شايفني حرام تراني و الله مافكرت فيها و لا فكرت في الحرام بس هذي مشكلتي و لازم تحلونها لي قال هو بصراحه حنا شيكنا على الصرافه و سحبنا جميع مبالغ الإيداع ولا حصنا شيء يمكن طلعت وواحد أخذها مايخاف الله قلت له أنا جلست عند الصرافه ولا طلع شيء قال ما لك إلى ترفع شكوى لي السي أي أن و ترسلهم مشكلتك أنا بصراحه يوم قال لي كذا حسيت أنا مراح أستفيد شيء بس روتين وقلت له هذا الكلام و قال و الله ما أدري المهم أني دخلت على المدير العام و قلت له عن مشكلتي المهم سأني نفس أسئلت الموظف قام هو و قال لي خلاص الله يكون في عونك يمكن أحد أخذها يوم طلعت من الصرافه قلت له الحين الموظف يقول لي أرسل شكوى للس أي أن أنا أحسها ماوراها فائده قام هو قال تبي الصراحه ماراح تسفيد شيء إذا الفرع ما حصلها في مبالغ الإيداع لذالك اليوم ما راح يعطونك نتيجه بس الله يكون في عونك المهم أني طلعت من البنك و لا سويت شكوى و شكوى لله الله لا يوفقهم إذا هم أخذوها أو أحد موظفينهم .
الحين وشرايك وش أسوي و أشكرك على الموضوع و السلام عليكم