[برفسور ملتمس]

بسم الله الرحمن الرحيم



تعلمون مدى أهمية الفئة الأكثر في المجتمع وهي فئة ( الشباب ) وتدركون مدى أن هذه الفئة من السهولة أن يتم إستغلالها في أمور عديدة ولايمكن حصرها ..
لذا من المؤسف أن هؤلاء الشباب يتم ( ركلهم ) من مكان إلى آخر وخص نص بمدينة ( بريدة ) فإن ذهبوا إلى ذاك المكان ليتم تفريغ مابداخلهم من شحنات وتصرفات شبابية ( طردوهم ) إما الأمن ولايُلام لأن بإجتماعهم هنا قد يكون خطراً عليهم .. أوأصحاب هذا الحي وأيضاً لايلامون لأن بأجتماعهم قد يحدثون شغب وأصواتاً مزعجة فهنالك النائم وهنالك المريض وغيرهم ..
لايخفى عليكم منطقة القصيم ومدينة بريدة أصبحت تتطور ، فهي ثاني أكبر مدينة بعد الرياض بنجد وشمال المملكة ، وحتى الآن لايوجد مكان مخصص لهم ..
أجزم أن بجميع مناطق المملكة يوجد متنفس للشباب :
في الرياض //
( شارع التحلية - المولات الشبابية - الصالات الرياضية - الدورات الشبابية - الأندية - المطاعم والجلسات الشبابية - المقاهي مثل : = ستاربكس - د/كيف - هاجن دز= ) .
في الشرقية //
( يكفي وجود الكورنيش وأيضاً أمكانية السفر لدول الخليج المجاورة مثل " قطر ، الكويت ..إلخ ". )
في جــــــدة//
( شارع التحلية ، الكورنيش ، الأندية ، الصالات الرياضية ، قرب مكة المكرمة وايضاً الطائف )
في بريـدة //
( لايوجد مكان مخصص للشباب )
لذا آملي وكثير من الشباب أن يكون هنالك شارع بأسم " التحلية " يتوفر فيه جميع المقاهي والمطاعم والصالات الرياضية ويكون من ضمن خطط الأمانة لنظرة مستقبلية لشباب منطقة القصيم وتحديداً مدينة ( بريدة ) يضعون فيه مهاراتهم وهواياتهم ويفرغون طاقاتهم بمكان مخصص ..

تسديدات //
* في عالم الأثرياء ومن ينافسون على أعلى الأرصدة عالمياً خرجوا من هذه المنطقة ولكن ذهبوا يقدمون المشاريع لشباب المناطق الأخرى فضلاً على منطقتهم .. لله ما أخذ ولله ما أعطى ..
* بعد وجود مثل هذا الشارع الخاص بالشباب بصريح العبارة وبالعامية ( تروح قلة الحياء ووساعة الوجه ) أنه نناقش هالشباب وندق خشومهم بحال وجودهم بأي حارة أو أي شارع غير مخصص لتواجدهم ..
* قد يقول قائلاً أن مثل هذه الشوارع تجلب السلبيات أكثر من الايجابيات وأنا بقوله ( أمريكا وبريطانيا والامارات وقطر والرياض وجدة .. معقولة على غلط ومايفهمون وحنا الي على صح ونفهم ) ؟؟!
* بتوفر مثل هذا الشارع المخصص للشباب " الأمن بدلاً من أن يتواجد بأكثر من حي وأكثر من شارع ، يختصر الوقت والجهد بحال وجوده بهذا الشارع فقط ..
* أتوقع لو يقومون بدراسة عن الثقافة الاجتماعية والتكنلوجيا والتطور ، وجد أن أبناء هذه المنطقة الأقل والسبب أن البعض منهم لايزال يعيش على عادات أبائه وأجداده .
* استراحة ، شقة ، حوش .. هالثلاثي أصبح هاجس مرتبط بشباب هذه المنطقة ؟ لدرجة أن البعض لايدخن ، ولكن أصبح بحكم المتواجدين يدخن فلايريد أن يكون منبوذاً بينهم لأنه تحتم تواجده بكثافة والسبب لايوجد بديل ؟
* أستغرب من أباء وأمهات هذه المنطقة بحال الاتصال على أبنائهم ( أين أنت ؟ تأخرت ؟ ) وكأنهم يحسسون هذا الأبن أنه بولاية شيكاغو بينما الواقع هو بالثلاثي (: الاستراحة ، الشقة ، الحوش ) .. يعني بتفرق عن البيت ؟!
* الشباب الأجانب بهذه المنطقة ( تضايقوا من الملل ) بينما حضورهم كان للعمل ؟ وش نقول لسكانها أجل ؟!
* مهرجان الطرفية ، مهرجان الغضا ، عسيلان ، وفرنا لكم المهرجانات وينكم ياشباب ؟؟؟ .. طيب شباب كثير مايبون البر فيها شي ياجماعة الخير ؟؟
* وفرو لهم الأنترنت ، والتلفزيون ، وفتحو لهم المجال للسفر ، وكأنهم يقولون أنظروا إلى هؤلاء الشباب وأماكن ترفيههم ؟ ولكن هيهات أن تقوموا بما يفعلون في منطقتكم فحتماً سنعاقبكم ..

