[قلم ناشف]

السلام عليكم و رحمة الله و بركاته هلا و الله بعيال علي :i128



المشائخ ثلاث أنواع :

1/ المشائخ كبار السن : و هؤلاء لا يحتاجون إلى شرح أو تفصيل .

2/ المشائخ الشرعيين : و هؤلاء هم رجال من رجال الأمة الإسلامية يمتلكون حصيلة علمية تؤهلهم لهذا اللقب و هم و الحمد لله كثارين مثل :

الشيخ عبدالعزيز آل الشيخ ، الشيخ عبدالله بن جبرين ، الشيخ عبدالله المطلق ، الشيخ سلمان العودة ، الشيخ عبدالله الجعيثن ، الشيخ سفر الحوالي ، الشيخ عبدالكريم الحميد ، الشيخ مساعد المديفر ، الشيخ صالح الفوزان ، الشيخ صالح السدلان ، الشيخ ناصر العمر و الشيخ أحمد الصقعوب .... الخ

هذؤلاء هم اللي عليهم العلم و إذا هرج أحد منهم ماودك يسكت من زين هرجه .



3/ المشايخ البزراين : هذولاء عاد لهم قصة لحالهم ودك إذا شفت واحد من هالمشائخ البزراين ودك يصير معك حلاوة بمخباتك عشان تفرحه به :D .. يعني عادي ولد جيرانكم اللي كل عمره يفحط عند البقالة يطلع أكبر شيخ من حقين (النوع الثالث) ،،، عادي تراه أي واحد يقدر يصير شيخ و إن شاء الله يطلع كتاب أسمه : كيف تكون شيخاً عليك العلم و أنت ما خط شاربك ..

و كتاب ثاني يبي يطلعه واحدن من العيال أسمه : كيف تصبح شيخاً في 3 أيام فقط ، و بكتب تحت الكتاب : الكتاب الأكثر مبيعاً في العالم



عاد أنا أحب لكم الخير مثل ما أحبه لنفسي ، ودي أفيدكم و أنصحكم وشلون الواحد يصير شيخ و هو بزر تراه المسألة عادية يعني موب لازم تصير لحيتك بيضاء عشان تصير شيخ يعني عادي تصير شيخ و أنت للحين طالب في الثانوية و فيه قول ثاني يقول عادي تصير شيخ و أنت للحين ما بديت تلبس شماغ .......



الطريقة بالتفــــــصيل :





1/ يجب عليك أنك تروح للجردة و تدور لك عند الشيبان أقدم شماغ البسام الطبعة سوداء و كان به شماغ بدون طبعة تراه أحسن بعد .

2/ انتبه و حذاري ثم حذراي أنك تكوي الشماغ و لو قدر الله و حصلت شماغك مكوي و أنت ما دريت على طول أنحر السيارة و حط تحت المرتبة و أجلس عليه لمين يغدي سنه عالكته بقره همن عاد دور لك طاقية ارتفاعه 2 سم يعني يالله تسقط براسك .

3/ دور لك نعال زبيريات و إن حصل يكونن قديمات شوي يعني آكل عليهن الزمان و شرب و عادي تلقى زبيريات من هالنوع عند بعض الشيبان اللي يصير فلوس و عنده زهابين زبيريات .

4/ إذا كانت سياراتك فورد و إلا كامري جديدة فيلزمك تدفه للمعارض و تدور لك هايلكس .

5/ حذاري ثم حذراي ثم حذاري أنه يغريك الشيطان و تجلس تضحك ، فالشيخ ما يضحك لو قدامه عيد الدوسري حتى لو يدغدغك أحد بكريك لا تضحك ،، يعني إذا صرت عند اخوياك خلك دايم تقل ميت لك أحد طبعاً هذا من تأثير مأسي المسلمين على قلب الناصع البياض .

6/ لا تتكلم كثير و لا تدخل مع أحد بسواليف جانبية ما عدا سواليف المجاهدين في جميع الأراضي و خاصة المجاهدين اللي عندنا و تكلم عن المجاهدين و يقالك خابصهم خبص ، و كثر من قولة واحدن من العيال هناك أتصل علي و قال لي .. يعني يقالك مهم و تعرف ناس مجاهدين و أذكر لهم بيانات موقع الجهاد مدري وش أسمه و الله و عليك بالهرج الكبير و تكلم بالتواريخ و قلهم عن سنة التسيعنات و الثمنينات يوم يجي الظاهر ببرس هو و ربعه يبي يهاوشونكم تراه مثل هالهرج يخلي الناس تصدق أن عندك سالفة .و لا تنسى حديث : أخرجوا المشركين من جزيرة العرب و أنه ضروري يصير فيه جبه هنا عشان نطلع المسلمين و وجوب مناصرة المجاهدين في السعودية .

