[Moonlight]

كليات بريدة الأهلية ، قدمت عليهم الترم الأول من السنة هاذي اللي راحت
والحمد لله مستواي عالي في تخصصي اللغة الإنجليزية ، ومعي التوفل بدرجة حلوة
وعندهم احتياج ، على طول العميدة ( د. دعاء ) قبلتن ، وقالت تداومين من بكرا ،
وجيت من بكرا وقلت وش ادرس ، قالوا تونا ما وزعنا الجدول ، اليوم اللي بعده
" يا جماعة وش ادرس ؟ " قالوا ما ندري للحين " بس ادخلي على الطالبات ودرسيهن
اي شي بالإنقلش "، دخلت على الطالبات وشرحت لهم قواعد وشوي محادثة
( ملاحظة : الطالبات مداومات من أول أسبوع ومتحمسات ) ، ومن بكرا نفس الحكاية
ما فيه جدول بس ادخلي واشرحي أي شي بالإنقلش ، دخلت على مستوى أول وشرحت
لهم المضارع البسيط وأنا قاعدة أشرح دخلت رئيسة القسم ( الإنقلش ) وأستاذه ثانية
قالوا يبي يقومون الشرح ، قلت حياكم ، وشرحت للطالبات الأصوات الفاول القصيرة والطويلة ،
بعد المحاضرة قالت لي رئيسة القسم أن الشرح زين ، وطبعا للحين مافيه جداول ، بس عطون خبر
أنه احتمال أمسك الترجمة وادرسه وقالوا " شوفي أي منهج يصلح" ، وأخيرا
ارتحت وعرفت وش راح أدرس ، وقررت أن كتاب " Translation Problems and Solutions" هو أفضل كتاب ،
بس قلت لازم المحاضرة الأولى تكون تعريف بالترجمة كعلم وأدوات المترجم وأشياء زي كذا ،
فأخذت من كتاب " مقدمة في الترجمة "وصارت أول محاضرة لي كاملة ، جيت للدوام قالوا ما فيه محاضرات اليوم
لأن اليوم احتفال بالطالبات الجدد ، أخذ الإحتفال تقريبا ساعتين ، والحضور للاستاذات إلزامي ،
بعد الإحتفال قالوا فيه إجتماع مع العميده ، أول من جاء للإجتماع أنا ، وطبعا بمكتب العميده ( كان بالمكتب كيك وفطائروحركات الإحتفالات
: طبعا العميده والأستاذات غير السعوديات
هم أعضاء الحفل المصغر هذا في مكتب العميدة ومب لازم الأستاذات السعوديات يعبرن ) ، وبعد ما إجتمعنا كلنا سعوديات ومصريات " وثنتين سوريات جدد"
قالت العميده " أن عدد المدرسات للإنقلش كبير ولازم ننقص ثنتين !!" ، سؤال " شلون صار العدد كبير فجأة ؟! " لأنه في ثنتين سوريات جدد
" يقولون معهن ماستر" ، والحل بسيط
نبعد السعوديات ، فوقع
الإختيار علي أنا وعلى سعودية ثانية ( الرابعة على دفعته ) ، طيب سؤال ليش أنا وهي ؟؟
الجواب بسيط : السعوديات 5
وحده: له سنه عندهم فصعبه شوي تفصل فجأة
الثانية: له وااااااااااااااااااااااااااااسطة
الثالثة: أنا ( مافيه واسطة بس ممتازة بالإنقلش ف سهله تتقلع )
الرابعة :زميلتي الرابعة على الدفعة ، ( أيضا نفس مميزاتي من قل الواسطة والإمتياز )
الخامسة : ما شفته ابدا لأنه ما داومت الأسبوع الأول ، ( يعني إلى هالإجتماع وهي ما داومت )

وبهذه الطريقة الظالمة تم استبعادي أنا وزميلتي ، لأنه هناك أجنبيتين سوريتتين أولى منا في وطننا
ولأن الباقي السعوديات صحيح أقل منا مستوى بس معهن واسطة ، ولأن الطالبات آخر شي يفكرون فيه
ولأن الدكتور الشتيوي مايرد على الجوال ، " الجوال أخذته من قريب له ومتأكده أنه له "

وانتهت فصول المهزله ،
طبعا العبرة أي وحده وده تتوظف عندهم لااااااااااااااااا تداوم يوم بدون العقد مهما كان الأسلوب
غااااااااااااااااااااية في اللطافة في البداية.

