[أم غمازات]

ياهلا و مسهلا ..

اختفيت عنكم فترة و هــ أنذآ أتيكم بكل شوق > ها أنذا متعوب عليه عع .

احييكم بباقة ورد فوشيّة مجمّلة بقطرات العطر و بجوانبها بالونات فسفوريّة و بالوسط شمعة كستنائيّة "مسكت خطّ" , وانا الحين اكل علك حريم "لبان" و اشرب شاني > الحمد لله على الذوق .

شسمه ’’ توني اسولف مع صقيقتي عن "وش سويتي مواقف بالقاعة"

و عجبتني سوالف المواقف بالقاعات فـ حبّيت أقرقر لكم مواقفي بس بشرط !!!

اللي اوله شرط اخره نور عندي شرررط (( انتم بعد قرقروا مواقفكم و الا لاتقرون مواقفي ترى ما أحللكم )) > قولي

ق

اول شيئ ترى مواقفي بــ آآآآآآخذ أبو رآحتي بالسوالف بتفاصيلها يعني على بلاطة لاتقولون ممنوع و ما ممنوع ..

ق1


الحمد لله رب العالمين و الصلاة و السلام على اشرف الانبياء و المرسلين و بعد ,,

في يوم من الايّام ؛؛ تحديداً لما كنت بثالث كلية (( ثالث أوووم المواقف )) كان عندنا محاضرة مع الدختورة نبيلة

حقت الحديث "نبيلوووه"
المهم طفت له بحركة تجمعنا حنا و القاعة الثانية بقاعة من قاعات مبنى -هـ- يعني القاعة ما تاخذنا كلنا , نصنا

جالسين بالاررض و انواع الزحمة و كانت ذيك الايام موضة (( البلوتوث )) كل وحدة عيونه بالدختورة و يدينه تدهر

تحت الطاولة تستقبل بلاتوث ,, أنا ممن واكبوا هذه الموضة و كان الموقف كما يجي :


كنت جالسة بــ قبل آخر القاعة "ودي بالاخير مرة , بس دايما العين عليهم و انا ايقال اني مؤدبة قدمت شووي" , و قلت لبنت ترسل لي عنشودة "انشودة" , البنت ارسلت و انا استقبلت ,, اثناء استقبالي للعنشودة وهو جآري التحميل البنات صاجن يسولفن و نبيلة كانت قدام شاشت اسكتووووووا و جت لمّنا يعني قررربت لمي و الجوال بيديني ياويليه الحين تدري بي جيت دخلت الجوال بقووة للدرج و حطيت يديني فوق الطاولة و ناظرت به بحماس ياتسبدي بريئة متحمسة للشرح يوم قربت لي قوووة الجوال انتهى محمل و لازم بعد التحميل يقول برررررر صح ؟ يعني يهززز , الجوال بالدرج , الدرج حديد , اقوى مابالجوال هزازه يعني > برررررررررررررررر الدنيا كلّه هزّت عشان تم استقبال البلوتوث و نبيلوه فوق راسي ,, البنات أللي حولي طاااااااااحوا ضحك و انا متنحة واقلبيه وش تبي تزين بي بس , اثره تهوش تهوش سكتت , قلت شكله تفكّر وش تبي تسوّي بي "اللي على راسه بطحاء " , اثره مادرت عني و لا عن هزازي قاعدة تاخذ نفس عشان تكمّل هواشه , اووووووووه وبس تبين تهوشين ؟ هوشي لمين تقولين امين ذذ اهم شيئ لا تدرين بي وه وه ..! > الحمد لله على سلامتي .


وفي يومن اخرن كذلك ,, كان عندنا الدكتورة منيرة الخزي ق1 , و انا عادةً ما أغيب الا آخر الترم عشان أضمن اني مو محتاجة لغياباتي اغيبهم جميع , كان قبل اخر اسبوع عندنا الدكتورة و انا باقي لي غياب لاخر اسبوع , يوم دخلت قالت يا بنات هذي اخر محاضرة و انا مرتزة قدّام و جايبة كتابي , قلت له لو سمحتي .. قالت تفضلي : قلت هذي اخر محاضرة طيب ودّي أطلع "خبركم باقي لي غياب لازم اقضّيه عع" , قالت تفضلي اطلعي "نسيَت مين انا و الا كان قالت معصي مهناش طلعة" , يوم ضفيت عفشي جيت ابوصل الباب قالت تعالي تعالي , يمه وش بي , سمّي وش بغيتي ؟ قالت وش عندك بالطلعة لوين تبي ترووحين ؟ (( عاااد تعرفون دكتورة منيييرة ما عنده لعععب و مو ايّ شيئ ينقااال له )) , قلت هـ إحم , أبي . أروح , أبي أروح أكمّل قهوتي مع البنات !!! قالت أحيّيك على صراحتك و هوّنت مافيه طلعة ارجعي !!! > أشمّ ريحة كسحة .


