[الضاري]

بسم الله الرحمن الرحيم

***
مقتطفات من سنترت الأولين
ومثل ما قال المثل
فتشبهو إلم تكونو مثلهم *** إن التشبه بالكرام فلاح
ومع أول سربوتين للشلة الكشكول ..

جـلـوكوز ـ سعفة

يالبي قلوب هالثنين

...

أتركم مع النشرة الموجزة وأنتم حللو المواقف
وأكتشفوا اسرار هالمواضيع << أحلق عيني أن ما دخلو على ملفاتهم ياحيات الشرافة

إلى >> أخلص علينا أولاهـ

هيلا هب هذا هو ألو الموضوع
جلكوزا

اقتباس المشاركة الأساسية كتبها جـلـوكـوز ^^^ كل الهذرات اللي فوق تراهن مقدمات للموضوع بتاعي فنرجو منكم التسليك تخيّل تقول لك امك وشلون نزوجك وانت تسذا ، تصدقون انقزت مر بتسبدي عجزت أهضم الكسحه لا صدز تخيّلوا >> حطوا سحابة فوق روسكم وتخيلوا كيف راح أواجه المجتمع بدون زوجة؟ كيف أدخل العثيم والنخيل؟ كيف من يغسل ويتسوي خلاقيني؟ كيف أمنع التدرِّبي من على السرير علشان ما أمسط على الأرض ذذ ، كيف يجين ورعان و ورعانات؟ كيف وكيف وكم من كيفات لن تتحقق الا بوجود الزوجة على طاري الورعان تصدقون منوّل يلعبن علينا الحريم ويقولن البزارين نجيبهم من البقالة >> وحنا ياويلي على الشيلة علطول نصدق << قل أنا مهب حنا عاد يوم كبرت شوي وعرفت إن المره تحمل قلت لحدى الحريم وشلون ينتفخ بطنك قالت لي أدعي ربي إن ينتفخ بطني ثمن ينتفخ >> شفتو ما شاء الله دعاء الحريم الأولات مهب زي هالتاليات يداعن ويطاطن على غير سنع << مصدق عاد يوم كبرت شويات سألت وحده وقلت وشلون تضني المره يعني وشلون يطلع البزر << قرقرته واجده بلشت وشكله تقول وش هالنشبه ذا وراه متسلطن علي هي ماوده تقول انهم يشقون بطوننا تخاف أشق بطن أحد أو انه ما وده تخوفن ومير تقول لي إن ربي يخلًي خشتي (اثمي) كبيييرة هآآآآآآآلكبر ثمن أكح كِح ثمن يطلع << أجل هي حبة رز غاصتنّبه وأنا مازلت على نياتي وتراي للحين ما أدري وش السالفة << اللي يعرف يفيدنا عبر الرسائل الخاصة

وشلون يضنن الحريم ما صدز قالت
وحدة نبيض ثم نرقد عليه اسبوع وتفقس ولد

ــــ

صح الموضوع ..

اقتباس المشاركة الأساسية كتبها جـلـوكـوز 2 ومرت(ن) معزومين عند اعميمتي واهلي الله يهديهم ملّغوه شوي وسهروا (أبطوا ما مشو) يوم بديت أنود والله واشوف هكالكنب الظاهر انه توهم جايبينه بقراطيسه يجنّنن يصلح منام للمعرسين وأدبخه نومه الين مشوا اهلي ويوم قومت الله لا يوريكم واشوف الكنب واثره يرطش صار به بقعه كبر اقريح ابو زنّه الطامة الكبرى يوم جيت أبركب السيارة شافن اخوي وشك بالمشية >> معروفه مشية وشسمه ذذ قال ونا اخوك وراك ما تركب بالصندوق أزين لك وأدفا لك مداخله >> تراي انا مسميه سروال ام ناصر لان ناسي اسم المرأه اللي تخيطه

ههـ

أجل أركب بالصندوق وش قاسي القلب ذا

ـــ

صح لسانك وبدنك وفسقك وأنت كلك لو أني ما أعرفك واجد

اقتباس المشاركة الأساسية كتبها سعفة يوم صار نص العصر من هكاليوم وانا تفحيط بالحوش والله واشوف عيال خالي داخلين ضايقن صدورهم يقولون تشششششش تشششششش تششششششش قلت لهم وراه ،،،،، قالوااا أبوك عند البابــ عاد انا قلت مثلهم تشششششش واااااااوكـ والله واطلع واتكي مع ابوي وانا يقالي أنواع البرائة وابوي ماغير هواش وماغير يردد أكيد انكم موذين أكيد انكم مخربين ،، أكيد انكم قامزين وانا صراحة طول الطريق خانقتن العبرة ودي أرجع للوناسة بس راحت راحت راحت راحت ..... وطلعت راسي مع الدريشة وأنا أقول <<<-- - - تسذبتن طيبة ويـــن ايـامـنـا ويـــــــن ........ اللي قضــيــناهـا راحت في غمضة عين ......... يـامـحـلا ذكراها المنبطح وراء الشاشة (__(__(ـــــــــعــفـــة ®