7/ إذا جاء طاري الدولة و إلا شيء أبد لعنهم و تمتم بكلمات يقالك مالك خلق تسمعهم و خل هذؤلاء خونة و من هالهرج الرخيص و قل لك كمن آيتين عن الحكم بغير ما أنزل الله .

8/ إذا جاء طاري ولد العودة (سلمان العودة) على طوووول قل بصوت عالي : لا حول و لا قوة إلا بالله العلي العظيم ثم خذ نفس عميق و قل : القلوب بين أصبعين من أصابع الرحمن يقلبهما كيف يشاء .. همن عاد أستلم سلمان العودة و لا تبقي به شيء قل انه ما عندك أحد و لا عنده سالفة و أنه خذل الأمة و شكلنا نبي نطلعه عن الإسلام بعد كم يوم ، تراه التكفير لازم يصير عندك زي السلام عليكم دخل عالم بالإسلام و طلع عالم من الإسلام خلك سنك معك مفاتيح الجنة . و تكلم عن الشيخ سلمان أنه قبل السجن كان ما مثله بس بعد السجن طلع موب مضبوط و إنه يحلق لحيته ...منول لحيته طويله و الحين خليجية و توقع أنه بعد كمن سنه يبي يخليه سكسوكه و من هالحكي .

9/ أي شيء تشوفه قدامك قل هذا حرام إلا عاد الصلاة و الأشياء اللي ما تقدر تخليه حرام ،،، يعني إذا شفت ناس مبسوطين يضحكون قلهم الأمة تقتل و أنت جالس تضحكون حرام عليكم ، و إذا شفت ناس جالسين عند قناة المجد على طول رح و أمسك الرسيفر و صكه بالجدار و قلهم التصوير حرام و هذي قناة لتمييع الدين و العياذ بالله ، و إذا شفت واحد معه جوال نوكيا ان 80 على طول ركبه معك بالسيارة و لا توقف إلا عند الطائر الجوال و خله يشري رهيب 2000 أو الكاتيل بس أهم شيء مابه كاميرا و لا بلوتوث لأن سبب انحطاط الأمة هو جوال رفيقك ، طبعاً العقال و الكبك ممنوع و في قول ضعيف أنهن حرام و القول لرفيقك أبو دلامه المفتي الكبير حقك .

10/ أشترك بخدمة dsl عشان تتابع أحوال المسلمين عبر المنتديات التي تخدم الأمة و عليك بتحميل الأفلام أي فلم بطريقك حمله عاد سواء صار ذبح و إلا وصية و إلا عملية اللي هو هو أنت حمله و رح لم الأفق للكمبيوتر عندهم سيديات عليهن تخفيضات أشتر لك كمن سيدي و أنسخ الأفلام و نشبهن بمسحات السيارات حقات جيرانكم لو أنت ما تعرفهم تراه هذا من أكبر أبواب الاحتساب و الجهاد .

11/ شارك بالمنتديات و خل توقيعك صورة أر بي جي و لا تدخل إلا بالمواضيع التي به شين يصلح لك و إذا شفت أحد جالس ينكت هشه و خلك عالم زمانك عندهم ، يعني أنتبه تدخل بموضوع ضحك و إلا وناسة لا لا تراه هذا ممنوع و لا نقدر نخليك شيخ إذا سويت كذا .

12/ إذا سألك أحد و قالك يا أخي أنت بس تتكلم عن الجهاد و ضرورة الخروج للجهاد طيب ليه أنت ما تروح ؟؟!

لا تختبص ترى الجواب سهل :

خذ نفس عميق .. و خل معالم الحزن على وجهك و قل :

آآآآآآآآآآآآه ،، و الله أنك وطيت الجرح يا أبو فلان :D و الله أني أتحقرص ودي أروح بس أمي حالفتن علي و أنا أكبر أخواني همن عاد طنبس رأسك شوي يقالك تأثرت .