[انسان من بني آدم]

والله انك صادز ماعندنا شي نروح له

بس لاتنسى ياحبيلك البر انه مو موجود عند كل المدن اللي ذكرت هههههه
كلامك اخوي جميل ياليت يكون فيه الشارع هذا ليش لا

يعني وش ينقصنا عن الرياض وجدهـ والشرقيه

ماينقصنا الا شي واحد الاهتمام

كلامك اخوي في محله يعطيك الف عافيه


مشكوووووور ا

[صاحبة الامتياز]

روحـــو الحـــديقة البلـــديه وش زينـــه

[المنذبح]

فيه عندك شارع النهضه <<<< على قدكم

والصلات الرياضيه ماليات بريدهـ ,,,

ومثل ماقال ,,, عندك البر والمخيمات ,,, كذلك قطع الثيل بكل مكان ,,,


ويالله من فضلكـ ,,




اجل تبي شارع التحليه ,,,, ايه إن شاء الله ..

[مهم للغايه]

شارع التحلية - المولات الشبابية - الصالات الرياضية - الدورات الشبابية - الأندية - المطاعم والجلسات الشبابية - المقاهي مثل : = ستاربكس - د/كيف - هاجن دز= )


يبوووووووو ترانا من بريده ماحنا في مدغشقر تبي تقولنا ان بريده مافيها ماذكر اعلاءه

[برفسور ملتمس]

اقتباس المشاركة الأساسية كتبها صاحبة الأمتياز روحـــو الحـــديقة البلـــديه وش زينـــه

عـــوائــــل ، وبصراحة بعد احداث مصر صايره من كثرة المصريين ( كأنها ساحة التحرير ) .. ملاحظة : وش تفرق عن الاستراحة ؟!!

[برفسور ملتمس]

اقتباس المشاركة الأساسية كتبها المنذبح فيه عندك شارع النهضه <<<< على قدكم والصلات الرياضيه ماليات بريدهـ ,,, ومثل ماقال ,,, عندك البر والمخيمات ,,, كذلك قطع الثيل بكل مكان ,,, ويالله من فضلكـ ,, اجل تبي شارع التحليه ,,,, ايه إن شاء الله ..