وأنتم وش مسوين تقل ما سويتو شين
أنواع البرائة واااضح السعف
بوارة روابي رويبة

***
للإستزادة ما عندا مانع كلن ينهب هالموضيع ويلزق
ويحط لنا تعليقآت طيبة تحفزهم على الإقدام

حياكم البارئ تحيات قليبي الضاري " واحد وردة وفيس ودمعة لروح الموضوع .. .

[ولد بريــــدة]

هههههههههههههه

مشكور ياضاري ويا سعفه ويا جلوكوز على هالموضوع الاكثر من رائع ..~

وؤآصلوا ونطوا اوووم الفواااصل ..~

[الضاري]

اقتباس المشاركة الأساسية كتبها سعفة هع الهعات الســــــــــــــــلام عليكم ## الطريقة الأولى ## ^^ التقبيص ^^ وهي أنك تجي مطلدزن الارض وتقبصه مع اليمين ثم تهج وترجع ثانية ارتداد وتقبصه مع اليسار ثم تهج وعلى هالحالة لمااا انه سلمك الله يدوخ الخروف وأنت مستمر على هالحالة والتقبيص حتى يتخدر جسمه وتكمل وانت مرتاح بالتقبيص حتىىىى يموت الخروف لأنه يبي يصير جايه نزيف داخلي من التقبيص ثم تتوكل على الله وتقشره ## الطريقة الثامنة ## ^^ الانتحار الجبري ^^ الطريقة سهلة وسريعة المفعول ونصيحتي لكل العجازين يسوونه وطريقته انكم اتجمعون على الخروف وتحاولون تساحرونه أنه يرقااا بالسطح وتقولون له ياحبيلك حنا بيوم هالعيد نبي نلعب ضومنه والسلم والداب نبيك ترقى معنا تلعب ثم إذا رقى الخروف معكم حاولو تقولون له به شات عند جيراننا وراه ماتويدز عليه وتصفر له همن تجيبون السلم وتخلونه يويدز وأنتم هالحين فرصتكم دفوه علشان يمصط بالارض ويموت وهذي انتحار يحبه قلبك بس تنزلون تحت وتقشرووووونه

صح الطرق .. .
والله يالي بالأحمر بالحالة

اقتباس المشاركة الأساسية كتبها سعفة - - - - - - قبل وصول البيت بكيلو - - - - - - أنا / يووه يووه ميخالف أفك باغة الفيشار آخذ واحد أمي / مهيد ،، والله ما يطب ايدك ... وين العشرة الي عطيتك أنا / والله اني شريت به فصفص وبليلا من راعي العربية عمتي / ياخيتي عطيه من هالفشار كثر خيره ألي ودانا أنا / إيه يا عمتي يا خلفهم أمي / والله ياوخيتي جايبتن هالفشار للبزران ما دريت ان هالشايب يبي أنا / إيه يوه والله إن العيال الكبارين يآكلون فشار هكليوم أمي / خذ عساك للي ما ياويلك - - - - - داخل الصالة - - - - - - بزر رقم 1 / يوووه آآآآ آآآآآ آآآآآآ (يصيح) وراه ؟؟؟؟ معه فشارين وانا لا أمي تنادي بزر رقم 2 / تعال منين لك الفشارين بزر رقم 2 / والله انه هذا فشار أنتي معطيتن إياه وهذا شاريه بقروشي من البيقالة أمي / خلاص يا ( بزر رقم 1 ) شاريه من قروشه (( وأخيرا اقتنع )) أنا / يووه يووه .... (( خايف )) ميخالف آخذ من الريكو الي بالباغة أمي / لا لا فرقعين و مهيد ... هذا مغبيته لخالتك لا جت لمنا أنا / زين زين

والله يا الليز الحار بالدماغ
بعذره والله أحس أن سـ لمة
الشايب سارت تقل تتدليعة
من شان الفشفش >> متعوب عليه من شآن

...