هالمرة موقف مو بالقاعة و انّما بالساحة , توني داخلة من البوّابة جايّة من البيت و كان على وقت العميدة فاطمة الرديني ممنوع الجوّالات , كان فيه تفتيش عند الباب و قبل فترة اخذوا لي جوال قلت مهو حلا كل مرّة ياخذون جوالاتي يحسبوني قاعدة على بنك ؟!!! , جيت رفعت عباتي و دخلت شنطتي داخل العباة و تقل ابسوّي مصارعة ووووووورررررر هجّيت ركض ركض انا و عبايتي "والعالم كلّه تناظر وش بالبنت" ركض لمييييييين وصلت لطاولتي , يوم وصلت اوه اوه اوه "الهث فحمة" قالن صقيقاتي وش بك ؟ قلت "بصوت عال"الحاااارسة الله يخااااااذه بغت تاخذ جوااااالي , (( طاولتي جنبه بوابة ثانية للباصات و فيه حارسة ثانية غير هذيك و قاعدة تناااااااااااظرني ويلااااااااااااااه)) , يوم قضيت محرّشة على نفسي قدّام الحارسة الا هي تناظرني ليه هاجّة انا وعباتي ؟ > حمداً لله كانت الحارسة الثانية عجّازة و الا كان قالت وش بك و فتّشتني وخذت جوالي "مهو كلّ مرة تسلم الجرّة" أدري مثل خاطم بس احس انّه مناسب لقصتي عع .


هالمرّة موقف لصقيقتي , كنّا عند الدختورة بدرية "تخبرونه ذيك الصعيدية اللي تقول انا من مكة و اصلي من الاشراف" , تنويه .. صعيدية ما تعتبر طنزة الحين تقولون لي لا يسخر قوم من قوم هي من الصعيد ينقال له صعيدية , كـ أن أقول لواحدتن منكن ذيك البريداوية , كانت علينا بدرس فقه , وكنا جالسين شلّة كاملة ورررااااااااااااء وراء كلش يعني ما تشوفنا قدامنا كراسي و زحمة , المهم حنا يمكن 5 بنات و جالسين ع الارض و فاتحين جوالاتنا كل وحدة تورّي الثانية صور و جايبين سماعات نتسمّع انآآشيد و هيتس "هيك بالقصيمي" , كان معي انشودة فتحتها و عطيت السمّاعآت لصقيقتي تسمعها و مرفوع الصوت قوووة بس بأذانها حنا ما نسمع , " طبعاً البنت بهالحالة تسمع الانشودة بقوووة بس حنا ياللي جنبه ما تسمعنا أبد , وعادةً اللي ما يسمع يعلّي صوته إذا جاء يتكلم " , كنا نسولف نسولف الدختورة شاشت بااااااااااااااااس , كلنا سكتنا , هالبنت للحين باذانه السماعات و ما تسمعنا و لا تدري ان الدكتورة تهوش حنا بعالم وهي بعالم , للحين تسمع الانشودة و حنا سكوووت , جت البنت قالت قصريه قصريااااااااااااااااااه وشلون تقصصصصصصصصصصصصصر (( بصوت عاااااااااااالي )) كل اللي قدام التفتوا وراء وش اللي صاير ؟ اثر البنت منصقهه من السماعات مشغلة الانشودة , عاد شوفوا اشكالنا , احد متنح وش سالفة اللي تصارخ ؟ و احد يضحك على الموقف , وحنا منجلطين ما ندري شلون نرقّع الموقف الحين تذبحنا بدرية , بس الحمد لله عدّت على خير وصارت سالفة تروى .


هذا ما بجُعبتي لهذا اليوم ,, أعطونا ما بأكياسكم أثابكم الله > مرّة سألت وحدة وش معنى جُعبتي قالت يعني كيستي .. عشان هيتس قلت اكياسكم ...