13/ لازم تخلي بسيارتك بشت (مشلح) للحاجة القصوى . يعني خله وراء المرتبة مع عصا العفريتة .







عاد إذا طبقت الوصفة كاملة ما عليك تبي تصير أطلق شيخ ،، يعني شيخ أد الدنيا يبي يبدون ربعك يسمونك شيخ جاء الشيخ راح الشيخ و وش رايك ياشيخ و وش ترى يا شيخ عاد أنت لازم تبين لهم أنه يقالك ماودك يقولون لك يا شيخ بس لا تلزم عليهم أنهم ما يقولون لك يا شيخ ،، همن عاد أنقز لم سيارتك و طلع البشت اللي قلناه بالفقره (13) و أنفضه من الغبار و ألبس و لا يردك إلا صدر المجلس



و كذا تطلع شيء و يصير لك بيانات بالانترنت و حركات حلوة ..

و كله كمن يوم و أنت متكي بعنبر 12 بسجن الحاير أنت و مشلحك

:D :D :D :D :D


وش رايكم عاد بالدرس الخصوصي

[هولستن]

( و شكلنا نبي نطلعه عن الإسلام بعد كم يوم ):D


الله يقطع ابليسك صارت الدعوى مباراة حواري

[بلسم]

درس جدا جدا بايخ وماله أي داعي......!!!
(ولئن سألتهم ليقولون إنما كنا نخوض ونلعب قل أبلله وءايته ورسوله كنتم تستهزءون)

يعني خلصت المواضيع مالقيت إلا هذا الموضوع هداك الله..

[بلسم]

عفوا(ولئن سألتهم ليقولون إنما كنا نخوض ونلعب قل أبالله وءايته ورسوله كنتم تستهزءون)

[المسفهل]

وعليكم السلام ورحمة الله وبركاته

عزيزي قلم ناشف

أود منك مراجعة كلامك هذا .. وأحكم بنفسك في جدوى موضوعك

اقتباس و لا تنسى حديث : أخرجوا المشركين من جزيرة العرب

اقتباس و قل لك كمن آيتين عن الحكم بغير ما أنزل الله

كذلك راجع كلامك في الفقرة رقم ( 8 )


كما أني أعلم أن هذا ليس رأيك .. بل تنقُل صورة كثير من الناس في هذا الزمن
ولكـــن ... !!! ليس بهذه الطريقة ..

[قلم ناشف]

أهلين حبيبي قلبي هولستن

ههههه ،، حرام عليك تشبهنا بمباريات الحواري ،، ترى مشايخ (النوع الثالث) ما يرون الكورة و شكله تبي تصير كبيرة من كبائر الذنوب الله يستر بس

اقول هولستن
تصدق عاد لي واحد من خوياي عربجي يعني ما بوش لا لحية و لا يحزنون أراد الله له خيراً فهداه و الرجال ترك لحيته و صار بس ودك تناظره طلع وش ملحة باللحية و صدق من قال اللحية زين الرجال

المهم الرجال هذا إنتحار لعب كورة يعني كل يوم يلعب كورة و إذا جاء لمنا بالإستراحة أبلشنا و نشب بحلوقنا لمين نطب بالملعب و هو اللي يحكم و هو اللي يجيب الكورة و هو اللي يحلل المبارة بعد اللعب و كل شيء هو
يعني هو كوتيل بتاع كله

المهم الرجال فقدناه فترة مدري وين طس له الظاهر أنه طاح له بجماعة الفكر الضال خبرك هم يدورون الناس اللي توهم ملتزمين المهم الرجال ذا طب معهم بالفكر و جاء لمنا غير الرجال الاول ما غير حرام حرام حرام حرام



عاد تجيك النكته ،،، يوم طبينا الملعب أقوله تعال يا أبو فلان طب ألعب يالله اليوم يومك ..
عاد تدري وش قال سيبويه.. قال لي :

هداك الله يا قلم ناشف .... هذي من سفاسف الأمور و لا ينبغي علينا كشباب ملتزمين أننا نضيع أوقاتنا في لعب الكورة ..... عاد تصدق لو معي الكوره سان أمحطه بوجهه ،، وش عنده أبن عثيمين على غفله اللي يسمعه يقول هذا ما غير يتسدح عن كتب الإمام أحمد و يحفظ سنن البخاري