ترقبوآ عضونا القآدم << أرميك يالحماس ذذ

خن نفرقع نصلي أبرك لي والله

سي يو تمو رو

برب

[روقــآن]

اقتباس وابوي ماغير هواش وماغير يردد أكيد انكم قامزين

تبي تقنعنا إنك طويل يا سعفه وراعي تقميز جدران ذذ

الضاري مشكور على الموضوع وعلى فكرة حياة تكتب تسذا مهب تكتب حيات

[الضاري]

رقآن وراه ما تبلع العافية
ورنا ورنا موضوع موضوع
زنقة زنقة وأن رد صحح

***
أغدين أخليك العضو الجديد أصبر بس شويات روقآنهوه << loading

[غربة غريب]

سئلت واحد ممن سجلوا في بريدة ستي قبل أكثر من عشر سنوات

قلت له مازلت تكتب قال لا وناسي بعد عضويتي وشي هي

ثم سألني هل السعفة مازال يكتب هالمنسم !؟

قلت له لاشف سعفة ولا عشة


على العموم شكرا ضاري على التفتيش والنخجره بالمعرفات بس لاتقربن

[الديزلية]

هذا الموضوع ولا بلاش
كذا تحي القسم يا خلفهم
الى الامام الى الامام
وانك تبي فزعة نتصيد معك ما ورنا الا االدجة

[الضاري]

اقتباس المشاركة الأساسية كتبها ولد بريــــدة هههههههههههههه مشكور ياضاري ويا سعفه ويا جلوكوز على هالموضوع الاكثر من رائع ..~ وؤآصلوا ونطوا اوووم الفواااصل ..~

تسلم على المرور وأما تشكر جلكوز ـ سعفة فما الظاهر يشوفونك ...

اقتباس المشاركة الأساسية كتبها غربة غريب سئلت واحد ممن سجلوا في بريدة ستي قبل أكثر من عشر سنوات قلت له مازلت تكتب قال لا وناسي بعد عضويتي وشي هي ثم سألني هل السعفة مازال يكتب هالمنسم !؟ قلت له لاشف سعفة ولا عشة على العموم شكرا ضاري على التفتيش والنخجره بالمعرفات بس لاتقربن

هلا والله بالغربة وراه ما نقربك وش عندك وش لا فز أنت
أفصح عما بجعبتك أهيا الغريب.. .

"
شكراً على مرورك أخي العزيز الغالي

اقتباس المشاركة الأساسية كتبها الديزلية هذا الموضوع ولا بلاش كذا تحي القسم يا خلفهم الى الامام الى الامام وانك تبي فزعة نتصيد معك ما ورنا الا االدجة

هلا بك والله الديزلية هلا والله أبو درع ,,
تسلم والله يالغالي ألا وش رايك بالتوقيع الي بتاعي أحس أني أطلق واحد ذذ
\
نصيد بس لاتنسى الخرازة يابو وابد من الموتر والفرش والخلاقين والطبخ ..

[*ذيب الليل*]

++++++مشكووووووووووور يالضاري على الموضوع+++++++

[مرفــأ]

+مشكووووووووووور يالضاري على الموضوع

[الديزلية]

والله ودي بالصيد
بس وشوله خرازه ولنتب لاقي الا الضبان
ذي ما يبيله الا سيقان

[الضاري]

العضو المستضاف حبيبنا بصووت عالي يملئ أرجاء غرفتنا السواليفية العضو العضو العضو برنس بليدر حالياً
فحياه الله بين أيديكم فاستلمو وأنظروا إلى أسطوريت هذا العضو قصدي المشرف <<

..

أنا من نفسي هذا الفيس شوي عليه بوايدآآآآت أوي أوي أوي بالمرة
والله من العلوم بها الآدمي بس ترفقت عليه لإنو مثل ما قلت غآلي << ومشرف بنفس الوقت

فإلى أولى البهرجة العصرية ذذ
هيييييييييلا هوووووووووب

اقتباس المشاركة الأساسية كتبها Bleeder تحصل أحيانا بعض الكلمات الهاجه ، مثل مرة من المرات كنت أبقوله ، أقدر أروح لدورة المياة، ولعلي قلبت الضمير وقلت له تقدر تروح لدورة المياة عاد هم يسلكون لنا ، يدرون إن الطلاب ماحولك أحد ..

والله من الجود بس أهم شئ أنك طلعت من سالماً برنسنٍ
والله يحفظك دين ودنياً وآخرهـ :D

اقتباس المشاركة الأساسية كتبها Bleeder ماقعدنا شوي ولا بديت أفكر .. منهوبه أوديه للوكاله ولا لحدى هالورش يوم طفيت السيارة راح صوت الصفير .. همن شغلته مرة ثانيه برضه مابه صفير بس يوم شغلت هالمكيف طلع الصفير راح على بالي إن المروحه خربت بدت الهواجيس من جديد طفيت هالمكيف ومشيت مع السباق وصدري ضايق بالحيل < زاد وشوله تعدا السرعه القانونيه يوم قضا هالسباق وركب معي هالخراب < حمدزن عليه قال لي : بالله شغل المكيف .. .. < اللحين هو مخربه ويقول لي شغله .. هزلت والله المهم الرجال محترم ومارديته .. شغلت المكيف وطلع الصفير من جديد فتح فتحه المكيف واختفى الصفير وين راح له معين هج وين اندزلع هالصفير أثرة هالولد الله يصلحوهـ ماسكر فتحه المكيف زين خلى جزء بسيط مفتوح ومخليه يصفر علانا عدّا ذاك اليوم على خير ولله الحمد والمنه مارحت لا لورشه ولا وكاله ولا يحزنون مايستفاد من الموضوع 1/ لاتعدا السرعه القانونيه بموترك 2/ الموضوع كله فوائد 3/ بمان الله