[ربى نجد]

الله يكون في عونك,, حال بلدنا يكسف للاسف !!!
لكن لا تسكتين أشتكي لديوان المظالم ينصفونك من تالي لهم تغيرات إيجابية !
ما أقول تغيرات كبيرة لكن ملحوظة ..والله ينصرك والحق معك. دعواتي لك وبالتوفيق.

[نايف123]

شوفي أنا أدرس في هذه الكلية وهدف هذه الكلية إبعاد السعوديين وتفضيل الأجانب بكل شيء مثل ما تعرفين كلية أهلية تبي تدفع رواتب برخص ومن المفترض تقدم شكوى على هذه الكلية بسبب عدم السعودة وهو المطبق حاليا تخيلي عندنا بالكلية عدد الإداريين والمدرسيين تقريبا 60 سواء أكثر أو أقل كلهم أجانب وفي بعضهم أعمارهم من 60 وفوق كذلك عدد بسيط من السعوديين وأنا بإذن الله سوف أكتب موضوع عن هذه الكلية التى تشبع الناس بالإعلانات والمدح وهي العكس

[محمد 777]

بلدنا للأجانب والمواطن آخر أهتمام حكومتنا التي لم تحاول الأصلاح بل هي من غضت الطرف حتى أزداد الأمر .
فساد في التعليم وفي الصحه وفي الأداره والأقتصاد . فوضى باالأنظمه وفي كل شيء حتى أصبحنا دلوخ من الدرجة الأولى .
أحتسبي الأجر أختى وعلينا كأمه بالدعاء والناس نيام بأن يصلح الله حال مسئولينا ليصحوا من سباتهم الذي طال .

[م ع م]

الفساد ((المرض)) من قديم من عشرين سنة واكثر وعلاجة ياخذ وقت اذا فية علاج افهم يافهيم

[أوصاف]

قولي حسبي الله ونعم الوكيل

المفروض اذا قبلوك بالبدايه مايستقبلون احد غيرك

لكن هاذي أهليه ماعليهم شرهه

جامعة القصيم يوظفون أجانب وحنا جالسين

مادري وين السعوده؟؟؟ 

[دربك تدله !]

جامعة القصيم ياكثر الاجانب فيها !
و لا اجنبي وماسك قسم اداري

يا سلام !!


الله يعوضك خير افضل من الوظيفه هذي

[ميمو القصيم]

في هذا البلد الافضليه للاجنبي بالتوظيف

[بنت كفو]

اقتباس المشاركة الأساسية كتبها أوصاف جامعة القصيم يوظفون أجانب وحنا جالسين مادري وين السعوده؟؟؟

ــــــــــــــــــــ

[صوت البحر]

للاسف ان الجامعات السعودية تفضل الاجانب مع العلم ان السعوديين لديهم طاقات وامكانيات ولله الحمد لكن الاجانب هم من يتسبب في استبعاد السعوديين من هذا العمل وحتى المستشفيات الاجانب هم الاساس وابناء الوطن يتم الاستخفاف فيهم في التعيين لدرجة انهم تم توظيفهم في المستوصفات الخاصة ؟
وكما تعلمون ان المستوصفات الخاصة رواتب خايسة ومديرك اجنبي يهينك ويتلفظ عليك ودوام فترتين وخصم في حالة الغياب كان بعذر او غير عذر وايضا عدم الزيادة في الراتب وفي اي وقت يقال لك مفصول
كما يحصل في المدارس الاهلية الي تقوم بالتلاعب في الشباب السعوديين وعدم احترامهم وتقديرهم

[صوت البحر]

توكلي على الله واتركي التفكير في هذه الجامعة الاهلية
وبعون الله يكون التعيين في الجامعات المعروفة
عليك بالدعاء والصدقة والبحث عن الافضل

[دنيا السراب]

هههههههههههه

وش ترجون من ورى هالكليـه

روحو شوفوا طاقم المدرسين للكليه حقت الطلبه

اغلبهم اجانب من فئة ابو ريالين

وعشان كذا تشوفون مخرجاتهم العلميه فاشلـه

[عزتي في شموخي]

يقلون السعودين مايبون الشغل وويطلعون مليون عيب علينا

حتي يكرفون بالشغل لما تكره

والسبب منهم

[أبورامي]

الله يعوضك خير
الأجانب مفضلين على المواطنين منذ قرون