[قمردين]

بسم الله الرحمن الرحيم

~ للعائلات فقط ~
الجملة اعلاه تؤرق كثيرين من الشباب ليش ؟

بوجهة نظري الشخصية ان اغلب من تؤرقهم تكن نواياهم سيئة

خلوكم معي:

الجملة هاذي وين تلقونها؟

1/عند ابواب الاسواق.

الشاب اللي يبي يدخل السوق بلحاله وش يبي فيه؟
بصراحه 99% هدفهم الغزل ومطارد بنات خلق الله والتميلح..

اما عذر البعض ابشتري اغراض.. فأغراض الشباب غالبا ماتباع خارج السوق بمحلات مستقله
بعيدا عن الزحمات ...

قبل اربع سنين تقريبا رحت لسوق الفيصليه الصباح ..كنت طالعن من الكلية وقالي واحد قوه للفيصليه
قلت قوه ماورانا شي ابشوف وش عند هالعالم...طبعا كلها شباب وبنات..لكن فيه ملاحظة

كلهم مجتمعين بالكافيات والمطاعم.. وين اللي رايحن يتسوق ويشري اغراض؟

هذا دليل على نصبه وكذبه.. وكذلك شاهدت هالمشهد بالراشد بالخبر.. والله ياجماعه المحلات فاضيات
الشباب ماغير يتسحبون بالسوق .. والغريب ايضا تلقاهم متزاحمين عند محل اتصالات

والمشكلة اكثر ماهنا محلات الاتصالات بالشوارع

ومما يدل ايضا.. على كذب هؤلاء الشباب .. ان الزحمات يوم الاربعاء والخميس ...

على بلاطه.. هدفهم مغازل البنات


2/امام المنتزهات العائلية


وتجد هذه الجملة ايضا امام المنتزهات العائليه...

الشاب اذا دخل المنتزه بلحاله وش يبي فيه؟

انا دخلت منتزهات واجد.. والله ما القى شي يناسب الشباب ..يعني جلسات والعاب اطفال.!!

لكن الشاب هذا مستحيل يجيب اهله للمنتزه.. يبي يدخل هو بلحاله.. ليش؟؟

عشان يغازل..والتعميم يقتضي التغليب



نكتفي بهذا...

وين نروح؟


سؤال يردده كثير من الشباب...

اذا جينا للصدز.. ترى الشباب بهم دلع.. يبون اي شي على كيفهم..


الاماكن اللي يروحون لهن الشباب..
أ> الدائــــــــري الشرقــي أيام الاربعاء والخميس تطـــعــــيس وناسه

1/الاستراحات والشقق...بصراحه وناسة جلساتهن.. عند التلفزيون وشاهي وان كان به بلوت ..ويالله من فضلك
ازين من النسحب بالشوارع.. صرف بنزين ودوخة راس..


2/المقاهي...برضو مكان مناسب.. بس البعض يقول شبهة ومدري ايش.. والله الشبهة وقلة الحيا والمصاخة
هو التسحب بالاسواق والتميلح عند البنات..


3/صالات الالعاب .. بلياردو..تنس.. سنوكر...الخ...هاذي اماكن مخصصة للشباب وفي كل اغلب الدول.. بس الفرق ان برا المملكة تلعب مع بنت وهنا مع شنب.. .. وهذا اللي مايبيه اكثرهم


4/الكافيات ومقاهي الانترنت...هاليومين بكل عاير كافي..والجلسة والله بالكافي ترد الروح اذا كان معك اخوياك.. واخذتوا لكم قهوة ولا شي...وناسة والله.. واللحين اتجهت الكافيات ..لعرض مباريات الدوري الاوربي.. وبعضهن حاطن لك قناة افلام..يعني تقدر تضيع وقتك..


5/الكشتات ما هنا ازين من كشتة العزوبيه...اذا جا عقب صلاة الاخير يوم الاربعاء..ولم عفشك والثمامة خذ لك شوطين مطاعس..وعقبه انزل وشب ضوك واطبخ عشيك...وان كان معك معسل او انك راعي تتن ..والله وناسة..

6/المخططات..برضو الجلسة فيهن حلوة.. شاهي وبلوت ..وان كانه المخطط فيه نور.. عض الثوب وطق الكورة
واخبر فيه مخططات عند الفحص الدوري بهن استعراض دبابات ..

هذا اللي جا على بالي ..

طبعا اللي تقرون فوق.. بديل للي يتعذرون بللعائلات فقط.!وهم غالبا من الغير متدينين..

وادري ان الافضل الالتحاق بحلقة تحفيظ او مجلس ذكر



***************

خلك معي ايها الشاب..

ندري ان فيه عوائل مارزقهم الله بشباب.. يعني كل روحتهم وجيتهم مع السواق..ويروحون لمنتزهات عائليه خاصه..طبعا غالبا ماتكون فيه هيئات..والحريم اذا راحت ودهن ينبسطن ويرتاحن نفسيا..هل ترضى لأهلك ان واحد سربوت يوذيهم؟

تبي تقول .. لا والله ..انا ما عمري خليتهم بمنتزه بلحالهم.. ولا ارضى . وهذا شان كل شاب

محد يرضى لأهله الازعاج..تذكر هاللحظات.. وتذكر انهن خواتك بالدين.. وربما تنطلق منهن دعوة..ودعوة المظلوم ليس بينها وبين الله حجاب،تفتح لها ابواب السماء السبع.. ويقول الله.. وبعزتي لأنصرنك ولو بعد حين..

وش تستفيد لو دعت عليك وحده من اللي توذيهن بالشوارع او المنتزهات.. لو دعت عليك بالشلل.. او العمى .. وربي استجاب.. وش تبي تسوي؟؟

ولاتنسى ان الجزاء من جنس العمل...ربما بكرا اذا كبرت وجاك بنات تلقى واحد يوذيهم مثل ماكنت توذي بنات خلق الله!
***************


اخوكم قمردين ..

[جرح الكرامة]

جزاك الله خيرا ...