ولو أثرك تحافظ تراي ما أحللك تبيع الموتر إلا ونت معطين خبر << إحلق عيني أنسانه دري عنك :
أحلق عيني أنكان بوه ماستفاد بس
ما نقول إلا سلك يا مسلك

اقتباس المشاركة الأساسية كتبها فارس 7 يا انت قديم .. أنا مثلك نفس الحالة .. لا نغزن احد انز وأشهق .. عاد العيال مستلمينن .. والحين تركوه .. جدي [ حفظه الله ] تسد طحت به مع خوياه خارشينه بالنتغيز ... يانا بتلت اضحك ..

وشي الحالة ممكن تعطينا موجز عنه بليدر
هذا الرد مع الحالة النفسية لإخينا بليدر
وها أحد النشاما يعطيه وصفة علاجية لضبط
تأزم وتضخم حدوث آوان الحالة عندهـ .. .

الله يشفيك يا حلالي .. .

اقتباس المشاركة الأساسية كتبها Bleeder ^ قالي / بخبز ولا بدون خبز أنا / بدون خبز <== مضيع الطاسه هههه هو / بكيس ولابدون كيس .. أنا / لا خله بكيس .. هو / بفلافل وبدون فلافل <==تقل طوله أنا / اممم خله بفلافل هو / يا عم بدك نحط الفلافل بالكيسه .. أنا بابتسامه صفراء <== يسمع بالروايات / لالا حطه بالخبزة <== توة يفطن وتوي أنتبه إن شغل التسليك اللي قبل شوي حايقن أم الدعوى عقبه بديت أركز معه ووش هو يقول ..المهم مشت هالسالفه .. يوم انتهى من تلفيف الخبزة حطه بوسط كيسه ومسك طرفه وحلته بوجهي .. وأجيك أنز وارجع لي مترين ورى ويكر علي ضحك هو وأخوياو والله من القلق بعد تشوف خلق الله يخرشك وأنت مالك خلق تهرج .. وأجيك آخذ الكيسه منه وأقوله هذا وجهي إن جيت لمك مرة ثانيه ياوجه الحصني .. وآصل ثلاجه الببس وأقول لحداهم بالله واحد ديو .. ويجيك يعطين اياو من تحت (( يعني من داخل القزازة )) يارب إنكم فهمتوة ايه أقولكم ويمده لي من عند تحت وأمد يدي أباخذة وأمير أضرب القزازة ،، جانا ذا وكمل الناقص ..

ههههههـ
ههههههـ

,,

ترقبو عضويتنا القآدمة وبكل قوة وبكل شوق وحضور الحزم

أحبتي لا يخفا عليكم أني أضطرب عندما أبحث عن خبايا أخواني

من الأعضاء الكرام وما يشق علي لإن هذا كمثل أسرار وأحداث

طوا عليه الزمن ونبش أوراق الماضي من المحازن والآلام الموجعة

بي أنا قبل أن تكون لهم ... فأستبيحكم عذراً إن لم أستطيع إكمال الموضوع

بالصورة القوية بين قوسين أبي واحد يساعدن ويراسلنن على الخاص ولا

يحسبونه يبي يقول معليش ما أقدر أواصل أحلقو عيني أن ما بتلت

تحيآتي الضاري ..:::|||

[الضاري]

هلا وغلا بذيب الليل لعيونك الموضوع .. فا فل حجاجك يا حلالي ..

أستاذة مرفأ لا تسسوي نسخ ولصق خلك واثق وأكتب من تعبيرك .."

الديزلية . والله ليته تجي وأنسوي طليعة بس ورنا سيقانك الحلوات <<

[قــــراقــــوش]

اقتباس المشاركة الأساسية كتبها الضاري هلا وغلا بذيب الليل لعيونك الموضوع .. فا فل حجاجك يا حلالي .. أستاذة مرفأ لا تسسوي نسخ ولصق خلك واثق وأكتب من تعبيرك .." الديزلية . والله ليته تجي وأنسوي طليعة بس ورنا سيقانك الحلوات <<

الضاري أنصحك تعدل الخطأ قبل لايطلع عليه الاستاذ مرفأ او يبي يسويلك استلمت