بعض الناس ما يرتاح لمين يصير كل شيء عنده حراااام
و لازم قبل كذا يبدأ ما يحب الشيخ سلمان العودة :D



هولستن / ما حكم شرب البيره ؟

بس أبي الحكم من مشائخ النوع الثاني ، موب راعين النوع الثالث :D


مع السلامة صديقي

[محبوب الجميع]

جزاك الله خيرا

[ajmn]

كلام فيه مبالغة . .
و تعدي بعض الشيء . .
لأنه يا حبيبي اللي يسوي هالشغلات . . اللي بالنوع الثالث . . من قالك إنه يسمى شيخ . .
إلا في أذهان البعض أمثالك . . وإلا فيخسأ يصير شيخ . .
أنا ما كان ودي إنك تبالغ في بعض الأشياء . .
رب كلمة قالت لصاحبها دعني . .
أتمنى للجميع الهداية . .

[فرخ الفيل]

يتبين من كلامك ان وجهك وقفاك

( وجهان لعمله واحده ):D

[الصارخ]

وهل أصلحت أخطاءك ..
وممكن تشرح لي ياعزيزي مالمغزى من الموضوع إذا كان نصيحة فليس هكذا تؤتى الأمور
وإن كنت تنكّت فيوجد قسم خاص لهذه المواضيع
وعلينا بأنفسنا فالإنسان ما ينجح إذا كان ينظر لأخطاء غيره وينسى نفسه منهمكه
في قاع لا سقف له من الأخطاء
ربنا يهدينا ويهديك ..
دمت بإذن الله شاباً صالحاً تهتم في أمورك ..

[أبوسلمان الخالدي]

إذا كان هذا النوع يسمى شيخ فقل على الأمة السلام....



وإذا كان بودك أن تكون شيخا مرضيا عنه ولست من المغضوب عليهم...

فهناك نوع آخر وهو مجلس الشيوخ الأمريكي.......................................

[قلم ناشف]

هلا و الله بـ بلسم صدق أنك بلسم

يا حبيبي يا بعد قلبي ،، يا حياة الشقاء أنت

حبيبي أنا من قال أني جالس ألعب أصلن أنا اتكلم من جد ،، بس وش أسوي أنا منب مثقف عشان أجيب هرج بالفصحى ...


بعدين تعال يا بعدي أنت ،،، من قال أننا نتكلم بأيات الله ! و نستهزي به

يا أخي إذا ما فهمت الموضوع لا تتكلم على غير سنع بعدين خل عندك حسن ظن شوي ،، تراي قسم بالله مسلم و أحب المطاوعة كلهم بس المطاوعة اللي على سنع موب فيدين اللي كلش حرام عندهم

يا بعدي اللي أنا أتلكم عنهم ذولاء ناس جهلة ناس سلنتح مالهم بالعلم ناقة و لا جمل يعني ما غير هرج

يا أخي بعضهم يحرم عليك قناة المجد و التصوير و النشيد و القرآن بالقرائات المصرية و شيء يفقع القلب ،، لا و لا يوقف عند هالحد بس ،، يجيك و يبدا تفسيق بخلق الله ، فلان فاسق و فلان كافر ، و فلان خائن للأمة و الشيخ الفلاني موب شيخ و البزر الفلاني أكبر شيخ و من هالهرج بالله عليك هذا من الدين


الدين أرفع من الهرطقات هذي و اللي ما غير تغث الواحد و اللي يقهرك أنه بعد كم سنة يدري أنه كان مخطي و يقول أيه الله يخلف ذيك أيام الجاهلية و تنتهي على كذا ........

أيه يالله ..... نروح نشوف اللي بعدك :D

[قلم ناشف]

هلا و الله بك يا المسفهل ،، و الله يا أسمك بعد شيء

شوف خبيبي ،،

انا يوم اني أقول حديث اخرجوا المشركين من جزيرة العرب و العبارات اللي أنت حاط تراي و الله منب أستهتر بالحديث استغفر الله كل شيء ينكت فيه إلا القرآن و السنة ذولي ما بهن لعب يا بعدي

يا حبي لك بعد يا المسفهل انا أحب الواحد اللي ينصح بكلام مؤدب و يخليك غصب تحترمه زي كلامك اللي بردك و الله يا أنا استحيت بعد يوم قريته بس ودي تفهم قصدي زين يا احلى واحد .....