ههههههههاي .. أجل تبون .. معليش حبيبي حنا نناقش حسيتك متكي بمجلس الشورى وننتظر القرار منك يوم تقول ( أجل تبون ) ..
بعدين لاتحسب كل الشباب زي طموحك ( النهضة ) بالله هذا تسميه شارع شجرتين ودوارين وكم مراهق ياخذون لهم فرتين ، تحسب تفكير الشباب كلهم كذا ، ..
ووين الصالات الرياضية جيب لي زي ( وقت اللياقة فيها ملاعب خارجية ، وحمامات سباحة وكافتريات ) لاتجيب لي صالتين بالتغيرة ووحدة بالفاخرية خخخخخ ماتقدر تتنفس ..
أما بخصوص المخيمات والبر ، فيه شباب مايبون البر ، أنت انسان تعز شي اسمه ( بر ) غيرك لا ، بتمشي عقليات الشباب زي عقلتيك ماينفع كذا .. واكب العصر ..
ملاحظة : يبدو أنك ماقريت هذي ( أتوقع لو يقومون بدراسة عن الثقافة الاجتماعية والتكنلوجيا والتطور ، وجد أن أبناء هذه المنطقة الأقل والسبب أن البعض منهم لايزال يعيش على عادات أبائه وأجداده ) .

[أطوي جروحي بضحكتي]

اقتباس المشاركة الأساسية كتبها برفسور ملتمس عـــوائــــل ، وبصراحة بعد احداث مصر صايره من كثرة المصريين ( كأنها ساحة التحرير ) .. ملاحظة : وش تفرق عن الاستراحة ؟!!

^
^
,,,,,,,,هههههههههه,,,أبدا ...ماتأثرت..

[نالا]

اقتباس ( أتوقع لو يقومون بدراسة عن الثقافة الاجتماعية والتكنلوجيا والتطور ، وجد أن أبناء هذه المنطقة الأقل والسبب أن البعض منهم لايزال يعيش على عادات أبائه وأجداده ) .

احسنت باارك الله فيك
اعجبتني هذه العباره قوووه تحاكي مجتمعنا ومو معترفين

مااقول الا عسى الله يجيب السيل

[برفسور ملتمس]

اقتباس المشاركة الأساسية كتبها مهم للغايه شارع التحلية - المولات الشبابية - الصالات الرياضية - الدورات الشبابية - الأندية - المطاعم والجلسات الشبابية - المقاهي مثل : = ستاربكس - د/كيف - هاجن دز= ) يبوووووووو ترانا من بريده ماحنا في مدغشقر تبي تقولنا ان بريده مافيها ماذكر اعلاءه

نعم جميع ماذكر والدليل :
شارع التحلية = هذا مانبحث عنه ..
المولات الشبابية = اذكر لي مول خاص بالشباب << الحين مافيه الا اثنين للعوائل ومزعجين العالم فيه..
الصالات الرياضية = سبق وذكرت في ردي أتكلم عن الملاعب الخارجية والدورات الي تقام فيه مثل دورات بلياردو عالمية وبلاي ستيشن وبطولات ، مو تجيب لي غرفة مساحتها ( 4 × 6 ) وتقول هذي صالة ..
الدورات الشبابية : هل تعلم أن هنالك دورات كرة قدم تقام في الرياض وجدة والشرقية ويرعاها شركات وأنتجوا لاعبين غير دورات الألعاب الأخرى ، << لاتقولي ساحة الملاعب الي شباب متطوعين سووها عشان لياقتهم وتحصل بدون تخطيط ومافيه سلامة لايكون هذي الي تفكر أني أطالب بتواجدها ؟؟
الأندية : عندك التعاون والرائد اكيد تحسبني أقصد هذولي ههههه ، ياعزيزي أقصد الأندية العالمية الي في جدة والشرقية مثل اندية اهتمام السيارات بمعنى أندية هوايات شباب ، مو بالبران ولا بشارع التجاري ويروحون يجربون باللغف ولا الربيعية ، أقصد هذي المخصصه لها مواقع ومنتديات ومشرفين ومراقبين وجوائز ورعاة ..

جميع المقاهي العالمية الي ذكرتها ( غير متواجدة في بريدة ) ..
عزيزي باختصار : بعض سكان المنطقة طموحهم محدود وماشافو خير ( لو يفتح مطعم ولا مقهى موجود من سنوات بجدة وبالرياض والشرقية ، رفعوا الدنيا وقعدوها وآخر مثال " كارفور" " ) ..

