[مجنون بريده]

السلام عليكم ورحمة الله وبركاته

تحيّة عطرة أزجيها لكم بجمالها ونسماتها ... ( حسبك حسبي الله عليك ,, نبي المقدّمة بتوعك ماغيره وعساك تفلح به )

صباح / مساء الخير لكم ياسادة

في آخر موضوع كتبته كان يتكلّم عن الخادمات وكنت قد جزّأته لجزأين ,, أمّا الجزء الأول فقد تشرّف بلقياكم ,, ولكن نصفه الآخر فللأسف لم ولن ينال شرف اللقاء بكم !

لاتعتقدون بأنّ فكرة الجزأين غلطة لم أحتسبها , ولكن لابد من وجود بعض النقاط تكون مذكورة في الجزء الثاني وإن كانت ستخرج عن النص كثيرا !

فمن أجل ذلك أردت الإنسحاب لا لشئ ولكن ماكل مايعرف يكتب !!
,,

نبدأ موضوعنا على بركة الله , وزي مانتوا شايفين العنوان واضح أعلاه ( اللي جلست يومين وأنا أعدّلبه عشان يطلع بهالصورة )

وبيني وبينكم اللي يشوف العنوان يقول هذا عنوان مقالة لكاتب بصحيفة الشرق الأوسط ( ياكرهي لهالجريدة بصراحه مدري ليش بثلاثة والباقي بريالين ؟! )

لي صديق عزيز على قلبي لو تسألونه وش أمنيتك قبل ماتموت ؟ كان يجاوب بدون خيارات ويقول بكل وقاحة أبي أتزوّج ( بدون وقاحة الله يرضالي عليك )


فاصل ونواصل

....

بعد الفاصل ,, جملة بالبنط العريض , بعد مرور أربع سنوات, ( متحمسين مع الموضوع وإلا لا ؟ )

عاد يوم من الأيام وبالتحديد يوم الخميس ,, وياطويلين البقاء والسلامة لنا إستراحة نطلع به كل خميس مع خوياي ومن ضمنهم صديقي اللي كل هرجته ودّي أعرس

عاد يوم جاء وقت الكورة دخلوا الشباب للملعب ,, وأنا وصديقي جلسنا نتقهوى ونتفرّج عليهم وهم يلعبون

فمع السوالف اللي دارت بيننا ,, قالي : إنّي قرّرت أتزوّج وأبخطب لي بنت أجواد ,, قلت : ماشاء الله منك المال ومنه العيال

قال : هذي قله لي بالقصر وخلّنا الحين بالمهم ,, قلت : اسلم ( اسلم : تعني كمّل كلامك ولا يكثر , للي مايفهم )

قال : أنت تدري إنّك أقرب صديق لي بالدنيا ( بغيت أخمّه وأبكبك ) ,, فتوقّع بأي لحظة يجي أحد يسألك عن وعن أموري ودنفستي

قلت : إزهله أبضبّط أمورك , إرقد وكبّر وسادتك !!

وبعد كم يوم جاني إتصال من رقم غريب لعلّه طلع اللي بيسأل عن صديقي وبعد الرد عليه إليكم مادار بيننا بالتفصيل :

ولي البنت : السلام عليكم

أنا : وعليكم السلام

ولي البنت : أنت صديق صديقك ؟ ( أهم شئ وصلت لكم )

أنا : وصلت خير ياخال ,, بهاللحظات تذكّرت إنه متّصل بيسأل ( التفكير عنده بحل يا أحمد الفريدي )

ولي البنت : ما أخفيك إنه متقدّم لبنيّتي وأبشوف وش هو من لحية ؟

أنا : والله ياخال اللحية موب كل شئ ( من بدايته يبي يخوره )

ولي البنت : وشلونه مع الصلاة ؟

.. يوم جاب طاري الصلاة تذكّرت إنه مايصلّي إلا بمصلّيات المحطّات ,, والمفروض لابغى يسأل عن الصلاة يسأل إمام المسجد , بس صديقي كل يوم له إمام جديد
( مرّه سعودي ومرّه بنقالي ومرّه بنشري المحطّة )

أنا : والله ياخال مواظب على الصلاة بس مشكلته يصلّي بمسجد المحطّة والله يتقبّل من الجميع

ولي البنت : وشلونه مع والديه ؟

أنا : والله ماشاء الله عليه أحسن شئ ويوم يموت أبوه قبل سنتين جلس يصيح ( جاب الدليل القاطع )

ولي البنت : طيب هو راعي سفر ؟

أنا : أبببببببببببببببببببببد مايتعدّى ديرته ( وجسر الملك فهد يشكي منه )

ولي البنت : طيّب هو يدخّن ؟

أنا : مالك لوى , وقلت بيني وبين نفسي ( بس يشيّش ) عشان أبرّي ذمّتي


همســـــه /

عندما تسأل عن صديق لك ,, هل ترضي ربّك ونفسك فتجيب بصدق ,, أم ترضي صديقك وترضى بالخيانة ؟


وأخيرا : إعلم عزيزي القارئ بأنّ الزواج قسمة ونصيب ,, فعليك بالصدق حتى تبرأ ذمّتك أمام الله !!