محبوب الجميع ،،، و الله يا أنت أستانس على اللي واثق من نفسه تعجبني و الله صدق انك محبوب الجميع ،،، و شكراً على الدعاء و إياااااااااك يا صديقي محبوب الجميع ......


ajmn هلا بك و الله مدري وشلون ينطق أسمك أخاف أنطقه غلط ..... يا بعد قلبي صدقني أنه ما فيه مبالغة في كلامي اللي فات و الله اني وقفت على حالات مثل كذا ،،، صحيح بعض كلامي اللي فوق مو واقعي مثل شماغ البسام الطبعة سوداء مثلاً يعني ممكن تكون موجودة في بعض الحالات لكن كلامي على عمومة واقع يمغص القلب بس وش نسوي خشمك هو خشمك لو هو عوج .....

شوف يا صديقي ..... مشايخ النوع الثالث لهم جمهورهم و لهم طلبة العلم حقينهم .... و طلبة العلم حقينهم بعد كم شهر يطلعون مشايخ و المشايخ الأولين حقين النوع الثالث يطلعون آية الله :D

لو تقرب شوي من أصحاب الفكر الضال أو التكفيري سان تشوف شيء يهول العقل ،، عاد تصدق أنه فيه واحد أعاد صلواته اللي صلاهن خلف الشيخ السديس بالحرم ! يقول أن السديس كافر وش رايك عاد
إذا صار السديس كافر ،، أجل من بقي يصير مسلم
أنا اللي أعرف أن عدد المسلمين 100 مليون مسلم و خمسمئية ألف ... ودي أدري كم عدد المسلمين على رأي الفكر التكفيري ... شكله ما بقي بالإسلام على رأيهم إلا 15 واحد بس

شوكرن لك يا صديقي

[قلم ناشف]

فرخ الفيل ههههه و الله يا هو أسم بعد خخخخ

شوف يا أخ فرخ :D
يبدو لي انك أحد نتائج المدرسة التكفيرية أو مدرسة الفكر الضال ،،، يعني شين و قوي عين ،، فالمفروض أنك إذا صرت غطاء ما عندك ما عند جدتي لا تهرج مع الناس الفاهمه عشان ما يبان إنك بو.. و ما بالثوب أحد ....
أقول تعرف أفلاطون ... أكيد منتب عارفه لأنك ما تعرف إلا مشائخ النوع الثالث و إن شاء الله بعد كم يوم أنت بعد تصير شيخ أد الدنيا
أقولك .... افلاطون ذا منسم .. قال كلام رهيب قوووة ...

يقول أفلاطون :

ينبغي للرجل أن ينظر في وجهه ، فإن كان حسناً استقبح أن يضيف إليه فعلاً قبيحاً ، و إن كان وجهه قبيحاً ، استقبح أن يجمع بين قبيحين
:D


عساك فهمت الهرج .. على فكرة ترا أفلاطون ذا الظاهر أنه موب مسلم ،، فمدري يا شيخ يجوز أستشهد بكلامه و إلا لا



الصارخ ، هلا بك يا صارخ أقول قبل ارد عليك ودي انبهك .... أنت حاط تحت أسمك :
الإقامة: الخليج العربي ،، و هذا ما ينبغي يا أخي المسلم ،، المفروض تكتب (جزيرة العرب) و إلا لا يا شيخ فرخ :D

الصارخ يا صارخ .. شوف انا ما أقول أني ما علي أخطاء أنا كلي على بعض أخطاء و ذنوب عسى الله يغفر لنا و يرحمنا برحمته ،، بس ما ياصل بنا الأمر اننا نفسق مشايخ أو نكفرهم أو توصفهم بالخونة و أعداء الأمة ،، كلش و لا هالهرج ....
أنا منب أنكت لو أنا أبنكت يا بعدي سان ما تكلمت بالموضوع هذا ،، بعدين أنت ما تفرق بين المواضيع ذات الهدف و المواضيع اللي ما تحمل هدف ،، ترى موب لازم يصير الموضوع بالفصحى عشان يصير الموضوع زين
انت خذ المعلومة لو هي بالأردو :D
صح يمكن أسلوبي موب زين لدعوة المشايخ حقين النوع الثالث ، بس وش أسوي يالصارخ من حرارة بقلبي بديت أكتب سذا:i128 ..


يالله مع السلامة