[يعجبني تفكيري]

اقتباس المشاركة الأساسية كتبها برفسور ملتمس ههههههههاي .. أجل تبون .. معليش حبيبي حنا نناقش حسيتك متكي بمجلس الشورى وننتظر القرار منك يوم تقول ( أجل تبون ) .. بعدين لاتحسب كل الشباب زي طموحك ( النهضة ) بالله هذا تسميه شارع شجرتين ودوارين وكم مراهق ياخذون لهم فرتين ، تحسب تفكير الشباب كلهم كذا ، .. ووين الصالات الرياضية جيب لي زي ( وقت اللياقة فيها ملاعب خارجية ، وحمامات سباحة وكافتريات ) لاتجيب لي صالتين بالتغيرة ووحدة بالفاخرية خخخخخ ماتقدر تتنفس .. أما بخصوص المخيمات والبر ، فيه شباب مايبون البر ، أنت انسان تعز شي اسمه ( بر ) غيرك لا ، بتمشي عقليات الشباب زي عقلتيك ماينفع كذا .. واكب العصر .. ملاحظة : يبدو أنك ماقريت هذي ( أتوقع لو يقومون بدراسة عن الثقافة الاجتماعية والتكنلوجيا والتطور ، وجد أن أبناء هذه المنطقة الأقل والسبب أن البعض منهم لايزال يعيش على عادات أبائه وأجداده ) .

والله رحمتك

الحل اللي ينفع بك اسكن بالرياض والا اللي تبي
اللي راعي هالاشكال يطق له خيمه عندهم
اما شارع التحليه اعوذبالله الله لا يخسف بنا

ودي ادري معين تفكر

[عصير مشوي]

اقتباس المشاركة الأساسية كتبها يعجبني تفكيري والله رحمتك الحل اللي ينفع بك اسكن بالرياض والا اللي تبي اللي راعي هالاشكال يطق له خيمه عندهم اما شارع التحليه اعوذبالله الله لا يخسف بنا ودي ادري معين تفكر

ياشين البنات لاردن صدز ماتدرون عن شي وماشفتو العيشة ،
تحسبون الي يكتب مواضيع مايفهم ويحلم ، ماكتب هالموضوع الا اكيد يعرفهن وراح لهن
نبي مثل تسذا وترى كتب الرياض وجده والشرقية بالسعودية وراك ثلوثتي يوم قال التحلية
وشبه التحليه والله ياتصير اشياء بالفاخرية أقوى من الي تصير بالتحلية بس خليها على الله
بتششششش مير لاتحكمون على الشي على طول أولاه وتراه نقاش موب صدز

تحسبين شارع التحليه بوه كنايس

[عـزيـز]

اقتباس أتوقع لو يقومون بدراسة عن الثقافة الاجتماعية والتكنلوجيا والتطور ، وجد أن أبناء هذه المنطقة الأقل والسبب أن البعض منهم لايزال يعيش على عادات أبائه وأجداده

ا

الله المستعان
موب قبل كم يوم تبي تكسر قزاز سيارات العالم عشان البيبي ؟

[برفسور ملتمس]

اقتباس المشاركة الأساسية كتبها عـزيـز ا الله المستعان موب قبل كم يوم تبي تكسر قزاز سيارات العالم عشان البيبي ؟

هههههه أما الرد ..
يبدو أنك ماخذ فكرة سيئة عن شارع التحلية " وهذي مشكلة " الشارع مخصص للشباب الواعين ، يكون مجلس لهم يمارسون هواياتهم بحدود الأدب يالفطين ، وليس عشان يتمنظرون ويتميلحون ويحطون أرقام البيبي والكلام الفاضي هذا، وايش علاقة الموضوع هذاك الي كان بخصوص ( تعليق رقم البيبي وعادة سيئة تشوفها بجميع الجنسين وفي جميع المناطق ، في موضوعنا هذا !!؟ ركز أولاه المره الثانية ولاتلف قبل العاير ) ..،