لاننسى بالتذكير أنّ القصة نسج من الخيال , ولا تمت لواقعي بأيّة صلة

أرق التحايا والتقدير

مجنـون بريده ..

[MISS PINK]

أعتقد من الأفضل أن تكون صادقاوواضحا بالنسبة للطرفين

[لماذاهذا]

أتهرب من هذة ^^ الاسئلة والموفق

اسلم لي ولها ولهم ^^

[طموح مشرق]

انا أعتقد اللي يتستر على صديقة جبااااااااااان وغاش للناس

ولو سألته
ترضى أحد يتستر على خطيب أختك.؟؟بالطبع راح يقول لا...؟

فأفضل شيء إن الواحد لما يسأل لا يقتصر على الصديق بل المسجد أقاربه العمل الحي ..

هذا زواج وعشرة عمر مو لحظة وينتهي..

[المتذوق]

بالنسبة للزواج

يجب ان يبدي كل شيء عن صديقة لكن بدون فضائح فمن سالك دخل ذمتك


انا عن نفسي سوف اقول الصحيح حتى ولو كان على اخي شقيقي

[متصفحة]

اقتباس المشاركة الأساسية كتبها مجنون بريده السلام عليكم ورحمة الله وبركاته تحيّة عطرة أزجيها لكم بجمالها ونسماتها ... ( حسبك حسبي الله عليك ,, نبي المقدّمة بتوعك ماغيره وعساك تفلح به ) صباح / مساء الخير لكم ياسادة في آخر موضوع كتبته كان يتكلّم عن الخادمات وكنت قد جزّأته لجزأين ,, أمّا الجزء الأول فقد تشرّف بلقياكم ,, ولكن نصفه الآخر فللأسف لم ولن ينال شرف اللقاء بكم !

أستغرب كثيرًا ..

هل الموضوع نفسه هناك وهنا لم يلقى شرف المناقشة والمتابعة ..

[دوغان]

مو لازم يكون عندي اصدقاء ولا احب يكون عندي

[مجنون بريده]

شكرا لمروركم جميعا

ولتكن نظرتنا مستقبلية ومنطقية حتى لانظلم البنت بخيانتنا !!

أتمنى من الأخت متصفحة توضيح ردّها لأن المخ بصراحة مقفّل

[شمعة حنين]

أفضل الأخبار بالحقيقه حتى لو كان من أقرب المقربين الي

لأن هذا مستقبل له و لبنت الناس اللي بيتزوجه

و شكرا

[مجنون بريده]

شكرا لمرورك يابحبوحة

كلامك سليم وعين العقل

[الـصـمـصـام]

سبق و إني سئلت عن ناس أعرفهم و أقدرهم لكن أحوالهم ما تناسب أبداً .. فإذا كانت مهب كفو أكتفي بقول
( لو يخطب أختي ما رضيت أنها تكون زوجته ) .. طبعا فيه أمر ... أنه غالبا ما يجيك يسأل إلا اللي واثق فيك ..
و السؤال في مثل هالحالات أمانة ..

[صمت النار]

اقتباس المشاركة الأساسية كتبها الـصـمـصـام سبق و إني سئلت عن ناس أعرفهم و أقدرهم لكن أحوالهم ما تناسب أبداً .. فإذا كانت مهب كفو أكتفي بقول ( لو يخطب أختي ما رضيت أنها تكون زوجته ) .. طبعا فيه أمر ... أنه غالبا ما يجيك يسأل إلا اللي واثق فيك .. و السؤال في مثل هالحالات أمانة ..

أعوذ بالله من مثل هالجواب على من يُسأل

إلا إن كان سؤاله لك كان كما يلي : هل لو خطب أختك ترضى به زوج لها ..

لكن يجيك يسأل عن أمور محدده وترد بهذا الرد ..

عاد اقول لك سالفة ,, والله إن أحدهم رد بمثل ردك , ولم يتم الزواج ولكن تدور الأيام ويتزوج نفس الشاب بتلك الفتاة برغم رفضهم له سابقاً ..

وياعزيزي

أنت قلت في آخر ردك أنه أمانة , ومن الامانة أن تذكر العيوب وتذكر المزايا ..

[مــــــلاذ]

أســــــااسا أنا من رأيي إنه أكبر خطأ الأخذ بسؤال الصديق
أو الاكتفاء به
لأنه من المستحيل بيوضح الأشياء السلبيه اللي بصديقه...
ماراح يفكر بأمااانه وغيره..
(والتوفيق بيـــد الرحمن الرحيم)

[مجنون بريده]

أخي الصمصام

بالفعل ( المستشار مؤتمن )

والمهم راحة الضمير يابعدي

شكرا لمرورك الكريم